ខណៈពេលដែលប្រទេសអ៊ូហ្គង់ដាកំពុងរៀបចំការបោះឆ្នោតជាតិនៅក្នុងថ្ងៃទី១៨ ខែកុម្ភៈ នេះ យុវជននៅក្នុងប្រទេសនេះមានការយល់ឃើញខុសគ្នាអំពីការសម្រេចចិត្តប្រើប្រាស់សិទ្ធិរបស់ពួកគេក្នុងការបោះឆ្នោត។ ចំនួនយុវជនវ័យក្មេងដែលមានសិទ្ធិបោះឆ្នោតកាន់តែច្រើន អាចមានឥទ្ធិពលគួរឲ្យកត់សម្គាល់ក្នុងការបោះឆ្នោតនេះ។ ក៏ប៉ុន្តែពួកគេភាគច្រើនមានអារម្មណ៍ថា ពួកគេមិនត្រូវបានអើពើដោយបេក្ខជនដែលឈរឈ្មោះបោះឆ្នោត។
អ៊ូហ្គង់ដាគឺជាប្រទេសដែលមានមនុស្សវ័យក្មេងច្រើនជាងគេបំផុតមួយក្នុងពិភពលោក ដែលមានប្រជាជនចំនួន ៧៨ភាគរយអាយុក្រោម៣០ឆ្នាំ។ ប៉ុន្តែនៅពេលនិយាយដល់ការបោះឆ្នោតជ្រើសរើសប្រធានាធិបតីនៅពេលខាងមុខនេះ យុវជនភាគច្រើន សម្រេចចិត្តមិនចូលរួមទេ។ វាមិនមែនមានន័យថា ពួកគេមិនចាប់អារម្មណ៍នឹងរឿងនយោយបាយនោះទេ ក៏ប៉ុន្តែពួកគេភាគច្រើនបានបញ្ចេញអារម្មណ៍ថា ការចូលរួមរបស់ពួកគេមិនមានលទ្ធផលច្រើនឡើយ។
លោក Shaban Kalema គឺជាប្រធាននៃវេទិកាយុវជនអន្តរគណបក្ស (Interparty Youth Platform) ដែលបានជួយបង្កើតគោលនយោបាយមួយដែលមានឈ្មោះថា «សេចក្តីប្រកាសសម្រាប់ក្រុមយុវជនជាតិ» (National Youth Manifesto)។ ឯកសារនេះកំណត់បញ្ហាដែលយុវជនអ៊ូហ្គង់ដាប្រឈមសំខាន់ៗចំនួន៥យ៉ាង រួមមានការងារ ការថែរក្សាសុខភាព ឱកាសទទួលបានការអប់រំ កីឡា និងសិល្បៈច្នៃប្រឌិត ក៏ដូចជាការរួមចំណែករបស់យុវជនក្នុងការសម្រេចចិត្ត។
លោក Kalema និយាយថា លោកប្រាកដជាចូលរួមការបោះឆ្នោត ប៉ុន្តែលោកទទួលស្គាល់ថា សេចក្តីប្រកាសរបស់ពួកគេភាគច្រើនត្រូវពួកបេក្ខជនដែលឈរឈ្មោះបោះឆ្នោតបំភ្លេចចោល។
«ដោយសារឥឡូវនេះ បើសិនជាបេក្ខជនដែលកំពុងស្វែងរកតំណែងក្នុងឆាកនយោបាយទាំងនេះ បើសិនជាសេចក្តីប្រកាសរបស់ពួកគេមិនដូចទៅនឹងអ្វីដែលយើងទាមទារ នៅថ្ងៃស្អែកខ្ញុំនឹងអង្គុយចុះហើយនិយាយថា តើខ្ញុំគួរទៅបោះឆ្នោតដើម្បីអ្វី? ការធ្វើដូច្នេះ អាចចូលរួមចំណែកក្នុងការព្រងើយកន្តើយរបស់អ្នកបោះឆ្នោត។ ពីព្រោះកម្មវិធី (នយោបាយ) របស់ពួកគេបរាជ័យក្នុងការទាក់ទាញយុវជនឲ្យចូលរួម»។
