២១:២៣
២៣.៦.២០២២
ថ្ងៃពុធ ទី២២ ខែមិថុនា៖
- រដ្ឋមន្ត្រីការពារជាតិអ៊ុយក្រែនបាននិយាយថា អ៊ុយក្រែនបានទទួលជំនួយរបស់សហរដ្ឋអាមេរិកដែលមានប្រព័ន្ធរ៉ុក្កែតកាំភ្លើងធំចល័តកម្រិតខ្ពស់ (HIMARS)។ ប្រព័ន្ធដែលបំពាក់លើរថយន្តនេះអាចផ្ទុកគ្រាប់រ៉ុក្កែតបានចំនួនប្រាំមួយគ្រាប់ដែលអាចបាញ់បានចម្ងាយប្រហែល៧០ គីឡូម៉ែត្រ។ កាលពីដើមខែនេះ សហរដ្ឋអាមេរិកបានប្រកាសថា ខ្លួនកំពុងបញ្ជូនជំនួយយោធាចំនួន១ពាន់លានដុល្លារបន្ថែមទៀតដល់អ៊ុយក្រែន។ នោះជាការផ្តល់អាវុធ និងឧបករណ៍ធំបំផុតលើកទី១២របស់រដ្ឋាភិបាលក្រុងវ៉ាស៊ីនតោន ដែលមានបំណងប្រឈមមុខនឹងការជំរុលទៅមុខយឺតៗរបស់រុស្ស៊ី នៅតំបន់ Donbas ដែលនៅភាគខាងកើតនៃប្រទេសអ៊ុយក្រែន។
- វិទ្យុអឺរ់ុបសេរី / វិទ្យុសេរីភាព (RFE/RL) បានរាយការណ៍ថា ក្រុមហ៊ុនសម្លៀកបំពាក់កីឡាដ៏ធំរបស់អាមេរិកាំងម៉ាក Nike និយាយថា ខ្លួនចាកចេញពីទីផ្សាររុស្ស៊ីទាំងស្រុងក្នុងរយៈពេលបីខែបន្ទាប់ពីការផ្អាកប្រតិបត្តិការនៅក្នុងប្រទេសនេះ។ ក្រុមហ៊ុន Nike បាននិយាយកាលពីថ្ងៃព្រហស្បតិ៍ថា ខ្លួនកំពុងចូលរួមជាមួយយីហោលោកខាងលិចសំខាន់ៗផ្សេងទៀតក្នុងការចាកចេញពីទីផ្សាររុស្ស៊ី ដោយសារការចូលឈ្លានពានរបស់រដ្ឋាភិបាលក្រុងម៉ូស្គូទៅលើអ៊ុយក្រែន ដោយគ្មានការបង្កហេតុ។
- វិទ្យុអឺរ់ុបសេរី / វិទ្យុសេរីភាព (RFE/RL) បានរាយការណ៍ដោយស្រង់សម្តីមន្ត្រីក្នុងតំបន់ Luhansk កាលពីថ្ងៃព្រហស្បតិ៍ថា កងកម្លាំងរុស្ស៊ីបានវាយយកបានកន្លែងតាំងលំនៅចំនួនពីរនៅភាគខាងត្បូងនៃទីក្រុង Lysychansk ដ៏សំខាន់ក្នុងតំបន់ Donbas ខណៈដែលពួកគេបានបន្តការវាយលុកមួយក្នុងគោលបំណងកាត់ផ្តាច់ទាំងស្រុងនូវការតស៊ូរបស់អ៊ុយក្រែននៅក្នុងតំបន់ Luhansk។ ក្រសួងការពារជាតិអង់គ្លេសបាននិយាយនៅក្នុងការធ្វើបច្ចុប្បន្នភាពព័ត៌មានចារកម្មប្រចាំថ្ងៃរបស់ខ្លួនថា ការធ្វើឱ្យប្រសើរឡើងនូវប្រតិបត្តិការយោធារបស់រុស្ស៊ីនៅក្នុងតំបន់ Lysychansk និងទីក្រុងភ្លោះ Syevyerodonetsk ទំនងជាលទ្ធផលនៃការពង្រឹងកងទ័ពនាពេលថ្មីៗនេះ និងការប្រើប្រាស់កាំភ្លើងធំច្រើន។ អភិបាលយោធានៃតំបន់ Luhansk លោក Serhiy Hayday បាននិយាយកាលពីថ្ងៃព្រហស្បតិ៍ថា ភូមិ Loskutyvka និង Rai-Oleksandryvka នៅភាគខាងត្បូងនៃទីក្រុង Lysychansk និង Syevyerodonetsk បានធ្លាក់ទៅរុស្ស៊ី ប៉ុន្តែលោកបានបន្ថែមថា កងកម្លាំងអ៊ុយក្រែននៅតែបន្តទប់ទល់នៅទីក្រុងSyevyerodonetsk និងកន្លែងតាំងលំនៅនៅ Zolote និង Vovchoyrovka ដែលនៅក្បែរនោះ។
- អ៊ុយក្រែនរំពឹងថា នឹងបើកសវនាការបឋមនៅថ្ងៃព្រហស្បតិ៍ដើម្បីកាត់ទោសទាហានរុស្ស៊ីដែលត្រូវបានចោទប្រកាន់ពីបទរំលោភស្ត្រីអ៊ុយក្រែនម្នាក់ក្នុងអំឡុងពេលការឈ្លានពានរបស់រុស្ស៊ីលើអ៊ុយក្រែន។ នេះបើយោងតាមទីភ្នាក់ងារសារព័ត៌មាន Reuters។ ជនសង្ស័យឈ្មោះ Mikhail Romanov អាយុ៣២ឆ្នាំ ត្រូវបានចោទប្រកាន់ពីបទឃាតកម្មលើជនស៊ីវិលនៅក្នុងតំបន់ជុំវិញទីក្រុងកៀវ ហើយបន្ទាប់មកបានរំលោភប្រពន្ធរបស់បុរសនោះម្តងហើយម្តងទៀត។ ទាហាននោះមិនស្ថិតក្នុងមន្ទីរឃុំឃាំងរបស់អ៊ុយក្រែនទេ ហើយនឹងត្រូវកាត់ទោសកំបាំងមុខ។
- ទីតាំងវប្បធម៌ និងប្រវត្តិសាស្ត្រជាង១៥២ត្រូវបានខូចខាត ឬបំផ្លាញចាប់តាំងពីកងកម្លាំងរុស្ស៊ីបានឈ្លានពានអ៊ុយក្រែនក្នុងខែកុម្ភៈ។ នេះបើយោងតាមសេចក្តីរាយការណ៍របស់ទីភ្នាក់ងារព័ត៌មានបារាំង AFP។ សំណង់ដែលខូច ឬបំផ្លាញនោះរួមមាន សារមន្ទីរ វិមាន ព្រះវិហារ និងបណ្ណាល័យ។
