ក្រសួងការបរទេសស.រ.អា.និយាយថា ប្រព័ន្ធអ៊ីនធឺណិតនៅផ្ទះរបស់អតីតរដ្ឋមន្ត្រីការបរទេសស.រ.អា លោកស្រី Hillary Clinton ដែលមិនមានការរឹតបន្តឹងសន្តិសុខនោះមានសារអ៊ីម៉ែលមួយចំនួនដែលមានព័ត៌មានសម្ងាត់កំរិតខ្ពស់ ហើយថាអ៊ីម៉ែលទាំងនោះនឹងត្រូវរក្សាទុក មិនបញ្ចេញឲ្យសាធារណជនបានឃើញនោះទេ។
អ្នកនាំពាក្យក្រសួងការបរទេសស.រ.អា លោក John Kirby បាននិយាយកាលពីថ្ងៃសុក្រថា ឯកសារទាំងនោះមានរួមចំនួន៧អ៊ីម៉ែលទាំងអស់ចំនួន ៣៧ទំព័រ។ លោកនិយាយថាអ៊ីម៉ែលទាំងនោះ និងអ៊ីម៉ែលឯទៀតរបស់លោកស្រី Clinton នឹងមិនបញ្ចេញជាសាធារណទេ។
លោក Kirby បានថ្លែងថា ឯកសារទាំងនោះមិនត្រូវបានគេចាត់ទុកថាជាឯកសារសម្ងាត់ នៅពេលផ្ញើរចេញទៅ ប៉ុន្តែឥឡូវត្រូវបានផ្លាស់ប្តូរទៅជាឯកសារសម្ងាត់វិញ ដោយសារសំណើររបស់សហគមស៊ើបការសម្ងាត់។
រឿងនេះកើតឡើងតែប៉ុន្មានថ្ងៃប៉ុណ្ណោះ មុនការបោះឆ្នោតជាបឋមនៅរដ្ឋ Iowa ដែលជាព្រឹត្តិការណ៏ទីមួយហើយដែលពលរដ្ឋអាមេរិកាំងនឹងចេញទៅបោះឆ្នោតដើម្បីជ្រើសរើសបេក្ខជនរបស់គណបក្សសម្រាប់តំណែងប្រធានាធិបតីអាមេរិក។ លោកស្រី Clinton ជាបេក្ខជននាំមុខគេខាងគណបក្សប្រជាធិបតេយ្យ ប៉ុន្តែឥឡូវកំពុងប្រឈមមុខនឹងការប្រណាំងប្រជែងគ្នាយ៉ាងប្រកិតនៅក្នុងរដ្ឋ Iowa។
កាលពីថ្ងៃសុក្រយុទ្ធនាការរបស់លោកស្រី Clinton បានទាមទារឲ្យបញ្ចេញអ៊ីម៉ែលទាំងអស់។ សេចក្តីថ្លែងការណ៍មួយរបស់យុទ្ធនាការលោកស្រីបាននិយាយថារឿងនេះជាឧទាហរណ៍មួយ នៃ«ការប្រជែងគ្នាបែបការិយាធិបតេយ្យ» និង «ឯកសារសម្ងាត់ជ្រុលមានភាពរញេររញៃ»។
លោកស្រី Clinton ជួបប្រទះនឹងរឿងចម្រូងចម្រាស់ តាំងពីពេលមានការរកឃើញថាលោកស្រីបានប្រើប្រាស់អ៊ីម៉ែលផ្ទាល់ខ្លួនរបស់លោកស្រី សម្រាប់ការងារផ្លូវការ នៅពេលដែលលោកស្រីនៅកាន់តំណែងជារដ្ឋមន្ត្រីការបរទេសស.រ.អា៕
