តុលាការក្រុងភ្នំពេញបានបញ្ចប់សាវនការសួរដេញដោលសកម្មជនគណបក្សសង្រ្គោះជាតិចំនួន៥រូបក្នុងចំណោម១១រូប នៅថ្ងៃអង្គារនេះ ទាក់ទងនឹងសំណុំរឿងអំពើហិង្សានៅក្បែរទីលានប្រជាធិបតេយ្យ ហើយបានសម្រេចបន្តសាវនការទៅថ្ងៃអង្គារសប្តាហ៍ក្រោយទៀត។
នៅក្នុងសាវនការដែលធ្វើឡើងពេញមួយថ្ងៃនេះ ក្រុមប្រឹក្សាជំនុំជម្រះបានចោទសួរជនជាប់ចោទ៥រូបដំបូង ដើម្បីផ្ទៀងផ្ទាត់ចម្លើយដែលពួកគេបានផ្តល់នៅក្នុងដំណាក់កាលស៊ើបសួរទាក់ទងនឹងករណីអំពើហិង្សា ដែលបានកើតឡើងកាលពីថ្ងៃទី១៥ ខែកក្កដា ឆ្នាំ២០១៤កន្លងទៅនេះ។
សកម្មជនទាំងនោះរួមមានលោក អឿ ណារិត ប្រធានចលនាមហាជននៃគណបក្សសង្គ្រោះជាតិ និងជាជំនួយការអ្នកតំណាងរាស្រ្ត មូរ សុខហួរ និងលោក ឃិន ជំរឿន ប្រធានចលនាយុវជនសង្គ្រោះជាតិនៅទីក្រុងភ្នំពេញ។
លោកទាំងពីរត្រូវបានមេធាវីដើមបណ្តឹងសួរពីទំនាក់ទំនង ដែលពួកគេធ្លាប់មាន នៅមុនពេលអំពើហិង្សានេះកើតឡើង ខណៈពេលដែលជនជាប់ចោទបីរូបទៀត រួមទាំងយុវជនសង្គ្រោះជាតិមួយរូបត្រូវបានក្រុមប្រឹក្សាជំនុំជម្រះចោទសួរអំពីការពាក់ព័ន្ធនៅក្នុងអំពើហិង្សាដដែលនោះ។
នៅក្នុងការជជីកសួរដេញដោលនេះ លោកមេធាវី ចេង ប៉េងហាក់ ដែលជាមេធាវីដើមបណ្តឹងតំណាងឱ្យសនិ្តសុខរងគ្រោះ៣៩នាក់ បានសួរសង្កត់ទៅលោក ឃិន ជំរឿន អំពីវត្តមានរបស់លោក នៅក្នុងការប្រជុំមួយដែលលោក អឿ ណារិត បានចូលរួមនៅមុនថ្ងៃកើតហេតុ។
លោក ឃិន ជំរឿន បានឆ្លើយតបថា ៖«ខ្ញុំមិនបានចូលរួមប្រជុំមុនថ្ងៃ១៥ កក្កដាទេ។ ស្គាល់ អឿ ណារិត តែមិនច្បាស់»។
ក្រោយមកលោកមេធាវី ចេង ប៉េងហាក់ បានប្រាប់ទៅលោក ឃិន ជំរឿន ថា៖ «ប៉ុន្តែលោក អឿ ណារិត ថាស្គាល់លោកច្បាស់។ ហៅ អឿ ណារិត មកសួរតទល់ ព្រោះ អឿ ណារិត បានឆ្លើយទាក់ទង ឃិន ជំរឿន»។
នៅពេលដែលលោក អឿ ណារិត ដើរចូលក្នុងបន្ទប់សាវនការ លោកគ្រាន់តែត្រូវបានសួរឲ្យឆ្លើយថា តើពិតជាស្គាល់ លោក ឃិន ជំរឿន ឬទេ ហើយគ្មានការជជែកតទល់គ្នាដែរ។