- ទីភ្នាក់ងារព័ត៌មាន The Associated Press កត់សម្គាល់ថា កិច្ចប្រជុំកំពូលចំនួនបីនៅសប្តាហ៍ក្រោយនឹងសាកល្បងការប្តេជ្ញាចិត្តរបស់បស្ចិមប្រទេសក្នុងការគាំទ្រអ៊ុយក្រែន៖ មេដឹកនាំសហភាពអឺរ៉ុបនឹងជួបប្រជុំគ្នានៅទីក្រុងព្រុចសែល ដើម្បីពិចារណាបេក្ខភាពអ៊ុយក្រែនជាសមាជិកសហភាពអឺរ៉ុប។ ក្រុមប្រទេសមហាអំណាចសេដ្ឋកិច្ចឈានមុខគេទាំងប្រាំពីរនឹងរៀបចំកិច្ចប្រជុំកំពូលប្រចាំឆ្នាំនៅក្នុងប្រទេសអាល្លឺម៉ង់។ បន្ទាប់ពីនោះ មេដឹកនាំអូតង់នឹងជួបជុំគ្នានៅទីក្រុងម៉ាឌ្រីដ។
- កាសែត The New York Times រាយការណ៍ថា ទាំងកងកម្លាំងអ៊ុយក្រែន និងរុស្ស៊ីកាន់តែនឿយហត់ នៅពេលដែលពួកគេប្រយុទ្ធដណ្តើមទីក្រុង Sievierodonetsk និង Lysychansk។ លោក Mick Ryan ឧត្តមសេនីយ៍អូស្ត្រាលីចូលនិវត្តន៍ និងជាមេបញ្ជាការនៃមហាវិទ្យាល័យការពារជាតិអូស្ត្រាលី បានសរសេរក្នុងការវិភាគថ្មីៗនេះថា «មានភស្តុតាងដែលថា ភាគីទាំងពីរ ជិតអស់កម្លាំង ដោយសារចំនួនអ្នកស្លាប់បាត់បង់ជីវិត និងការចំណាយគ្រាប់រំសេវច្រើន។ ទំនងណាស់ថា ប្រតិបត្តិការនឹងផ្អាកនៅខែក្រោយ ឬពីរខែទៀត»។
- ទីភ្នាក់ងារព័ត៌មានរដ្ឋរុស្ស៊ី Tass បានឱ្យដឹងថា ពលរដ្ឋអង់គ្លេសពីរនាក់ដែលត្រូវបានចាប់ខ្លួនដោយកងកម្លាំងរុស្ស៊ីនឹងប្តឹងឧទ្ធរណ៍ចំពោះការកាត់ទោសប្រហារជីវិតរបស់ពួកគេ។ លោក Shaun Pinner និងលោក Aiden Aslin បានជួយកងកម្លាំងអ៊ុយក្រែនក្នុងការប្រយុទ្ធនៅទីក្រុងMariupol នៅពេលដែលពួកគេត្រូវបានចាប់ខ្លួន ហើយក្រោយមកត្រូវបានកាត់ទោសនៅក្នុងតុលាការក្នុងសាធារណរដ្ឋប្រជាមានិត Donetsk ដែលជារដ្ឋបំបែកខ្លួនគាំទ្រដោយរុស្ស៊ី។
- នាយករដ្ឋមន្ត្រីអង់គ្លេស លោក Boris Johnson បានប្រាប់ក្រុមបណ្តាញព័ត៌មានអឺរ៉ុបថា ចារកម្មអង់គ្លេសជឿថា រុស្ស៊ីអាចបាត់បង់សន្ទុះក្នុងការប្រយុទ្ធក្នុងប៉ុន្មានខែខាងមុខ ដោយសារធនធានរបស់ខ្លួនត្រូវបានបាត់បង់នៅក្នុងសង្គ្រាមដែលមានការបាញ់ផ្លោងយ៉ាងធ្ងន់ធ្ងរ និងការស្លាប់បាត់បង់ជីវិតច្រើន។ អ្នកការទូតអឺរ៉ុបម្នាក់បានប្រាប់កាសែត The Washington Post ថា កងកម្លាំងរបស់ទីក្រុងមូស្គូអាចនឹងអស់កម្លាំងនៅប្រហែលខែសីហា។
- មេដឹកនាំនៃប្រទេសអេស្តូនី បាននិយាយកាលពីថ្ងៃពុធថា សមត្ថភាពយោធារបស់រុស្ស៊ីមិនទាន់អស់ទេ ហើយមិនគួរមើលស្រាលឡើយ។ អ្នកស្រី Kaja Kallas នាយករដ្ឋមន្ត្រីរបស់អេស្តូនីបាននិយាយដូចនេះនៅមុនកិច្ចប្រជុំកំពូលរបស់អង្គការអូតង់។ អ្នកស្រីបានបន្ថែមប្រាប់ទីភ្នាក់ងារសារព័ត៌មាន AP ថា៖ «ខ្ញុំបានឮការពិភាក្សាថា គ្មានការគំរាមកំហែងទៀតទេ ពីព្រោះពួកគេបានអស់កម្លាំង។ ទេ ពួកគេមិនទាន់អស់កម្លាំងទេ»៕
២២:៣៧
២២.៦.២០២២
ថ្ងៃពុធ ទី២២ ខែមិថុនា៖
- ទីភ្នាក់ងារសារព័ត៌មាន Reuters បានរាយការណ៍ថា កងកម្លាំងរុស្ស៊ីបានបាញ់រ៉ុក្កែតលើទីក្រុង Kharkiv ដែលជាទីក្រុងធំទីពីររបស់អ៊ុយក្រែន និងតំបន់ជនបទជុំវិញ ដោយបានសម្លាប់មនុស្សយ៉ាងហោចណាស់ ១៥ នាក់ នៅក្នុងនោះរដ្ឋាភិបាលក្រុងកៀវហៅថា ការប៉ុនប៉ងដើម្បីបង្ខំឱ្យខ្លួនទាញយកកម្លាំងពីសមរភូមិដ៏សំខាន់មកការពារជនស៊ីវិលក្នុងការវាយប្រហារនេះ។ ការវាយប្រហាររបស់រុស្ស៊ីលើទីក្រុង Kharkiv ពេញមួយថ្ងៃអង្គារ និងបន្តនៅព្រឹកថ្ងៃពុធ គឺជាការវាយប្រហារដ៏អាក្រក់បំផុតក្នុងប៉ុន្មានសប្តាហ៍នេះនៅក្នុងតំបន់ដែលការរស់នៅបានវិលត្រឡប់មកធម្មតាវិញ ចាប់តាំងពីអ៊ុយក្រែនបានរុញច្រានកងកម្លាំងរុស្ស៊ីត្រឡប់ទៅវិញនៅក្នុងការវាយបកដ៏ធំមួយកាលពីខែមុន។
