ភ្នំពេញ៖ ប្រទេសកម្ពុជានឹងនាំយកកិច្ចព្រមព្រៀងបទឈប់បាញ់ជាអចិន្ត្រៃយ៍ទៅកាន់កិច្ចប្រជុំថ្នាក់រដ្ឋមន្ត្រីការបរទេសអាស៊ាននៅក្នុងទីក្រុងហ្សាកាតានៅសប្តាហ៍ក្រោយ។ សំណើឈប់បាញ់នេះបានស្នើឡើងដោយលោកនាយករដ្ឋមន្ត្រីហ៊ុន សែន ប៉ុន្តែលោកនាយករដ្ឋមន្ត្រីថៃបានបដិសេធ។ ក្រុមអ្នកសង្កេតការណ៍សង្ស័យថា កិច្ចព្រមព្រៀងបទឈប់បាញ់នេះអាចនឹងទទួលបរាជ័យ។
លោករដ្ឋមន្ត្រីការបរទេសហោ ណាំហុងកំពុងរៀបចំខ្លួនចូលរួមនៅក្នុងកិច្ចប្រជុំថ្នាក់រដ្ឋមន្ត្រីការបរទេសអាស៊ាននៅក្នុងទីក្រុងហ្សាកាតា នៅសប្តាហ៍ក្រោយនេះ។ ក្រុមអ្នកសង្កេតការណ៍បាននិយាយនៅថ្ងៃសុក្រនេះថា កិច្ចព្រមព្រៀងបទឈប់បាញ់នឹងមានភាពស្មុគស្មាញនិង ប្រហែលជាមិនអាចទទួលជោគជ័យបានទេ។
លោកអ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជា បានថ្លែងថា អាស៊ានមិនអាចបញ្ជូនអ្នកសង្កេតការណ៍មកកាន់តំបន់ជម្លោះព្រំដែនរវាងប្រទេសកម្ពុជានិងប្រទេសថៃបានទេ បើមានប្រទេសណាមួយនៅក្នុងសមាគមអាស៊ានវេតូ ឬប្រឆាំងនោះ។
«ការស្នើសុំបទឈប់បាញ់ជាអចិន្ត្រៃយ៍ដោយលោកនាយករដ្ឋមន្ត្រីហ៊ុន សែនគឺជាយន្តការមួយសម ស្រប។ លទ្ធផលនៃការសម្រេចលើកិច្ចព្រមព្រៀងបទឈប់បាញ់នេះនឹងមានការស្មុគស្មាញ។ ប៉ុន្តែបន្ទុកសម្ពាធ ដំបូងនឹងធ្លាក់ទៅលើអាស៊ាន និងបន្ទាប់មកធ្លាក់ទៅលើប្រទេសថៃ ហើយប្រទេសថៃ គ្មានជម្រើសណាដែលចំណេញទេ ក្នុងពេលបច្ចុប្បន្ននេះ ដោយសារតាមផ្លូវច្បាប់ យើងឈ្នះ។ ដូច្នេះប្រទេសថៃឆ្លើយតបយ៉ាងម៉េចក៏យើងឈ្នះដែរ»។
ប្រទេសសមាគមអាស៊ានមានប្រទេសប្រូណេ ប្រទេសកម្ពុជា ប្រទេសឥណ្ឌូនេស៊ី ប្រទេសលាវ ប្រទេសម៉ាឡេស៊ី ប្រទេសភូមា ប្រទេសហ្វីលីពីន ប្រទេសសិង្ហបូរី ប្រទេសថៃ និងប្រទេសវៀតណាម។
លោកហង្ស ឆៃយ៉ា នាយកប្រតិបត្តិនៃវិទ្យាស្ថានខ្មែរដើម្បីលទ្ធិប្រជាធិបតេយ្យ បានថ្លែងថា លទ្ធផលនៃសេចក្តីសម្រេចអំពីកិច្ចព្រមព្រៀងបទឈប់បាញ់នេះនឹងមានលក្ខណៈជាពាក្យសន្យា ប៉ុន្តែមិនអាចមើលឃើញនូវអ្វីដែលជាយន្តការច្បាស់លាស់សម្រាប់បញ្ជូនអ្នកសង្កេតការណ៍មកត្រួតពិនិត្យបទឈប់បាញ់រវាងប្រទេសកម្ពុជា និងប្រទេសថៃនោះទេ។
