ចិនបានក្លាយជាប្រភពសំខាន់នៃការវិនិយោគពីបរទេសរបស់អូស្រ្តាលី។ អ្នកទិញពីចិន បានចំណាយលុយជិតដល់ ៩,៥ ពាន់លានដុល្លារអាមេរិកាំងទៅលើវិស័យអចលនទ្រព្យកាលពីឆ្នាំមុន លើសពីប្រាក់ចំណាយរបស់អ្នកវិនិយោគរបស់ស.រ.អា។ ក្នុងរដ្ឋធានីកាន់បេរ៉ា រដ្ឋាភិបាលកំពុងសម្រេចច្បាប់ថ្មីដើម្បីគ្រប់គ្រងអ្នកវិនិយោគបរទេសដែលចង់ទិញអចលនទ្រព្យរបស់អូស្រ្តាលី។
ជាលើកដំបូង ប្រទេសចិនបានក្លាយជាប្រភពសំខាន់នៃការវិនិយោគបរទេសនៅក្នុងប្រទេសអូស្រ្តាលី ហើយបានរុញច្រានសហរដ្ឋអាមេរិកទៅកាន់ចំណាត់ថ្នាក់លេខពីរវិញ។
កាលពីឆ្នាំមុន អ្នកវិនិយោគចិនដែលមានលុយច្រើនបានដាក់ទុន ២១,៨ ពាន់លានដុល្លារអាមេរិកាំងចូលទៅក្នុងប្រទេសអូស្រ្តាលី ខណៈពេលដែលការវិនិយោគពីស.រ.អាមានតម្លៃត្រឹម ១៣,៨ពាន់លានដុល្លារអាមេរិកាំង។
តួលេខនេះមានចុះនៅក្នុងរបាយការណ៍ប្រចាំឆ្នាំ ដែលត្រូវបានចេញផ្សាយដោយក្រុមប្រឹក្សាពិនិត្យមើលវិនិយោគបរទេសរបស់អូស្រ្តាលី ដែលត្រូវបានរៀបចំឡើងដើម្បីគ្រប់គ្រងការវិនិយោគក្រៅប្រទេស។
ភាគច្រើននៃចំណាប់អារម្មណ៍របស់អ្នកវិនិយោគចិន គឺផ្តោតសំខាន់លើវិស័យអចលនទ្រព្យ ដែលមានការចំណាយទុនដល់ទៅ ៩,៥ ពាន់លានដុល្លារអាមេរិកាំងក្នុងឆ្នាំ២០១៤។ ចំនួននេះគឺច្រើនជាងពីរដងនៃបរិមាណទុនដែលអ្នកវិនិយោគអាមេរិកាំងបានចំណាយទៅលើវិស័យអចលនទ្រព្យអូស្រ្តាលី។
លំហូរនៃលុយពីប្រទេសចិនចូលទៅក្នុងវិស័យអចលនទ្រព្យអូស្រ្តាលីបានបង្កើនចំណុចរសើបផ្នែកនយោបាយ ជាពិសេសនៅក្នុងទីក្រុងស៊ីដនី ដែលតម្លៃផ្ទះបានកើនឡើងរហូតដល់ទៅ ១៤ភាគរយកាលពីឆ្នាំមុន ស្មើនិង៦០ភាគរយចាប់តាំងពីឆ្នាំ២០០៩។ ការកើនឡើងយ៉ាងឆាប់រហ័សនេះ មិនមែនត្រឹមតែជាលទ្ធផលនៃការវិនិយោគបរទេសនោះទេ ប៉ុន្តែគឺដោយសារតែអត្រាការប្រាក់មានកំណត់ទាបបំផុតនៅក្នុងអូស្រ្តាលី រួមជាមួយកង្វះខាតនៃចំនួនផ្គត់ផ្គង់។
យ៉ាងណាក៏ដោយ រដ្ឋាភិបាលអូស្រ្តាលីបានស្នើឲ្យមានច្បាប់តឹងរឹងថ្មី ដើម្បីគ្រប់គ្រងលើការវិនិយោគបរទេសនៅក្នុងវិស័យអចលនទ្រព្យផ្ទះសម្បែង។
