អ្នកវិភាគយល់ថា គណបក្សប្រជាជនកម្ពុជាកំពុងស្ថិតក្នុងរបត់ផ្លាស់ប្តូរមួយបន្ទាប់ពីមរណភាពរបស់អតីតប្រធានគណបក្សគឺលោក ជា ស៊ីម ខណៈពេលដែលគណបក្សប្រជាជនកម្ពុជា ដែលមានវ័យចំណាស់នេះគ្រោងបារព្ធខួបអនុស្សាវរីយ៍នៃការបង្កើតគណបក្សនេះនាថ្ងៃអាទិត្យខាងមុខ។
អ្នកវិភាគយល់ថា ការផ្លាស់ប្ដូរទាំងនេះ រួមការប្រមូលផ្តុំអំណាចរបស់លោកនាយករដ្ឋមន្ត្រី ហ៊ុន សែន នៅក្នុងការគ្រប់គ្រងគណបក្ស និងការប្រកួតប្រជែងរកសំឡេងឆ្នោតនាពេលខាងមុខ។
មិនបានប៉ុន្មានថ្ងៃ បន្ទាប់ពីលោក ជា ស៊ីម អតីតប្រធានគណបក្សប្រជាជនកម្ពុជា និងជាអ្នកនយោបាយនិយមកណ្តាល បានលាចាកលោកទៅ សមាជិកអចិន្ត្រៃយ៍នៃគណបក្សប្រជាជនកម្ពុជាបានផ្លាស់ប្តូររូបសញ្ញាគណបក្សនេះពីថ្នាក់ដឹកនាំ៣រូបមកពីររូបវិញ ដោយនៅសល់តែរូបលោកនាយករដ្ឋមន្ត្រីហ៊ុន សែន និងលោក ហេង សំរិន ប្រធានកិត្តិយស។
កាលពីថ្ងៃសៅរ៍កន្លងទៅ លោកហ៊ុន សែនត្រូវបានសន្និបាតគណៈកម្មាធិការកណ្តាលជ្រើសរើសជាប្រធានគណបក្ស ខណៈពេលដែលលោក ស ខេង និងលោក សាយ ឈុំ ត្រូវកាន់តំណែងអនុប្រធានគណបក្សដូចគ្នា។ ស្លាកបដាធំៗដែលមានរូបលោកហ៊ុន សែន និងលោកហេង សំរិន ត្រូវបានគេដាក់បង្ហាញជាសាធារណៈក្នុងសប្ដាហ៍នេះ ដោយមិនបានបញ្ចូលរូបអនុប្រធានថ្មីពីររូបដែលទើបនឹងត្រូវបានជ្រើសរើសនោះទេ។
អ្នកស្រាវជ្រាវនិងជាអ្នកវិភាគបញ្ហាសង្គមគឺលោកកែម ឡីបានប្រាប់វីអូអេថា ការផ្តាស់ប្តូរនេះនឹងអាចនាំឲ្យលោកហ៊ុន សែនទទួលបានអំណាចកាន់តែខ្លាំងនៅក្នុងប្រទេសកម្ពុជា ក៏ប៉ុន្តែវាក៏អាចប្រែជាអរិភាពនៅក្នុងគណបក្សដែរ ប្រសិនបើលោកហ៊ុន សែនមិនធ្វើការបែងចែកតំណែងឲ្យបានត្រឹមត្រូវនោះ។
«ខ្ញុំគិតស្អីៗ វាមានការផ្លាស់ប្តូរ។ វាមានការប្រែប្រួល។ វាអាចល្អគ្រាន់ជាងមុន ដោយសារកាលពីមុន គាត់ធ្វើទៅវាប៉ះខែ្សនេះ ខ្យែនោះ។ អញ្ចឹងដល់ឥឡូវគឺវាមានតែមួយខ្សែ គាត់កែទៅ វាអាចមានប្រសិទ្ធភាពជាងមុន ឬពេលដែលគាត់កែខ្លាំងពេកអាចមានបញ្ហាដែរ ឧទាហរណ៍ ដូចជាដកអង្គរក្សទៅបន្ទាយវិញ និងមានការដកទីប្រឹក្សាអីហ្នឹង វាអាចមានបញ្ហាដែរបើគាត់ធ្វើមិនស្រួលនោះ»។
កាលពីថ្ងៃច័ន្ទ កន្លងទៅ ទីប្រឹក្សារបស់លោកជា ស៊ីមមួយចំនួនត្រូវបានបញ្ចប់តំណែងរបស់ខ្លួន និងមានខ្លះត្រូវបានតែងតាំងឡើងវិញជាទីប្រឹក្សារបស់លោកសាយ ឈុំជំនួសវិញ ដោយមានឋានៈចាប់ពីអគ្គនាយករហូតដល់ទេសរដ្ឋមន្ត្រី។
បើទោះជាមានការប្រមូលកម្លាំងរបស់គណបក្សប្រជាជនឡើងវិញក៏ដោយ តែលោកកែម ឡីយល់ថា បរិបទនិងរបៀបគ្រប់គ្រងរបស់គណបក្សដែលមានវ័យចំណាស់នេះ នៅតែដដែល ដោយអំណាចធំគឺប្រមូលផ្តុំនៅក្នុងគណៈធម្មាធិការអចិន្ត្រៃយ៍ ហើយក្តីសម្រេចគឺលើប្រធានគណបក្សនោះនៅដដែល។