«អាស៊ានអត់មានកាតព្វកិច្ចសំខាន់ផ្នែកសន្តិសុខទេ។ ម៉្លោះហើយវាអត់ប្រយោជន៍ទេ។ អាស៊ានមិនដែលមានបទពិសោធន៍ ឬ កាតព្វកិច្ចផ្នែកសន្តិសុខ ដើម្បីដោះស្រាយបញ្ហាជម្លោះរវាងប្រទេសកម្ពុជា និងថៃទេ។ អាស៊ានអត់មានអំណាច អត់មានយន្តការ អត់មានកាតព្វកិច្ច អត់មានធនធាន អត់មានកម្លាំងសន្តិសុខជួយបានទេ។ អាស៊ាននិយាយតែនឹងមាត់ និងនយោបាយ»។
លោកកុយ គួង អនុរដ្ឋលេខាធិការ និងជាអ្នកនាំពាក្យក្រសួងការបរទេសកម្ពុជា បានថ្លែងថា លោករដ្ឋមន្ត្រីការបរទេសឥណ្ឌូនេស៊ី Marty Natalegawa ប្រធានអាស៊ានបានគាំទ្រកិច្ចព្រមព្រៀងបទឈប់បាញ់ថ្នាក់រដ្ឋមន្ត្រីការបរទេសអាស៊ាននេះ។
«បទឈប់បាញ់ជាអចិន្ត្រៃយ៍គឺជាចំណុចសំខាន់មួយក្នុងចំណោមចំណុចសំខាន់ផ្សេងៗនៅក្នុងកិច្ចប្រជុំថ្នាក់រដ្ឋមន្ត្រីការបរទេសអាស៊ាននៅសប្តាហ៍ក្រោយ ពីព្រោះបទឈប់បាញ់ជាអចិន្ត្រៃយ៍ គឺជាអនុសាសន៍ជាអាទិភាពរបស់ក្រុមប្រឹក្សាសន្តិសុខអង្គការសហប្រជាជាតិ។ មុននឹងយើងដោះស្រាយបញ្ហាអ្វីក៏ដោយ យើងត្រូវការទាមទារឱ្យមានសន្តិសុខ និងសន្តិភាពជាអចិន្ត្រៃយ៍សិន»។
លោកនាយករដ្ឋមន្ត្រីហ៊ុន សែនស្នើសុំឱ្យប្រទេសថៃចុះហត្ថលេខាលើកិច្ចព្រមព្រៀងបទឈប់បាញ់នៅកិច្ចប្រជុំថ្នាក់រដ្ឋមន្ត្រីការបរទេសអាស៊ាននៅថ្ងៃទី២២ ខែកុម្ភៈ។ ប៉ុន្តែលោកនាយករដ្ឋមន្ត្រីថៃ Abhisit Vejjajiva បានបដិសេធសំណើបទឈប់បាញ់នេះ។
ក្រុមប្រឹក្សាសន្តិសុខអង្គការសហប្រជាជាតិ កាលពីថ្ងៃច័ន្ទ បានសម្តែងការព្រួយបារម្ភយ៉ាងខ្លាំងអំពីការវាយប្រយុទ្ធគ្នារវាងកងទ័ពកម្ពុជា និងកងទ័ពថៃថ្មីៗនេះ នៅតំបន់ព្រំដែនក្បែរប្រាសាទព្រះវិហារ និងបានអំពាវនាវដល់ភាគីទាំងពីរឱ្យបង្កើតបទឈប់បាញ់ជាអចិន្ត្រៃយ៍ និងដោះស្រាយជម្លោះដោយសន្តិវិធី៕
