ប្រធានាធិបតីសហរដ្ឋអាមេរិក លោក Joe Biden នៅថ្ងៃព្រហស្បតិ៍នេះ បានអំពាវនាវឲ្យដោះលែងជាបន្ទាន់ ប្រធានាធិបតីនីហ្សេ លោក Mohamed Bazoum ដែលត្រូវបានបណ្តេញចេញពីអំណាចដោយរដ្ឋប្រហារយោធាមួយកាលពីសប្តាហ៍មុន។
លោក Biden បាននិយាយក្នុងសេចក្តីថ្លែងការណ៍មួយថា ប្រទេសនីហ្សេ «កំពុងប្រឈមនឹងបញ្ហាធ្ងន់ធ្ងរចំពោះលទ្ធិប្រជាធិបតេយ្យរបស់ខ្លួន»។
លោក Biden និយាយថា៖ «ពលរដ្ឋនីហ្សេ មានសិទ្ធិជ្រើសរើសមេដឹកនាំរបស់ខ្លួន។ ពួកគេបានសម្តែងឆន្ទៈតាមរយៈការបោះឆ្នោតដោយសេរីនិងយុត្តិធម៌ ហើយគេត្រូវតែគោរពឆន្ទៈនោះ»។
បណ្តាប្រមុខការពារជាតិមកពីប្លុកប្រទេស ១៥ ក្នុងទ្វីបអាហ្វ្រិកខាងលិច ហៅកាត់ថា ECOWAS គ្រោងនឹងបញ្ចប់ការចរចានៅថ្ងៃទី ២ ក្នុងប្រទេសនីហ្សេរីយ៉ា ដែលនៅជាប់ខាងនីហ្សេអំពីស្ថានការណ៍រដ្ឋប្រហារនេះ។
ប៉ុន្មានថ្ងៃក្រោយរដ្ឋប្រហារ សហគមន៍ ECOWAS បានដាក់ទណ្ឌកម្មលើមេដឹកនាំរដ្ឋប្រហារ ហើយបានកំណត់កាលបរិច្ឆេទត្រឹមថ្ងៃអាទិត្យ ឲ្យលើកលោក Bazoum ធ្វើជាប្រធានាធិបតីឡើងវិញ បើមិនដូច្នោះទេ អាចនឹងមានការប្រើប្រាស់កម្លាំងយោធា។
លោកនាយឧត្តមសេនីយ៍ Abdourahamane Tchiani ដែលបានប្រកាសខ្លួនឯងថាជាប្រមុខរដ្ឋថ្មី បានថ្លែងផ្សាយតាមទូរទស្សន៍កាលពីថ្ងៃពុធម្សិលមិញថា ក្រុមយោធា«ទាត់ចោលទណ្ឌកម្ម ទាំងស្រុង ហើយបដិសេធមិនចុះញ៉មនឹងការគំរាមណាមួយទេ មិនថាវាមកពីណាក៏ដោយ។ យើងបដិសេធការជ្រៀតជ្រែកកិច្ចការផ្ទៃក្នុងរបស់នីហ្សេ»។
លោក Abdel-Fatau Musah ស្នងការទទួលបន្ទុកកិច្ចការនយោបាយ សន្តិភាព និងសន្តិសុខនៃសហគមន៍ ECOWAS បានប្រាប់ក្រុមអ្នកយកព័ត៌មានក្នុងទីក្រុងអាប៊ូហ្សាកាលពីថ្ងៃពុធថា ជម្រើសយោធាគឺជា «ជម្រើសចុងក្រោយ» សម្រាប់ប្លុកប្រទេសនៅទ្វីបអាហ្វ្រិកខាងលិចនេះ។ តែលោក Musah និយាយថា គេត្រូវតែត្រៀមសម្រាប់លទ្ធភាពនៃការប្រើយោធា។
ប្រទេសអង់គ្លេស បាននិយាយនៅថ្ងៃព្រហស្បតិ៍នេះថា ខ្លួនបានកាត់បន្ថយបុគ្គលិកស្ថានទូតរបស់ខ្លួនក្នុងរដ្ឋធានីនីញ៉ាម៉េ ប្រទេសនីហ្សេ ជាបណ្តោះអាសន្ន ដោយសារបារម្ភពីសន្តិសុខ។
កាលពីថ្ងៃពុធ សហរដ្ឋអាមេរិក បាននិយាយថា ខ្លួនបានបញ្ជាឲ្យ «បុគ្គលិករដ្ឋាភិបាលសហរដ្ឋអាមេរិកដែលគ្មានកាតព្វកិច្ចបន្ទាន់ និងសមាជិកគ្រួសាររបស់ពួកគេដែលត្រូវលក្ខណៈសម្បត្តិ ចាកចេញពីស្ថានទូតអាមេរិកក្នុងរដ្ឋធានីនីញ៉ាម៉េជាបណ្តោះអាសន្ន»។ សហរដ្ឋអាមេរិកក៏បានដំឡើងកម្រិតហានិភ័យនៃការធ្វើដំណើរដល់កម្រិត ៤ ឬកុំធ្វើដំណើរ ទៅកាន់ប្រទេសនីហ្សេ៕
ព័ត៌មានខ្លះក្នុងសេចក្តីរាយការណ៍នេះ មានប្រភពពីទីភ្នាក់ងារសារព័ត៌មាន The Associated Press, Agence France-Presse និង Reuters