លោកសុខ ឦសាន អ្នកនាំពាក្យគណបក្សប្រជាជនកម្ពុជា បានទទួលស្គាល់ថា អំណាចទាំងស្រុងកំពុងតែប្រមូលផ្តុំលើលោកនាយករដ្ឋមន្រ្តី ហ៊ុន សែន ដែលជាប្រធានគណបក្សថ្មី ជ្រើសរើសដោយសមាជិកគណៈធម្មាធិការកណ្ដាលកាលពីថ្ងៃសៅរ៍កន្លងទៅ។
«មិនបាច់វិភាគទេ អាហ្នឹងគេមើលឃើញហើយថា គឺអំណាចទាំងអស់គឺធ្លាក់ទៅលើប្រធាន ហើយប្រធានហ្នឹងគឺប្រធានគណៈកម្មាធិការអចិន្ត្រៃយ៍ ដែលចេញពីគណៈកម្មាធិការកណ្ដាលហ្នឹងគឺគេជ្រើសរើសចេញមកអញ្ចឹង»។
លោកបានបន្ថែមថា ការផ្លាស់ប្តូររូបភាពរបស់គណបក្សប្រជាជនកម្ពុជានោះក៏តាមការសម្រេចនៃមហាសន្និបាតកាលពីថ្ងៃសៅរ៍កន្លងទៅដែរ។
ដោយឡែកលោក អ៊ូ វីរៈ ប្រធាននៃវេទិកាអនាគតដែលជាមជ្ឈមណ្ឌលស្រាវជ្រាវគោលនយោបាយក្នុងស្រុក បានយល់ថា ការផ្លាស់ប្តូរផ្ទៃក្នុងនៃគណបក្សប្រជាជនកម្ពុជានោះវាគ្មានអ្វីប្លែកទេសម្រាប់រូប ដោយលោកយល់ថា អំណាចទាំងអស់នឹងត្រូវធ្លាក់ក្នុងដៃរបស់លោកហ៊ុន សែន ហើយ ស្លាកសញ្ញាគណបក្សប្រជាជនកម្ពុជាទៀតសោតនឹងអាចនៅសល់ត្រឹមតែលោកហ៊ុន សែន។ បើទោះជាយ៉ាងនេះក៏ដោយ លោកយល់ថា ការប្រមូលប្រជាប្រិយភាពពីប្រជាជនគឺជាការសំខាន់ជាងការចែកអំណាចក្នុងគណបក្ស។
«និយាយរួមទៅគឺមិនបញ្ហាទេ ព្រោះវាជាផ្ទៃក្នុងគណបក្ស។ ចំពោះខ្ញុំ ឲ្យតែមានការប្រកួតប្រជែងនៅក្រៅគណបក្ស និងមានគណបក្សដទៃគេអាចប្រកួតប្រជែងតាមរយៈការបោះឆ្នោតឲ្យបានត្រឹមត្រូវនោះណា៎គឺល្អហើយ។ អញ្ចឹងគណបក្សណាក៏ដោយ ក៏ត្រូវតែកែទម្រង់ឲ្យខ្លាំងដែរ ហើយបើទោះជាមានការដឹកនាំរបៀបម៉េច តាមបុគ្គលក៏ដោយ តាមជាក្រុមក៏ដោយ អាហ្នឹងគឺជាសិទ្ធរបស់គណបក្សទេ។ ហើយវាមិនមានប៉ះពាល់ប៉ុន្មានទេ។ តាមពិតទៅសំខាន់ភាពប៉ះពាល់ទាំងឡាយគឺវាទាក់ទងនឹងការប្រកួតប្រជែងនៅក្រៅគណបក្សនយោបាយ ប្រកួតប្រជែងតាមរយៈការបោះឆ្នោតទេ»។
ស្របពេលនេះដែរ លោកកែម ឡីបានយល់ថា គណបក្សប្រជាជនកម្ពុជានឹងអាចប្រឈមជាមួយការរីកដុះដាលនិងប្រជាប្រិយភាពរបស់គណបក្សសង្គ្រោះជាតិ ដែលជាដៃគូធំរបស់គេនោះ។
គណបក្សប្រជាជនកម្ពុជា ដែលកាន់អំណាចជាង៣០ឆ្នាំមកហើយនោះ ត្រូវបានបង្កើតឡើងនាថ្ងៃទី២៨ខែមិថុនាឆ្នាំ១៩៥១ ក្រោមឈ្មោះថា«គណបក្សប្រជាជនបដិវត្តន៍កម្ពុជា»។ គណបក្សប្រជាជនកម្ពុជាបច្ចុប្បន្ននេះ ដែលគេស្គាល់ថា ជាអតីតគណបក្សកុម្មុយនិស្តដ៏ធំនៅក្នុងប្រទេសកម្ពុជានេះ បានឡើងកាន់អំណាចចាប់តាំងពីដើមឆ្នាំ១៩៧៩មកម្ល៉េះ បន្ទាប់ពីកងទ័ពវៀតណាមបានផ្តួលរំលំរបបវាលពិឃាតកម្ពុជាប្រជាធិបតេយ្យ ឬប៉ុល ពតដ៏សាហាវឃោរឃៅ៕