លោក Tim Harcourt សេដ្ឋវិទូមកពីសាលាពាណិជ្ជកម្មនៃសាកលវិទ្យាល័យ New South Wales Business School បាននិយាយថា ការហូរចូលនៃវិនិយោគពីប្រទេសចិន គឺមិនបានរំពឹងទុកជាមុនទេ។
«នេះជាបាតុភូតថ្មីមួយ ពីព្រោះជាទូទៅអ្នកវិនិយោគបរទេសមកកាន់អូស្រ្តាលី តាមធម្មតាភាគច្រើនមានមកពីអឺរ៉ុប ស.រ.អា និងជប៉ុន ក្នុងរយៈពេលប៉ុន្មានឆ្នាំកន្លងមកថ្មីៗនេះ ដូចនេះគេអាចនិយាយបានថា ចិន និងឥណ្ឌាជាអ្នកវិនិយោគថ្មី។ អាស្រ័យហេតុនេះ ការដែលប្រទេសទាំងនោះស្ទុះឡើងលេខរៀងយ៉ាងឆាប់រហ័សដូចនេះ គឺហាក់បីដូចជាមិនត្រូវបានគេរំពឹងទុកជាមុនទេ។ ករណីភាគច្រើនទាក់ទងនឹងវិស័យអប់រំ និងការចង់បានប័ណ្ណនិវាសដ្ឋានអចិន្រ្តៃយ៍»។
កាលពីឆ្នាំមុន គណៈកម្មាធិការសភាមួយនៅក្នុងរដ្ឋធានីកាន់បេរ៉ាបានរកឃើញថា ជាជាងការធ្វើឲ្យខូចទីផ្សារលំនៅដ្ឋានអូស្រ្តាលី តាមពិតទៅការវិនិយោគបរទេសបានជួយទប់ទល់ការឡើងថ្លៃផ្ទះឯកជន ដោយសារការកើនឡើងនៃសំណង់ផ្ទះថ្មីច្រើនថែមទៀត។ ក្រុមមន្រ្តីនិយាយថា ផលប្រយោជន៍ក៏ទទួលបានបន្ថែមជាមួយនឹងការបង្កើតការងារនៅក្នុងវិស័យសំណង់ និងចំណូលខាងពន្ធដារផងដែរ។
ដើម្បីបំពេញសេចក្តីត្រូវការដែលកំពុងកើនឡើងនៅប្រទេសចិន ក្រុមហ៊ុនអចលនទ្រព្យធំៗនៅក្នុងអូស្រ្តាលី បានបើកការិយាល័យនៅក្នុងទីក្រុងប៉េកាំង និងហុងកុង ដើម្បីផ្តល់សេវាកម្មដែលសម្របទៅតាមចំណង់របស់អ្នកវិនិយោគក្នុងស្រុក។
ខណៈពេលដែលការលក់អចលនទ្រព្យទៅឲ្យជនជាតិចិនកំពុងធ្វើបន្ត ការលក់កសិដ្ឋាននៅអូស្រ្តាលីទៅឲ្យជនបរទេសបានក្លាយជារឿងចម្រូងចម្រាសកាន់តែខ្លាំងឡើង។ អ្នករិះគន់មួយចំនួនបាននិយាយថា វាបានធ្វើឲ្យវិស័យសន្តិសុខស្បៀងអាហារអូស្រ្តាលីប្រឈមនឹងហានិភ័យ ខណៈដែលអ្នកគាំទ្រទទូចថា វាបានជួយសម្រួលផ្នែកហិរញ្ញវត្ថុដល់វិស័យឧស្សាហកម្មនាំចេញដ៏សំខាន់មួយនេះ៕
ប្រែសម្រួលដោយ នូវ ពៅលក្ខិណា
