លោកស្រី Hillary Clinton និងលោក Bernie Sanders បេក្ខជនប្រធានាធិបតីខាងគណបក្សប្រជាធិបតេយ្យបានជជែកដេញដោលគ្នាទៅវិញទៅមកពីប្រវត្តិបេក្ខជននីមួយៗ ជាពិសេសស្តីពីបញ្ហាអន្តោប្រវេសន៍នៅក្នុងការជជែកដេញដោលកាលពីយប់ថ្ងៃពុធនៅក្នុង Florida ភាគអាគ្នេយ៍។
បេក្ខជនទាំង២ បានប្រកួតប្រជែងគ្នានៅក្នុងការបោះឆ្នោតបឋមនៅទីនោះហើយនិងនៅក្នុងរដ្ឋ៤ទៀតដែលមានប្រតិភូច្រើននៅថ្ងៃអង្គារសប្តាហ៍ក្រោយដោយលោក Sanders សមាជិកព្រឹទ្ធសភារដ្ឋ Vermont កំពុងព្យាយាមប្រមែប្រមូលកម្លាំងបន្ទាប់ពីជ័យជម្នះដ៏ភ្ញាក់ផ្អើលមួយនៅក្នុងរដ្ឋ Michigan ហើយដើម្បីតាមឲ្យទាន់លោកស្រីអតីតរដ្ឋមន្រ្តីការបរទេស។
លោកស្រី Clinton បានរិះគន់លោក Sanders ចំពោះការបោះឆ្នោតប្រឆាំងសេចក្តីព្រាងច្បាប់ការធ្វើកំណែទម្រង់អន្តោប្រវេសន៍នៅឆ្នាំ២០០៧ ខណៈដែលលោក Sanders បានរិះគន់លោកស្រី Clinton ចំពោះការជំទាស់ប្រឆាំងការខ្នះខ្នែងអនុញ្ញាតឲ្យជនអន្តោប្រវេសន៍ខុសច្បាប់ទទួលបានបណ្ណបើកបររថយន្ត។ ក៏ប៉ុន្តែ បេក្ខជនទាំង២បាននិយាយថា ពួកគេនឹងមិនបញ្ជូនកូនក្មេង ឬជនអន្តោប្រវេសន៍ដែលមិនមានប្រវត្តិឧក្រិដ្ឋកម្មទៅកាន់ប្រទេសវិញទេ។
អ្នកទាំង២ ក៏បានឆ្លើយតបទៅនឹងជំហរដែលមានភាពខុសគ្នាខ្លាំងរបស់លោក Donald Trump បេក្ខជនប្រធានាធិបតីខាងគណបក្សសាធារណរដ្ឋស្តីពីបញ្ហាអន្តោប្រវេសន៍ដែលរួមមានការសន្យាស្ថាបនាជញ្ជាំងនៅព្រំដែនប្រទេសម៉ិកស៊ិក ហើយនិងការបញ្ជូនមនុស្ស១១លាននាក់ដែលកំពុងរស់នៅខុសច្បាប់ក្នុងសហរដ្ឋអាមេរិកទៅកាន់ប្រទេសរបស់ពួកគេវិញ។
លោកស្រី Clinton បានហៅផែនការស្ថាបនាជញ្ជាំងនោះថាជាគំនិតរវើរវាយ ខណៈដែលលោក Sanders បាននិយាយថា គំនិតនៃការបញ្ជូនមនុស្ស១១លាននាក់ទៅកាន់ប្រទេសវិញជាគំនិតមិនគួរឲ្យជឿ៕
