ជនជាតិភាគតិចភាគឦសានព្រួយ បារម្ភអំពីការបាត់បង់ព្រៃឈើ

ជនជាតិដើមភាគតិចនៅភូមិភាគឦសាននៃប្រទេសកម្ពុជាព្រួយបារម្ភអំពីការ
បាត់បង់ព្រៃឈើ ដោយរួមទាំងព្រៃជំនឿរបស់ពួកគេផងដែរ ដោយសារតែការ
ផ្តល់ដីសម្បទានសេដ្ឋកិច្ចដល់ក្រុមហ៊ុនឯកជន។ប៉ុន្តែអាជ្ញាធរខេត្តអះអាងថា
ប្រជាពលរដ្ឋខ្លួនឯងជាអ្នកកាប់បំផ្លាញព្រៃឈើ។

នៅតាមផ្លូវធ្វើដំណើរពីខេត្តស្ទឹងត្រែងឆ្ពោះទៅខេត្តរតនៈគីរី គេអាចមើលឃើញ
ព្រៃឈើដ៏ស្រស់ត្រកាលដុះអមសងខាងផ្លូវ។ ប៉ុន្តែបើគេចុះពីផ្លូវទៅឲ្យហួសពី
ព្រៃឈើដែលដុះនៅអមសងខាងផ្លូវនេះប្រមាណជា២គីឡូម៉ែត្រ គេឃើញតែ
វាលដែលមានតែស្មៅនិងរុក្ខជាតិព្រៃតូចៗដុះពាសវាលពាសកាលទៅវិញ។

លោកកែវ ម៉ីបកំពុងដើរតាមផ្លូវដីក្រហមតូចមួយក្រោមកំដៅថ្ងៃពេលម៉ោងប្រ-
មាណជា១២ថ្ងៃត្រង់ តម្រង់ឆ្ពោះទៅទីវាលដែលមើលទៅវែងឆ្ងាយដាច់កន្ទុយ
ភ្នែកនេះ។

បុរសវ័យ៣៩ឆ្នាំ ជាជនជាតិព្នងនៅក្នុងភូមិក្បាលរមាស ស្រុកសេសាន ខេត្ត
ស្ទឹងត្រែងរូបនេះបានអះអាងថា ទីវាលដែលមានប្រវែងរាប់ពាន់ហិកតានេះគឺ
ជាដីដាំកូនកៅស៊ូរបស់ក្រុមហ៊ុនឯកជនមួយ ដែលទទួលបានដីសម្បទានសេដ្ឋ
កិច្ចពីរដ្ឋាភិបាល។ប៉ុន្តែលោកថា ក្រុមហ៊ុននោះបានបោះបង់ដំណាំកៅស៊ូរបស់
គេចោលក្រោយពីបានកាប់រានឈូសឆាយនិងប្រមូលឈើល្អៗចេញពីព្រៃអស់
ហើយនោះ។

លោក កែវ ម៉ីប ដើរបណ្តើរ និយាយបណ្តើរថា ជនជាតិព្នងរបស់លោកពឹង
អាស្រ័យនឹងព្រៃឈើដើម្បីទ្រទ្រង់ជីវភាពរស់នៅប្រចាំថ្ងៃ ដូច្នេះលោកថា ការ
បាត់បង់ព្រៃឈើនេះគឺដូចជាការបាត់បង់ប្រាក់ចំណូលសំរាប់ជនជាតិភាគតិច
របស់លោកដូច្នោះដែរ។

“ទីមួយវាបាត់បង់មុខរបររកស៊ីដូចជារុករកផល អនុផលព្រៃឈើអញ្ចឹង ទៅរក
កន្លែងណា បើវាអស់ព្រៃហើយ មួយទៀតវាប៉ះពាល់ជាមួយដីក្រុមហ៊ុន យើង
ងាកចេញមកក្រៅមក ដីក្រុមហ៊ុនអស់ហើយ អញ្ចឹងយើងមានដីកន្លែងណាដី
តិចតួចហ្នឹងមិនគ្រប់គ្រាន់ផង កូនចៅជំនាន់ក្រោយកាន់តែកើនឡើងៗ”។

