រដ្ឋ North Carolina -- ក្រោយពីបានឡើងកាន់តំណែងជាប្រធានាធិបតីសហរដ្ឋអាមេរិកនៅឆ្នាំ២០១៧មក លោក ដូណាល់ ត្រាំ (Donald Trump) បានចាត់វិធានការតឹងរឹងមួយចំនួនពាក់ព័ន្ធនឹងជនអន្តោប្រវេសន៍ខុសច្បាប់។
វិធានការទាំងនោះរួមការព្យាយាមសង់ជញ្ជាំងនៅតាមបណ្តោយព្រំដែននៅភាគខាងត្បូងជាមួយប្រទេសម៉ិកស៊ិក និងការបង្កើនការសាងសង់កន្លែងឃុំខ្លួនជនអន្តោប្រវេសន៍ដែលស្វែងរកវិធីចូលមកប្រទេសអាមេរិក ដើម្បីជៀសផុតពីការធ្វើទុកបុកម្នេញក្នុងប្រទេសរបស់ខ្លួន នៅតាមបណ្តោយព្រំដែនភាគខាងត្បូងជាដើម។
គោលនយោបាយរបស់លោក ដូណាល់ ត្រាំទាំងនេះ រងការរិះគន់ពីសំណាក់គណបក្សប្រជាធិបតេយ្យ និងក្រុមអ្នកការពារសិទ្ធិមនុស្សខ្លះ។ តែសម្រាប់ពលរដ្ឋខ្មែរអាមេរិកាំងនៅតាមបណ្តារដ្ឋមួយចំនួនបានគាំទ្រទៅវិញជាពិសេសទៅលើការអនុវត្តច្បាប់និងការប្តេជ្ញាចិត្តរបស់លោកត្រាំ។ក្រុមពលរដ្ឋទាំងនោះបានទទូចថាលោកត្រាំគួរត្រូវបន្តប្រសិទ្ធភាពនៃគោលនយោបាយរបស់លោកនេះទៀតដើម្បីសេដ្ឋកិច្ចសង្គមនិងផលប្រយោជន៍ប្រទេសបើលោកជាប់ឆ្នោតមួយអាណត្តិបន្តទៀត។
លោក អ៊ុន សុខុម អាយុ៥៧ឆ្នាំជាពលរដ្ឋខ្មែរម្នាក់រស់នៅក្នុងទីក្រុងឡូវែល (Lowell)រដ្ឋម៉ាស្សាឈូសេតស៍(Massachusetts)បានថ្លែងថា លោកចង់ឃើញលោកត្រាំរៀបចំក្រុមជនអន្តោប្រវេសន៍ឲ្យបានត្រឹមត្រូវនាពេលខាងមុខ។
លោកថ្លែងថា៖ «ជាគោលការណ៍របស់គាត់ទិសដៅរបស់គាត់នៅពេលក្លាយជាប្រធានាធិបតីអាណត្តិទី២នាពេលអនាគតលោកត្រូវមានផែនការហ្នឹងហើយលោកត្រាំក៏អាចនិយាយបានថានៅក្នុងអាណត្តិរបស់គាត់ហ្នឹងអាចនិយាយបានថាគាត់នឹងត្រូវរៀបចំឲ្យបានត្រឹមត្រូវនូវបញ្ហាជនអន្តោប្រវេសន៍នៅក្នុងសហរដ្ឋអាមេរិក»។
លោកថាគោលនយោបាយរបស់លោកត្រាំប្រឆាំងនឹងជនអន្តោប្រវេសន៍ខុសច្បាប់និងការបញ្ជូនពលរដ្ឋទាំងនោះត្រឡប់ទៅវិញត្រូវបានទទួលការគាំទ្រពីពលរដ្ឋអាមេរិកាំងដើម្បីធានាបានស្ថិរភាពសេដ្ឋកិច្ចនិងការងារធ្វើហើយនឹងបញ្ហាជាច្រើនទៀតដែលបង្កក្នុងប្រទេសអាមេរិក។
