ពួកអ្នកគាំទ្រលទ្ធិប្រជាធិបតេយ្យចិនយកចិត្តទុកដាក់ការតវ៉ាប្រឆាំងនៅក្នុងប្រទេសអ៊ីរ៉ង់។ពួកសកម្មជនចិនទាំងនោះបានសម្តែងនូវក្តីសង្ឃឹមចំពោះការងើបឡើងស្រដៀងគ្នាដើម្បីបញ្ចប់ការត្រួតត្រាដ៏តឹងរ៉ឹងរបស់ចិនទៅលើសិទ្ធិពលរដ្ឋនិងសេរីភាពសារព័ត៌មាន។
ការតវ៉ាប្រឆាំងនៅក្នុងប្រទេសអ៊ីរ៉ង់កំពុងធ្វើឲ្យល្បីខ្ទរដល់ពួកអ្នកគាំទ្រលទ្ធិប្រជាធិបតេយ្យនៅខាងក្នុងនិងខាងក្រៅប្រទេសចិន ពួកគេជាច្រើនបានសម្តែងនូវ សេចក្តីសង្ឃឹមថា ការងើបបះបោរប្រហាក់ប្រហែលគ្នាមួយអាចកើតមានឡើងដល់ប្រទេសដែលមានការត្រួតត្រាដ៏តឹងរ៉ឹងហើយនឹងបញ្ចប់ការត្រួតត្រាដ៏តឹងរ៉ឹងទៅលើសិទ្ធិពលរដ្ឋនិងសេរីភាព។
នៅពេលជាមួយគ្នានោះ ពួកអាជ្ញាធរចិនបានចាត់វិធានការដ៏ឆាប់រហ័សដើម្បីរឹតបន្តឹងការត្រួតត្រាបណ្តាញប្រព័ន្ធអ៊ិនធឺណិត និងកម្រិតការពិភាក្សាបាតុកម្មប្រឆាំងរដ្ឋាភិបាល។
លោកHu Jiaជាសកម្មជនសិទ្ធិពលរដ្ឋចិននិងជាអ្នករឹះគន់គណបក្សកុម្មុយនិស្តចិន បាននិយាយថា៖«ការគៀបសង្កត់កាន់តែខ្លាំងឡើងពីរដ្ឋាភិបាល វាកាន់តែបង្កើនការភ្ញាក់រលឹកកាន់តែខ្លាំងឡើងពីការជឹះជាន់សង្កត់សង្កិន។របៀបដែលប្រជាពលរដ្ឋអ៊ីរ៉ង់រៀបចំការតវ៉ាប្រឆាំងនិងរបៀបដែលប៉ូលិសបង្ក្រាបការតវ៉ាប្រឆាំងរបស់ពួកគេ បន្ទាប់ពីមានការបញ្ជាពីពួកអាជ្ញាធរនោះ នឹងមានឥទ្ធិពលដល់ប្រជាពលរដ្ឋនិងប៉ូលិសតាមមូលដ្ឋានរបស់ចិន»។
គណបក្សកុម្មុយនិស្តចិនត្រូវបានគេដឹងឮជាទូទៅថា បានសិក្សាពីភាពចលាចលខាងនយោបាយនៅផ្នែកផ្សេងៗទៀតនៃពិភពលោកនៅក្នុងការស្វែងរកមេរៀនដែលខ្លួនអាចប្រើប្រាស់ដើម្បីធ្វើឲ្យមានស្ថិរភាពនៅក្នុងប្រទេសចិន។ក្នុងករណីនៃការតវ៉ាប្រឆាំងនោះ មនុស្សខ្លះបានកត់សម្គាល់ឃើញនៅលើបណ្តាញព័ត៌ មានសង្គមថា គណបក្សកុម្មុយនិស្តចិនទំនងបានដាក់បម្រាមលើបណ្តាញព័ត៌មានអំពីទាក់ទងរបាយការណ៍ទាំងអស់អំពីការតវ៉ាប្រឆាំងដ៏ធំនៅអ៊ីរ៉ង់។
