ការឡោមព័ទ្ធដ៏ប្រល័យនៅវិមានសភាសហរដ្ឋអាមេរិកជាមេរៀនមួយដល់នាង Gigi Mei ដែលបានបញ្ចប់ការសិក្សាកាលពីខែឧសភាឆ្នាំមុនពីសាកលវិទ្យាល័យ Columbia នៅទីក្រុង New York។
នាង Mei អាយុ២៥ឆ្នាំមកពីប្រទេសចិនបាននិយាយថា៖ «ប្រជាធិបតេយ្យពិតជាផុយស្រួយណាស់ ហើយគេត្រូវប្រឹងប្រែងនិងចំណាយថាមពលច្រើនដើម្បីឱ្យមានលទ្ធិប្រជាធិបតេយ្យនេះ»។ នាង Mei បានថ្លែងទៀតថា៖ «ហើយគេត្រូវការឱ្យមនុស្សទាំងឡាយទ្រទ្រង់ ការពារ និងអនុវត្តលទ្ធិប្រជាធិបតេយ្យ»។
នាង Mei ឋិតក្នុងចំណោមជនអន្តោប្រវេសន៍សហរដ្ឋអាមេរិករាប់សិបនាក់ ឬពលរដ្ឋអាមេរិកាំងជំនាន់ទីមួយ ដែលបាននិយាយជាមួយវីអូអេនៅក្រោយពេលដែលពួកកុបកររាប់ពាន់នាក់បានរុលកាត់ក្រុមប៉ូលិសវិមានសភាសហរដ្ឋអាមេរិកនៅក្នុងការប្រឹងប្រែងគ្មានជោគជ័យក្នុងការរារាំងសមាជិកសភាមិនឱ្យបញ្ជាក់អំពីជ័យជម្នះរបស់លោក Joe Biden លើលោក Donald Trump នៅក្នុងការបោះឆ្នោតប្រធានាធិបតីសហរដ្ឋអាមេរិក។
ដូចមនុស្សជាច្រើននាក់ក្នុងពិភពលោកដែរ ជនអន្តោប្រវេសន៍ទាំងនេះបានសម្តែងការហួសចិត្តអំពីការបះបោរប្រដាប់អាវុធកាលពីថ្ងៃ៦មករាដែលបានបណ្តាលឱ្យមនុស្សប្រាំនាក់ស្លាប់ ដោយមានរួមបញ្ចូលទាំងប៉ូលិសម្នាក់ផងដែរ។ អ្នកខ្លះបានប្រៀបធៀបកុបកម្មនេះទៅនឹងអំពើហិង្សានយោបាយនៅក្នុងប្រទេសកំណើតរបស់ពួកគេ។ ពួកគេនិយាយអំពីការបែកបាក់គ្នាខាងគណបក្សដែលកាន់តែខ្លាំងក្លាឡើងៗនៅក្នុងការបោះឆ្នោតកាលពីថ្ងៃ៣ វិច្ឆិកា ការលួចបន្លំសន្លឹកឆ្នោតដែលបានត្រូវច្រានចោលជាច្រើនដងនៅក្នុងតុលាការថ្នាក់រដ្ឋនិងនៅតុលាការសហព័ន្ធ ការចោទប្រកាន់ទម្លាក់ប្រធានាធិបតីពីតំណែងដែលទើបតែកើតឡើង និងការគំរាមកំហែងនៃភាពវឹកវរនៅពេលសម្ពោធតំណែងប្រធានាធិបតីលោក Biden នៅថ្ងៃពុធ ទី២០ ខែមករាខាងមុខនេះ។
ទោះជាយ៉ាងនេះក្ដី ក៏ពួកជនអន្តោប្រវេសន៍ទាំងនេះនៅតែនិយាយថា ពួកគេមានទំនុកចិត្តថាលទ្ធិប្រជាធិបតេយ្យនឹងឈ្នះក្នុងសហរដ្ឋអាមេរិក ដោយមានការខិតខំប្រឹងប្រែង។
