អ្នកស្រីទេព វន្នី សុំឱ្យអន្តរជាតិដាក់សម្ពាធឲ្យរដ្ឋាភិបាលដោះស្រាយទំនាស់ដីធ្លី
ជ័យលាភីរង្វាន់ភាពជាអ្នកដឹកនាំរបស់អង្គការ Vital Voice និងជាសកម្មជនដីធ្លីគឺអ្នកស្រីទេព វន្នី កំពុងស្ថិតនៅក្នុងរដ្ឋធានីវ៉ាស៊ីនតោនដើម្បីចូលរួមប្រជុំជាមួយនឹងធនាគារពិភពលោក។ នៅក្នុងបទសម្ភាសន៍ជាមួយវីអូអេអ្នកស្រីទេព វន្នីបាននិយាយថា សហគមន៍អន្តរជាតិ រួមទាំងធនាគារពិភពលោក គួរតែដាក់សម្ពាធមកលើប្រទេសកម្ពុជាដើម្បីបញ្ចប់ការឆក់ប្លន់ដីធ្លីនិងការរំលោភសិទ្ធិមនុស្ស។ លោកស្រី បន្ថែមថា ការតវ៉ាអហិង្សាដែលគាត់បានដឹកនាំធ្វើកាលពីថ្ងៃអាទិត្យត្រូវកម្លាំងប៉ូលិសនិងក្រុមជនពាលបង្ក្រាបយ៉ាងសាហាវ។ លោកស្រីបានហៅថា នោះគឺជាការប៉ុនប៉ងធ្វើមនុស្សឃាតមកលើអ្នកតវ៉ាក្នុងសហគមន៍បឹងកក់និងបូរីកីឡា ហើយជាចេតនាក្នុងការឆក់ប្លន់ផងដែរ៕