ឯកសារសារាចរណ៍ឃោសនាដែលបានផ្សព្វផ្សាយលើប្រព័ន្ធ អ៊ីនធឺណិត បានលាតត្រដាងអំពីការត្រួតត្រាស្ថានភាពហួសពីការពណ៌នាក្នុងប្រទេសអ៊ីរ៉ង់។សារាចរណ៍ឃោសនានោះបានប្រាប់ឲ្យដឹងថា «ការិយាល័យកិច្ចការសន្តិសុខប្រព័ន្ធកំព្យូទ័រនឹងតាមដានមើលភ្លាមៗនូវប្រព័ន្ធអ៊ីនធឺណិត ដើម្បីបិទអ្នកដែលចុះ ផ្សាយពីបដិវត្តន៍អ៊ីរ៉ង់តាមប្រព័ន្ធ អ៊ីនធឺណិត។ទៅតាមភាពចាំបាច់ វិធានការដ៏ធំទូលាយនឹងធ្វើឡើងដូចជាការបិទខ្ទប់ការភ្ជាប់ប្រព័ន្ធ អ៊ីនធឺណិតការហាមឃាត់អត្ថាធិប្បាយដែលជាប់ទាក់ទិននឹងព្រិត្តិការនៅអ៊ីរ៉ង់ដែលត្រូវបានគេចុះផ្សាយឬត្រូវបានបញ្ជូនតាមប្រព័ន្ធ អ៊ីនធឺណិត ហើយការឃុំឃាំងខ្លួននឹងត្រូវធ្វើឡើង»។
សារបញ្ហានេះបានធ្វើឲ្យអ៊ីរ៉ង់ជាប្រធានបទដែលមានការត្រួតពិនិត្យដ៏តឹងនោះលើគេហទំព័រ Freeweibo.com កាលពីយប់ថ្ងៃពុធគឺ មុនពេលឆ្មាំការពារបដិវត្តន៍ក្នុងប្រទេសអ៊ីរ៉ង់បានអះអាងថា ភាពចលាចលរយៈពេល៦ថ្ងៃបណ្តាលមកពីការតវ៉ាប្រឆាំងរដ្ឋាភិបាលជាបន្តបន្ទាប់នៅទីក្រុងសំខាន់ៗនោះបានបញ្ចប់ហើយ។
ទោះជាយ៉ាងណាក៏ដោយ មុនពេលមានបម្រាមនិងការឆ្លងកាត់របាំងបញ្ជូនសារឬGreat Firewall នៅក្នុងប្រទេសចិនដែលបិទខ្ទប់ការចូលមើលបណ្តាញព័ត៌មាននិងប្រព័ន្ធវិបសាយបរទេសនោះ ពួកប្រឆាំងនិងអ្នកប្រើអ៊ីនធឺណិត អាចបញ្ចេញមតិរបស់ខ្លួននៅតាមបណ្តាញព័ត៌មានសង្គម។
លោកស្រីGao Yuជាអ្នកកាសែតប្រឆាំងបានផ្ញើរសារតាមប្រព័ន្ធTwitterថា «ដើម្បីប្រារព្ធថ្ងៃទី១នៃឆ្នាំ២០១៨នេះ ពលរដ្ឋអ៊ីរ៉ង់ត្រូវតែទទួលបានជ័យជម្នះ»។
កាលពីយប់ថ្ងៃពុធ លោកស្រី Gao បានបញ្ជូនសារតាមប្រព័ន្ធTwitter ម្តងទៀតដើម្បីរាយការណ៍ថា លោកស្រីទើបច្រានចោលសំណើររបស់ប៉ូលិសអ៊ីនធឺណិត ចិនដែលបានទាមទារឲ្យលោកស្រីបញ្ឈប់ផ្ញើរសារតាមប្រព័ន្ធ Twitter ហើយសុំឲ្យពិនិត្យមើលទូរស័ព្ទរបស់លោកស្រី។
លោកស្រីនិយាយថា «ហេតុផលរបស់ខ្ញុំគឺថា ហេតុអ្វីបានជាលោកជាប៉ូលិសប្រព័ន្ធអ៊ីនធឺណិត អាចចូលក្នុងប្រព័ន្ធ Twitter បានហើយយើងទាំងអស់គ្នាមិនអាចចូលក្នុងប្រព័ន្ធនោះបាន? នេះជាភស្តុតាងថ្មីៗបំផុតនៃការត្រួតត្រាបណ្តាញព័ត៌ មានសង្គម។ខ្ញុំទើបទទួលបានជោគជ័យក្នុងការប្រឆាំងការរឹតបន្តឹងមិនឲ្យប្រើ អ៊ីនធឺណិត។ខ្ញុំនឹងបន្តនិយាយប្រឆាំង»។
