ប៉ុន្មានម៉ោងក្រោយពីមរណភាពរបស់អតីតនាយករដ្ឋមន្ត្រីប្រទេសសិង្ហបុរី គឺលោកលី ក្វាន់យូ លោកនាយករដ្ឋមន្ត្រីហ៊ុន សែនបានចូលរួមរំលែកទុក្ខនៃការស្លាប់នេះ ដោយកើតសរសើរអំពីស្នាដៃនៃស្ថាបនិកដែនដីកោះមួយនេះ។
«ក្នុងនាមរាជរដ្ឋាភិបាលកម្ពុជា ក្នុងនាមប្រជាជនកម្ពុជា ខ្ញុំសូមផ្ញើជូនឯកឧត្តមនាយករដ្ឋមន្ត្រីលី ស៊ូឡុង នាយករដ្ឋមន្ត្រីសិង្ហបុរី ក៏ដូចជាប្រជាជនសិង្ហបុរី ក្នុងការចូលរួមមរណទុក្ខអំពីការបាត់បង់ឯកឧត្តមលី ក្វាន់យូ ដែលជាស្ថាបនិកនៃប្រទេសសិង្ហបុរី»។
លោកហ៊ុន សែនថ្លែងដូច្នេះនៅក្នុងពិធីសម្ពោធន៍មួយនៅក្នុងទីក្រុងភ្នំពេញនៅព្រឹកថ្ងៃច័ន្ទនេះ។
លោកលី ក្វាន់យូបានទទួលមរណភាពនៅថ្ងៃនេះក្នុងអាយុ៩១ឆ្នាំបន្ទាប់ពីមានជំងឺរលាកសួតធ្ងន់ធ្ងរ ហើយលោកទទួលការព្យាបាលចាប់តាំងពីដើមខែកុម្ភៈឆ្នាំ២០១៥មកម្ល៉េះ។
លោកបានកាន់តំណែងជានាយករដ្ឋមន្ត្រីអស់រយៈពេល៣១ឆ្នាំគឺចាប់ពីឆ្នាំ១៩៥៩ដល់ឆ្នាំ១៩៩០ ហើយកូនប្រុសរបស់គាត់លោកលី ស៊ានឡុងកំពុងកាន់ដំណែងបច្ចុប្បន្ននេះ។
ថ្វីបើលោកលី ក្វាន់យូជាអ្នកកាន់អំណាចដ៏យូរបំផុតម្នាក់ក្នុងពិភពលោកនិងជាបុគ្គលប្រើប្រាស់អំណាចផ្តាច់ការ និងគាបសង្កត់ផ្នែកសេរីភាពសារព័ត៌មាន ប៉ុន្តែលោកបានប្រែក្លាយសិង្ហបុរីពីដែនដីកោះ និងកំពង់ផែដ៏តូចមួយទៅជាប្រទេសដែលមានការរីកចម្រើនផ្នែកសេដ្ឋកិច្ចនិងពាណិជ្ជកម្មដែលមានសន្ទុះខ្លាំងបំផុត។
លោកលីជានាយករដ្ឋមន្ត្រីដំបូងគេនៅសិង្ហបុរី ដោយលោកបានដឹកនាំដណ្តើមឯករាជ្យភាពពីប្រទេសអង់គ្លេស និងជាអ្នកដឹកនាំដែលប្រយុទ្ធប្រឆាំងនឹងអំពើពុករលួយយ៉ាងមានប្រសិទ្ធភាពបំផុត។
លោកនាយករដ្ឋមន្ត្រីខ្មែរហ៊ុន សែនកោតសរសើរការដឹកនាំរបស់លោកលី ក្វាន់យូ។
«គាត់មិនត្រឹមតែជាស្ថាបនិកនៃប្រទេសសិង្ហបុរីប៉ុណ្ណោះទេ ក៏ប៉ុន្តែគាត់ក៏ជាស្ថាបនិកនៃអាស៊ានផងដែរ។ ហើយពេញមួយជីវិតរបស់គាត់ គាត់ធ្វើកិច្ចការរហូតដល់ទីបញ្ចប់តែម្តង។ ទស្សនវិស័យ ការបញ្ចេញមតិ និងការសរសេរនានា ការព្យាករណ៍អំពីសភាពការណ៍ពិភពលោក សភាពការណ៍តំបន់ ជាពិសេសសភាពការណ៍សេដ្ឋកិច្ចហិរញ្ញវត្ថុសកលគឺត្រូវបានគាត់ព្យាករណ៍ជាច្រើន»។
ប្រទេសសិង្ហបុរីជាដែនដីកោះដែលមានទំហំត្រឹមតែ៧១៨គីឡូម៉ែត្រការ៉េគឺតូចជាងរាជធានីភ្នំពេញ នៅពេលទីក្រុងភ្នំពេញពង្រីកដល់ទំហំ៩០០គីឡូម៉ែត្រការ៉េក្នុងពេលខាងមុខនោះ។
កោះនេះមានប្រជាជនតិចជាងប្រជាជនកម្ពុជាប្រមាណបីដង ប៉ុន្តែជាប្រទេសដែលមានបំផុតមួយក្នុងតំបន់។
លោកយ៉ែម ប៉ុញ្ញរិទ្ធ តំណាងរាស្ដ្រ និងជាអ្នកនាំពាក្យគណបក្សសង្គ្រោះជាតិ បានសម្តែងការសោកស្តាយ ព្រោះលោកលី ក្វាន់យូមានការដឹកនាំប្រកបដោយវីរភាពផ្នែកសេដ្ឋកិច្ច។
«គឺទី១ទាក់ទងនឹងការអប់រំដើម្បីផលិតធនធានមនុស្ស។ ទី២គឺការប្រយុទ្ធប្រឆាំងនឹងអំពើពុករលួយ និងទី៣គឺការធ្វើកំណែទម្រង់សេដ្ឋកិច្ច និងកែប្រែប្រទេសសិង្ហបុរីទៅជាប្រទេសជឿនលឿននៅលើពិភពលោកមួយ»។
រីឯលោកស្រីពុង ឈីវកេក ប្រធានអង្គការការពារសិទ្ធិមនុស្សលីកាដូ ក៏បានកើតសរសើរពីជោគជ័យរបស់លោកលីក្នុងការកំចាត់អំពើពុករលួយផងដែរ។
«គាត់គិតគូរដល់ប្រជាពលរដ្ឋរបស់គាត់ គិតគូរដល់ការអភិវឌ្ឍប្រទេសរបស់គាត់ឲ្យបានជឿនលឿនទៅមុខ។ ប្រទេសសិង្ហបុរី ថ្វីដ្បិតតែខាងសេរីភាពមានការរឹតត្បិតមែន ប៉ុន្តែខាងសេដ្ឋកិច្ចមានការអភិវឌ្ឍ»។
លោកអគ្គលេខាធិការអង្គការសហប្រជាជាតិ និងលោកប្រធានាធិបតីអាមេរិកបារ៉ាក់ អូបាម៉ាក៏បានចូលរួមរំលែកទុក្ខសពលោកលី ក្វាន់យូដែរ។
យ៉ាងណាក៏ដោយ លោកស្រីពុង ឈីវកេកមិនបានភ្លេចនិយាយយោងដល់ការដឹកនាំប្រកបដោយការផ្តាច់ការរបស់លោកលី ក្វាន់យូនោះទេ៕