ពលរដ្ឋមកពីប្រទេសជាច្រើនក្នុងពិភពលោកដែលកំពុងរស់នៅខុសច្បាប់លើទឹកដីអាមេរិក ដើម្បីប្រកបរបរចញ្ចឹមជីវិតដោយធ្វើការយកលុយសុទ្ធទោះជាមិនចូលតាមប្រព័ន្ធការងារដែលអាចផ្តល់អត្ថប្រយោជន៍ច្រើនសម្រាប់ការធានាសុខភាព អាយុជីវិត និងការចូលនិវត្តន៍ដូចបុគ្គលិកធ្វើការស្របច្បាប់ធម្មតាក្តី។ពួកគេរងការបង្ក្រាបចាប់ខ្លួន និងបណ្តេញចេញពេលអាជ្ញាធរដឹងពីការរស់នៅមិនស្របច្បាប់និងធ្វើការខុសច្បាប់។
ក្រៅពីនេះពួកគេក៏ត្រូវចោទប្រកាន់និងរើសអើងធ្ងន់ធ្ងរក្នុងសង្គមអាមេរិកាំងផងដែរដូចជាការចោទប្រកាន់ថាពាក់ព័ន្ធក្នុងសកម្មភាពខុសច្បាប់ជាច្រើនដែលលោកត្រាំធ្លាប់លើកឡើងពីការប្រព្រឹត្តបទឧក្រិដ្ឋនានារួមទាំងប្លន់សម្លាប់គ្រឿងញៀន រំលោភស្រី្តភេទជាដើម។តែតាមការវិភាគនិងការស្រាវជ្រាវខ្លះបានបង្ហាញថា អំពើឧក្រិដ្ឋដែលជនអន្តោប្រវេសន៍បានប្រព្រឹត្តគឺមានចំនួនតិចជាងឆ្ងាយបើធៀបទៅនឹងជនជាតិអាមេរិកាំងខ្លួនឯងបានប្រព្រឹត្ត។
ជនអន្តោប្រវេសន៍ខ្លះមានការទាក់ទងនឹងការគេចខ្លួនរស់នៅពេលផុតទិដ្ឋាការលួចឆ្លងដែនចូលមកសហរដ្ឋអាមរិកដោយគ្មានឯកសារការរៀបការក្លែងក្លាយការរត់ពន្ធមនុស្សតាមរយ:វីធីផ្សេងៗជាដើម។ក្រសួងសន្តិសុខមាតុភូមិបានប៉ាន់ប្រមាណថាមានជនអន្តោប្រវេសន៍ខុសច្បាប់ក្នុងសហរដ្ឋអាមេរិក ដល់ទៅជិត១១លាននាក់។
បញ្ហារបស់ជនអន្តោប្រវេសន៍ខុសច្បាប់នៅពាសពេញសហរដ្ឋអាមេរិកទាំងនោះត្រូវគេគិតថាជាបន្ទុករបស់រដ្ឋាភិបាលអាមេរិកសហព័ន្ធនិងរដ្ឋាភិបាលតំបន់ឬរដ្ឋាភិបាលប្រចាំរដ្ឋនានាដែលលោកត្រាំបានប្តេជ្ញាថា នឹងរឹតបន្តឹងដោយវិធានការច្បាប់ហើយបញ្ចប់ការទទួលខុសត្រូវរបស់រដ្ឋលើជនអន្តោប្រវេសន៍ខុសច្បាប់។នេះជាការរៀបរាប់បន្ថែមរបស់លោកអ៊ុន សុខុម។
លោកបានបន្ថែមថា៖ «អីចឹងហើយដោយសារឮលោកប្រធានាធិបតីដូណាល់ ត្រាំគាត់មានគោលការណ៍ផ្លូវច្បាប់ដើម្បីដោះស្រាយផ្លូវច្បាប់គឺពលរដ្ឋអាមេរិកាំងគាត់គាំទ្រមិនមែនជនអន្តោប្រវសន៍ដែលមកដាក់ពាក្យសុំសញ្ជាតិទេតែមានពលរដ្ឋជាច្រើន»។