មនុស្សផ្សេងទៀតរៀនមេរៀនពីបាតុកម្មនៅអ៊ីរ៉ង់។
លោកLi Fangជាជនជាតិចិនដីគោកដែលរស់នៅក្នុងទីក្រុងHelsinki នៃប្រទេសហ្វាំងឡង់បានបញ្ជូនសារតាមប្រព័ន្ធ Twitterថា «ចូរធ្វើតាមប្រជាពលរដ្ឋអ៊ីរ៉ង់ហើយចេញទៅតាមផ្លូវដើម្បីទាមទារឲ្យមានការផ្លាស់ប្តូរក្នុងប្រទេសចិន។ពលរដ្ឋអ៊ីរ៉ង់កំពុងធ្វើបាតុកម្មប្រឆាំងនឹងការលួចទ្រព្យសម្បត្តិជាតិ ការកើនឡើងអតិផរណានិងការគ្មានការងារធ្វើ»។
លោក Cao Ji ជាអ្នកស្រាវជ្រាវជាន់ខ្ពស់ចិនដែលបានទៅរស់នៅកោះតៃវ៉ាន់បន្ទាប់ពីចលនាការតវ៉ាប្រឆាំងនៅទីលានTiananmen បានបញ្ជូនសារតាមប្រព័ន្ធ Twitter ថា «កុំមើលងាយបាតុកម្មប្រឆាំងរដ្ឋាភិបាលក្នុងប្រទេសអ៊ីរ៉ង់។បាតុកម្មនោះអាចធ្វើឲ្យមានចលនាប្រហាក់ប្រហែលមួយដែលពលរដ្ឋចិនងើបឡើងប្រឆាំងការដឹកនាំផ្តាច់ការនិងគណបក្សកុម្មុយនិស្តចិន»។
លោក Cao លើកហេតុផលថា បន្ទាប់ពីតម្លៃឧស្ម័នធម្មជាតិនិងវត្ថុធាតុដើមបានឡើងថ្លៃខ្លាំងកាលពីឆ្នាំទៅមក អតិផរណាក្នុងប្រទេសចិន ប្រាកដនឹងឡើងខ្ពស់ក្នុងឆ្នាំខាងមុខនេះដែលនឹងជំរុញឲ្យពលរដ្ឋធ្វើតាមតម្រាប់ពលរដ្ឋអ៊ីរ៉ង់។ទោះជាយ៉ាងណាក៏ដោយ មានប្រតិកម្មចម្រុះអំពីការឲ្យហេតុផលរបស់លោក Cao។ អ្នកប្រើប្រព័ន្ធ Twitter ដែលទំនងយល់ស្របជាមួយលោក Cao បាននិយាយថា «ខ្មោច អាចសប្បាយតែក្នុងយប់ងងឹតបំផុតតែប៉ុណ្ណោះ។ថ្ងៃមួយ ព្រះអាទិត្យនឹងរះ»។
ក៏ប៉ុន្តែ អ្នកប្រើប្រព័ន្ធ Twitter ម្នាក់ទៀតបានសរសេរប្រកបដោយទុទិដ្ឋិនិយមថា «រដ្ឋាភិបាលពិតជាឃ្លាំមើលបាតុភូតឆ្នាំ១៩៨៤នៅក្នុងប្រទេសចិនគឺ៖ មនុស្សជាច្រើនត្រូវបានគេលាងខួរក្បាល។សូម្បីតែមានទុរ្ភិក្សមួយទៀត ក៏បដិវត្តន៍នៅក្នុងប្រទេសចិនមិនអាចមានដែរ»។
លោក Hu Jia ជាសកម្មជនសិទ្ធិពលរដ្ឋធ្វើអត្ថាធិប្បាយទៅលើប្រតិកម្មចម្រុះមកពីប្រទេសចិន។លោកបាននិយាយថា៖«យើងអាចមានសុទ្ឋិនិយមនិងប្រុងប្រៀបចាត់វិធានការ។មិនមានការរង់ចាំប្រទេសចិនផ្លាស់ប្តូរទេ។គេត្រូវខិតខំប្រឹងប្រែងខ្លាំងហើយនឹងលះបង់ទាំងអស់ដើម្បីធ្វើឲ្យការផ្លាស់ប្តូរកើតមានឡើង»។
