លោកនាយករដ្ឋមន្ត្រី ហ៊ុន សែន កាលពីថ្ងៃសៅរ៍កន្លងទៅនេះ បានថ្លែងថា ភាគីកម្ពុជា និងថៃ បានយល់ព្រមលើគម្រោងបង្កើនទំហំពាណិជ្ជកម្មទ្វេភាគីឲ្យដល់ ១៥.០០០ លានដុល្លារអាមេរិកនៅក្នុងឆ្នាំ២០២០ខាងមុខនេះ តាមរយៈការពង្រីកវិសាលភាពនៃការដឹកជញ្ជូនទាំងផ្លូវគោក និងផ្លូវដែក។
គម្រោងនៃការបង្កើនទំហំពាណិជ្ជកម្មនេះ កើតមាននៅស្របពេលដែលប្រទេសកម្ពុជា កំពុងប្រឈមមុខនឹងឱនភាពជញ្ជីងពាណិជ្ជកម្មរវាងប្រទេសកម្ពុជា និងថៃ ដែលបាននាំទំនិញចូលមកកម្ពុជាក្នុងតម្លៃរាប់ពាន់លានដុល្លារ។
ថ្លែងទៅកាន់លោកឧត្ដមសេនីយ៍ ប្រាយុទ្ធ ច័ន្ទអូចា នាយករដ្ឋមន្ត្រីថៃនៅក្នុងកិច្ចប្រជុំគណៈរដ្ឋមន្ត្រីចម្រុះលើកទី២ កម្ពុជា ថៃ ដែលគេរៀបចំឡើងនាទីក្រុងបាងកកកាលពីថ្ងៃសៅរ៍ លោក ហ៊ុន សែន នាយករដ្ឋមន្ត្រីដ៏មានឥទ្ធិពលរបស់កម្ពុជា បានថ្លែងថា ទំនាក់ទំនងពាណិជ្ជកម្មរវាងប្រទេសទាំងពីរ បានបង្ហាញនូវសញ្ញាវិជ្ជមានពីមួយឆ្នាំទៅមួយឆ្នាំ ពីព្រោះទំហំពាណិជ្ជកម្មរវាងប្រទេសទាំងពីរ បានបន្តកើនឡើង ដោយក្នុងឆ្នាំ២០១៤ កម្ពុជា និងថៃ បាននាំទំនិញចេញចូលទៅវិញទៅមកមានតម្លៃប្រមាណ៥០០០លានដុល្លារ។
លោក ហ៊ុន សែន ថ្លែងថា ទំហំពាណិជ្ជកម្មរវាងប្រទេសទាំងពីរ ត្រូវបានគ្រោងថា នឹងកើនដល់១៥០០០លានដុល្លារនៅក្នុងរយៈពេល៥ឆ្នាំទៅមុខទៀត។
«យើងមានវឌ្ឍនភាពច្រើនណាស់ ហើយយើងក៏នៅសេសសល់សក្ដានុពល ដើម្បីនឹងពង្រីកសហប្រតិបត្តិការនេះបន្ថែមទៀត។ ខ្ញុំលើកឧទាហរណ៍ វិស័យពាណិជ្ជកម្ម ទំហំពាណិជ្ជកម្មឆ្នាំ២០១៤គឺមានរហូតដល់៥០០០លានដុល្លារ។ ក្នុង៥០០០លានដុល្លារនេះ គឺនាំចេញពីកម្ពុជាមកកាន់ថៃប្រមាណ ៥០០លាន ហើយនាំពីថៃទៅកាន់កម្ពុជាប្រមាណ៤៥០០លាន។ ឥឡូវរដ្ឋមន្ត្រីក្រសួងពាណិជ្ជកម្មទាំងពីរ បានដាក់ចេញនូវគោលដៅហើយដែលរដ្ឋាភិបាល រាជរដ្ឋាភិបាលនៃប្រទេសទាំងពីរគាំទ្រ គឺឆ្នាំ២០២០ត្រូវសម្រេចឲ្យបាន១៥០០០លានដុល្លារ»។
លោក ហ៊ុន សែន ថ្លែងបញ្ជាក់ថា ភាគីទាំងពីរនឹងធ្វើការបង្កើនចរាចរណ៍ដឹកទំនិញតាមផ្លូវគោក ដោយការបើកច្រកព្រំដែនថ្មីៗបន្ថែមទៀត និងការតភ្ជាប់ផ្លូវដែក ក៏ដូចជាការសម្រួលពាណិជ្ជកម្ម សម្រាប់ការជំរុញទំហំពាណិជ្ជកម្មរវាងប្រទេសទាំងពីរឲ្យដល់កម្រិតដែលបានព្រមព្រៀងគ្នា។ ជាមួយគ្នានេះ ភាគីទាំងពីរ បានឯកភាពឲ្យមានការបង្កើនរថយន្តដឹកជញ្ជូនពីចំនួន៤០គ្រឿងនាពេលបច្ចុប្បន្ននេះ ឲ្យដល់៥០០គ្រឿងនៅពេលខាងមុខនេះ។ រីឯការតភ្ជាប់ផ្លូវដែក ភាគីថៃ គឺជាអ្នកចំណាយក្នុងការសាងសង់។
