របាយការណ៍អង្គការ Care International ដែលត្រូវបានចុះផ្សាយកាលពីពេលថ្មីៗនេះ បានជ្រើសយកលំនាំខុសពីទម្លាប់ដើមមួយ ដោយធ្វើការពិនិត្យមើលនិងសរុបអត្ថបទព័ត៌មាននានាលើប្រព័ន្ធអ៊ីនធឺណិតជាភាសាអារ៉ាប់ អង់គ្លេស បារាំង អាល្លឺម៉ង់ និងអេស្ប៉ាញ។
របាយការណ៍បានរកឃើញថា មានអត្ថបទព័ត៌មានជាង ២១៥.០០០ កាលពីឆ្នាំមុន រាយការណ៍អំពីសៀវភៅក្រោមចំណងជើងថា «Spare» របស់ព្រះអង្គម្ចាស់ Harry ប៉ុន្តែមានអត្ថបទព័ត៌មានតែ ១១.០០០ ប៉ុណ្ណោះ ដែលរាយការណ៍ពីអំពើហិង្សាដ៏ប្រល័យ និងការបាត់បង់ទីលំនៅរបស់ប្រជាជននៅប្រទេសបួគីណាហ្វាសូ។
អត្ថបទព័ត៌មានជាង ២៧៣.០០០ បានរាយការណ៍អំពីភាពយន្ត «Barbie» ប៉ុន្តែមានអត្ថបទព័ត៌មានប្រមាណតែ ១.០០០ ប៉ុណ្ណោះ ដែលបានរាយការណ៍អំពីគ្រោះទឹកជំនន់ គ្រោះរាំងស្ងួត និងភាពអត់ឃ្លាននៅអង់ហ្គោឡា ដែលបានប៉ះពាល់មនុស្សប្រមាណ ៧លាននាក់។
របាយការណ៍ ដែលមានចំណងជើងថា «ទម្លាយភាពស្ងប់ស្ងាត់» (Breaking the Silence) លើកឡើងថា វិបត្តិដទៃទៀតជាច្រើនទៀតនៅអាហ្រិ្វកទទួលបានចំណាប់អារម្មណ៍តិចតួច ឬមិនទទួលបានទាល់តែសោះពីសំណាក់ប្រព័ន្ធផ្សព្វផ្សាយ។ លោក Stefan Brand ប្រចាំអង្គការ Care International នៅប្រទេសអាល្លឺម៉ង់ បកស្រាយពីហេតុផលដែលវិបត្តិមនុស្សធម៌នៅទ្វីបអាហ្វ្រិកមិនទទួលបានការរាយការណ៍ច្រើន។
លោក Brand ថ្លែងថា៖ «វិបត្តិនិងជម្លោះដូចជា សង្រ្គាមនៅអ៊ុយក្រែន ហើយឥឡូវនេះនៅតំបន់មជ្ឈិមបូព៌ា កំពុងទទួលបានការរាយការណ៍ច្រើនពីសំណាក់អ្នកសារព័ត៌មានអន្តរជាតិនៅគ្រប់ប្រទេស ឬតាមប្រទេសភាគច្រើន ហើយដូច្នេះវិបត្តិតូចៗគឺ ស្ថិតនៅក្រោមស្រមោលនៃជម្លោះធំៗទាំងនេះ។ ប៉ុន្តែខ្ញុំក៏គិតថា ប្រព័ន្ធផ្សព្វផ្សាយកាន់តែច្រើនត្រូវបង្ខំចិត្តសន្សំសំចៃ ដោយសារតែកង្វះចំណាប់អារម្មណ៍ពីសាធារណជន»។
ការស្រាវជ្រាវរបស់អង្គការ Care International បានចង្អុលបង្ហាញពីប្រទេសចំនួន ១០ នៅអាហ្វ្រិក រួមមាន ស៊ីមបាវ៉េ អ៊ូហ្កង់ដា ប៊ូរ៉ុនឌី សំប៊ី និងសេណេហ្គាល់ដែលរងគ្រោះពីវិបត្តិនានា ដូចជា ការប្រែប្រួលអាកាសធាតុ ជម្លោះ ភាពក្រីក្រ ភាពអត់ឃ្លានរីករាលដាល និងអស្ថិរភាពនយោបាយ។
ការស្រាវជ្រាវបានលើកឡើងថា អត្ថបទព័ត៌មានជាង ៧៧.០០០ ត្រូវបានចុះផ្សាយកាលពីឆ្នាំមុនអំពីប្រទេសទាំងនេះ ស្របពេលទូរសព្ទ Iphone 15 ទទួលបានការរាយការណ៍ក្នុងអត្ថបទជាង ២៧៣.០០០។
លោក Douglas Okwatch គឺជាលេខាធិការនៃសមាគមសារព័ត៌មានបរទេស (Foreign Press Association) នៅអាហ្រ្វិក ដែលជាអង្គការអ្នកសារព័ត៌មានអាហ្រ្វិកបម្រើការឱ្យប្រព័ន្ធផ្សព្វផ្សាយបរទេស។ លោកនិយាយថា កញ្ចប់ទឹកប្រាក់សម្រាប់ប្រព័ន្ធផ្សព្វផ្សាយកំពុងរួមតូច ដោយការណ៍នេះតម្រូវឱ្យមានការកាត់បន្ថយចំនួនអត្ថបទព័ត៌មានពីអាហ្វ្រិក។