- កងកម្លាំងប្រដាប់អាវុធបារាំងបានធ្វើសមយុទ្ធយោធាដ៏គួរឱ្យភ្ញាក់ផ្អើលមួយក្នុងប្រទេសអេស្តូនី ដោយដាក់ពង្រាយទាហានឆ័ត្រយោងជាង១០០នាក់នៅប្រទេសអេស្តូនី ដែលជាប្រទេសជិតខាងរបស់រុស្ស៊ី។ នេះបើតាមទីភ្នាក់ងារសារព័ត៌មាន The Associated Press បានរាយការណ៍កាលពីថ្ងៃពុធ ដោយដកស្រង់ពីក្រសួងការពារជាតិបារាំង។ សេចក្តីថ្លែងការណ៍បាននិយាយថា ប្រតិបត្តិការតាមអាកាសនេះបានធ្វើឡើងកាលពីយប់ថ្ងៃអង្គារ ហើយត្រូវបានគេដាក់ឈ្មោះថា Thunder Lynx នោះ «បានបើកដំណើរការភ្លាមៗ ដោយមានការលោតឆ័ត្ររបស់ទាហានឆ័ត្រយោងប្រហែល១០០នាក់» ពីកងពលតូចទ័ពអាកាសទី ១១ របស់បារាំង «លើតំបន់ដែលការពារដោយទាហានអេស្តូនី»។ សមយុទ្ធដែលរៀបចំយ៉ាងប្រញាប់ប្រញាល់ក្នុងប្រទេសអេស្តូនី ដែលជាសម្ព័ន្ធមិត្តអូតង់នេះ ត្រូវបានប្រតិបត្តិជាសកម្មភាព«សាមគ្គីភាពជាយុទ្ធសាស្ត្រ» ចំពេលមានសង្រ្គាមរបស់រុស្ស៊ីនៅអ៊ុយក្រែន។ សេចក្តីថ្លែងការណ៍របស់ក្រសួងការពារជាតិបារាំងបាននិយាយថា «ប្រតិបត្តិការតាមអាកាសនេះបង្ហាញពីសមត្ថភាពរបស់កងកម្លាំងប្រដាប់អាវុធបារាំងក្នុងការធ្វើអន្តរាគមន៍ ក្នុងគ្រាអាសន្ន និងគាំទ្រប្រទេសសម្ព័ន្ធមិត្ត»។
- សេចក្តីព្រាងនៃសេចក្តីប្រកាសចុងក្រោយសម្រាប់កិច្ចប្រជុំកំពូលរបស់សហភាពអឺរ៉ុបនៅសប្តាហ៍នេះស្នើសុំឋានៈបេក្ខភាពសម្រាប់ប្រទេសអ៊ុយក្រែន និងម៉ុលដាវី។ នេះបើតាមឯកសារដែលវិទ្យុអឺរ៉ុបសេរី /វិទ្យុសេរីភាពបានឃើញ។ លោក Jean Asselborn នៃប្រទេស លុចសំបួ បាននិយាយមុនកិច្ចប្រជុំរដ្ឋមន្ត្រីការបរទេសសហភាពអឺរ៉ុបថា នៅក្នុងសហភាពអឺរ៉ុប «គ្មានប្រទេសណាមួយជំទាស់»នឹងសំណើរនេះទេ។
- ឯកអគ្គរដ្ឋទូតសហរដ្ឋអាមេរិកប្រចាំនៅប្រទេសរុស្ស៊ី លោក John Sullivan បាននិយាយថា ការឈ្លានពានរបស់រុស្ស៊ីលើប្រទេសអ៊ុយក្រែន ដែលជា «ការឈ្លានពានដ៏ធំ»នោះ គឺជាប្រធានបទដ៏សំខាន់មួយអំឡុងសន្និសីទនៃប្រមុខបេសកកម្មសកលនៅរដ្ឋធានីវ៉ាស៊ីនតោន កាលពីថ្ងៃអង្គារ។
- រដ្ឋមន្ត្រីក្រសួងការពារជាតិអ៊ុយក្រែន លោក Oleksii Reznikov កាលពីថ្ងៃពុធ បានសរសេរនៅលើ បណ្តាញ Twitter ថា លោកទទួលស្វាគមន៍ព័ត៌មាននៃទំនាក់ទំនងថ្មីជាមួយនឹងគំនិតផ្តួចផ្តើមសមុទ្រ ៣ (3SI)។ ប្រធានាធិបតីប៉ូឡូញ លោក Andrzej Duda បានប្រកាសថា ប្រទេសជាសមាជិកគំនិតផ្តួចផ្តើមសមុទ្រ៣ បានផ្តល់ឋានៈដល់ប្រទេសអ៊ុយក្រែនក្នុងនាមជាដៃគូចូលរួមក្នុងក្រុមនេះកាលពីថ្ងៃអង្គារ។ លោកនិយាយថា វានឹងជួយអ៊ុយក្រែនអភិវឌ្ឍកិច្ចសហប្រតិបត្តិការជាមួយគំនិតផ្តួចផ្តើមសមុទ្រ ៣ លើផ្នែកថាមពល និងការដឹកជញ្ជូន។ យោងតាមអង្គការនេះ គោលដៅចម្បងនៃគំនិតផ្តួចផ្តើមនេះគឺ «ដើម្បីជំរុញកំណើនសេដ្ឋកិច្ច និងភាពធន់នៃតំបន់នេះ ដោយការអភិវឌ្ឍការដឹកជញ្ជូន ថាមពល និងហេដ្ឋារចនាសម្ព័ន្ធឌីជីថល»។ សមាជិកនៃគំនិតផ្តួចផ្តើមសមុទ្រសមុទ្រ៣នេះ រួមមានប្រទេសចំនួន១២នៅអឺរ៉ុប ដែលស្ថិតនៅចន្លោះសមុទ្របាល់ទិក អាឌ្រីយ៉ាទិក និងសមុទ្រខ្មៅ។