សេដ្ឋវិទូនៅក្នុងប្រទេសកម្ពុជា ធ្លាប់លើកឡើងថា កម្ពុជាទំនងជាពិបាកនឹងធ្វើឲ្យមានតុល្យភាព ជញ្ជីងពាណិជ្ជកម្មជាមួយប្រទេសក្បែរខាង ជាពិសេស គឺប្រទេសថៃ ដោយសារកម្លាំងផលិតនៃឧស្សាហកម្មកម្ពុជា នៅមានលក្ខណៈទន់ខ្សោយ ហើយប្រទេសនេះ នៅពឹងផ្អែកខ្លាំងលើទំនិញនាំចូល។ ពួកគេ ឲ្យដឹងដែរថា កម្ពុជា ត្រូវធ្វើពិពិធកម្ម ឬធ្វើឲ្យមានភាពចម្រុះនៃការផលិតរបស់ខ្លួន ដោយប្រទេសកសិកម្មមួយនេះ មិនអាចផ្អែកលើតែផលិតកម្មស្រូវ និងឧស្សាហកម្មកាត់ដេរនោះឡើយ។
សេចក្ដីប្រកាសព័ត៌មាន របស់ក្រសួងការបរទេសដែលបានចេញផ្សាយកាលពីថ្ងៃសៅរ៍កន្លងទៅនេះ បានឲ្យដឹងថា ដំណើរទស្សនៈកិច្ចរយៈពេល២ថ្ងៃរបស់លោកនាយករដ្ឋមន្ត្រី ហ៊ុន សែន ទៅកាន់ប្រទេសថៃពីថ្ងៃទី១៨និង១៩ខែធ្នូនេះ នឹងជួយពង្រឹងកិច្ចសហប្រតិបត្តិការលើវិស័យកសិកម្ម សុខភាពសាធារណៈ និងកិច្ចសហប្រតិបត្តិការលើវិស័យការងារឲ្យកាន់តែមានប្រសិទ្ធភាពថែមទៀត។
ទាក់ទិនវិស័យកសិកម្ម ភាគីថៃ នឹងផ្ដល់ការគាំទ្រផ្នែកបច្ចេកទេស។ ចំណែកឯខាងសុខភាពសាធារណៈ វិញ ភាគីទាំងពីរនឹងពង្រឹងកិច្ចសហប្រតិបត្តិការ ជាពិសេសនៅតាមបណ្ដោយតំបន់ព្រំដែន រួមទាំងការអភិវឌ្ឍការបង្កើត ប្រព័ន្ធបញ្ជូនអ្នកជំងឺ ឆ្លងកាត់ព្រំដែនឲ្យមានលក្ខណៈ សាមញ្ញ និងការបង្កើតការរៀបចំ «មន្ទីរពេទ្យសម្ព័ន្ធមេត្រី ភាព»។
ភាគីថៃ នឹងផ្ដល់ការគាំទ្រផ្នែកបច្ចេកទេស ដើម្បីជួយកសាងសមត្ថភាព ដល់គ្រូពេទ្យជំនាញ និងបុគ្គលិកសុខាភិបាលសាធារណៈរបស់កម្ពុជា។
នៅក្នុងវិស័យការងារ ភាគីទាំងពីរ បានស្វាគមន៍ការចុះហត្ថលេខាលើអនុស្សរណៈនៃការយោគយល់គ្នាស្ដីពីកិច្ចសហប្រតិបត្តិការលើវិស័យការងារ និងកិច្ចព្រមព្រៀងស្ដីពីកិច្ចសហប្រតិបត្តិការលើការ ប្រើប្រាស់កម្លាំងពលកម្ម និងបានជំរុញអាជ្ញាធរពាក់ព័ន្ធអនុវត្តឲ្យបាន ពេញលេញនូវអនុស្សរណៈយោគយល់គ្នានេះ ឲ្យបានឆាប់បំផុត។
ភាគីថៃ នឹងបន្តផ្ដល់ការគាំទ្រផ្នែកបច្ចេកទេសលើការអភិវឌ្ឍជំនាញវិជ្ជាជីវៈនៅតាមបណ្ដោយព្រំដែន និងបើកវគ្គបណ្ដុះបណ្ដាលវិជ្ជាជីវៈកម្ពុជា ថៃនៅរាជធានីភ្នំពេញ។
ប្រទេសទាំងពីរ ក៏បានឯកភាពបន្តជំរុញយុទ្ធនាការ «ព្រះរាជាណាចក្រពីរ គោលដៅតែមួយ» ដើម្បីទាក់ទាញអ្នកទេសចរ បន្ថែមទៀតនៅក្នុងប្រទេសទាំងពីរ ដូចជាទីតាំងបេតិកភណ្ឌ ពិភពលោក និងតំបន់ប្រវត្តិសាស្ត្រ ក៏ដូចជាការលើកកម្ពស់ ទេសចរណ៍តាមរយៈការតភ្ជាប់ផ្លូវសមុទ្រ ជាពិសេសរវាងកម្ពុជា ថៃ និងវៀតណាម។