លោកបានបន្តថា៖ «ហើយអ្នកគាំទ្រលោកដូណាល់ ត្រាំអំពីបញ្ហាអន្តោប្រវេសន៍ខុសច្បាប់ហ្នឹងគឺជាគោលការណ៍មួយដែលត្រឹមត្រូវរបស់អ្នកដែលគិតឃើញច្បាប់របស់សហរដ្ឋអាមេរិកដែលត្រូវគោរពនិងអនុវត្តន៍»។
លោកបានបន្តថាក្រុមអ្នកដែលគាំទ្រគណបក្សប្រជាធិបតេយ្យគេមានគោលនយោបាយរបស់គេ។ហើយសម្រាប់ពលរដ្ឋខ្មែរខ្លះក៏ប្រឆាំងដោយសារតែគេមានផលប្រយោជន៍របស់គេរៀងខ្លួន ដូចជាការគេចនៅការរៀបការក្លែងក្លាយនិង ទង្វើមិនល្អមួយចំនួនទៀតដែលផ្ទុយពីច្បាប់សហរដ្ឋអាមេរិកជាពិសេសច្បាប់ចូលសញ្ជាតិ។
គណបក្សសាធារណរដ្ឋបានរឹតបន្តឹងជនអន្តោប្រវេសន៍ខុសច្បាប់រាប់ចាប់តាំងពីការមិនផ្តល់ថវិកាជួយសង្គ្រោះដោយវិបត្តិកូវីដការសង់ជញ្ជាំងទប់ស្កាត់របស់លោកត្រាំនៅភាគខាងត្បូងអាមេរិកជាប់ប្រទេសម៉ិកស៊ិកនិងការចាប់បញ្ជូនទៅកាន់ប្រទេសកំណើតវិញចំពោះជនអន្តោប្រវេសន៍ខុសច្បាប់ក្រោមបទបញ្ជាប្រធានាធិបតីត្រាំដែលបញ្ជាក់ថាគ្មានការអត់ឱនដល់ជនអន្តោប្រវេសន៍ខុសច្បាប់ដែលឆ្លងចូលមកកាន់ទឹកដីអាមេរិកទេ។
លោកគឹម សុផល ពលរដ្ឋខ្មែរអាមេរិកាំងនៅរដ្ឋមីនីសូតាដែលមករស់នៅសហរដ្ឋអាមេរិកតាំងពីដើមទសវត្សរ៍១៩៨០បានថ្លែងថាបើមានក្រុមជនអន្តោប្រវេសន៍ខុសច្បាប់មកច្រើនមានការប៉ះទង្កិចដល់សេដ្ឋកិច្ចនិង ការងារដោយសារជនអន្តោប្រវេសន៍ខុសច្បាប់មកច្រើននឹងនាំឲ្យតម្លៃពលកម្មចុះថោកហើយប៉ះពាល់ឬកាត់បន្ថយការងារដល់ពលរដ្ឋរាប់លាននាក់ដែលធ្វើការបានថ្លៃដើម្បីបង់ផ្ទះសម្បែងបង់ប្រាក់ធានារ៉ាប់រងជីវិតនិងសុខភាពជាដើម។
លោកចង់ឃើញលោកត្រាំមានវិធានការបន្ថែមលើបញ្ហាអន្តោប្រវេសន៍ខុសច្បាប់បើលោកដឹកនាំប្រទេសបន្ត។
លោកបញ្ជាក់ថា៖ «បើសិនឲ្យចូលមកដោយសេរីហើយលួចលាក់គឺខ្ញុំគាំទ្រថាមិនឲ្យចូលទេ។យើងត្រូវឃាត់ឃាំង យើងមិនឲ្យចូលមកអីចឹងបានទេ។
លោកថាសហរដ្ឋអាមេរិកគួរមានប្រព័ន្ធការងារមួយដែលអាចឲ្យប្រទេសមួយចំនួនដែលចង់បញ្ជូនកម្មករឬពលរដ្ឋមកធ្វើការនៅអាមេរិកត្រូវដាក់ពាក្យសុំហើយត្រូវត្រឡប់ទៅវិញពេលចប់អាណត្តិជាក់លាក់មួយរាល់៣ឬ៤ឆ្នាំម្តង។