យុវជនភាគច្រើនក៏មានអារម្មណ៍ថា ពួកគេអាចជួបគ្រោះថ្នាក់ប្រសិនបើពួកគេទៅបោះឆ្នោត។ របាយការណ៍ចេញផ្សាយកាលពីពេលថ្មីៗនេះរបស់អង្គការឃ្លាំមើលសិទ្ធិមនុស្ស Human Rights Watch បានឲ្យដឹងថា ការប្រើប្រាស់ឧស្ម័នបង្ហូរទឹកភ្នែកជាញឹកញាប់ និងភាពឃោរឃៅរបស់ប៉ូលិស អាចធ្វើឲ្យខូចខាតការបោះឆ្នោតដោយសេរី និងយុត្តិធម៌។ ការលួចសន្លឹកឆ្នោត ក៏ជាការព្រួយបារម្ភមួយផងដែរ។
លោក Moses Egunyu ជំនួយការមន្ត្រីគម្រោងនៅវិទ្យាស្ថានសាធារណរដ្ឋអន្តរជាតិ IRI (International Republican Institute) និយាយថា យុវជនជាច្រើនដែលបានធំដឹងក្តីពេលលោក Yoweri Museveni នៅជាប្រធានាធិបតី មើលឃើញការបោះឆ្នោតថាជារឿងគ្មានប្រយោជន៍។
«មនុស្សមួយចំនួនគិតថា តើការបោះឆ្នោតនេះនឹងធ្វើឲ្យអ្វីផ្លាស់ប្តូរទៅ? តើខ្ញុំទៅបោះឆ្នោតដើម្បីអ្វី? បើសិនជានៅរាល់ការបោះឆ្នោតមកដល់ យើងជាអ្នកបោះឆ្នោតនិយាយថា យើងនឹងប្រយុទ្ធនឹងភាពក្រីក្រ យើងនឹងដោះស្រាយបញ្ហាអំពើពុករលួយ យើងនឹងដោះស្រាយជាមួយបញ្ហាអត់ការងារធ្វើ។ ក៏ប៉ុន្តែ យើងមើលឃើញថា ភាពអត់ការងារ អំពើពុករលួយកើនឡើងយ៉ាងខ្លាំង និងភាពក្រីក្រកំពុងកើនឡើងយ៉ាងខ្លាំង។ មនុស្សជាច្រើនមិនអាចទទួលបានតម្រូវការមូលដ្ឋាន។ អញ្ចឹង តើទៅបោះឆ្នោតដើម្បីអ្វី? ពិតណាស់ ប្រជាជនអ៊ូហ្គង់ដាជាច្រើនមានអារម្មណ៍ថា វាប្រហែលមិនអាចទៅរួចទេក្នុងការប្តូរមេដឹកនាំដោយគ្រាន់តែធ្វើការបោះឆ្នោតនោះ។ វាមិនធ្លាប់កើតមានទេពីមុនមកនៅក្នុងប្រទេសអ៊ូហ្គង់ដា»។
មនុស្សផ្សេងទៀតមានដូចជាអ្នកបោះឆ្នោតវ័យក្មេងឈ្មោះ Ritah Nakyanzi មានអារម្មណ៍ថា គូប្រជែងនឹងលោក Museveni គឺអតីតនាយករដ្ឋមន្ត្រី Amama Mbabazi និងបេក្ខជននៃគណបក្ស FDC គឺលោក Kizza Besigye មិនអាចកែប្រែប្រទេសអ៊ូហ្គង់ដាបានទេ។
«ការពិតគឺថា នៅតែមានពេលខ្លះដែលខ្ញុំគិតថា បើទោះបីជាខ្ញុំទៅបោះឆ្នោត តើនឹងមានអ្វីកើតឡើងផ្លាស់ប្តូរ? ខ្ញុំពិតជាបានមើលលើកាលៈទេសៈ ថាតើ Amama ឬ Besigye នឹងចូលកាន់តំណែង។ ក៏ប៉ុន្តែ វាប្រហែលជាការផ្លាស់ប្តូរមនុស្សតែប៉ុណ្ណោះ វាមិនមានន័យថាជាការផ្លាស់ប្តូរភាពជាអ្នកដឹកនាំដែលអនុវត្តការងារផ្ទាល់នោះទេ»។
ការបោះឆ្នោតជាតិនៅអ៊ូហ្គង់ដា ត្រូវបានកំណត់ធ្វើឡើងនៅថ្ងៃទី១៨ ខែកុម្ភៈខាងមុខនេះ។ យោងតាមគណៈកម្មការរៀបចំការបោះឆ្នោត ប្រជាជនអ៊ូហ្គង់ដាប្រមាណ១៥លាននាក់បានចុះឈ្មោះបោះឆ្នោត៕
ប្រែសម្រួលដោយ នៀម ឆេង