- ក្រសួងការពារជាតិរុស្ស៊ីបាននិយាយកាលពីថ្ងៃពុធថា គណៈប្រតិភូរុស្ស៊ី និងតួកគីបានយល់ព្រមបន្តការពិគ្រោះយោបល់លើការអនុញ្ញាតឲ្យកប៉ាល់ចាកចេញប្រកបដោយសុវត្ថិភាព និងការនាំចេញគ្រាប់ធញ្ញជាតិពីកំពង់ផែអ៊ុយក្រែន។ អ៊ុយក្រែនគឺជាអ្នកផ្គត់ផ្គង់ស្រូវសាលីធំជាងគេបំផុតមួយនៅទូទាំងពិភពលោក ប៉ុន្តែការនាំចេញគ្រាប់ធញ្ញជាតិបានជាប់គាំង ហើយគ្រាប់ធញ្ញជាតិជាច្រើនតោនត្រូវជាប់នៅក្នុងឃ្លាំង ចាប់តាំងពីរុស្ស៊ីបានបញ្ជូនកងទ័ពចូលទៅឈ្លានពាន។
- រដ្ឋមន្ត្រីក្រសួងយុត្តិធម៌អាមេរិក លោក Merrick Garland បានទៅបំពេញទស្សនកិច្ចនៅអ៊ុយក្រែនកាលពីថ្ងៃអង្គារដើម្បីបង្ហាញការគាំទ្ររបស់អាមេរិកដល់រដ្ឋាភិបាលក្រុងកៀវក្នុងការកាត់ទោសកងកម្លាំងរុស្ស៊ីដែលត្រូវបានចោទប្រកាន់ពីបទឧក្រិដ្ឋកម្មសង្រ្គាម និងអំពើឃោរឃៅផ្សេងទៀត។ លោកGarland បានជួបជាមួយអគ្គរដ្ឋអាជ្ញាអ៊ុយក្រែនគឺអ្នកស្រី Iryna Venediktova ដែលកំពុងដឹកនាំការស៊ើបអង្កេតលើអ្វីដែលទីក្រុងកៀវនិយាយថា ជាឧក្រិដ្ឋកម្មសង្រ្គាមដែលត្រូវបានរាយការណ៍ចំនួន១៦០០០ករណី ចាប់តាំងពីរុស្ស៊ីបានឈ្លានពានប្រទេសនេះកាលពីជិតបួនខែមកនេះ។
- ប្រទេសហ្វាំងឡង់បានត្រៀមខ្លួនអស់ជាច្រើនទសវត្សរ៍សម្រាប់ការវាយប្រហារដោយរុស្ស៊ី ហើយនឹងតស៊ូយ៉ាងខ្លាំងក្លា ប្រសិនបើមានការវាយប្រហារមែន។ ទីភ្នាក់ងារសារព័ត៌មាន Reuters បានរាយការណ៍ដូច្នេះដោយដកស្រង់សម្តីប្រមុខកងកម្លាំងប្រដាប់អាវុធរបស់ហ្វាំងឡង់។ ប្រទេសហ្វាំងឡង់បានបង្កើនអាវុធយុទ្ធភណ្ឌយ៉ាងច្រើន។ ប៉ុន្តែក្រៅពីយុទ្ធោបករណ៍ លោកឧត្តមសេនីយ៍ Timo Kivinen បាននិយាយថា កត្តាសំខាន់មួយទៀតគឺថា ជនជាតិហ្វាំងឡង់មានទឹកចិត្តប្រយុទ្ធ។ ប្រទេសហ្វាំងឡង់បានធ្វើសង្រ្គាមពីរលើកក្នុងទសវត្សរ៍១៩៤០ប្រឆាំងនឹងប្រទេសរុស្ស៊ី។
- ទីភ្នាក់ងារសារព័ត៌មាន Reuters បានរាយការណ៍ថា សមាជិកនៃគណៈប្រតិភូរុស្ស៊ីប្រចាំអង្គការសម្រាប់សន្តិសុខ និងកិច្ចសហប្រតិបត្តិការនៅអឺរ៉ុប ឬ OSCE ត្រូវបានអង់គ្លេសបដិសេធមិនផ្តល់ទិដ្ឋាការទៅចូលរួមសម័យប្រជុំបន្ទាប់ទេ។ លោក Vladimir Dzhabarov អនុប្រធានទីមួយនៃគណៈកម្មាធិការកិច្ចការអន្តរជាតិនៃសភាជាន់ខ្ពស់រុស្ស៊ីបានប្រាប់ Reuters ដូច្នេះនៅថ្ងៃពុធ។
- ប្រធានាធិបតីអាមេរិក លោក Joe Biden នឹងនិយាយនៅថ្ងៃពុធនេះ អំពីតម្លៃសាំង និងផលប៉ះពាល់សេដ្ឋកិច្ចដោយសារសង្គ្រាមរបស់រុស្ស៊ីនៅអ៊ុយក្រែន ខណៈលោកពិចារណាថា តើត្រូវគាំទ្រការផ្អាកយកពន្ធសាំងដោយរដ្ឋាភិបាលសហព័ន្ធ ឬយ៉ាងណា។ លោក Biden បាននិយាយថា លោកនឹងធ្វើការសម្រេចចិត្តត្រឹមចុងសប្តាហ៍នេះ។ ពន្ធសាំងត្រូវបានកំណត់ត្រឹម១៨,៤ សេនក្នុងមួយហ្គាឡុង ដោយប្រាក់ភាគច្រើនប្រើប្រាស់លើគម្រោងសាងសង់ផ្លូវ។
- ក្រសួងការពារជាតិរបស់ចក្រភពអង់គ្លេសបាននិយាយកាលពីថ្ងៃពុធថា ប្រទេសរុស្ស៊ីទំនងជាកំពុងរៀបចំដាក់ពង្រាយកងទ័ពបម្រុងមួយចំនួនធំទៅកាន់តំបន់ Donbas ។ ក្រសួងនេះបាននិយាយថា ការស្លាប់បាត់បង់ជីវិតមានចំនួនប្រហែល ៥៥% នៃកងកម្លាំងដើមរបស់កងទ័ពសាធារណរដ្ឋប្រជាមានិត Donetsk ដែលប្រកាសដោយខ្លួនឯង (DPR) និងជាតំបន់រណបមួយរបស់រុស្ស៊ីនៅភាគខាងកើតអ៊ុយក្រែន។ តួលេខដែលបានចេញផ្សាយដោយសាធារណរដ្ឋប្រជាមានិត Donetsk បានបង្ហាញថា គិតត្រឹមថ្ងៃទី១៦ ខែមិថុនា ទាហានចំនួន២.១២៨ នាក់ត្រូវបានសម្លាប់នៅក្នុងបេសកកម្ម ដោយមាន៨៨៩៧នាក់បានរងរបួស ចាប់តាំងពីដើមឆ្នាំ២០២២មក។ នេះបើតាមរបាយការណ៍ដែលបានបង្ហោះតាមប្រព័ន្ធ Twitter៕
២១:៤០
២១.៦.២០២២
ថ្ងៃអង្គារ ទី២១ ខែមិថុនា៖