លោក Mirwais Safi ធ្លាប់ជាអ្នកបកប្រែភាសាឲ្យរដ្ឋាភិបាលសហរដ្ឋអាមេរិកនៅប្រទេសអាហ្វហ្គានីស្ថាន ដែលជាប្រទេសកំណើតរបស់លោក នៅមុនពេលលោកមករស់នៅក្នុងសហរដ្ឋអាមេរិក តាមរយៈទិដ្ឋាការអន្តោប្រវេសន៍ពិសេស។ លោកបាននិយាយថា៖ «យើងឃើញសហរដ្ឋអាមេរិកចំណាយប្រាក់រាប់ពាន់លានដុល្លារ...នៅក្នុងប្រទេសនិងនៅក្នុងទ្វីបនានា» ដើម្បីគាំទ្រលទ្ធិប្រជាធិបតេយ្យ ការអភិវឌ្ឍសេដ្ឋកិច្ច ការសិក្សាអប់រំពលរដ្ឋ សិទ្ធិមនុស្សនិងអ្វីៗច្រើនទៀត។ លោកថ្លែងទៀតថា៖ «តែយើងយល់ថាមានកិច្ចការច្រើនតម្រូវឱ្យធ្វើនៅខាងក្នុងសហរដ្ឋអាមេរិកផងដែរ»។
នៅពេលនេះ លោក Safi ធ្វើការជាមួយអង្គការមិនរកប្រាក់កម្រៃមួយនៅប៉ែកខាងជើងរដ្ឋ Virginia ដោយធ្វើការផ្ដោតលើលទ្ធិប្រជាធិបតេយ្យនិងការអភិវឌ្ឍ។
ការពិតនាំឱ្យមានការមិនស្រួលចិត្ត
សម្រាប់លោក Boukary Sawadogo ដែលបង្រៀនអំពីខ្សែភាពយន្តអាហ្រ្វិកនៅសាកលវិទ្យាល័យ City College of New York ទិដ្ឋភាពនៃពួកកុបករចូលលុកក្នុងវិមានសភា«ហាក់ដូចជាក្នុងខ្សែកុនហូលីវូដមួយ»មិនមែនជាការពិតដែលលោកមិនដែលរំពឹងថាកើតមាននៅក្នុងកន្លែងនៃអំណាចនយោបាយអាមេរិកាំងទេ។
លោក Sawadogo មកពីប្រទេសប៊ូគីណាហ្វាសូបាននិយាយថា ការណ៍នេះនាំឱ្យលោកនឹកដល់បាតុកម្មមហាជនកាលពីឆ្នាំ២០១៤ ដែលបានបង្ខំឲ្យលោកប្រធានាធិបតី Blaise Compaore នៃប្រទេសនៅប៉ែកខាងលិចទ្វីបអាហ្វ្រិកមួយនេះ ឱ្យចេញពីតំណែងក្រោយពីកាន់អំណាច២៧ឆ្នាំ។ លោកបាននិយាយថា៖ «ពួកបាតុករបានកាន់កាប់រដ្ឋសភាហើយដុតអាគារនោះ។ ពួកសមាជិកសភា«រត់គេចខ្លួនដើម្បីជីវិតរបស់ពួកគេ»។
ក្រុមសមាជិកសភាសហរដ្ឋអាមេរិកបានប្រញាប់ប្រញាល់ចេញពីសាលប្រជុំដែរ តែបានវិលមកវិញក្នុងពេលប៉ុន្មានម៉ោងបន្ទាប់ដើម្បីបញ្ចប់ការបញ្ជាក់លទ្ធផលនៃការបោះឆ្នោតតាមការកំណត់។
ពួកសមាជិកនៃក្រុមដែលបានសម្រុកចូលទៅកាន់វិមានសភាសហរដ្ឋអាមេរិកបាននិយាយថា ពួកគេមានសិទ្ធិតវ៉ានឹងលទ្ធផលនៃការបោះឆ្នោតនោះ។