ក្រុមអ្នកភូមិអះអាងថាពួកគេតែងតែឮថា ក្រុមហ៊ុនដែលទទួលបានដីសម្បទាន
សេដ្ឋកិច្ចនឹងដាំដើមកៅស៊ូ ឬ ដំណាំកសិឧស្សាហកម្មផ្សេងទៀត នៅលើដីព្រៃ
ដែលក្រុមហ៊ុនទាំងនោះបានឈូសឆាយ ប៉ុន្តែកន្លងមកគេឃើញតែក្រុមហ៊ុនមក
កាប់ឈូសឆាយព្រៃឈើ រួចហើយប្រមូលឈើល្អប្រណិតចេញទៅអស់ដោយ
មិនខ្វល់នឹងថែទាំដំណាំរបស់ពួកគេឡើយ។

“គេដាំកៅស៊ូឃើញដាំ ប៉ុន្តែអត់ថែ គេចូលកាប់ឈើយកទៅ ប្រើអាស្អីដៃ យើង
នោះអាអ៊ិច អាប៊ុល គេយកឈើធ្នង់ អាត្រង់ៗយកទាំងអស់តាំងពី២តឹកឡើង
ទៅ អាត្រង់ៗយកទាំងអស់ ឡានអីអាវែងៗ អាយីឌុបក៏មាន”។

លោក ជឿម គា មេភូមិក្បាលរមាសបានមានប្រសាសន៍ថា ប្រជាពលរដ្ឋចំនួន
១២០គ្រួសារនៅក្នុងភូមិរបស់លោកដែលសុទ្ធតែជាជនជាតិព្នងស្ទើរតែទាំងអស់
នោះ បានសម្តែងក្តីព្រួយបារម្ភ ចំពោះការបាត់បង់ព្រៃជំនឿរបស់ពួកគេដោយ
សារតែការកាប់និងឈូសឆាយព្រៃឈើដោយឈ្មួញទុច្ចរិត និង ក្រុមហ៊ុន ដែល
ទទួលបានដីសម្បទានពីរដ្ឋាភិបាលមួយចំនួននោះ។

ការបាត់បង់ព្រៃជំនឿត្រូវបានលោក ជឿម គា ពន្យល់ថាអាចនឹងធ្វើឱ្យដូនតា
ឬអារុក្ខអារ័ក្សអ្នកតាថែរក្សាព្រៃភ្នំខឹងសម្បារ ហើយនឹងធ្វើទុក្ខបុកម្នេញមកលើ
ជនជាតិដើមភាគតិចរបស់លោកដូចជាបង្កឲ្យមានគ្រោះទុរភិក្សឬជម្ងឺអាសន្ន
រោគផ្សេងៗជាដើម។

“ព្រៃជំនឿ ឧទាហរណ៍ថាតំបន់កន្លែងសក្តិសិទ្ធិចុះ បើសិនជាមកឈូសឆាយ
ដូចជាក្រុមហ៊ុនធ្វើ ឬគាស់កកាយអីហ្នឹង វាអាចធ្វើឱ្យធ្វើទុក្ខដល់យើងអ្នកភូមិ
ថា យើងទៅរុកទៅរានតំបន់របស់គេ វាអាចមានគ្រោះថ្នាក់គ្រោះដល់អ្នកភូមិ
ដូចអ្នកភូមិចាស់អញ្ចឹងស្រ្តីមានផ្ទៃពោះ កូនកើតម៉ោ ងាប់ កើតម៉ោងាប់ ជាង
២០នាក់”។

ប្រជាជនភាគច្រើនជាពិសេសអ្នកដែលរស់នៅតាមបណ្តោយទន្លេសេសាននិង
ស្រែពកនៅក្នុងខេត្តស្ទឹងត្រែងនិងខេត្តរតនៈគីរីគឺជាជនជាតិដើមភាគតិច ដែល
មានជំនឿទៅលើអារុក្ខអារ័ក្សអ្នកតា។ ជនជាតិដើមភាគតិចទាំងនេះ មានដូច
ជាជនជាតិព្នង ចារាយ កាចក ព្រៅ តាវែត គ្រឹង លននិងទំពួន ជាដើម។ ពួក
គេរស់នៅពឹងផ្អែកទៅលើធនធានធម្មជាតិជាពិសេសគឺផល និងអនុផលព្រៃ
ឈើតែម្តង។

