ប្រធានាធិបតីសហរដ្ឋអាមេរិកលោក Joe Biden បានធានាចំពោះសមភាគីហ្វីលីពីនរបស់លោកកាលពីថ្ងៃចន្ទអំពីការតាំងចិត្តរបស់សហរដ្ឋអាមេរិកចំពោះប្រទេសហ្វីលីពីន នៅចំពេលមានភាពតានតឹងកើនឡើងជាមួយនឹងចិន។
លោក Biden បាននិយាយថា៖ «សហរដ្ឋអាមេរិកនៅតែតាំងចិត្តម៉ឺងម៉ាត់ដើម្បីការពារប្រទេសហ្វីលីពីន ដែលក្នុងនោះរួមមានទាំងសមុទ្រចិនខាងត្បូងផងដែរ ហើយសហរដ្ឋអាមេរិកនឹងបន្តគាំទ្រគោលបំណងទំនើបកម្មយោធារបស់ហ្វីលីពីន»។
មេដឹកនាំទាំងពីរបានចុះហត្ថលេខាលើកិច្ចព្រមព្រៀងសហប្រតិបត្តិការការពារថ្មីមួយកាលពីថ្ងៃចន្ទដើម្បីពង្រឹងសន្តិសុខហ្វីលីពីន និងគាំទ្រការធ្វើទំនើបកម្មយោធា។
កិច្ចព្រមព្រៀងនេះផ្អែកលើការបញ្ចប់កាលពីសប្ដាហ៍មុននូវសមយុទ្ធយោធាដ៏ធំបំផុតមិនធ្លាប់មានពីមុនមករវាងប្រទេសទាំងពីរ ក៏ដូចជាកិច្ចព្រមព្រៀងកាលពីដើមឆ្នាំនេះ ដែលហ្វីលីពីនបានយល់ព្រមផ្ដល់លទ្ធភាពដល់សហរដ្ឋអាមេរិកឱ្យប្រើប្រាស់មូលដ្ឋានកងទ័ពចំនួន ៤ បន្ថែមទៀតនៅហ្វីលីពីន។
កាលពីថ្ងៃចន្ទ ប្រធានាធិបតីហ្វីលីពីនលោក Ferdinand Marcos Jr. បាននិយាយថា ហ្វីលីពីនស្ថិតនៅជួរមុខនៃភាពតានតឹងកើនឡើងនៅសមុទ្រចិនខាងត្បូង។
លោក Marcos បញ្ជាក់ដូច្នេះថា៖ «បញ្ហាភូមិសាស្ត្រនយោបាយក៏មានផងដែរដែលធ្វើឱ្យតំបន់នេះ ដែលក្នុងនោះហ្វីលីពីនអាចស្ថិតក្នុងស្ថានការណ៍ភូមិសាស្ត្រនយោបាយដ៏ស្មុគស្មាញបំផុតនៅលើពិភពលោកនាពេលបច្ចុប្បន្ន។ ដូច្នេះហើយ វាជារឿងធម្មតាទេដែលហ្វីលីពីនសម្លឹងទៅរកសហរដ្ឋអាមេរិកដែលជាដៃគូសន្ធិសញ្ញារបស់ខ្លួនតែមួយគត់នៅលើពិភពលោកដើម្បីពង្រឹង និងកំណត់ឡើងវិញនូវទំនាក់ទំនងដែលយើងមាន និងតួនាទីដែលយើងធ្វើឡើងនៅចំពេលប្រឈមនឹងភាពតានតឹងកើនឡើងទាំងនោះដែលយើងឃើញនៅពេលឥឡូវនេះនៅជុំវិញសមុទ្រចិនខាងត្បូង និងតំបន់អាស៊ីប៉ាស៊ីហ្វិក និងតំបន់ឥណ្ឌូប៉ាស៊ីហ្វិក»។
ប្រទេសចិនបានយាយីម្ដងហើយម្ដងទៀតលើកងល្បាតទាហានជើងទឹកនិងកងល្បាតឆ្មាំសមុទ្រហ្វីលីពីន និងប្រឆាំងនឹងវិធីសាស្ត្ររបស់ហ្វីលីពីន។
នៅក្នុងសេចក្ដីថ្លែងការណ៍រួម លោក Biden និងលោក Marcos ក៏បានបញ្ជាក់ផងដែរថា លោកទាំងពីរនឹងធ្វើការរួមគ្នាក្នុងនាមជាសម្ព័ន្ធមិត្តលើកិច្ចប្រឹងប្រែងដូចនេះដើម្បីលើកកម្ពស់ «វិបុលភាពប្រកបដោយបរិយាបន្ននិងទូលំទូលាយ» វិនិយោគលើ «ការផ្លាស់ប្ដូរទៅរកថាមពលស្អាត» ប្រយុទ្ធប្រឆាំងនឹងការប្រែប្រួលអាកាសធាតុ ទ្រទ្រង់សន្តិភាពនិងស្ថិរភាពអន្តរជាតិ និងធានាឱ្យមានការគោរពសិទ្ធិមនុស្សនិងនីតិរដ្ឋ៕
អ្នកស្រី Nike Ching រួមចំណែកនៅក្នុងសេចក្តីរាយការណ៍នេះ។
