កាលពីថ្ងៃអង្គារ អតីតប្រធានាធិបតីលោក Donald Trump បានបង្ហាញខ្លួននៅមុខចៅក្រមសហព័ន្ធម្នាក់ក្នុងទីក្រុង Miami ដោយនិយាយថាលោកគ្មានទោសពៃរ៍ទេអំពីការចោទប្រកាន់ថាលោកបានរក្សាទុកដោយខុសច្បាប់នូវឯកសារសម្ងាត់ខាងសន្តិសុខជាតិរាប់សិបសំណុំក្រោយពីលោកបានចាកចេញពីសេតវិមានហើយបានរារាំងការប្រឹងប្រែងរបស់រដ្ឋាភិបាលដើម្បីយកឯកសារទាំងនោះមកវិញ។
លោក Trump បានក្លាយជាប្រធានាធិបតីស.រ.អ.ទីមួយដែលប្រឈមនឹងការចោទប្រកាន់សហព័ន្ធនៅពេលមហាគណៈវិនិច្ឆ័យមួយនៅទីក្រុង Miami បានចោទប្រកាន់លោកចំនួន៣៧ករណីកាលពីសប្តាហ៍មុនទាក់ទិននឹងការរក្សាទុកឯកសារសម្ងាត់មិនត្រឹមត្រូវ។
ការចោទប្រកាន់នេះដែលត្រូវបានលាតត្រដាងកាលពីថ្ងៃទី៩ខែមិថុនា ចោទលោក Trump ចំនួន៣១ករណីអំពី«ការរក្សាទុកដោយចេតនា»នូវព័ត៌មានស្តីពីការការពារជាតិ ដោយករណីនីមួយៗតំណាងឯកសារនីមួយៗផ្សេងៗគ្នាដែលលោក Trump បានយកពីសេតវិមានទៅភូមិគ្រឹះ Mar-a-Lago ហើយលោកបានប្រកែកមិនព្រមប្រគល់ឯកសារទាំងនោះមកវិញក្រោយពីមានដីការកោះ។
ការចោទប្រកាន់នេះក៏ចែងដែរថាលោក Trump បានបង្ហាញឯកសារសម្ងាត់ទាំងនេះពីរដងដល់ជនឯទៀតៗហើយថាលោកបានឃុបឃិតធ្វើអំពើទុច្ចរិតជាមួយជំនួយការម្នាក់ ដើម្បីរក្សាឯកសារទាំងនោះកុំឱ្យពួកអ្នកស៊ើបអង្កេតយកបាន។
លោក Todd Blanche មេធាវីម្នាក់ក្នុងបណ្តាពួកមេធាវីរបស់លោក Trump បាននិយាយប្រាប់ចៅក្រម Jonathan Goodman ថា«យើងប្រាកដជាឆ្លើយថាគ្មានទោសពៃរ៍អ្វីទេ»។
លោក Trump ត្រូវបានដោះលែងដោយមានការធានារបស់លោកផ្ទាល់និងត្រូវបានបញ្ជាមិនឱ្យនិយាយទាក់ទងជាមួយលោក Nauta និងសាក្សីឯទៀតៗទេអំពីការពិតជាក់ស្តែងនៃករណីនេះ។ លោក Nauta ដែលជាអតីតអ្នកបម្រើក្នុងសេតវិមាននិងជាជំនួយការលោក Trump បានឆ្លើយថាលោកគ្មានទោសពៃរ៍អ្វីទេអំពីការចោទប្រកាន់ចំនួន៦ករណីថារារាំងការស៊ើបអង្កេតនិងនិយាយកុហកក្រុមអ្នកស៊ើបអង្កេត។
ការចោទប្រកាន់ពីបទ«រក្សាទុកដោយចេតនា»នូវព័ត៌មានខាងការពារជាតិមានទោសជាប់ពន្ធនាគារ១០ឆ្នាំ។ ការចោទប្រកាន់អំពីការរារាំងមានទោសជាប់គុករហូតដល់២០ឆ្នាំ៕