នៅលើប្រព័ន្ធ អ៊ីនធឺណិត Sina Weibo កម្មវិធី microblogging ដូចជាប្រព័ន្ធ Twitter នៅចិន ការធ្វើអត្ថាធិប្បាយតាមប្រព័ន្ធ អ៊ីនធឺណិត អំពីការតវ៉ាប្រឆាំងរបស់អ៊ីរ៉ង់បានត្រូវគេបង្ហាញកាលពីថ្ងៃព្រហស្បត៍។ទោះយ៉ាងណាក៏ដោយ ប្រព័ន្ធ អ៊ីនធឺណិត ទាំងនោះបានត្រូវគេបិទម្តងទៀតមួយថ្ងៃមុន។
អ្នកប្រើប្រព័ន្ធ អ៊ីនធឺណិតចិនខ្លះ បានចោទប្រកាន់សហរដ្ឋអាមេរិកថា បានដើរតួនាទីធ្វើវិទ្ធង្សនានៅពីក្រោយបាតុកម្មនៅអ៊ីរ៉ង់។
អ្នកប្រើប្រព័ន្ធ Website Weiboម្នាក់ទៀតបានសរសេរថា សហរដ្ឋអាមេរិកមានការជ្រៀតជ្រែកកិច្ចការផ្ទៃក្នុងរបស់ប្រទេសដ៏ទៃទៀតដោយការលើកស្ទួយសិទ្ធិមនុស្សជាជាងអធិបតេយ្យភាព។
អ្នកប្រើប្រព័ន្ធគេហទំព័រ Weibo ម្នាក់ទៀតបានសរសេរទៀតថា «គិតពីការងាររបស់អ្នកទៅ ហើយកុំជ្រៀតជ្រែកកិច្ចការអ្នកដ៏ទៃទៀត»។
អ្នកប្រើប្រព័ន្ធគេហទំព័រ Weibo ទាំង២បានសរសេរនៅក្នុងការឆ្លើយតបទៅនឹងការចុះផ្សាយដោយស្ថានទូតសហរដ្ឋអាមេរិកនៅក្នុងទីក្រុងប៉េកាំងដែលបានបង្ហាញពីការគាំទ្ររបស់ពួកអ្នកនយោបាយសហរដ្ឋអាមេរិកដល់ការតវ៉ាប្រឆាំងនិងការថ្កោលទោសប៉ូលិសអ៊ីរ៉ង់ដែលបានចាប់ខ្លួនបាតុករដោយសន្តិវិធីនោះ។
ទោះយ៉ាងណាក៏ដោយ ក្នុងអត្ថបទមួយដែលបានបោះពុម្ពផ្សាយដោយកាសែត Global Times របស់រដ្ឋចិន លោក Hua Liming អតីតឯកអគ្គរដ្ឋទូតចិនប្រចាំនៅប្រទេសអ៊ីរ៉ង់បានធ្វើការបញ្ជាក់ថា រហូតមកទល់ពេលនេះ មិនមានភស្តុតាងបង្ហាញថា បាតុកម្មជាបន្តបន្ទាប់នៅក្នុងប្រទេសអ៊ីរ៉ង់ជាបដិវត្តន៍ពណ៌មួយទៀតដែលរៀបចំឡើងដោយសហរដ្ឋអាមេរិកឬប្រទេសលោកខាងលិចផ្សេងទៀត។
លោក Hua បានលើកហេតុផលថា ភាពអយុត្តិធម៌ខាងនយោបាយ សេដ្ឋកិច្ចនិងសង្គមបានជំរុញឲ្យពលរដ្ឋអ៊ីរ៉ង់ចេញមកធ្វើបាតុកម្មនៅតាមផ្លូវទាមទារថា «តើនរណានឹងត្រូវសម្រេចអនាគតរបស់ពួកគេ»។
ប្រែសម្រួលដោយជឹង ប៉ូជីន