- អ៊ុយក្រែនបានឃុំខ្លួនមន្ត្រីរដ្ឋាភិបាលជាន់ខ្ពស់ និងមេដឹកនាំអាជីវកម្មម្នាក់ ដែលសង្ស័យថា ជាផ្នែកមួយនៃបណ្តាញចារកម្មរុស្ស៊ី។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មាន Reuters កាលពីថ្ងៃអង្គារ ដោយដកស្រង់ពីសេវាសន្តិសុខអ៊ុយក្រែន(SBU)។
- សេវាសន្តិសុខ (SBU) នេះមិនបានបញ្ចេញឈ្មោះជនសង្ស័យទាំងពីរនាក់នោះទេ ប៉ុន្តែបានបញ្ជាក់អត្តសញ្ញាណពួកគេថា ជាមន្ត្រីជាន់ខ្ពស់នៅក្នុងលេខាធិការដ្ឋានខុទ្ទការល័យគណៈរដ្ឋមន្ត្រី និងម្នាក់ទៀតជាប្រធាននាយកដ្ឋាននៅសភាពាណិជ្ជកម្ម និងឧស្សាហកម្ម ដែលជាក្រុមបញ្ចុះបញ្ចូលធុរកិច្ច។ សេវាសន្តិសុខនេះបានបញ្ជាក់នៅក្នុងសេចក្តីថ្លែងការណ៍មួយតាម Telegram ថា ខ្លួនបានអនុវត្ត «ប្រតិបត្តិការពិសេសពហុដំណាក់កាល» ដើម្បីបង្ក្រាបបណ្តាញចារកម្មរុស្ស៊ីដែលជាប់សង្ស័យនេះ។
- សម្ព័ន្ធមិត្តកំពូលមួយរូបរបស់ប្រធានាធិបតីរុស្ស៊ីលោក វ្ល៉ាឌីមៀ ពូទីន បានព្រមានប្រទេសលីទុយអានី កាលពីថ្ងៃអង្គារថា រុស្ស៊ីនឹងឆ្លើយតបទៅនឹងការបញ្ឈប់ការដឹកជញ្ជូនទំនិញ ដែលត្រូវបានដាក់ទណ្ឌកម្មពីសហភាពអឺរ៉ុប ទៅកាន់តំបន់ Kaliningrad តាមរបៀបដែលពលរដ្ឋនៃប្រទេសសមាជិកអង្គការអូតង់ និងសមាជិកសហភាពអឺរ៉ុបនឹងមានអារម្មណ៍ឈឺចាប់។ នេះបើតាមសេចក្តីរាយការណ៍របស់ទីភ្នាក់ងារសារព័ត៌មាន Reuters។
- លោក Nikolai Patrushev អតីតភ្នាក់ងារចារកម្ម KGB ដែលបច្ចុប្បន្នជាលេខានៃក្រុមប្រឹក្សាសន្តិសុខរុស្ស៊ី បាននិយាយថា សកម្មភាព «អរិភាព» របស់ប្រទេសលីទុយអានី បានបង្ហាញថា រុស្ស៊ីមិនអាចជឿទុកចិត្តលើបស្ចិមប្រទេសបានទេ។
- អ៊ុយក្រែនកំពុងធ្វើការចរចា«ដ៏ស្មុគស្មាញ»ដើម្បីរំដោះកំពង់ផែរបស់ខ្លួនពីការបិទខ្ទប់ដោយកងទ័ពជើងទឹករុស្ស៊ី។ នេះបើតាមការថ្លែងរបស់ប្រធានាធិបតីអ៊ុយក្រែនលោក Volodymyr Zelenskyy បន្ទាប់ពីអ្នកការទូតកំពូលរបស់សហភាពអឺរ៉ុបបានចោទប្រកាន់រុស្ស៊ីថា បានប្រព្រឹត្ត «ឧក្រិដ្ឋកម្មសង្រ្គាមពិតប្រាកដ» ដោយការរារាំងការនាំចេញគ្រាប់ធញ្ញជាតិពីកំពង់ផែនានា។ នេះបើតាមសេចក្តី រាយការណ៍របស់វិទ្យុអឺរ៉ុបសេរី / វិទ្យុសេរីភាព។
- រូបភាពពីផ្កាយរណបបានបញ្ជាក់ការចោទប្រកាន់ថា រុស្ស៊ីកំពុងដឹកជញ្ជូនគ្រាប់ធញ្ញជាតិដ៏ច្រើនលួចពីអ៊ុយក្រែន យកទៅឲ្យរបបរបស់លោក Bashar al-Assad ក្នុងប្រទេសស៊ីរី។ វិទ្យុអឺរ៉ុបសេរី / សេវាវិទ្យុសេរីភាពអ៊ុយក្រែនបានចងក្រងឯកសារនៃការដឹកជញ្ជូនជាបន្តបន្ទាប់តាមរយៈផែធំបំផុតសម្រាប់ដឹកគ្រាប់ធញ្ញជាតិនៅតំបន់គ្រីមៀ ដែលកាន់កាប់ដោយរុស្ស៊ី ហើយបានបោះពុម្ពរបាយការណ៍ស៊ើបអង្កេតនេះ។
- អធិការបតីអាល្លឺម៉ង់លោក Olaf Scholz បាននិយាយថា អាល្លឺម៉ង់នឹងបញ្ជូនសព្វាវុធទៅអ៊ុយក្រែនលុះត្រាលែងត្រូវការ។ លោកបន្ថែមថា ចាប់តាំងពីលោកធ្វើដំណើរទៅកាន់ទីក្រុង Kyiv កាលពីសប្តាហ៍មុន វាបង្ហាញកាន់តែច្បាស់ថា អ៊ុយក្រែនជាផ្នែកមួយរបស់អឺរ៉ុប។ លោក Scholz បានគូសបញ្ជាក់នៅក្នុងព្រឹត្តិការណ៍មួយកាលពីថ្ងៃអង្គារថា អាល្លឺម៉ង់ឈរយ៉ាងម៉ឺងម៉ាត់ជាមួយប្រទេសលីទុយអានី និងសម្ព័ន្ធមិត្តភាគខាងកើតផ្សេងទៀតក្នុងការការពារលទ្ធិប្រជាធិបតេយ្យ និងសេរីភាព សិទ្ធិមនុស្ស និងសង្គមសេរី។