លោក អឿ ណារិត ដែលជួបប្រជុំជាមួយលោកស្រី មូរ សុខហួ និងលោក ហូ វ៉ាន់ នៅព្រឹកថ្ងៃទី១៤ ខែកក្កដា ឆ្នាំ២០១៤នោះ បានឆ្លើយថា ៖ «ខ្ញុំស្គាល់ [លោក ឃិន ជំរឿន] ប្រហែលមួយឆ្នាំជាង»។
លោកមេធាវី ចេង ប៉េងហាក់ ក៏បានបញ្ចប់ការចោទសួរ បន្ទាប់ពីលោក ឃិន ជំរឿនបដិសេធដាច់អហង្កាថា លោកមិនបានមានវត្តមានក្នុងការប្រជុំជាមួយលោក អឿ ណារិត និងតំណាងរាស្រ្តគណបក្សសង្គ្រោះជាតិពីររូបគឺលោកស្រី មូរ សុខហួ និងលោក ហូ វ៉ាន់ ទេ។
ក្រុមប្រឹក្សាជំនុំជម្រះបន្តដេញដោលសួរជនជាប់ចោទទាំង៥រូប អំពីមូលហេតុក្នុងការចូលរួមការតវ៉ានៅក្បែរទីលានប្រជាធិបតេយ្យ ខណៈដែលអាជ្ញាធរកម្ពុជាបិទទីលាននេះបណ្តោះអាសន្ននាពេលនោះ ហើយនឹងមូលហេតុនានាអំពីការប្រើក្រណាត់សញ្ញាពណ៍ ដែលមាននៅលើខ្លួនអ្នកចូលរួមការតវ៉ា និងឫសគល់នៃការប៉ះទង្គិចគ្នានាពេលនោះ។
តាំងពីការចាប់ផ្តើមនៃការដេញដោលសួររហូតដល់ចុងបញ្ចប់នៃសាវនការ សកម្មជននយោបាយជាប់ចោទទាំង៥រូបនេះ បានឆ្លើយការពារភាពស្អាតស្អំរបស់ពួកគេ ដោយអះអាងថា ពួកគេមិនមែនជាអ្នកបង្កអំពើហិង្សានោះឡើយ។
ក្រុមសកម្មជនគណបក្សសង្គ្រោះជាតិចំនួន១១រូបនេះ ត្រូវបានតុលាការចោទពីបទចូលរួម និងដឹកនាំកុប្បកម្មប្រឆាំងនឹងរដ្ឋាភិបាល បន្ទាប់ពីអំពើហិង្សាមួយនៅក្បែរទីលានប្រជាធិបតេយ្យនាថ្ងៃទី១៥ ខែកក្កដា ឆ្នាំ២០១៤។
លោក មាជ សុវណ្ណរ៉ា ដែលមិនទាន់ត្រូវបានសួរដេញដោលដោយអង្គជំនុំជម្រះនៅតុលាការក្រុងភ្នំពេញនៅថ្ងៃនេះ បានប្រាប់ក្រុមអ្នកសារព័ត៌មានក្រោយពីសវនការថា លោកនឹងមកចូលរួមសវនការបន្ទាប់ ដែលនឹងត្រូវធ្វើឡើងនៅថ្ងៃទី២៦ ខែឧសភា ខាងមុខនេះ។
លោកមានប្រសាសន៍ថា៖ «ខ្ញុំមក បើចេះរត់ ចេះគេចហ្នឹង តាំងពីមិនទាន់ចាប់បាត់ហើយ ប៉ុន្តែឥឡូវ គេឲ្យសិទ្ធិសេរីភាពយើងក្រៅឃុំ ហើយអញ្ជឹងមានអ្វីដែលថាពិបាកនឹងបន្តសាវនការទៀត។ ខ្ញុំនឹងចូលទៀត ព្រោះទៅណាក៏វាអត់កើតដែរ ព្រោះវាអត់មានpassport [លិខិតឆ្លងដែន]»។
មានមនុស្សជាង៤០នាក់បានរងរបួសក្នុងហេតុការណ៍ហិង្សានៅក្បែរទីលានប្រជាធិបតេយ្យនោះ។ ភាគច្រើននៃអ្នករងរបួសគឺជាកងសន្តិសុខ៕