ភាគីទាំងពីរបានលើកទឹកចិត្តឲ្យ សមាគមមិត្តភាពនៃប្រទេសទាំងពីរ ពង្រឹងការប្រាស្រ័យទាក់ទងគ្នា ដើម្បីប្រយោជន៍ទៅវិញទៅមក និងវិបុលភាពរបស់ប្រជាជនប្រទេសទាំងពីរ។
ក្នុងកិច្ចប្រជុំគណៈរដ្ឋមន្ត្រីចម្រុះលើកទី២ កម្ពុជា ថៃដដែលនោះ លោកឧត្ដមសេនីយ៍ ប្រាយុទ្ធ ច័ន្ទអូចា ថ្លែងចំពោះមុខលោក ហ៊ុន សែន និងមន្ត្រីរដ្ឋាភិបាលនៃប្រទេសទាំងពីរថា រដ្ឋាភិបាលថៃ នឹងបន្តការទិញយកផលិតផលកសិកម្មពីកម្ពុជា ហើយថា ភាគីទាំងពីរ បានជជែកគ្នាទាក់ទិននឹងការរុករកថាមពលក្នុងបាតសមុទ្រ ដែលនឹងទាញយកមកប្រើជាប្រយោជន៍សម្រាប់ថ្ងៃខាងមុខ។
«ចំពោះវិស័យខាងការរុករកថាមពលនោះ យើងក៏បានពិភាក្សាគ្នាស៊ីជម្រៅមួយកម្រិតហើយ។ យើង នឹងបន្តធ្វើឲ្យមានតម្លាភាពដើម្បីនាំយកថាមពលដែលមាននៅក្នុងបាតសមុទ្រមកប្រើដើម្បីឲ្យបានជាប្រយោជន៍តទៅនៅក្នុងអនាគត»។
VOA ព្យាយាមទាក់ទងលោក ជុំ សុន្ទរី អ្នកនាំពាក្យក្រសួងការបរទេសកម្ពុជា ដើម្បីសុំការអធិប្បាយបន្ថែម តែនៅមិនទាន់អាចទាក់ទងបានទេ នៅថ្ងៃអាទិត្យនេះ។
យ៉ាងក៏ដោយ ក្រសួងការបរទេសប្រទេសកម្ពុជា បានឲ្យដឹងនៅក្នុងសេចក្ដីប្រកាសព័ត៌មានរបស់ខ្លួនបន្ថែមទៀតថា ភាគីទាំងពីរ បានពិនិត្យទៅលើបញ្ហាសន្តិសុខ និងកិច្ចការសំខាន់ៗជាច្រើនទៀត ទាក់ទិននឹងការតភ្ជាប់ ហើយនិងពាណិជ្ជកម្ម។
ភាគីទាំងពីរ បានឯកភាពពន្លឿនការចាប់ផ្ដើមការធ្វើល្បាត ដោយសហការគ្នានៅតាមបណ្ដោយតំបន់ព្រំដែន ដើម្បីបង្ក្រាបការ កាប់ឈើខុសច្បាប់ និងពង្រឹងបន្ថែមទៀតនូវកិច្ចសហប្រតិបត្តិការ លើការប្រយុទ្ធប្រឆាំងការជួញដូរគ្រឿងញៀន ការជួញដូរ មនុស្ស និងឧក្រិដ្ឋកម្មឆ្លងដែន។
ចំពោះការតភ្ជាប់ ភាគីទាំងពីរ បានឯកភាពកែលម្អ សេវាកម្មដឹកជញ្ជូនតាមផ្លូវថ្នល់ ឆ្នេរសមុទ្រ និងរថភ្លើង។ សេវាកម្មរថភ្លើងរវាងទីក្រុងបាងកក និងរាជធានីភ្នំពេញនឹងចាប់ផ្ដើមដំណើរការនៅដំណាច់ឆ្នាំ២០១៦។ ភាគីទាំងពីរ ក៏បានឯកភាពពន្លឿនការបើកច្រកទ្វារអន្តរជាតិថ្មីចំនួន២ នៅខេត្តបន្ទាយមានជ័យ និងខេត្តស្រះកែវ គឺច្រកស្ទឹងបត់ ណងអៀន និងច្រកអូរនាង បានប៉ារៃ ដើម្បីសម្រួលដល់ការដឹកជញ្ជូនទំនិញ និងជំរុញការអភិវឌ្ឍតំបន់សេដ្ឋកិច្ចពិសេសនៃប្រទេសទាំងពីរនៅតាមតំបន់ព្រំដែន៕