លោក Tuan Anh La ទាហានជើងចាស់នៃកងទ័ពជើងទឹកសហរដ្ឋអាមេរិកមានដើមកំណើតមកពីប្រទេសវៀតណាមបាននិយាយថា៖ «យើងមកទីនេះដើម្បីទាមទារការពិត។ យើងមិនអាចទទួលយកបានទេនូវលទ្ធផលមួយដែលអ្នកបោះឆ្នោតពាក់កណ្តាលត្រូវបានទុកជាមោឃៈ» នៅក្នុងការបោះឆ្នោតកាលពីថ្ងៃទី៣ ខែវិច្ឆិកា។
រដ្ឋនីមួយៗចំណាយពេលច្រើនថ្ងៃនិងច្រើនសប្តាហ៍ដើម្បីរាប់សន្លឹកឆ្នោត។ នៅទីបញ្ចប់ លោក Biden បានទទួលសំឡេងឆ្នោតគាំទ្រ៨១លានសន្លឹក ហើយលោក Trump មានឆ្នោតទ្រទ្រង់តែ៧៤លានសន្លឹក។
នៅក្នុងការរាប់សន្លឹកឆ្នោតរបស់អង្គបោះឆ្នោត លោក Biden ទទួលបានអង្គបោះឆ្នោតចំនួន ៣០៦ ហើយលោក Trump ទទួលបាន ២៣២អង្គបោះឆ្នោត។
លោក Vanndhath Man មកពីប្រទេសកម្ពុជា ហើយធ្វើការជាគិលានុបដ្ឋាកនៅប៉ែកខាងជើងរដ្ឋ Virginia។ លោកបាននិយាយថា លោកមិនជឿថាការវាយប្រហារនោះបានត្រូវគិតជាមុនទេ ទោះជាអ្នកតវ៉ាខ្លះមានកំប៉ុងបាញ់សារធាតុគីមីប្រឆាំងនឹងការវាយប្រហារដោយខ្លាឃ្មុំហៅ bear spray ចំណងប្លាស្ទិកហៅ zip ties និងវត្ថុផ្សេងៗទៀតដែលនាំឱ្យយល់ថាមានការរៀបចំផែនការមាំទាំដោយមានបំណងអាក្រក់ក៏ដោយ។
លោក Vanndhath Man បានថ្លែងថា៖ « ខ្ញុំយល់ថាហ្វូងមនុស្សនេះ ឬពួកបាតុករទាំងនេះ...មិនបានគ្រោងធ្វើសកម្មភាពហិង្សាទេ»។ លោកបានថ្លែងទៀតថា៖ «តែនៅពេលមានការរុញច្រាន ភាពតានតឹងក៏បានក្លាយទៅជាការចូលលុកក្នុងវិមានសភាតែម្ដង»។
លោក Osman Ahmed អាយុ៣៣ឆ្នាំ ធ្លាក់ធ្វើការឱ្យសមាជិកព្រឹទ្ធសភាសហរដ្ឋអាមេរិកពីរនាក់មកហើយមកពីរដ្ឋ Minnesota។ លោកបាននិយាយថា ការវាយប្រហារនៅវិមានសភា«មានភាពផ្ទាល់ខ្លួនខ្លាំងណាស់សម្រាប់ខ្ញុំ។ លោកបានថ្លែតទៀតថា៖ «ក្នុងនាមជាបុគ្គលិកម្នាក់ លោកអ្នកមិនអាចចូលក្នុងព្រឹទ្ធសភាដោយគ្មានការត្រួតពិនិត្យទេ...ខ្ញុំដឹងថាអគារនេះមានសន្តិសុខ និងការថែរក្សាបែបណា»។
លោក Osman Ahmed បានឈប់ធ្វើការងារនោះកាលពីឆ្នាំ២០១៩ ដោយទៅធ្វើការនៅអង្គការមិនរកកម្រៃមួយក្នុងក្រុង Minneapolis ដើម្បីកសាងភាពជាដៃគូក្នុងសហគមន៍។ លោកឆ្អើមនឹងរូបភាពនៃការបង្ហូរឈាមក្នុងវិមានសភាសហរដ្ឋអាមេរិក ដែលលោកបានថ្លែងថានាំឱ្យលោកនឹកឃើញដល់កុមារភាពលោកក្នុងប្រទេសសូម៉ាលីដែលគ្មានស្ថិរភាព។
