សមាជិកសភាស.រ.អា៖ ការបោសសម្អាតក្រុមជនភាគតិចកំពុងកើតឡើងក្នុងប្រទេសម៉ីយ៉ាន់ម៉ា
ក្រុមសមាជិកសភាសហរដ្ឋអាមេរិកកំពុងជំរុញឲ្យរដ្ឋបាលលោក Trump ប្រកាសថា វិធានការណ៍បោសសម្អាតជនជាតិភាគតិច កំពុងតែធ្វើឡើងប្រឆាំងក្រុមជនភាគតិចរ៉ូហ៊ីងយ៉ាកាន់សាសនាឥស្លាមនៅក្នុងប្រទេសម៉ីយ៉ាន់ម៉ា។ ប្រទេសដែលមាន ពលរដ្ឋភាគច្រើនកាន់សាសនាព្រះពុទ្ធ ដែលត្រូវបានគេស្គាល់ថាជាប្រទេសភូមានេះ បានបង្កើនចំណងទាក់ទងជាមួយរដ្ឋបាលក្រុងវ៉ាស៊ីនតោននៅប៉ុន្មានឆ្នាំចុងក្រោយនេះ។ លោក Michael Bowman នៃ VOA រាយការណ៍ថា ក្រុមសមាជិកព្រឹទ្ធសភា កាលពីពេលថ្មីៗនេះ បានជំរុញឲ្យក្រុមមន្រ្តីសហរដ្ឋអាមេរិកចាត់វិធានការណ៍តឹងរឹងជាងមុនប្រឆាំងទៅនឹងការគាបសង្កត់យ៉ាងឃោរឃៅ និងការរត់ភៀសខ្លួនរបស់ជនអំបូររ៉ូហ៊ីងយ៉ារាប់សែននាក់ក្នុងប្រទេសម៉ីយ៉ាន់ម៉ា។ អ្នកស្រី ស៊ូ ពេជ្រចិន្តា ជូនសេចក្ដីប្រែសម្រួល៕