- ប្រទេសលីទុយអានីបានស្នើសុំការគាំទ្រផ្នែកហិរញ្ញវត្ថុបន្ថែមទៀតពីសហភាពអឺរ៉ុបដើម្បីដោះស្រាយបញ្ហាជនភៀសខ្លួនអ៊ុយក្រែន។ ប្រធានាធិបតីប្រទេសលីទុយអានី លោក Gitanas Nauseda បាននិយាយនៅក្នុងសេចក្តីថ្លែងការណ៍មួយកាលពីថ្ងៃអង្គារថា សហភាពអឺរ៉ុបត្រូវតែរួមចំណែកទទួលបន្ទុកហិរញ្ញវត្ថុ ដែលនៅពេលនេះ «ត្រូវបានចាយវាយពីថវិកាជាតិដោយមិនមានសមាមាត្រនឹងគ្នា។ សាមគ្គីភាពរបស់សហភាពអឺរ៉ុបមានសារៈសំខាន់ខ្លាំងណាស់ក្នុងការធានានូវការគាំទ្រត្រឹមត្រូវដល់ជនភៀសខ្លួនគេចចេញពីសង្គ្រាមនៅអ៊ុយក្រែន»។
- អ៊ុយក្រែនរាយការណ៍ឲ្យដឹងពីការវាយប្រហារយ៉ាងខ្លាំងកាលពីថ្ងៃអង្គារនៅក្នុងតំបន់ Sievierodonetsk ខណៈកងកម្លាំងរុស្ស៊ីជំរុញដើម្បីគ្រប់គ្រងទីក្រុងភាគខាងកើតនេះទាំងមូល។ អ្នកនាំពាក្យរបស់អគ្គសេនាធិការនៃកងកម្លាំងប្រដាប់អាវុធអ៊ុយក្រែនបាននិយាយនៅក្នុងសន្និសីទសារព័ត៌មានប្រចាំថ្ងៃថា ការប្រយុទ្ធគ្នានៅក្នុងទីក្រុង Sievierodonetsk មានភាពខ្លាំងក្លា ដោយប្រទេសរុស្ស៊ីបានធ្វើការវាយប្រហារតាមអាកាស និងបាញ់ផ្លោងទៅលើទីតាំងនានារបស់អ៊ុយក្រែន។
- អភិបាលក្រុង Luhansk លោក Serhiy Haidai បានរាយការណ៍ឲ្យដឹងពីការប្រយុទ្ធគ្នាយ៉ាងខ្លាំងនៅឯរោងចក្រគីមី Azot ក្នុងទីក្រុង Sievierodonetsk ជាកន្លែងដែលក្រុមយុទ្ធជនអ៊ុយក្រែន និងជនស៊ីវិលប្រហែល ៥០០ នាក់កំពុងជ្រកកោន។
- រដ្ឋមន្ត្រីការបរទេសរបស់ប្រទេសលុចសំបួបាននិយាយកាលពីថ្ងៃអង្គារថា បណ្តាប្រទេសនៅអឺរ៉ុបបានរួបរួមគ្នាក្នុងការគាំទ្រការផ្តល់ឋានៈជាបេក្ខភាពសមាជិកសហភាពអឺរ៉ុបដល់អ៊ុយក្រែន។ នេះបើយោងតាមទីភ្នាក់ងារសារព័ត៌មាន Reuters។
- មុនពេលកិច្ចប្រជុំជាមួយរដ្ឋមន្ត្រីសហភាពអឺរ៉ុបផ្សេងទៀត លោក Jean Asselborn បានប្រាប់អ្នកយកព័ត៌មានថា «យើងកំពុងធ្វើការឆ្ពោះទៅរកចំណុចដែលយើងប្រាប់លោក Putin ថា អ៊ុយក្រែនជាផ្នែកមួយរបស់សហភាពអឺរ៉ុប ហើយថា យើងក៏នឹងការពារតម្លៃដែលអ៊ុយក្រែនការពារផងដែរ»។
- ទិន្នន័យពីនិយតករសារគមនាគមន៍ Roskomnadzor របស់រដ្ឋាភិបាលរុស្ស៊ីបានបង្ហាញកាលពីថ្ងៃអង្គារថា គេហទំព័ររបស់កាសែតអង់គ្លេស The Telegraph ត្រូវបានបិទនៅក្នុងប្រទេសរុស្ស៊ី បន្ទាប់ពីមានការស្នើសុំពីអគ្គរដ្ឋអាជ្ញា។ នេះបើយោងតាមទីភ្នាក់ងារសារព័ត៌មាន Reuters។
- ជនជាតិអាមេរិកាំងពីរនាក់ដែលត្រូវបានចាប់ខ្លួនក្នុងប្រទេសអ៊ុយក្រែនបច្ចុប្បន្នកំពុងស្ថិតនៅក្នុងតំបន់ Donetsk ដែលគាំទ្រដោយរុស្ស៊ី។ នេះបើតាមទីភ្នាក់ងារសារព័ត៌មាន Reuters កាលពីថ្ងៃអង្គារ ដោយដកស្រង់ពីទីភ្នាក់ងារសារព័ត៌មាន Interfax។
- នាយករដ្ឋមន្ត្រីហ្សកហ្ស៊ី លោក Irakli Garibashvili បាននិយាយកាលពីថ្ងៃអង្គារថា ប្រទេសរបស់លោកប្តេជ្ញាចូលរួមជាសមាជិកអង្គការអូតង់ ប៉ុន្តែត្រូវតែដោះស្រាយបញ្ហាទឹកដីជាមួយរុស្ស៊ីជាមុនសិន។ នេះបើយោងតាមទីភ្នាក់ងារសារព័ត៌មាន Reuters។
- កងកម្លាំងអ៊ុយក្រែនកាលពីសប្តាហ៍មុនបានអះអាងពីការប្រើប្រាស់ដោយជោគជ័យជាលើកដំបូងនូវមីស៊ីល Harpoon ប្រឆាំងនាវា ផ្តល់ដោយបស្ចិមប្រទេសដើម្បីប្រយុទ្ធនឹងកងកម្លាំងរុស្ស៊ី។ នេះបើតាមផ្នែកស៊ើបការណ៍សម្ងាត់យោធារបស់់អង់គ្លេស។ ក្រសួងការពារជាតិអង់គ្លេសបានថ្លែងនៅក្នុងការធ្វើបច្ចុប្បន្នភាពតាមប្រព័ន្ធ Twitter ប្រចាំថ្ងៃរបស់ខ្លួនថា «គោលដៅនៃការវាយប្រហារគឺស្ទើរតែប្រាកដណាស់ គឺនាវាចម្បាំងរបស់កងទ័ពជើងទឹករុស្ស៊ី Spasatel Vasily Bekh ដែលកំពុងបញ្ជូនអាវុធ និងទាហានទៅកាន់កោះពស់ (Snake Island) នៅភាគពាយ័ព្យសមុទ្រខ្មៅ»៕
