ស្ថាប័នតុលាការ ប៉ូលិសនិងវិស័យសាធារណៈនៅតែជាស្ថាប័នដែលមានកម្រិតអំពើពុករលួយខ្ពស់បំផុតនៅក្នុងប្រទេសកម្ពុជា។ នេះបើតាមការចុះផ្សាយទិន្នន័យចុងក្រោយរបស់អង្គការតម្លាភាពកម្ពុជានៅថ្ងៃចន្ទនេះ។
មជ្ឈមណ្ឌលតស៊ូមតិនិងប្រឹក្សាយោបល់ផ្នែកច្បាប់នៃអង្គការតម្លាភាពកម្ពុជាបានបន្ថែមថាទម្រង់នៃអំពើពុករលួយដែលកើតមានជាទូទៅរួមមាន ការជំរិតទារប្រាក់ ការសូកប៉ាន់ និងការកេងប្រវ័ញ្ចថវិកាឬការបោកប្រាស់។
សេចក្តីប្រកាសព័ត៌មានបានបន្ថែមថាការរកឃើញនេះ ដោយផ្អែកលើទិន្នន័យដែលទទួលបានមកពីករណីចំនួន១៩១ដែលមជ្ឈមណ្ឌលនេះទទួលបាន។
លោកព្រាប កុល នាយកប្រតិបត្តិអង្គការតម្លាភាពកម្ពុជាបានបញ្ជាក់ថា៖
«ទិន្នន័យរបស់មជ្ឈមណ្ឌលតស៊ូមតិនិងប្រឹក្សាយោបល់ផ្នែកច្បាប់នេះឆ្លុះបញ្ចាំងពីសំឡេងនិងការព្រួយបារម្មណ៍ពិតប្រាកដរបស់ជនរងគ្រោះនៃ អំពើពុករលួយ។ របកគំហើញនេះបានគូសបញ្ជាក់សារជាថ្មីថាអំពើពុករលួយក្នុងប្រព័ន្ធយុត្តិធម៌ ប៉ូលិសនិងវិស័យសាធារណៈនៅតែ បង្កផលប៉ះពាល់ដល់ប្រជាពលរដ្ឋទូទៅនិងនៅតែជាឧបសគ្គដ៏ធំបំផុតដល់ការអភិវឌ្ឍតាមបែបលទ្ធិប្រជាធិបតេយ្យនិងនីតិរដ្ឋ»។
ក្រៅពីនេះស្ថាប័នអប់រំនិងសុខាភិបាលក៏ជាប់លំដាប់ទីបួននិងទីប្រាំក្នុងចំណោមស្ថាប័នរដ្ឋដែលពុករលួយក្នុងប្រទេសកម្ពុជាផងដែរ៕
