សហគមន៍អន្តរជាតិបានបញ្ជូនសារយ៉ាងច្បាស់មួយទៅកាន់រដ្ឋាភិបាលរុស្ស៊ីកាលពីថ្ងៃពុធ ដោយប្រកាសថា ការធ្វើប្រជាមតិនិងការដាក់បញ្ចូលរបស់ប្រទេសរុស្ស៊ីនូវតំបន់ ៤ របស់ប្រទេសអ៊ុយក្រែនជាផ្នែកមួយរបស់ខ្លួន គឺជាអំពើខុសច្បាប់និងមិនមានសុពលភាពនៅក្រោមច្បាប់អន្តរជាតិ។
នៅក្នុងការបង្ហាញការគាំទ្រខ្លាំងក្លាបំផុតលើប្រទេសអ៊ុយក្រែនតាំងពីការឈ្លានពានរបស់រុស្ស៊ីលើអ៊ុយក្រែនកាលពីថ្ងៃទី ២៤ ខែកុម្ភៈមក មហាសន្និបាតអង្គការសហប្រជាជាតិបានបោះឆ្នោតគាំទ្រក្នុងសំឡេង ១៤៣ ទល់នឹង ៥ ដើម្បីអនុម័តលើសេចក្ដីសម្រេចមួយថ្កោលទោសនិងច្រានចោលវិធានការរបស់រុស្ស៊ីនៅក្នុងការភ្ជាប់យកដែនដីរបស់អ៊ុយក្រែននេះ។
ប្រទេសចំនួន ៣៥ បានបោះឆ្នោតអនុបវាទ ហើយប្រទេសដែលបោះឆ្នោតគាំទ្រប្រទេសរុស្ស៊ីគឺប្រទេសបេឡារុស កូរ៉េខាងជើង ស៊ីរី និងនីការ៉ាហ្គា។
នៅក្នុងសារតាម Twitter ប្រធានាធិបតីអ៊ុយក្រែនលោក Volodymyr Zelenskyy បានថ្លែងអំណរគុណដល់បណ្ដាប្រទេសដែលគាំទ្រលើសេចក្ដីសម្រេចនេះ ដែលលោកហៅថាជា «សេចក្ដីសម្រេចជាប្រវត្តិសាស្ត្ររបស់មហាសន្និបាតអង្គការសហប្រជាជាតិ»។
ឯកអគ្គរដ្ឋទូតអ៊ុយក្រែនប្រចាំអង្គការសហប្រជាជាតិលោក Sergiy Kyslytsya បានប្រាប់អ្នកកាសែតថា លទ្ធផលនៃការបោះឆ្នោតរបស់មហាសន្និបាតអង្គការសហប្រជាជាតិនេះគឺ «អស្ចារ្យ»។
លោក Kyslytsya បាននិយាយថា៖ «ខ្ញុំគិតថា ប្រទេសទាំងនោះបានសម្រេចចិត្តត្រឹមត្រូវនៅក្នុងការការពារគោលការណ៍របស់ធម្មនុញ្ញអង្គការសហប្រជាជាតិនិងនៅក្នុងការអនុវត្តតាមធម្មនុញ្ញនេះ»។
ប្រធានាធិបតីសហរដ្ឋអាមេរិកលោក Joe Biden បានសាទរចំពោះការបោះឆ្នោតលើសេចក្ដីសម្រេចនេះ ដោយបាននិយាយថា៖ «មតិភាគច្រើនលើសលប់នៅលើពិភពលោក...បានបោះឆ្នោតការពារធម្មនុញ្ញអង្គការសហប្រជាជាតិនិងថ្កោលទោសការប៉ុនប៉ងខុសច្បាប់របស់ប្រទេសរុស្ស៊ីនៅក្នុងការភ្ជាប់យកដែនដីអ៊ុយក្រែនតាមរយៈការប្រើកម្លាំង។ ...ពិភពលោកទើបបានបង្ហាញឱ្យឃើញថាខ្លួនមានការរួបរួមជាងមុន និងមានការតាំងចិត្តជាងពេលណាៗទាំងអស់នៅក្នុងការធ្វើឱ្យរដ្ឋាភិបាលរុស្ស៊ីទទួលខុសត្រូវចំពោះការបំពានរបស់ខ្លួន»៕
មហាសន្និបាតអង្គការសហប្រជាជាតិបោះឆ្នោតច្រានចោលការភ្ជាប់យករបស់រុស្ស៊ីនូវដែនដីរបស់អ៊ុយក្រែន
ទីក្រុង New York សហរដ្ឋអាមេរិក —
