ភ្នំពេញ៖ សម្តេចឪនរោត្តមស៊ីហនុព្រះមហាវីរៈក្សត្រនៃប្រទេសកម្ពុជាបានសោយទីវង្គតនៅថ្ងៃចន្ទ ទី១៥ ខែតុលា វេលាម៉ោង១និង២០នាទីព្រឹកម៉ោងនៅប្រទេសកម្ពុជា នៅក្នុងទីក្រុងប៉េកាំងប្រទេសចិនប្រជាមានិតដោយសារជំងឺគាំងប៉េះដូងក្នុងព្រះជន្ម៩០ព្រះវស្សា។
ព្រះករុណាសម្តេចព្រះបរមនាថនរោត្តម ស៊ីហមុនី ព្រះមហាក្សត្រនៃព្រះរាជណាចក្រកម្ពុជា និងជាព្រះរាជបុត្ររបស់សម្តេចឪសម្តេចម៉ែ បានយាងចេញពីកម្ពុជាភា្លមៗនៅថ្ងៃចន្ទនេះ និងអមដំណើរដោយលោកនាយករដ្ឋមន្ត្រីហ៊ុន សែនដើម្បីទៅទទួលព្រះសពសម្តេចឪពីទីក្រុងប៉េកាំង។
លោក ខៀវ កញារិទ្ឋ អ្នកនាំពាក្យរដ្ឋាភិបាល និងជារដ្ឋមន្ត្រីព័ត៌មានបាននិយាយថា ព្រះសពសម្តេចឪគ្រោងនឹងនាំតាមព្រះទីនាំងយន្តហោះពិសេសពីទីក្រុងប៉េកាំងមកកាន់កម្ពុជានៅថ្ងៃពុធខាងមុខនេះ។ លោកបាននិយាយថា យ៉ាងតិចមានមនុស្សប្រមាណជាង១០ម៉ឺននាក់ទៅទទួលព្រះសពសម្តេចឪពីព្រលានយន្តហោះមកកាន់ព្រះបរុមរាជវាំង។
ព្រះសពសម្តេចឪនរោត្តមស៊ីហនុគ្រោងនឹងតម្កល់ទុកក្នុងព្រះវិហារព្រះកែវមរកតនៃព្រះបរុមរាជវាំងរយៈពេលបីខែដោយបើកទូលាយឲ្យប្រជានុរាស្ត្ររបស់ព្រះអង្គចូលគោរពព្រះសពមុននឹងយកទៅបូជានៅវាលព្រះមេរុ។
«តិចទៀតបានយើងធ្វើលម្អិត។ តែពេលមកដល់យើងរៀបចំពីធីបង្សុកូលពីរកន្លែងគឺនៅពោធិតុង និងមួយកន្លែងទៀតនៅព្រះបរុមរាជវាំង»។
នៅកម្ពុជាទាំងមូលទង់ជាតិត្រូវបានបង្ហូតចុះចំនួន១ភាគ៣រយៈពេលមួយសប្តាហ៍ចាប់ពីថ្ងៃទី១៥ដល់ថ្ងៃទី២១ដើម្បីចូលរួមកាន់ទុក្ខនៃការសោយទីវង្គត់របស់សម្តេចឪ។
លោកខៀវ កាញារិទ្ឋ បានមានប្រសាសន៍ថា រយៈពេលមួយសប្តាហ៍នេះនៅគ្រប់ស្ថានីយទូរទស្សន៍និងវិទ្យុរាប់ទាំងរដ្ឋ និងឯកជននៅទីក្រុងភ្នំពេញនិងនៅតាមបណ្តាខេត្តទាំងអស់មិនត្រូវបានអនុញ្ញាតឲ្យមានសកម្មភាពចាក់ភ្លេងឬក៏ចាក់បញ្ចាំងទស្សនីយភាពដែលមានលក្ខណៈគគ្រឹកគគ្រេងនោះទេចំណែកឯនៅតាមទីកន្លែងសប្បាយផ្សេងៗគឺសុំរក្សាភាពស្ងៀមស្ងាត់ដើម្បីចូលរួមកាន់ទុក្ខព្រះសពសម្តេចឪ។
«មែនថាមិនឲ្យលេងទេគឺអាក្រឆេងឆូងឆាងអីឬក៏សម្តែងសិល្បៈរញ៉េរញ៉ៃអីគឺយើងបន្ថយក្នុងមួយអាទិត្យហ្នឹង»។
ព្រះអង្គម្ចាស់ស៊ីសុវត្ថិ ធម្មិកោ ព្រះរាជលេខាផ្ទាល់របស់សម្តេចឪបានមានបន្ទូលថា ព្រះសុខភាពសម្តេចឪមានបញ្ហាព្រះរោគបេះដូងតាំងពីយូរណាស់មកហើយ។ ហេតុដូចច្នេះ ក្នុងរយៈពេលចុងក្រោយព្រះអង្គមិនអាចយាង្គនិវត្តន៍តាមទីនាំងយន្តហោះមកកាន់មាតុប្រទេសបានទេដោយសារព្រះរាជសុខភាពខ្សោយរបស់ព្រះអង្គ។ ព្រះអង្គម្ចាស់ធម្មិកោ បានមានបន្ទូលថា មរតសាស្ត្ររបស់សម្តេចឪមុនសោយទីវង្គតគឺចង់ឲ្យសង្គមខ្មែរទទួលបានយុត្តិធម៌។
«ពាក្យបណ្តាំរបស់លោក លោកសរសេរតាំងពីលោកនៅមានព្រះជន្មនៅឡើយថា លោកស្នើឲ្យគ្រប់គ្រងប្រទេសជាតិស្របទៅតាមយុត្តិធម៌ សីលធម៌ សុជីវធម៌ ផ្តល់យុត្តិធម៌ទៅឲ្យប្រជារាស្រ្តខ្មែរជាពិសេសប្រជារាស្រ្តក្រីក្រ»។
សម្តេចឪនរោត្តមស៊ីហនុគឺជាព្រះមហាវរៈក្សត្រដ៏ឆ្នើមមួយអង្គដែលបានទាមទារឯករាជ្យពីអាណានិគមបារាំងឲ្យប្រគល់ទឹកដីមកឲ្យកម្ពុជាវិញកាលពីឆ្នាំ១៩៥៣។ ព្រះអង្គក៏ធ្លាប់មានព្រះរាជតួនាទីយ៉ាងសំខាន់ក្នុងការនាំឲ្យមានកិច្ចព្រមព្រៀងសន្តិភាពក្រុងបារីសកាលពីថ្ងៃទី២៣តុលាឆ្នាំ១៩៩១។ សម្តេចឪបានជំរុញទាមទារយ៉ាងសកម្មឲ្យមានការដកកងទ័ពវៀតណាមចេញពីកម្ពុជាជាបន្តបន្ទាប់កាលពីឆ្នាំ១៩៨៩៕
