ភ្នំពេញ៖ ដោយមានការជំទាស់ខ្លាំងពីគណបក្សប្រឆាំងបន្ទាប់ពីបានពិភាក្សាយ៉ាងតឹងតែងអស់រយៈពេលចំនួនពីរថ្ងៃ នៅទីបំផុតរដ្ឋសភារបស់ប្រទេសកម្ពុជាបានអនុម័តសេចក្តីព្រៀងច្បាប់ដ៏ចម្រូងចម្រាស់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០១៣។
សមាជិករដ្ឋសភាចំនួន៧៨រូប ក្នុងចំណោមសមាជិករដ្ឋសភាដែលមានវត្តមាន៨៨រូប បានអនុម័តជាឯកឆ្ឆ័ន្ទដោយលើកដៃដើម្បីគាំទ្រសេចក្តីព្រៀងច្បាប់សម្រាប់ថវិកាជាតិឆ្នាំ២០១៣ ក៏ប៉ុន្តែសមាជិករដ្ឋសភាមកពីគណបក្សសិទ្ធិមនុស្ស និងគណបក្សសម រង្ស៊ីមិនបានលើកដៃគាំទ្រសេចក្តីព្រៀងច្បាប់នេះទេ។
លោកស្រី មូរ សុខហ៊ួរ អ្នកតំណាងរាស្ត្រមកពីគណបក្សសម រង្ស៊ី បាននិយាយថា មូលហេតុដែលគណបក្សប្រឆាំងមិនបានគាំទ្រសេចក្តីព្រាងច្បាប់នេះ ដោយសារតែសមាជិករដ្ឋសភា និងរដ្ឋាភិបាលបានបដិសេធការទាមទាររបស់ខ្លួន។
គណបក្សប្រឆាំងបានទាមទារឲ្យរដ្ឋសភា និងរដ្ឋាភិបាលពិចារណាទៅលើប្រាក់កម្ចីនិងឲ្យមានការរៀបចំជាប្រព័ន្ធពន្ធដារច្បាស់លាស់ និងមានប្រសិទ្ធិភាព ព្រមទាំងជាទ្រព្យសម្បត្តិរបស់ប្រទេសជាតិទាំងមូល។
លោកស្រីមូរ សុខហ៊ួរបាននិយាយថា ករណីវិស័យអប់រំ និងសុខាភិបាល និងការដំឡើងប្រាប់បៀវរត្សរ៍ជូនមន្ត្រីរាជការគួរតែដំឡើងឲ្យបានដល់១លានរៀលដើម្បីឲ្យជីវភាពមន្ត្រីរាជការបានសមរម្យ។
«ដំណោះស្រាយរបស់យើងខ្ញុំគឺដំឡើងប្រាប់ខែជូនមន្ត្រីរាជការរបស់យើង គឺជាពិសេសលោកគ្រូអ្នកគ្រូរបស់យើងឲ្យបាន១លានរៀលក្នុងមួយខែ បង្កើតនូវគុណភាពនៃវិស័យអប់រំវិស័យសុខាភិបាលគឺជាសេវាដែលជាសេវាសាធារណៈមិនគួរណាឡើយឲ្យប្រជាពលរដ្ឋយើងគាត់បង់ថ្លៃនូវសេវាសាធារណៈ»។
សមាជិករដ្ឋសភាខាងគណបក្សប្រឆាំងក៏បានលើកយកបញ្ហាអំពើពុករលួយ និងការលើកយកថវិកាជាតិទៅចាយវាយខុសគោលដៅ ដូចជាការយកទៅទិញរថពាសដែក និងសម្ភារៈយោធាទំនើបៗ ដើម្បីការពារអំណាចបុគ្គល។
ការទាមទាររបស់សមាជិករដ្ឋសភាខាងគណបក្សប្រឆាំងត្រូវបានសមាជិកមកពីគណបក្សគ្រប់គ្រងអំណាចច្រានចោល ដោយបានចាត់ទុកថា ថវិកាចំណាយរបស់ជាតិមិនបានយកទៅប្រើដូចការចោទប្រកាន់នោះទេ។
លោកគាត់ ឈុន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានថ្លែងអំណរគុណដល់សមាជិករដ្ឋសភាដែលបានអនុម័តសេចក្តីព្រាងច្បាប់ស្តីពីហិរញ្ញវត្ថុសម្រាប់ការគ្រប់គ្រងឆ្នាំ២០១៣នេះ។
«អ្វីដែលយើងពិភាក្សាគ្នានៅក្រៅពីជំពូកទី១នេះ ក៏នឹងធានាបាននូវការរ៉ាប់រងពង្រឹងរបបប្រជាធិបតេយ្យពហុសេរី ពហុបក្សរបស់រាជាណាចក្រកម្ពុជាដែលមានចែងនៅក្នុងរដ្ឋធម្មនុញ្ញ ហើយដែលគ្មាននរណាមួយអាចកែប្រែបាននោះ»។
រដ្ឋសភារបស់ប្រទេសកម្ពុជាបានប្រើពេលចំនួនពីរថ្ងៃដើម្បីអនុម័តលើសេចក្តីព្រាងច្បាប់ដ៏ចម្រូងចម្រាស់មួយនេះ។ សេចក្តីព្រាងច្បាប់នេះមានចំនួនប្រាំមួយជំពូក និង១៨មាត្រា ហើយតំណាងរដ្ឋាភិបាលដែលបានចូលមកការពារសេចក្តីព្រាងច្បាប់ថវិកាជាតិឆ្នាំ២០១៣នេះ ដឹកនាំដោយលោក គាត ឈុន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ។
សេចក្តីព្រាងច្បាប់ស្តីពីហិរញ្ញវត្ថុនេះបានកំណត់ពីការចំណាយរហូតដល់ជាង១២ពាន់លានរៀលគឺស្មើនឹងប្រមាណជាង៣ពាន់លានដុល្លារសហរដ្ឋអាមេរិក។ ថវិកាចំណាយសរុបសម្រាប់ឆ្នាំ២០១៣នេះបានកើនឡើងប្រមាណ១២,៣២%នៃផលិតផលក្នុងស្រុកសរុប រីឯថវិកាចំណាយសរុបក្នុងច្បាប់ហិរញ្ញវត្ថុសម្រាប់ការគ្រប់គ្រងឆ្នាំ២០១២គឺស្មើនឹង១៩,១២%នៃផលិតផលក្នុងស្រុកសរុប៕