លោក Ahmed បានសរសើរ៖ «ពួកប៉ូលិសនិងពួកមន្ត្រីពង្រឹងច្បាប់ដែលបានការពារជីវិតពួកមន្ត្រីជាប់ឆ្នោត»។ ក៏ប៉ុន្តែលោកក៏បាននិយាយដែរថាលោក«ខ្វល់ខ្វាយ»ថាមនុស្សមួយចំនួនតូចប៉ុណ្ណោះក្នុងបណ្តាពួកកុបករភាគច្រើនដែលជាជនស្បែកសត្រូវបានចាប់ខ្លួន ដែលយ៉ាងហោចណាស់នៅពេលដំបូង។ លោកបានថ្លែងថា៖ «ការណ៍នេះបង្ហាញយ៉ាងពិតប្រាកដថា មានការលម្អៀងខាងពូជសាសន៍និងវិសមភាពក្នុងសង្គម...ហើយប្រសិនបើហេតុការណ៍នេះកើតមានដល់ពួកជនមិនមែនស្បែកសវិញ វាមិនមែនមានភាពដូចគ្នានេះទេ»។
បើតាមការវិភាគមួយរបស់បណ្តាញទូរទស្សន៍ CNN ទៅលើទិន្នន័យរបស់ប៉ូលិសនៅរដ្ឋធានីវ៉ាស៊ីនតោន បានបង្ហាញថា មានការចាប់ខ្លួនមនុស្ស៦១នាក់«ទាក់ទិននឹងភាពចលាចល»កាលពីថ្ងៃទី៦ ខែមករា ប្រៀបធៀបនឹងការចាប់ខ្លួនមនុស្ស៣១៦នាក់កាលពីថ្ងៃទី១ ខែមិថុនា ឆ្នាំ២០២០ គឺថ្ងៃដែលក្រុមបាតុករ«ជីវិតពលរដ្ឋស្បែកខ្មៅមានតម្លៃ» ឬ Black Lives Matter ត្រូវបានបណ្តេញចេញពីផ្លូវនៅជិតសេតវិមាននៅមុនលោកប្រធានាធិបតី Donald Trump ឈរឱ្យគេថតរូបនៅមុខព្រះវិហារគ្រិស្តសាសនា St. John’s Episcopal ដោយកាន់គម្ពីរ bible មួយក្បាល។
លោក Michael Sherwin គឺជារដ្ឋអាជ្ញាស្តីទីប្រចាំរដ្ឋធានីវ៉ាស៊ីនតោន។ លោកបាននិយាយនៅក្នុងសន្និសីទកាសែតមួយកាលពីថ្ងៃទី១២ ខែមករាថា មនុស្សជាង៧០នាក់ត្រូវបានចោទប្រកាន់ក្នុងការវាយប្រហារនោះ ហើយពួករដ្ឋអាជ្ញាកំពុងធ្វើការចោទប្រកាន់ទៅលើមនុស្សយ៉ាងតិចណាស់១០០នាក់ទៀត។
លោកបានថ្លែងថា ពួករដ្ឋអាជ្ញាជាន់ខ្ពស់ក៏កំពុងពិនិត្យមើលលទ្ធភាពនៃការចោទប្រកាន់ពីបទបំបះបំបោរនិងការរួមគំនិតប្រព្រឹត្តអំពើទុច្ចរិតដែលអាចនាំឱ្យជាប់គុករហូតដល់២០ឆ្នាំផងដែរ។
លោក Jake Kim បានរត់ចោលគេចចេញពីប្រទេសកូរ៉េខាងជើង ហើយនៅពេលនេះជានិស្សិតនៅក្រុង Provo រដ្ឋ Utah។ លោកយល់ថាទោសនេះមិនធ្ងន់ធ្ងរទេ។
