របាយការណ៍របស់អង្គការសិទ្ធិការងារ China Labor Watch ដែលមានមូលដ្ឋាននៅក្នុងទីក្រុង New York សហរដ្ឋអាមេរិក បានរកឃើញថា រោងចក្រដែលប្រើដោយក្រុមហ៊ុន Foxconn ដែលជាក្រុមហ៊ុនផ្គត់ផ្គង់ឧបករណ៍អេឡិចត្រូនិកដល់ក្រុមហ៊ុន Amazon នេះ ពឹងផ្អែកលើកម្មសិក្សាការីដែលជាសិស្សអាយុចន្លោះ ១៦ ទៅ ១៨ ឆ្នាំ ចំនួន ១ ពាន់ ៥ រយនាក់ ឲ្យធ្វើការថែមម៉ោង និងវេនយប់។
អង្គការនេះបានបញ្ជាក់ថា ការធ្វើដូច្នេះគឺជាអំពើខុសច្បាប់នៅក្រោមច្បាប់ការងាររបស់ប្រទេសចិន ដែលកំណត់ពេលវេលា និងលក្ខខណ្ឌសម្រាប់អ្នកធ្វើការដែលជាក្មេងជំទង់។
លោក Li Qiang ដែលជានាយកប្រតិបត្តិ និងស្ថាបនិកនៃអង្គការ China Labor Watch បានប្រាប់ VOA ថា៖ «ក្រុមហ៊ុន Amazon និងក្រុមហ៊ុន Foxconn គួរតែអនុញ្ញាតឲ្យទីភ្នាក់ងារឯករាជ្យផ្សេងៗតាមដានមើលស្ថានភាពការងារនៃរោងចក្រពាក់ព័ន្ធនានា។ មានតែវិធីនេះទេ ដែលអាចការពារមិនឲ្យមានការរំលោភបំពានលើច្បាប់ការងារកើតឡើងបាន និងអាចដោះស្រាយបញ្ហាប្រកបដោយប្រសិទ្ធភាព»។
របាយការណ៍នេះក៏បានលើកឡើងផងដែរថា បុគ្គលិកកម្មសិក្សាការីដែលជានិស្សិតនៅឯរោងចក្រ Hengyang របស់ក្រុមហ៊ុន Foxconn នៅភាគខាងកើតប្រទេសចិននេះ ទទួលបានប្រាក់កម្រៃទាប និងផលប្រយោជន៍តិចតួចជាងបុគ្គលិកដែលមិនមែនជានិស្សិត។ របាយការណ៍នេះបានបញ្ជាក់ថា បុគ្គលិកប្រហែល ២០ ភាគរយ នៃរោងចក្រនេះគឺជាកម្មសិក្សាការីដែលជានិស្សិត ដែលជាចំនួនទ្វេដងលើសពីការកំណត់ឲ្យផ្លូវច្បាប់។
រោងចក្រនេះផលិតឧបករណ៍មានប្រជាប្រិយមួយចំនួនរបស់ក្រុមហ៊ុន Amazon ដូចជា Echo, Kindle និងឧបករណ៍ tablet ផ្សេងៗទៀតជាដើម។
ក្រុមហ៊ុន Amazon បានបញ្ជាក់នៅក្នុងសេចក្ដីប្រកាសមួយរបស់ខ្លួនថា៖ «យើងកំពុងស៊ើបអង្កេតលើការចោទប្រកាន់ទាំងនេះជាបន្ទាន់ និងដោះស្រាយបញ្ហានេះជាមួយនឹងក្រុមហ៊ុន Foxconn នៅកម្រិតខ្ពស់បំផុត»។ ក្រុមហ៊ុន Amazon បានបន្ថែមថា៖ «យើងនឹងមិនអត់ឱនឲ្យចំពោះការរំលោភបំពានណាមួយលើក្រមប្រតិបត្តិអ្នកផ្គត់ផ្គង់របស់យើងនោះទេ»។
ក្រុមហ៊ុន Foxconn បានទទួលស្គាល់បញ្ហានេះនៅក្នុងសេចក្ដីប្រកាសមួយកាលពីថ្ងៃទី ៩ ខែសីហាកន្លងទៅនេះ ដោយលើកឡើងថា ខ្លួនកំពុងបង្កើនការតាមដានមើលលើកម្មវិធីកម្មសិក្សារបស់ខ្លួនជាមួយសាលារៀននានា «ដើម្បីធានាថា ទោះក្នុងលក្ខខណ្ឌណាក៏ដោយ កម្មសិក្សាការីនឹងមិនអនុញ្ញាតឲ្យធ្វើការថែមម៉ោង ឬក៏ធ្វើការវេនយប់នោះទេ»។
ក្រុមហ៊ុន Foxconn បានបញ្ជាក់ដូច្នេះថា៖ «មានករណីខ្លះកាលពីមុន ដែលក្រុមគ្រប់គ្រងតាមមូលដ្ឋានមានការធ្វេសប្រហែលធូររលុង ដែលអនុញ្ញាតឲ្យរឿងនេះកើតឡើង ហើយទោះបីជាកម្មសិក្សាការីដែលរងគ្រោះទាំងនោះទទួលបានប្រាក់កម្រៃបន្ថែមសម្រាប់ការធ្វើការថែមម៉ោង និងការធ្វើការវេនយប់ក៏ដោយ ក៏ករណីនេះមិនអាចទទួលយកបាននោះទេ ហើយយើងបានចាត់វិធានការបន្ទាន់ដើម្បីធានាថា រឿងនេះនឹងមិនកើតឡើងម្ដងទៀតនោះឡើយ»។
ក្រុមហ៊ុន Foxconn ដែលមានមូលដ្ឋាននៅកោះតៃវ៉ាន់ គឺជាក្រុមហ៊ុនកុងត្រាផលិតគ្រឿងអេឡិចត្រូនិកដ៏ធំជាងគេបំផុតនៅលើពិភពលោក ដោយមានបុគ្គលិកជាងមួយលាននាក់នៅក្នុងប្រទេសចិន។
ក្រុមហ៊ុននេះ ដែលផលិតទូរស័ព្ទ iPhone របស់ក្រុមហ៊ុន Apple ផងដែរនោះ ទទួលបានការចាប់អារម្មណ៍កាលពីឆ្នាំ ២០១០ បន្ទាប់ពីមានករណីធ្វើអត្តឃាតជាច្រើនកើតឡើងនៅឯរោងចក្រនានារបស់ខ្លួននៅក្នុងប្រទេសចិន។ សកម្មជនរិះគន់ថា ករណីអត្តឃាតទាំងនេះកើតឡើងដោយសារតែលក្ខខណ្ឌការងារមិនល្អ៕
ប្រែសម្រួលដោយ ភី សុភាដា