ថ្លែងនៅឯពិធីជួបជុំគ្នាមួយរបស់តំណាងសហគមន៍ជនជាតិដើមភាគតិចដែល
គេរៀបចំឡើងកាលពីសប្តាហ៍មុននៅក្នុងខេត្តរតនៈគីរីនេះ លោករមាមទែន មក
ពីសហគមន៍ភូមិត្រណង ឃុំតាឡាវ ក្នុងស្រុកអណ្តូងមាសខេត្តរតនៈគីរី បាន
មានប្រសាសន៍ថា ប្រជាសហគមន៍របស់លោកកំពុងភ័យព្រួយអំពីការបាត់បង់
ព្រៃឈើដែលជាអាយុជីវិតរបស់ជនជាតិដើមរបស់លោកដោយសារតែការឈូស
ឆាយដីព្រៃដោយក្រុមហ៊ុនដែលទទួលបានដីសម្បទានសេដ្ឋកិច្ច។

“ចំការវិលជុំក៏អស់ ស្រែក៏អស់គេថាដីសម្បទានសេដ្ឋកិច្ច វិនិយោគដាំជាដំណាំ
កសិកម្ម កសិឧស្សាហកម្ម ចុះប្រជាពលរដ្ឋយើងខ្ញុំរស់នៅតទៅទៀតយ៉ាងម៉ិច
បាន? ក្នុងឆាកជីវិតយើងខ្ញុំ ជាអ្នករស់នៅអាស្រ័យផលទៅលើធម្មជាតិព្រៃឈើ
ពីព្រោះតំបន់ចុងកាត់មាត់ញកពឹងផ្អែកទៅលើបរិស្ថានព្រៃភ្នំក្រំថ្មហ្នឹងហើយរស់
នៅពឹងតែប៉ុណ្ណឹង ចុះបើអស់អាហ្នឹងហើយពួកខ្ញុំមានន័យថាអស់ជីវិត”។

ក្នុងចំណោមព្រៃឈើប្រមាណជា៨០ភាគរយដែលគ្រប់ដណ្តប់លើផ្ទៃដីជាង១
ម៉ឺនគីឡូម៉ែត្រក្រឡារបស់ខេត្តរតនៈគីរីនេះ យ៉ាងហោចណាស់ក៏មាន៣ម៉ឺន
ហិកតាដែរ ដែលត្រូវបានកាប់បំផ្លាញដោយខុសច្បាប់ នេះបើយោងតាមលោក
ប៉ែនប៊ុណ្ណារ៍អតីតអ្នកសម្របសម្រួលសមាគមន៍អាដហុកប្រចាំខេត្តរតនៈគីរី
នេះ។

លោក ប៉ែន ប៊ុណ្ណារ៏ បន្ថែមថា បើគិតពីឆ្នាំ២០០៤ នៅពេលដែលមានការកាប់
ព្រៃឈើយ៉ាងអាណាធិបតេយ្យនៅក្នុងខេត្តនេះមក យ៉ាងហោចណាស់ក៏មាន
រណាយន្តចំនួន១៥០០គ្រឿងដែរ ដែលកំពុងប្រតិបត្តិការអារឈើដោយខុស
ច្បាប់នោះ។

លោកប៉ែន ប៊ុណ្ណារ៏ ដែលទើបនឹងត្រូវបានគេផ្លាស់ចេញពីខេត្តរតនៈគីរីកាលពី
ពេលថ្មីៗនេះក៏បាន មានប្រសាសន៍ប្រាប់ VOA តាមទូរស័ព្ទដែរថា រហូតមក
ពេលនេះក្រុមហ៊ុនឯកជនដែលទទួលបានដីសម្បទានសេដ្ឋកិច្ចនៅក្នុងខេត្ត
រតនៈគីរីនេះមានចំនួន៧។ ក្រុមហ៊ុនទាំងនេះធ្វើវិនិយោគទុកលើ ដំណាំកៅស៊ូ
ប៉ុន្តែលោកប៉ុណ្ណារ៍បញ្ជាក់ថា ភាគច្រើនពុំបានបំពេញតាមកិច្ចព្រមព្រៀងសម្ប
ទានរបស់ខ្លួនឡើយ។

