លោកស្រី Hillary Clinton បេក្ខជនប្រធានាធិបតីនាំមុខខាងគណបក្សប្រជាធិបតេយ្យ បានហៅលោក Donald Trump គូប្រកួតប្រជែងខាងគណបក្សសាធារណរដ្ឋរបស់លោកស្រីថា ជាបេក្ខជនប្រកបដោយគ្រោះថ្នាក់និងគ្មានលក្ខណៈសម្បត្តិគ្រប់គ្រាន់សម្រាប់តំណែងប្រធានាធិបតីនៅក្នុងសុន្ទរកថាពីគោលនយោបាយការបរទេសរបស់លោកស្រីកាលពីថ្ងៃព្រហស្បតិ៍នៅក្នុងទីក្រុង San Diego រដ្ឋកាលីហ្វ័រញ៉ា។
លោកស្រី Clinton បានមានប្រសាសន៍ថា «លោក Trump មិនសាកសមកាន់តំណែងដែលតម្រូវឲ្យមានចំណេះដឹង ចិត្តនឹងនរ និងការទទួលខុសត្រូវធំ។ លោកមិនមែនជាមនុស្សដែលត្រូវមានលេខសម្ងាត់អាវុធនុយក្លេអ៊ែរនោះទេ»។
លោកស្រី Clinton បានមានប្រសាសន៍ទៀតថា «លោក Trump មិនយល់ពីប្រទេសអាមេរិកនិងពិភពលោកទេ។ ការណ៍នេះ មិនពិបាកដើម្បីនឹកស្រមៃលោក Donald Trump ដឹកនាំយើងចូលក្នុងភ្លើងសង្គ្រាមទេ ពីព្រោះតែមនុស្សណាម្នាក់ធ្វើឲ្យខឹង»។
នៅក្នុងសុន្ទរកថាមួយដែលគេរំពឹងទុក លោក Trump បានវាយប្រហារគូប្រកួតប្រជែងខាងគណបក្សប្រជាធិបតេយ្យនៅតាមប្រព័ន្ធ Twitter ថា «លោកស្រី Clinton មិនស្មោះត្រង់ ដែលខ្ញុំ ចូលចិត្តហៅគាត់លោកស្រីភ Clinton កំពុងរាយការណ៍ខុសទាំងស្រុងពីគោលនយោបាយការបរទេសរបស់ខ្ញុំ»។
លោកស្រី Clinton បានបញ្ជាក់ពីបទពិសោធន៍របស់លោកស្រីផ្ទាល់ជាស្រ្តីទីមួយ ជាសមាជិកព្រឹទ្ធសភានិងជារដ្ឋមន្រ្តីការបរទេសសហរដ្ឋអាមេរិក ដោយលោកស្រី មានប្រសាសន៍ថា លោកស្រី នឹងផ្តល់ទំនាក់ទំនងការទូតដល់ប្រទេសនានាដែលត្រូវការ។
លោក Lous Goodman សាកលវិទ្យាធិការសាលាទំនាក់ទំនងអន្តរជាតិនៃសាកលវិទ្យាល័យ American University បាននិយាយនៅក្នុងកិច្ចសម្ភាសន៍ជាមួយ VOA ថា៖
«សន្តិសុខជាតិ ជាគ្រឹះនៃការធ្វើឲ្យយើងប្រាកដថា ផលប្រយោជន៍របស់យើង បានត្រូវការពារនៅក្នុងពិភពលោក»៕
