ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

ជនជាតិ​ប៉ាឡេស្ទីន​ត្រឡប់​ទៅ​ភាគ​ខាងជើង​តំបន់​ហ្កាហ្សា​វិញ​ក្រោយ​មាន​កិច្ច​ព្រមព្រៀង​ថ្មី


ពលរដ្ឋ​ប៉ាឡេស្ទីន​ត្រឡប់​មក​ផ្ទះ​របស់​ខ្លួន​វិញ​នៅ​ភាគខាងជើង​តំបន់ហ្កាហ្សា។
ពលរដ្ឋ​ប៉ាឡេស្ទីន​ត្រឡប់​មក​ផ្ទះ​របស់​ខ្លួន​វិញ​នៅ​ភាគខាងជើង​តំបន់ហ្កាហ្សា។

ជនជាតិ​ប៉ាឡេស្ទីន​ដែល​ភៀសខ្លួន​ពី​ផ្ទះ​សម្បែង​ដ៏​ច្រើន​ណែនណាន់​តាន់តាប់​បាន​ចាប់ផ្ដើម​ធ្វើ​ដំណើរ​ឆ្ពោះ​ទៅកាន់​ភាគ​ខាងជើង​នៃ​តំបន់​ហ្កាហ្សា​កាលពី​ថ្ងៃ​ចន្ទ បន្ទាប់ពី​អ៊ីស្រាអែល​និង​ក្រុម​ហាម៉ាស់​បាន​និយាយ​ថា​ពួកគេ​បាន​សម្រេច​បាន​នូវ​កិច្ច​ព្រមព្រៀង​មួយ​ដើម្បី​ដោះលែង​ចំណាប់ខ្មាំង ៦ នាក់​ទៀត។ នេះ​បើ​យោង​តាម​សេចក្ដី​រាយការណ៍​របស់​ទីភ្នាក់ងារ​សារព័ត៌មាន AFP។

ការ​សម្រេច​បាន​នូវ​កិច្ច​ព្រមព្រៀង​នេះ​ធ្វើឲ្យ​បទឈប់បាញ់​ដ៏​ផុយស្រួយ​នេះ​នៅ​រក្សា​ដដែល​និង​បើក​ផ្លូវ​ឲ្យ​មាន​ការ​ដោះដូរ​ចំណាប់ខ្មាំង​ជាមួយ​អ្នកទោស​បន្ថែម​ទៀត​នៅក្រោម​កិច្ច​ព្រមព្រៀង​មួយ​ដែល​មាន​បំណង​បញ្ចប់​សង្គ្រាម​ជាង ១៥ ខែ​កន្លង​មក​នេះ។ សង្គ្រាម​នេះ​បាន​បំផ្លិចបំផ្លាញ​តំបន់​ហ្កាហ្សា​និង​ធ្វើឲ្យ​ពលរដ្ឋ​តំបន់​នេះ​ស្ទើរតែ​ទាំងអស់​ភៀសខ្លួន​ពី​ផ្ទះ​សម្បែង។

កន្លងមក អ៊ីស្រាអែល​បាន​រារាំង​ជនជាតិ​ប៉ាឡេស្ទីន​មិន​ឲ្យ​ត្រឡប់​ទៅ​ផ្ទះ​វិញ​នៅ​ភាគ​ខាងជើង​តំបន់​ហ្កាហ្សា ដោយ​បាន​ចោទ​ប្រកាន់​ក្រុម​ហាម៉ាស់​ថា​រំលោភ​លើ​លក្ខខណ្ឌ​នៃ​បទឈប់បាញ់។ ប៉ុន្តែ​ខុទ្ទកាល័យ​របស់​នាយករដ្ឋមន្ត្រី​អ៊ីស្រាអែល​លោក Benjamin Netanyahu បាន​បញ្ជាក់​កាលពី​យប់​ថ្ងៃ​អាទិត្យ​ថា ជនជាតិ​ប៉ាឡេស្ទីន​អាច​ធ្វើដំណើរ​ត្រឡប់​ទៅ​ផ្ទះ​របស់​ខ្លួន​វិញ​បាន​ក្រោយពី​កិច្ច​ព្រមព្រៀង​ថ្មី​ត្រូវបាន​សម្រេច​ឡើង។

មនុស្ស​ដ៏​ច្រើន​ណែនណាន់​តាន់តាប់​បាន​ចាប់ផ្ដើម​ធ្វើ​ដំណើរ​ដោយ​ថ្មើរ​ជើង​ឆ្ពោះ​ទៅកាន់​ភាគ​ខាងជើង​តំបន់​ហ្កាហ្សា​តាម​ផ្លូវ​ជាប់​សមុទ្រ​កាលពី​ព្រឹក​ថ្ងៃ​ចន្ទ ដោយ​យក​ទៅ​ជាមួយ​នូវ​របស់របរ​នានា​ដែល​ពួកគេ​អាច​យក​បាន។ នេះ​បើ​តាម​ការ​បង្ហាញ​របស់​រូបភាព​វីដេអូ​របស់ AFP។

មន្ត្រី​សន្តិសុខ​តំបន់​ហ្កាហ្សា​ម្នាក់​បាន​ប្រាប់​ទីភ្នាក់ងារ​សារព័ត៌មាន AFP ថា «ជន​ភៀសខ្លួន​ពី​ផ្ទះ​សម្បែង​ជាង ២០០.០០០ នាក់​បាន​ត្រឡប់​ទៅកាន់​តំបន់​ហ្កាហ្សា​និង​ភាគ​ខាងជើង​នៃ​តំបន់​នេះ​វិញ» ក្នុង​រយៈពេល​តែ ២ ម៉ោង​ដំបូង​តែ​ប៉ុណ្ណោះ​កាលពី​ថ្ងៃ​ចន្ទ។

បើ​យោង​តាម​ការិយាល័យ​ប្រព័ន្ធ​ផ្សព្វផ្សាយ​រដ្ឋាភិបាល​ដែល​គ្រប់គ្រង​ដោយ​ក្រុម​ហាម៉ាស់ តង់​និង​ជម្រក​ស្នាក់នៅ​ចំនួន ១៣៥.០០០ គឺ​ត្រូវការ​នៅក្នុង​ទីក្រុង​ហ្កាហ្សា​និង​ផ្នែក​ភាគ​ខាងជើង​នៃ​តំបន់​នេះ​ដើម្បី​ទទួល​ក្រុម​គ្រួសារ​ដែល​ធ្វើ​ដំណើរ​ត្រឡប់​ទៅកាន់​តំបន់​ទាំងនោះ​វិញ៕

វេទិកា​បញ្ចេញ​មតិ

XS
SM
MD
LG