លោកសុផលបានស្តីបន្ទោសរដ្ឋបាលលោកអតីតប្រធានាធិបតីអូបាម៉ាថាបណ្តោយឲ្យមានជនអន្តោប្រវេសន៍ច្រើនដែលធ្លាក់មកដល់រដ្ឋបាលលោកត្រាំដែលពិបាកឲ្យលោកត្រាំចាត់វិធានការទប់ស្កាត់។
លោកថ្លែងថា៖«ទប់ស្កាត់មិនបានទេព្រោះកន្លងមក៨ឆ្នាំកន្លងមកហើយកាលលោកប្រធានាធិបតីអូបាម៉ា គាត់នៅកាន់តំណែងជាប្រធានាធិបតីគាត់មិនបានហាមឃាត់ប៉ុន្មានទេក្នុងការទប់មិនឲ្យជនអន្តោប្រវេសន៍ខុសច្បាប់ចូលមកហ្នឹង។ច្បាប់មានចាប់ដែរតែគាត់មានភាពធូរលុងដែរ»។
ទោះជាលោកប្រធានាធិបតីត្រាំនៅប៉ុន្មានខែដើមអាណត្តិទី១របស់លោកមានការមមារញឹកនឹងបញ្ហាជាច្រើនក្តីក៏បានបង្ហាញកំណើនខ្លាំងក្នុងការចាប់បញ្ជូនជនអន្តោប្រវេសន៍ខុសច្បាប់លើសលោកអតីតប្រធានាធិបតីមុនៗមែនតែបើតាមគេហទំព័ររបស់វិទ្យាស្ថានគោលនយោបាយជនចំណាកស្រុក Migration Policy Institute នៅរដ្ឋធានីវ៉ាស៊ីនតោនដែលមិនប្រកាន់គណបក្សនយោបាយនោះ បានបញ្ជាក់ឲ្យដឹងថារដ្ឋបាលលោកអតីតប្រធានាធិបតី អូបាម៉ា បានបញ្ជូនមនុស្សជាង៥,២លាននាក់ចេញពីប្រទេសអាមេរិកក្នុងអំឡុងពេល៨ឆ្នាំដែលលោកកាន់តំណែង។
លោកគុជ ច័ន្ទលីពលរដ្ឋខ្មែរអាមេរិកាំងនៅរដ្ឋម៉ារីឡែនបានថ្លែងថាលោកគាំទ្រការអនុវត្តច្បាប់នៅសហរដ្ឋអាមេរិកចំពោះជនអន្តោប្រវេសន៍ខុសច្បាប់ក្រៅពីសង្កេតឃើញថាលោកត្រាំមានការតឹងរឹងខ្លាំងជាងមុន។ម្យ៉ាងទៀតវិធានការបន្តឹងលើជនអន្តោប្រវេសន៍នេះគឺស្របនឹងការការពារសុខភាពពេលមានវិបត្តិកូវីដឲ្យមនុស្សមានការងារធ្វើទុកការងារឲ្យអាមេរិកាំងឲ្យបានច្រើន។
លោក ច័ន្ទលី ថ្លែងថា៖ «ប្រទេសនីមួយៗមានច្បាប់របស់គេហើយច្បាប់របស់គេហ្នឹងគេតាក់តែងឡើងដើម្បីបម្រើផលប្រយោជន៍ប្រទេសគេ។ដូច្នេះហើយខ្ញុំមិនគាំទ្រទៅដល់អំពើខុសច្បាប់ផ្សេងៗដែលបុគ្គលណាម្នាក់ទោះបីជនភៀសខ្លួនក្តីជនអន្តោប្រវេសន៍ក្តីមានសញ្ជាតិអាមេរិកាំងក៏ដោយអត់ក៏ដោយ គឺថាឲ្យតែធ្វើខុសច្បាប់ត្រូវតែទទួលទណ្ឌកម្ម ។ បើជនហ្នឹងអត់មានសញ្ជាតិអាមេរិកាំងទេត្រូវតែបញ្ជូនទៅកាន់ប្រទេសគេវិញ»។
