លោក Sepp Blatter នាយកសហព័ន្ធបាល់ទាត់ពិភពលោក FIFA បានលាឈប់ភ្លាមៗ កាលពីថ្ងៃអង្គារក្នុងពេលមានរឿងអាស្រូវទាក់ទងនឹងអំពើពុករលួយ កំពុងបន្តកើតឡើងមិនទាន់ចប់នោះ។
លោក Blatter ត្រូវបានគេជ្រើសរើសជាថ្មីឲ្យបន្តកាន់តំណែងអាណត្តិទី៥ជា នាយកសហព័ន្ធនេះកាលពី៤ថ្ងៃមុននេះ។ លោកបញ្ជាឲ្យមានសមាជវិសាមញ្ញមួយសម្រាប់សហព័ន្ធបាល់ទាត់ដើម្បីជ្រើសរើសនាយកថ្មី ហើយថ្លែងថា លោក នឹងបន្តតំណែងជានាយករហូតដល់ពេលមាននាយកថ្មី។
ការបោះឆ្នោតជ្រើសរើសនាយក FIFAថ្មីទំនងជាចំណាយពេលជាច្រើនខែ។ ក្រុមអ្នកជំនាញរំពឹងថាការបោះឆ្នោតអាចនឹងកើតឡើងរវាងខែធ្នូឆ្នាំនេះនិងខែ មីនា ឆ្នាំ២០១៦។
នាយកFIFA ដែលមានអាយុ៧៩ឆ្នាំរូបនេះ បានធ្វើឲ្យពិភពលោកភ្ញាក់ផ្អើលបន្ទាប់ពីលោកបានប្រកាសលាលែងពីតំណែងរបស់លោក នៅឯសន្និសីទព័ត៌មានមួយក្នុងទីក្រុង Zurich ខណៈដែលលោកបានអះអាងម្តងហើយម្តងទៀតពីភាពស្អាតស្អំរបស់លោកជាច្រើនថ្ងៃចំពោះការផ្សព្វផ្សាយជាសារធារណៈដ៏ច្របូកច្របល់អំពីសកម្មភាពពុករលួយរបស់ថ្នាក់ដឹកនាំសហព័ន្ធបាល់ទាត់ពិភពលោក FIFA និងការពាក់ព័ន្ធនឹងអំពើទទួលសំណូកលុយរាប់លានដុល្លារ៕