២២:០០
២០.៦.២០២២
ថ្ងៃចន្ទ ទី២០ ខែមិថុនា៖
- ប្រទេសរុស្ស៊ីនៅថ្ងៃចន្ទនេះបានចោទប្រកាន់សមាជិកមួយចំនួននៃក្រុមប្រទេស G-20 ដែលជាក្រុមប្រទេសសេដ្ឋកិច្ចធំៗនៅលើពិភពលោកថាបានធ្វើឱ្យកិច្ចប្រជុំមួយអំពីបញ្ហាសុខភាពសាកលលោកក្លាយទៅជារឿងនយោបាយ។ សង្គ្រាមនៅអ៊ុយក្រែនគឺចំណុចផ្ដោតនៃកិច្ចប្រជុំរបស់ក្រុមប្រទេស G-20 នៅក្នុងឆ្នាំនេះ។ លោក Oleg Salagay ដែលជាមន្ត្រីផ្នែកសុខាភិបាលរបស់ប្រទេសរុស្ស៊ីបានបញ្ជាក់នៅក្នុងកិច្ចប្រជុំរបស់បណ្ដារដ្ឋមន្ត្រីសុខាភិបាលនៃក្រុមប្រទេស G-20 នៅក្នុងទីក្រុង Yogyakarta ប្រទេសឥណ្ឌូណេស៊ីថា៖ «យើងស្នើសហសេវិករបស់យើងធ្វើយ៉ាងណាកុំឱ្យវេទិកាសុខភាពរបស់ក្រុមប្រទេស G-20 ក្លាយទៅជារឿងនយោបាយ និងធ្វើយ៉ាងណាស្ថិតនៅក្នុងរង្វង់អាណត្តិរបស់យើងនិងពិភាក្សាតែបញ្ហាសុខាភិបាលតែប៉ុណ្ណោះ»។
- អ្នកនាំពាក្យរដ្ឋាភិបាលអាល្លឺម៉ង់បាននិយាយនៅថ្ងៃចន្ទនេះថា ប្រទេសអាល្លឺម៉ង់រួមជាមួយនឹងរដ្ឋមន្ត្រីការបរទេសសហរដ្ឋអាមេរិកលោក Antony Blinken នឹងរៀបចំកិច្ចប្រជុំមួយអំពីវិបត្តិស្បៀងអាហារពិភពលោកដែលកំពុងលេចឡើងបណ្ដើរៗដោយសារសង្គ្រាមនៅក្នុងប្រទេសអ៊ុយក្រែន។ កិច្ចប្រជុំនេះនឹងធ្វើឡើងនៅថ្ងៃសុក្រខាងមុខក្រោមប្រធានបទ «សាមគ្គីភាពដើម្បីសន្តិសុខស្បៀងអាហារសាកលលោក»។ អ្នកនាំពាក្យរូបនោះបានបញ្ជាក់ថា៖ «រដ្ឋាភិបាលអាល្លឺម៉ង់មានការតាំងចិត្តជាពិសេសក្នុងឋានៈជាប្រធានក្រុមប្រទេស G-7 ដើម្បីស្វែងរកចម្លើយរួមចំពោះវិបត្តិភាពអត់ឃ្លាននៅលើពិភពលោកដែលកំពុងលេចឡើងបណ្ដើរៗដោយសារសង្គ្រាមនៃភាពគឃ្លើនរបស់រុស្ស៊ីប្រឆាំងនឹងអ៊ុយក្រែន»។ នេះបើយោងតាមទីភ្នាក់ងារព័ត៌មាន AFP។
- ប្រធានាធិបតីអ៊ុយក្រែនលោក Volodymyr Zelenskyy បានបញ្ជាក់ប្រាប់សហភាពអាហ្វ្រិកនៅថ្ងៃចន្ទនេះថា ទ្វីបអាហ្វ្រិកត្រូវបានក្លាយជាចំណាប់ខ្មាំងរបស់ការឈ្លានពានរបស់រុស្ស៊ីលើអ៊ុយក្រែន ដោយសារតែការឈ្លានពានរបស់រុស្ស៊ីនេះបានធ្វើឱ្យមានបញ្ហាកង្វះស្បៀងអាហារកើតឡើងនិងការភ័យខ្លាចដែលថាវិបត្តិស្បៀងអាហារអាចកើតឡើងនៅទ្វីបអាហ្វ្រិក។ លោក Zelenskyy បានថ្លែងនៅក្នុងសុន្ទរកថាមួយទៅកាន់សហភាពអាហ្វ្រិកថា៖ «ជាការពិត ទ្វីបអាហ្វ្រិកគឺជាចំណាប់ខ្មាំង។ វាគឺជាចំណាប់ខ្មាំងរបស់ប្រទេសដែលធ្វើសង្គ្រាមប្រឆាំងនឹងប្រទេសអ៊ុយក្រែន»។ នៅក្នុងសុន្ទរកថានោះ លោក Zelenskyy ក៏បានរិះគន់ផងដែរលើប្រទេសរុស្ស៊ីថាជាអ្នករាំងខ្ទប់ការនាំចេញធញ្ញជាតិរបស់អ៊ុយក្រែន។ នេះបើយោងតាមទីភ្នាក់ងារព័ត៌មាន AFP។
- រដ្ឋមន្ត្រីការបរទេសហុងគ្រីលោក Peter Szijjarto បាននិយាយនៅថ្ងៃចន្ទនេះថា ប្រទេសហុងគ្រីនឹងផ្ដល់ទឹកដីរបស់ខ្លួនជាផ្លូវដែលអាចទៅរួចមួយសម្រាប់ការនាំចេញធញ្ញជាតិរបស់ប្រទេសអ៊ុយក្រែន ដោយសារតែការនាំចេញធញ្ញជាតិនេះដែលតែងតែធ្វើឡើងតាមផ្លូវនៅសមុទ្រខ្មៅត្រូវបានបង្អាក់ដោយសារការឈ្លានពានរបស់រុស្ស៊ី។ លោក Szijjarto ដែលបានលើកសំណើនេះឡើងនៅឯកិច្ចប្រជុំមួយរបស់បណ្ដារដ្ឋមន្ត្រីការបរទេសសហភាពអឺរ៉ុប ក៏បានបញ្ជាក់ផងដែរថា លោករំពឹងថាការផ្គត់ផ្គង់ឧស្ម័នរបស់រុស្ស៊ីដល់ហុងគ្រីនឹងមិនមានការបង្អាក់នោះទេ។ នេះបើយោងតាមទីភ្នាក់ងារព័ត៌មាន Reuters។
