មេដឹកនាំគណបក្សសង្គ្រោះជាតិ គឺលោក សម រង្ស៊ី នៅថ្ងៃអង្គារនេះ បានជួបជាលើកដំបូងជាមួយនឹងលោក ហោ ណាំហុង រដ្ឋមន្ត្រីក្រសួងការបរទេសដើម្បីពិភាក្សាអំពីការជួយសង្គ្រោះស្រ្តីរងគ្រោះកម្ពុជានៅបរទេស។
នៅក្នុងជំនួបជាលើកដំបូងក្នុងក្រសួងការបរទេសលោក សម រង្ស៊ី បានទទូចដល់រដ្ឋាភិបាលឱ្យជួយទប់ស្កាត់សកម្មភាពជួញដូរកម្លាំងពលកម្មពីប្រទេសកម្ពុជាទៅក្រៅប្រទេស។
លោកនិយាយថា៖
«ស្នើសុំដើម្បីឱ្យគេជួយដោះស្រាយប្រជាពលរដ្ឋខ្មែរជួបប្រទះនៅប្រទេសគេ។មានជនជាតិខ្មែរជាច្រើនជាពិសេសស្ត្រីដែលត្រូវគេបោកបញ្ឆោតយកទៅជួញដូរ ផ្លូវភេទ ឥឡូវនេះក្លាយទៅជាទាសករនៅប្រទេសគេដូចជាប្រទេសម៉ាឡេស៊ី»។
កាលពីថ្ងៃទី២១ខែកុម្ភៈកន្លងទៅនេះក្នុងខណៈពេលដែលលោកសម រង្ស៊ីបានជួបទៅសួរសុខទុក្ខប្រជាពលរដ្ឋនៅខេត្ត ត្បូងឃ្មុំលោកបានទទួលពាក្យបណ្តឹងផ្ទាល់មាត់ពីក្រុមគ្រួសារជនជាតិខ្មែរឥស្លាមថាមានកូនស្រីរបស់ពួកគេត្រូវបានគេជួញដូរធ្វើស្ត្រីពេស្យានៅក្នុងប្រទេសម៉ាឡេស៊ី។
ស្ត្រីជនរងគ្រោះទាំងពីរនាក់ត្រូវបានជួយសង្គ្រោះនិងបានវិលត្រឡប់មកកាន់ប្រទេសកម្ពុជាវិញបន្ទាប់ពីមានអន្តរាគមន៍ពីគណបក្សសង្គ្រោះជាតិនិងក្រសួងការបរទេសកម្ពុជា។
ក្រោយពីបានវិលត្រឡប់មកកាន់មាតុប្រទេសវិញលោក សម រង្ស៊ី បាននាំជនរងគ្រោះទាំងពីរនាក់និងក្រុមគ្រួសារទៅជួបលោក ហោ ណាំហុង រដ្ឋមន្ត្រីក្រសួងការបរទេសនៅទីស្តីការក្រសួង។
លោក កុយ កួង អ្នកនាំពាក្យក្រសួងការបរទេសមានប្រសាសន៍ប្រាប់ក្រុមអ្នកកាសែតថា កម្ពុជាបានធ្វើការជាមួយស្ថានទូតក្នុងប្រទេសម៉ាឡេស៊ី នៅក្នុងប្រទេសកម្ពុជា ដើម្បីជួយសង្គ្រោះស្ត្រីខ្មែរដែលត្រូវបានជួញដូរនៅក្នុងប្រទេសម៉ាឡេស៊ី។
លោកនិយាយថា៖ «ឯកឧត្តម ឧបលោកតែងតែបញ្ជាក់ហើយថាបញ្ហាជួញដូរមនុស្សគឺជាឧក្រិដ្ឋកម្មឆ្លងដែនមួយដែលយើងមិនដែលលើកលែងទេ។ យើងតែសហការនាំជនល្មើសឡើងតុលាការ»។
លោកបាននិយាយថាករណីស្ត្រីជនជាតិខ្មែរឥស្លាមទាំងពីរនាក់នេះនៅពេលដែលស្គាល់ច្បាស់ថាមេខ្យល់ជាអ្នកណាហើយគឺមិនអាចរួចខ្លួនបានទេ។ សំខាន់គឺស្វែងរកយុត្តិធម៌ ហើយកម្ពុជាមិនដែលឱ្យជនល្មើសរួចខ្លួនពីសំណាញ់ច្បាប់ទេ។
លោកនិយាយថា៖«ករណីជួញដូរមនុស្សនេះកន្លងមកក្រសួងមហាផ្ទៃបានប្រកាសពង្រឹងនូវគណៈកម្មការប្រឆាំងនឹងការជួញដូរហ្នឹងឥឡូវមានគ្នាច្រើន មានយុទ្ធសាស្ត្រកាន់តែល្អដើម្បីទប់ស្តាត់កុំឱ្យមានការជួញដូរនេះរីករាលដាល»។
លោក សម រង្ស៊ី បានមានប្រសាសន៍ថាឥឡូវលោក ឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃបានបញ្ជាទៅមន្ត្រីប៉ូលិសមូលដ្ឋាននៅគ្រប់ខេត្តក្រុងដើម្បីឱ្យមន្ត្រីនគរបាលយកចិត្តទុកដាក់ទទួលពាក្យបណ្តឹងពីប្រជាពលរដ្ឋដើម្បីទប់ស្កាត់ការជួញដូរមនុស្ស។
លោកនាយឧត្តមសេនីយ៍ ខៀវ សុភ័គ អ្នកនាំពាក្យក្រសួងមហាផ្ទៃមិនអាចស្នើសុំសេចក្តីអត្ថាធិប្បាយបានទេដោយលោកនិយាយថាកំពុងជាប់រវល់។
លោក យ៉ា ណាវុធ នាយកប្រតិបត្តិអង្គការសម្របសម្រួលការស្រាវជ្រាវអំពីជំងឺអេដស៍និងចំណាកស្រុកដែលហៅកាត់ថាខារ៉ាមកម្ពុជាមានប្រសាសន៍ថាពីមួយឆ្នាំទៅមួយឆ្នាំពលករចំណាកស្រុកទៅក្រៅប្រទេសកាន់តែមានចំនួនច្រើនឡើងៗ។
លោកបានបញ្ជាក់ថាភាគច្រើនពលករខ្មែរដែលបានចាកចេញទៅក្រៅប្រទេសត្រូវបានគេជួញដូរយកទៅលក់កម្លាំងពលកម្មនិងពេស្យាចារ។
លោកនិយាយថា៖
«យើងឃើញដូចជាករណីដែលយើងទទួលបានបើទៅប្រទេសថៃ យើងឃើញភាគច្រើនកម្លាំងពលកម្មប៉ុន្តែបើទៅប្រទេសចិនយើងឃើញថាភាគច្រើនគឺកម្លាំងពលកម្មផងនិងផ្លូវភេទផង ហើយដោយឡែកប្រទេសម៉ាឡេស៊ី ភាគច្រើនយើងឃើញថាពាក់ព័ន្ធទៅនឹងកម្លាំងពលកម្មច្រើន»។
លោកមានប្រសាសន៍ថាពលករខ្មែរដែលបានចាកចេញទៅក្រៅប្រទេសច្រើនជាងគេគឺទៅកាន់ប្រទេសថៃដែលមានចំនួន៧០ម៉ឺននាក់៕