លោក Jake Kim ដែលមានអាយុជាង៣០ឆ្នាំបាននិយាយថា៖ «ការធ្វើបាតុកម្មមានលក្ខណៈប្រជាធិបតេយ្យណាស់ តែអំពើហិង្សានាំឱ្យមានការតក់ស្លុត និងមិនអាចទទួលយកបានទេ។ លោកបានថ្លែងទៀតថានៅក្នុងសហរដ្ឋអាមេរិក៖ «មនុស្សអាចត្រូវចាប់ខ្លួនឬជាប់ពន្ធនាគារក្នុងមួយរយៈពេល។ នៅក្នុងប្រទេសកូរ៉េខាងជើង ពួកគេអាចត្រូវប្រហារជីវិត»។
សេរីភាព
ពួកប្រជាធិបតេយ្យទាំងអស់ និងពួកសាធារណរដ្ឋ១០នាក់នៅក្នុងរដ្ឋសភាអាមេរិកបានបោះឆ្នោតកាលពីសប្តាហ៍ទីពីរនៃខែមករា ដើម្បីចោទប្រកាន់ដកតំណែងលោក Trump ជាលើកទីពីរ ដែលជាការណ៍មិនធ្លាប់មានពីមុនៗ ដោយចោទប្រកាន់លោកថាបានញុះញង់ឱ្យមានការបះបោរអំពីលទ្ធផលនៃការបោះឆ្នោត។ ប្រធានាធិបតីរូបនេះបានបដិសេធថាលោកគ្មានធ្វើអ្វីខុសទេ។
លោក Trump ក៏បានត្រូវរឹតត្បិតដោយក្រុមហ៊ុន Twitter ក្រុមហ៊ុន Facebook និងបណ្តាញសង្គមឯទៀតៗ ដែលបានចោទប្រកាន់លោកថាបានធ្វើអត្ថាធិប្បាយអុជអាល។
លោក Junior Bompeti អាយុ៣៥ឆ្នាំ ជាអ្នករចនា software នៅក្រុង Dallas រដ្ឋ Texas និយាយថា៖ «នេះជារឿងមិនគួរឲ្យជឿនោះទេ! យើងមានសេរីភាពខាងការបញ្ចេញមតិ»។
លោក Bompeti ដែលមករស់ក្នុងសហរដ្ឋអាមេរិកកាលពីឆ្នាំ២០១៥ពីសាធារណរដ្ឋប្រជាធិបតេយ្យកុងហ្គោ បានបង្កើត Facebook សហគមន៍ជនជាតិកុងហ្គោ ដើម្បីគាំទ្រលោក Trump។
លោក Bompeti បានគាំទ្របណ្តឹងគ្មានជោគជ័យក្នុងការប្រែក្រឡាស់លទ្ធផលនៃការបោះឆ្នោតក្នុងរដ្ឋជាច្រើនដែលលោក Trump ចាញ់ឆ្នោត។ លោកបាននិយាយថា៖
«យើងត្រូវតែទុកចិត្តដំណើរការនេះ។ មានការចោទប្រកាន់ច្រើនអំពីការបន្លំសន្លឹកឆ្នោត។ លោកប្រធានាធិបតីបាននិយាយច្រើនដងថា មានការបន្លំសន្លឹកឆ្នោត»។
ដំណោះស្រាយ
លោក Bompeti និងពួកជនអន្តោប្រវេសន៍ឯទៀតៗបាននិយាយថា ការកសាងទំនុកចិត្តនិងលទ្ធិប្រជាធិបតេយ្យឱ្យមានដំណើរការល្អជាងមុនតម្រូវឱ្យមានការគោរពគ្នា ការអប់រំ និងការទាក់ទងគ្នារវាងពលរដ្ឋ។
លោក Roba Bulga គឺជានិស្សិតបរិញ្ញាបត្រជាន់ខ្ពស់ខាងដំណោះស្រាយជម្លោះនៃសាកលវិទ្យាល័យ Brandeis មកពីប្រទេសអេត្យូពី។ លោកបាននិយាយថា គណបក្សនយោបាយគួរ«ទុកដោយឡែក»នូវការខ្វែងគំនិតគ្នាខ្លះៗរបស់ពួកគេ។