- រដ្ឋមន្ត្រីការបរទេសអាល្លឺម៉ង់អ្នកស្រី Annalena Baerbock បាននិយាយនៅថ្ងៃចន្ទនេះថា ប្រទេសអាល្លឺម៉ង់គាំទ្រប្រទេសប៉ូឡូញនិងប្រទេសរូម៉ានីនៅក្នុងការបត់បែនសម្រួលផ្លូវដែករបស់ខ្លួនដើម្បីអនុញ្ញាតឱ្យមានការនាំចេញធញ្ញជាតិរាប់លានតោនដែលជាប់គាំងនៅក្នុងប្រទេសអ៊ុយក្រែនដោយសារតែការរាំងខ្ទប់របស់រុស្ស៊ីនៅសមុទ្រ។ អ្នកស្រីបានបញ្ជាក់នៅពេលអ្នកស្រីធ្វើដំណើរទៅដល់កន្លែងប្រជុំរបស់បណ្ដារដ្ឋមន្ត្រីការបរទេសនៃសហភាពអឺរ៉ុបនៅក្នុងប្រទេសលុចសំបួថា៖ «ផ្លូវដែកចាំបាច់ត្រូវធ្វើទំនើបនីយកម្ម។ យើងត្រូវការទូរថភ្លើងដែលអាចដឹកអីវ៉ាន់បាន។ រដ្ឋាភិបាលអាល្លឺម៉ង់កំពុងធ្វើកិច្ចការនេះជាមួយនឹងភាគីផ្សេងទៀតជាច្រើន»។ នេះបើយោងតាមទីភ្នាក់ងារព័ត៌មាន Reuters។
- លោក Josep Borrell ប្រធានផ្នែកគោលនយោបាយការបរទេសសហភាពអឺរ៉ុប បាននិយាយនៅថ្ងៃចន្ទនេះថា ការរាំងខ្ទប់របស់រុស្ស៊ីលើការនាំចេញធញ្ញជាតិរាប់លានតោនរបស់អ៊ុយក្រែនគឺជាឧក្រិដ្ឋកម្មសង្គ្រាម។ លោកបានប្រាប់អ្នកសារព័ត៌មានថា៖ «យើងអំពាវនាវឱ្យរុស្ស៊ីបញ្ឈប់ការរាំងខ្ទប់កំពង់ផែ [របស់អ៊ុយក្រែន]។ ...វាជារឿងដែលមិនគួរឱ្យជឿ។ គេមិនអាចនឹកស្មានថាស្រូវសាឡីរាប់លានតោននៅតែជាប់គាំងនៅក្នុងប្រទេសអ៊ុយក្រែន នៅពេលដែលប្រជាពលរដ្ឋនៅក្នុងប្រទេសផ្សេងទៀតនៅលើពិភពលោកកំពុងរងគ្រោះដោយសារភាពអត់ឃ្លាន»។ លោកបានបញ្ជាក់នៅពេលធ្វើដំណើរទៅដល់កន្លែងប្រជុំរបស់បណ្ដារដ្ឋមន្ត្រីការបរទេសនៃសហភាពអឺរ៉ុបនៅក្នុងប្រទេសលុចសំបួថា៖ «នេះគឺជាឧក្រិដ្ឋកម្មសង្គ្រាមពិតប្រាកដ»។ នេះបើយោងតាមទីភ្នាក់ងារព័ត៌មាន Reuters។
- លោក Ben Stiller ដែលជាតួសម្ដែងនិងជាឯកអគ្គរដ្ឋទូតសុឆន្ទៈរបស់ឧត្តមស្នងការអង្គការសហប្រជាជាតិទទួលបន្ទុកកិច្ចការជនភៀសខ្លួន (UNHCR) បានស្ថិតនៅក្នុងប្រទេសអ៊ុយក្រែននៅថ្ងៃចន្ទនេះដែលជាទិវាជនភៀសខ្លួន។ លោកបាននិយាយដូច្នេះថា៖ «គ្មាននរណាម្នាក់ជ្រើសរើសយកការភៀសខ្លួនពីផ្ទះសម្បែងនោះទេ។ ការស្វែងរកសុវត្ថិភាពគឺជាសិទ្ធិ។ ហើយសិទ្ធិនេះចាំបាច់ត្រូវតែប្រកាន់ខ្ជាប់សម្រាប់មនុស្សគ្រប់គ្នា»។
- រដ្ឋាភិបាលអ៊ុយក្រែនបានបញ្ជាក់នៅថ្ងៃចន្ទនេះថា កងកម្លាំងរុស្ស៊ីបានបង្កើនការបាញ់ផ្លោងនៅក្នុងតំបន់ Kharkiv និងតំបន់ Donetsk ក្នុងប្រទេសអ៊ុយក្រែន។ រដ្ឋាភិបាលអ៊ុយក្រែនលើកឡើងដូច្នេះ បន្ទាប់ពីប្រធានាធិបតីអ៊ុយក្រែនលោក Volodymyr Zelenskyy បានព្រមានកាលពីយប់ថ្ងៃអាទិត្យថា ប្រទេសរុស្ស៊ីនឹងបង្កើនការវាយប្រហាររបស់ខ្លួននៅសប្ដាហ៍នេះនៅមុនពេលដែលសហភាពអឺរ៉ុបពិភាក្សាជាប្រវត្តិសាស្ត្រនៅថ្ងៃព្រហស្បតិ៍និងថ្ងៃសុក្រខាងមុខ អំពីការផ្ដល់ឋានៈជាបេក្ខភាពប្រទេសដល់អ៊ុយក្រែនសម្រាប់ការចូលជាសមាជិកនៅក្នុងសហភាពអឺរ៉ុប។ នេះបើយោងតាមទីភ្នាក់ងារព័ត៌មាន AFP។
- ប្រធានាធិបតីអ៊ុយក្រែនលោក Volodymyr Zelenskyy បានប្រមើលមើលថា ប្រទេសរុស្ស៊ីនឹងបង្កើនការវាយប្រហាររបស់ខ្លួននៅសប្ដាហ៍នេះ ស្របពេលដែលបណ្ដាមេដឹកនាំសហភាពអឺរ៉ុបពិចារណាអំពីកិច្ចប្រឹងប្រែងរបស់ប្រទេសអ៊ុយក្រែននៅក្នុងការចូលជាសមាជិកសហភាពអឺរ៉ុបនិងស្របពេលដែលរុស្ស៊ីបង្កើនយុទ្ធនាការរបស់ខ្លួនដើម្បីដណ្ដើមកាន់កាប់តំបន់ភាគខាងកើតប្រទេសអ៊ុយក្រែន។ នេះបើយោងតាមសេចក្ដីរាយការណ៍របស់ទីភ្នាក់ងារព័ត៌មាន Reuters។ លោក Zelenskyy បានបញ្ជាក់នៅក្នុងសុន្ទរកថាជាវីដេអូកាលពីយប់ថ្ងៃអាទិត្យថា៖ «ជាការពិត នៅសប្ដាហ៍នេះយើងគួរតែរំពឹងថា រុស្ស៊ីនឹងបង្កើនសកម្មភាពអរិភាពរបស់ខ្លួន»។