លោកថ្លែងថា៖ «ខ្ញុំគិតថា បន្ទាប់ពីវិបត្តិជំងឺកូវីដ១៩ ប្រទេសនានាជុំវិញពិភពលោកពិតជាជួបបញ្ហាខ្វះខាតធនធាន។ ដូច្នេះ ប្រទេសមួយចំនួន ជាពិសេសប្រទេសដែលមានប្រព័ន្ធផ្សព្វផ្សាយអន្តរជាតិធំៗ កំពុងសម្លឹងមើលកន្លែងត្រូវកាត់បន្ថយចំណាយ។ ហើយប្រហែលប្រព័ន្ធផ្សព្វផ្សាយគឺជាកន្លែងដែលងាយស្រួលបំផុតដើម្បីកាត់បន្ថយកញ្ចប់ថវិកា។ នៅពេលអ្នកកាត់បន្ថយកញ្ចប់ថវិកា នោះនឹងមានផលប៉ះពាល់ផ្ទាល់លើការរាយការណ៍ព័ត៌មាន»។
ការបិទការិយាល័យនៅបរទេសរបស់ប្រព័ន្ធផ្សព្វផ្សាយអន្តរជាតិក៏ត្រូវចាត់ទុកថាជាកត្តានៅពីក្រោយការរាយការណ៍តិចតួច ក៏ដូចជា ភាពហត់នឿយដែលបានកើតឡើង បន្ទាប់ពីមានជម្លោះនិងវិបត្តិមនុស្សធម៌ឥតឈប់ឈរអស់ពេលរាប់ទសវត្សរ៍មកនេះនៅតាមបណ្តាប្រទេសអាហ្វ្រិកខ្លះ។
អ្នករិះគន់ខ្លះបានចោទប្រកាន់ប្រព័ន្ធផ្សព្វផ្សាយបរទេសថាផ្តោតច្រើនលើជម្លោះនិងការរងទុក្ខវេទនានៅអាហ្វ្រិក ជាងសក្តានុពលនិងការរួមចំណែករបស់ទ្វីបនេះទៅកាន់ពិភពលោក។
លោក Okwatch ដែលជាអ្នកសារព័ត៌មានផងដែរ និយាយថា វិស័យដទៃ និងការប្រជែងលើសាកលលោកសម្រាប់ធនធាននិងការគាំទ្រពីសំណាក់ទ្វីបអាហ្រ្វិក កំពុងទទួលបានការរាយការណ៍ច្រើនជាងវិបត្តិមនុស្សធម៌។
លោកថ្លែងថា៖ «យើងមិនត្រឹមតែផ្តោតលើរឿងមនុស្សធម៌នោះទេ មានអត្ថបទព័ត៌មានស្តីពីមនុស្សធម៌និងអ្វីផ្សេងៗទៀតកាន់តែតិចទៅៗនៅក្នុងបរិបទផ្តោតលើអាហ្រ្វិក។ ខ្ញុំគិតថា ប្រសិនបើមានការរាយការណ៍កាន់តែតិចស្តីពីវិបត្តិមនុស្សធម៌ ប្រហែលជាការរាយការណ៍បានងាកទៅផ្តោតលើផលប្រយោជន៍សេដ្ឋកិច្ច និងភូមិសាស្រ្តនយោបាយទៅវិញ»។
លោក Brand និយាយថា លទ្ធភាពចូលទៅកាន់ទ្វីបអាហ្រ្វិក និងការវិនិយោគខាងប្រព័ន្ធផ្សព្វផ្សាយដែលមានស្ថិរភាព អាចលើកកម្ពស់ការរាយការណ៍ព័ត៌មាននៅអាហ្វ្រិក។
លោកថ្លែងថា៖ «ខ្ញុំគិតថា ជាទូទៅ រដ្ឋាភិបាលត្រូវផ្តល់ការអនុញ្ញាតឱ្យអ្នកសារព័ត៌មានចូលក្នុងប្រទេសទាំងនេះ ហើយជាពិសេស ទៅកាន់កន្លែងដែលមានវិបត្តិនៅក្នុងតំបន់ ដើម្បីឱ្យអ្នករាយការណ៍និងអ្នកសារព័ត៌មានអាចរាយការណ៍ពីវិបត្តិទាំងនេះ។ ប្រព័ន្ធផ្សព្វផ្សាយអន្តរជាតិត្រូវការផ្តោតការយកចិត្តទុកដាក់បន្ថែម ទទួលយករូបភាពបន្ថែមពីអ្នកសារព័ត៌មានអាហ្រិ្វក អ្នកធ្វើការក្រៅក្របខណ្ឌពីបរទេស និងពីប្រទេសនៅអាហ្វ្រិក ហើយប្រព័ន្ធផ្សព្វផ្សាយត្រូវការវិនិយោគនៅក្នុងវិស័យសារព័ត៌មានដែលល្អនិងមានស្ថិរភាព អ្នកឆ្លើយឆ្លងព័ត៌មានបរទេស អ្នកធ្វើការក្រៅក្របខណ្ឌ និងដៃគូក្នុងស្រុក»។
អង្គការសហប្រជាជាតិនិយាយថា មនុស្សជាង ៣០០លាននាក់ នឹងត្រូវការជំនួយមនុស្សធម៌នៅឆ្នាំ ២០២៤ ដែលប្រហែលពាក់កណ្តាលគឺ នៅអាហ្វ្រិក។
អង្គការ Care International បានអំពាវនាវឱ្យប្រព័ន្ធផ្សព្វផ្សាយរាយការណ៍ពីវិបត្តិមនុស្សធម៌នៅអាហ្រ្វិក ដើម្បីឱ្យទីភ្នាក់ងារផ្តល់ជំនួយនិងអាជ្ញាធរពាក់ព័ន្ធអាចចាត់វិធានការជាបន្ទាន់ក្នុងការជួយសង្រ្គោះស្ថានភាពនេះ៕
ប្រែសម្រួលដោយ ណឹម សុភ័ក្រ្តបញ្ញា
វេទិកាបញ្ចេញមតិ