លោកបានហៅពេលនេះថាជា«ពេលវេលាមួយនៃការផ្សះផ្សាគ្នា ជាពេលមួយនៃការរួបរួមគ្នាជាប្រទេសតែមួយ»។
លោក Roba Bulga បានសុំឱ្យក្រឡេកមើលហួសពីព្រំដែនសហរដ្ឋអាមេរិក ដោយលោកបានថ្លែងថា៖ «ការគំរាមកំហែងដល់លទ្ធិប្រជាធិបតេយ្យនៅទីនេះអាចជាការគំរាមកំហែង»ដល់ផ្នែកឯទៀតៗនៃពិភពលោកផងដែរ។
អ្នកស្រី Thavin Keo ក៏បានជំរុញឱ្យមានសេចក្តីថ្លៃថ្នូរច្រើនជាងមុនដោយអ្នកស្រីមិនពេញចិត្តអំពី«ការមានភាពស្អប់ខ្ពើមច្រើននៅគ្រប់កន្លែង...សួមមើលនៅ ទីក្រុងPortland។ សូមមើលនៅទីក្រុង Seattle»។ អ្នកស្រីបានថ្លែងដូច្នេះដោយនិយាយសំដៅដល់បាតុកម្មជាច្រើនខែនៃចលនា «ពលរដ្ឋស្បែកខ្មៅមានតម្លៃ» ឬ Black Lives Matter កាលពីឆ្នាំទៅមិញ ដែលជួនកាលនាំឱ្យមានការប៉ះទង្គិចគ្នារហូតដល់បង្ហូរឈាមថែមទៀតផង។ ស្ត្រីអាយុ៦៧ឆ្នាំរូបនេះជាមន្ត្រីជាប់កិច្ចសន្យាចូលនិវត្តន៍របស់រដ្ឋាភិបាលសហរដ្ឋអាមេរិក ដែលបានមករស់ក្នុងប្រទេសអាមេរិកជាជនភៀសខ្លួនមកពីប្រទេសកម្ពុជាកាលពីឆ្នាំ១៩៨១ ដោយតាំងលំនៅដ្ឋាននៅប៉ែកខាងជើងរដ្ឋ Virginia។
អ្នកស្រី Thavin Keo បានពោលថា ពួកមេដឹកនាំសាធារណរដ្ឋ និងប្រជាធិបតេយ្យ«គួរធ្វើការជាមួយគ្នាដើម្បីលទ្ធិប្រជាធិបតេយ្យនៅក្នុងប្រទេសនេះ»។ អ្នកស្រីបាននិយាយទៀតថា បើមិនធ្វើដូច្នេះទេ«នឹងគ្មានវិធីចេញពីជម្លោះនេះទេ»។
លោក Pagniti Tosuksri ហៅ Tom បានចំណាយពេលខ្លះនៃកុមារភាពរបស់លោកក្នុងប្រទេសថៃជាប្រទេសកំណើតរបស់ឳពុកម្តាយលោក ហើយនៅពេលនេះលោកធ្វើការឱ្យកម្មវិធីមិនរកប្រាក់កម្រៃមួយខាងផ្ទះសម្បែងក្នុងក្រុង Cleveland រដ្ឋ Ohio។ លោកយល់ថាការទាក់ទងគ្នារវាងពលរដ្ឋមានសារៈសំខាន់។
លោក Tosuksri បាននិយាយថា លោកបានស្ម័គ្រចិត្តធ្វើជាអ្នកឃ្លាំមើលការបោះឆ្នោតកាលពីខែវិច្ឆិកា ហើយចង់«មានការទាក់ទិនជាងមុន...ដើម្បីបានដឹងច្រើនជាងមុនអំពីការបោះឆ្នោតក្នុងមូលដ្ឋានយើង»។