តែលោកគុជ ច័ន្ទលី ដែលថា ការឹតបន្តឹងច្បាប់ សេវាកម្មបច្ចេកវិជ្ជាដោយមិនចាំបាច់សង់ជញ្ជាំងឬធ្វើទុក្ខបុកម្នេញជនអន្តោប្រវេសន៍ដែលជាសកម្មភាពឃោរឃៅរហូតដល់ស្លាប់មនុស្សខ្លះនិងព្រាត់ប្រាស់ផងនោះបានបញ្ជាក់ថាសហរដ្ឋអាមេរិកតែងតែជ្រើសរើសមនុស្សពូកែនិង មានចំណេះដឹងខ្ពស់ៗដើម្បីកសាងប្រទេសនិងធ្វើឲ្យប្រទេសជាតិខ្លួនរីកចម្រើនទៅមុខជាច្រើនឆ្នាំហើយ៖
«សូម្បីតែជនអន្តោប្រវេសន៍ដែលចូលមកសហរដ្ឋអាមេរិកហ្នឹងក៏អីចឹងដែរសហរដ្ឋអាមេរិក មានប្រពៃណីមួយបើកទទួលយកមនុស្សបរទេសទាំងឡាយដែលមានទេពកោសល្យខ្ពស់ដែលមានចំណេះដឹងខ្ពស់ដែលមានលុយកាក់ច្រើនយកមកដាក់ទុនធ្វើវិភាគអ្វីផ្សេងៗធ្វើជំនួញអ្វីផ្សេងៗនៅក្នុងសហរដ្ឋអាមេរិក។អាមេរិកាំងមាននយោបាយជ្រើសរើសមនុស្សខ្លាំងៗពូកែយកមកដាក់នៅក្នុងប្រទេសគេ»។
លោកថ្លែងដូច្នេះយោងទៅលើថាអ្នកនយោបាយសហរដ្ឋអាមេរិកខិតខំបង្ហាញពលរដ្ឋរបស់គេឲ្យដឹងថាគេជាអ្នកគិតគូរពីផលប្រយោជន៍ជាតិនិងពលរដ្ឋក្រៅពីនិយាយយោងទៅដល់បទបញ្ជាលោកប្រធានាធិបតីត្រាំបិទទិដ្ឋការ H1B សម្រាប់អ្នកធ្វើការក្នុងពេលវិបត្តិកូវីដ១៩និងសង្គ្រាមពាណិជ្ជកម្មជាមួយចិនបិទការចាប់ឆ្នោតផ្សងសំណាងមករស់នៅសហរដ្ឋអាមរិកសម្រាប់ប្រទេសមួយចំនួននិងប្រភេទទិដ្ឋាការមួយចំនួនទៀតចាប់បញ្ជូនពលរដ្ឋឬជនអន្តោប្រវេសន៍ខុសច្បាប់ដែលគ្មានឯកសារចេញពីសហរដ្ឋអាមេរិកក្រៅពីចោទប្រកាន់គណបក្សប្រជាធិបតេយ្យថាបានចំណាយលុយរដ្ឋជាច្រើនសម្រាប់ជូយដល់ជនអន្តោប្រវេសន៍ខុសច្បាប់នៅសហរដ្ឋអាមេរិកជាដើម។
ទោះជាយ៉ាងណាបញ្ហាជនអន្តោប្រវេសន៍នៅសហរដ្ឋអាមេរិកបានក្លាយជាប្រធានបទសំខាន់មួយរបស់អ្នកនយោបាយចម្រុះបក្សដើម្បីទាញយកផលចំណេញនយោបាយហើយក្លាយជាប្រធានបទដែលត្រូវជជែកវែកញែកនិងខ្វែងគំនិតគ្នាមិនចេះចប់មិនចេះហើយផងដែរ។
គណបក្សប្រជាធិបតេយ្យមានគោលនយោបាយផ្សេងហើយចង់លុបចោលគោលនយោបាយអន្តោប្រវេសន៍ខ្លះរបស់លោកត្រាំដូចជាការកសាងជញ្ជាំងទប់ស្កាត់អន្តោប្រវេសន៍ដែលនាំឲ្យខាតបង់ថវិកាជាតិរាប់លានបានសន្យាថានឹងកែទម្រង់ច្បាប់អន្តោប្រវេសន៍បើលោកJoe Bidenបេក្ខជនប្រធានាធិបតីជាប់ឆ្នោតនៅក្រោយការបោះឆ្នោតថ្ងៃទី៣ខែវិច្ឆិកាឆ្នាំ២០២០នេះ៕