ថ្លែងទៅកាន់តំណាងសហគមន៍ជនជាតិដើមភាគតិចជាង២០០នាក់ ដែលមក
សម្តែងក្តីព្រួយបារម្ភ របស់ពួកគេនោះ លោក ម៉ុម សារឿន អភិបាលរងខេត្ត
រតនៈគីរីបានមានប្រសាសន៍ថា ការកាប់ឈូសឆាយព្រៃឈើដោយក្រុមហ៊ុន
ដែលទទួលបានសម្បទានសេដ្ឋកិច្ចពីរដ្ឋាភិបាលនោះ មិនបានបង្កផលប៉ះពាល់
ធ្ងន់ធ្ងរដល់ធនធានធម្មជាតិខ្លាំងពេកនោះទេ។

“គេវិនិយោគ គេធ្វើហ្នឹងហើយគេដាំកៅស៊ូទៅ វាបានបរិស្ថានវិញមិនបាត់បង់
ទាំងស្រុងទេ ឧបមាថា កាប់ទៅអត់មានធ្វើអីសោះ កាប់ទៅបំផ្លាញចោល
អញ្ចឹងទៅវាពិបាកដែរតែឥឡូវវាគ្មានអីក្រៅពីខ្លួនយើងទទួលខុសត្រូវខ្លួនយើង
ទេម៉ោងនេះ” ។

លោក អភិបាលរងខេត្តរតនៈគីរី ម៉ុម សារឿន អះអាងថាការបាត់បង់ព្រៃឈើ
នេះគឺដោយសារតែប្រជាពលរដ្ឋនៅមូលដ្ឋានផ្ទាល់ជាអ្នកកាប់បំផ្លាញដោយខ្លួន
ឯង ដោយសម្លឹងឃើញប្រាក់របស់ឈ្មួញ។

“យើងឃើញឈ្មួញឱ្យលុយដូល្លាយើងចាប់ផ្តើមកាប់ឈើលក់ ដល់កាប់ហើយ
ពិបាកខ្លួនឯង មុនដំបូងកាប់ឈើប្រណិតទេ អស់ឈើប្រណិតឈើបន្តៗមក
អស់រលីងបណ្តោយ វាមានអ្នកណាផ្សេងមកកាប់ក្រៅពីយើងកាប់ខ្លួនយើង
បំផ្លាញខ្លួនយើងមានអ្នកណាមកកាប់ ហើយតែកាប់ទៅឈ្មួញទិញហើយ ខ្ញុំ
និយាយនេះមិនមែនការពារអ្នកទិញទេ ខុសទាំងពីរ ហើយឥឡូវកំពុងតែដាក់
វិធានការក្តៅ អនុវត្តច្បាប់ព្រៃឈើតែម្តងបាទ”។

លោកបន្ថែមថា ប្រជាសហគមន៍ជនជាតិដើមភាគតិចគួរតែចូលរួមជាមួយ
អាជ្ញាធរមូលដ្ឋានក្នុងការទប់ស្កាត់ការកាប់ព្រៃឈើខុសច្បាប់ ដោយត្រូវរាយ
ការណ៍ជាបន្ទាន់នូវរាល់បទល្មើសព្រៃឈើដែលបានកើតឡើង។

តែទោះជាយ៉ាងនេះក្តី លោក ប៉ែន ប៊ុណ្ណារ៏ នៃសមាគមន៍អាដហុកបានមាន
ប្រសាសន៍ថា ការកាប់ ឈូសឆាយដីព្រៃដោយក្រុមហ៊ុនសម្បទានគួរតែត្រូវ
បានកំណត់នៅត្រឹមតំបន់ព្រៃណាដែលគ្មានប្រយោជន៍និងមិនប៉ះពាល់ដល់
ព្រៃរបស់ជនជាតិដើមភាគតិច ដែលកំពុងរស់នៅក្នុងភូមិភាគឦសាននៃប្រ-
ទេសកម្ពុជានេះ៕ ចប់