លោកក៏មានបំណង«លើកទឹកចិត្តមនុស្ស»ឱ្យធ្វើដូចលោកដែរ និងរៀនសូត្រឱ្យបានច្រើនជាងមុនអំពីពួកបេក្ខជនក្នុងមូលដ្ឋាននិងបញ្ហានានា។ លោកបាននិយាយថានៅពេលបោះឆ្នោត«មិនមែនគិតតែពីការជ្រើសរើសប្រធានាធិបតីមិនមែនគិតតែការជ្រើសរើសសមាជិកព្រឹទ្ធសភាទេ ក៏មានអ្វីៗជាច្រើនទៀតនៅក្នុងនោះដែលយើងត្រូវដឹងផងដែរ»។
លោក Meron Semedar អាយុ៣៤ឆ្នាំមកពីប្រទេសអេរីត្រេ ហើយនៅពេលនេះលោកជាទីប្រឹក្សាម្នាក់ដល់ពួកអ្នកស្រាវជ្រាវបញ្ហាអាហ្វ្រិកនៅសាកលវិទ្យាល័យ Californiaក្នុងក្រុង Berkerley។ លោកបាននិយាយថា ពួកជនអន្តោប្រវេសន៍ ជាពិសេសពួកជនដែលមានសញ្ជាតិអាមេរិកាំង មានការទទួលខុសត្រូវ។
លោក Semedar បាននិយាយថា៖ «ខ្ញុំលើកទឹកចិត្តដល់សហគមន៍ជនអន្តោប្រវេសន៍នីមួយៗឱ្យចេញទៅក្រៅដើម្បីប្រើសិទ្ធិរបស់ពួកគេ»ចាប់ពីការបំពេញទិន្នន័យជំរឿនប្រជារាស្ត្ររហូតដល់ការបោះឆ្នោត បើមានសិទ្ធិ។
លោក Semedar បានថ្លែងទៀតថា៖ «នេះជាការទទួលខុសត្រូវមួយ វាជាកាតព្វកិច្ចហើយយើងគួរគោរពកាតព្វកិច្ចនេះ។ យើងគួរផ្តល់កិត្តិយសដល់កាតព្វកិច្ចនេះ។ តែយើងក៏គួរបំពេញកាតព្វកិច្ចរបស់យើង ដើម្បីធ្វើឱ្យលទ្ធិប្រជាធិបតេយ្យលូតលាស់ដែរ។ ហើយយើងក៏គួរបង្រៀនអ្វីៗស្រដៀងគ្នានេះដល់ពួកកូនៗយើងដែរ...ការណ៍នេះត្រូវតែមានបន្តពីមនុស្សមួយជំនាន់ទៅមួយជំនាន់ទៀត»។
សម្រាប់លោក Sonam Zoksang ម្ចាស់អាជីវកម្មតូចមួយក្នុងតំបន់ Hudson Valley នៃរដ្ឋ New York «លទ្ធិប្រជាធិបតេយ្យមានកម្លាំងហើយ តែគេត្រូវការពារលទ្ធិនេះ»។
លោក Sonam Zoksang បានកើតនៅតំបន់ទីបេ ហើយលោកបានមកសហរដ្ឋអាមេរិកកាលពីឆ្នាំ១៩៩៥តាមរយៈប្រទេសនេប៉ាល់ ដែលនៅទីនោះឪពុកម្តាយលោកបានរត់គេចខ្លួនក្រោយចិនបានកាន់កាប់ប្រទេសពួកគេ។
លោកបាននិយាយថា លោកចាំមើលលោក Biden ប្រធានាធិបតីនឹងចូលកាន់តំណែងថាតើលោកនឹងធ្វើតាមសាររបស់លោកអំពីការឯកភាពនិងការជានាគ្នាឬទេ។
លោក Sonam Zoksang បានថ្លែងថា៖ «ខ្ញុំមានជំនឿថា រដ្ឋបាលថ្មីនិងពួកសាធារណរដ្ឋល្អៗខ្លះអាចធ្វើការជាមួយគ្នាបាន។ ពិភពលោកគោរពនិងមានសង្ឃឹមលើសហរដ្ឋអាមេរិក»៕
ប្រែសម្រួលដោយលោក ឈឹម សុមេធ
