នាយកមជ្ឈមណ្ឌលគ្រប់គ្រងនិងបង្ការជំងឺ (CDC) របស់សហរដ្ឋអាមេរិកអ្នកស្រី Rochelle Walensky បាននិយាយកាលពីថ្ងៃពុធថា ចំនួនអ្នកស្លាប់និងអ្នកសម្រាកនៅមន្ទីរពេទ្យរហូតមកដល់ពេលនេះមានកម្រិតទាបខណៈវីរុសបំប្លែងថ្មីប្រភេទអូមីក្រុង (omicron) កំពុងរាលដាល។ នេះបើតាមទីភ្នាក់ងារសារព័ត៌មាន Reuters។
ថ្លែងអំពីករណីទូទៅ អ្នកស្រីបាននិយាយថា៖ «ក្នុងរយៈពេលខ្លីតែពីរបីសប្តាហ៍វីរុសអូមីក្រុងបានកើនឡើងយ៉ាងឆាប់រហ័សនៅទូទាំងប្រទេសហើយយើងរំពឹងថា វានឹងបន្តរាលដាលនៅក្នុងសប្តាហ៍ខាងមុខនេះ។ ខណៈការឆ្លងបានកើនឡើងយ៉ាងខ្លាំងពីសប្តាហ៍មុន ការព្យាបាលនៅមន្ទីរពេទ្យនិងការស្លាប់នៅតែមានកម្រិតទាបនាពេលនេះ»។
អ្នកស្រី Walensky បានប្រាប់អ្នកយកព័ត៌មានថា មធ្យមភាគនៃការឆ្លងប្រចាំថ្ងៃរយៈពេលមួយសប្តាហ៍បច្ចុប្បន្ននេះគឺកើនឡើង៦០% បើប្រៀបធៀបនឹងសប្តាហ៍មុនគឺឡើងដល់ប្រហែល២៤០.៤០០ករណីក្នុងមួយថ្ងៃ។ អ្នកស្រីបន្តថា អត្រាចូលព្យាបាលនៅមន្ទីរពេទ្យប្រចាំថ្ងៃជាមធ្យមក្នុងរយៈពេលដូចគ្នាកើនឡើង១៤%គឺប្រហែល៩.០០០នាក់ក្នុងមួយថ្ងៃហើយការស្លាប់បានធ្លាក់ចុះប្រហែល៧%មកនៅត្រឹម១.១០០ក្នុងមួយថ្ងៃ។
ចំនួនឆ្លងជាមធ្យមដែលត្រូវបានបញ្ជាក់ប្រចាំថ្ងៃនៅសហរដ្ឋអាមេរិកបានឡើងដល់កំណត់ត្រាថ្មីកាលពីថ្ងៃពុធ។ ទិន្នន័យពីដំបូងនៅសហរដ្ឋអាមេរិកនិងកន្លែងផ្សេងទៀតបង្ហាញថា អត្រាអ្នកជំងឺព្យាបាលនៅមន្ទីរពេទ្យដោយសារវីរុសអូមីក្រុងនឹងមានសមាមាត្រទាបជាងវីរុសប្រភេទដែលតា(Delta)។ នេះបើតាមលោក Anthony Fauci ប្រធានផ្នែកជំងឺឆ្លងថ្លែងនៅសន្និសីទសារព័ត៌មាន។ លោកថាវ៉ាក់សាំងដូសជំរុញនឹងមានសារៈសំខាន់ក្នុងការដោះស្រាយបញ្ហានេះ។
លោកបាននិយាយថា៖ «សូចនាករទាំងអស់ចង្អុលបង្ហាញថា វីរុសអូមីក្រុងមិនធ្ងន់ធ្ងរដូចវីរុសដែលតាទេ»។ លោក Fauci និងអ្នកស្រី Walensky បាននិយាយថា ទិន្នន័យស្តីពីការស្លាប់និងការសម្រាកព្យាបាលនៅមន្ទីរពេទ្យមានទំនោរត្រឹមពីរសប្តាហ៍។
លោក Fauci បាននិយាយថា សហរដ្ឋអាមេរិក អាចត្រូវចាក់វ៉ាក់សាំងជំរុញដូសទី២ ប៉ុន្តែគេមិនអាចដឹងទេលុះត្រាបានកំណត់ត្រាអំពីអង្គបដិប្រាណជំរុញដោយវ៉ាក់សាំងជំរុញដូសដំបូងសិន។
លោកបានមានប្រសាសន៍ថា៖ «ឥឡូវនេះយើងមិនមានព័ត៌មាននោះទេ។ យើងអាចទៅរួចដែលថា នៅពេលអនាគតយើងអាចនឹងត្រូវចាក់វ៉ាក់សាំងបន្ថែមទៀតប៉ុន្តែឥឡូវនេះយើងសង្ឃឹមថាយើងនឹងទទួលបានកម្រិតការពាររឹងមាំវ៉ាក់សាំងដូសជំរុញនោះ»។
លោក Fauci ក៏បានប៉ាន់ប្រមាណថាការឆ្លងជំងឺដោយសារវីរុសអូមីក្រុងនឹងឡើងដល់កម្រិតកំពូលនៅចុងខែមករា៕
