កាលពីថ្ងៃច័ន្ទ ក្រុមអ្នកស៊ើបអង្កេតអ.ស.ប.បានចោទប្រកាន់អាជ្ញាធរស៊ីរីថា បាន «កម្ទេច»ជនស៊ីវិលច្រើននាក់ដែលពួកគេបានឃុំឃាំង ដោយនិយាយថាការណ៍នេះជា«ឧក្រិដ្ឋកម្មមួយប្រឆាំងនឹងមនុស្សជាតិ»។
ការស៊ើបអង្កេតរបស់អ.ស.ប. ដែលផ្អែកលើការធ្វើសម្ភាសន៍ជាមួយក្រុមអ្នកនៅរស់រានជាង៦០០នាក់និងអ្នកឃើញហេតុការណ៍ដោយផ្ទាល់នៃជីវភាពនៅក្នុងគុកក្នុងប្រទេសស៊ីរីបាននិយាយថា រដ្ឋាភិបាលរបស់ប្រធានាធិបតី Bashar al-Assad បានឃុំឃាំងមនុស្សរាប់ម៉ឺននាក់នៅពេលមួយនោះ ហើយថាមានមនុស្សរាប់ពាន់នាក់ទៀតបាន «បាត់ខ្លួន» នៅក្រោយការចាប់ខ្លួនពួកគេឬបានបាត់ខ្លួននៅក្រោយត្រូវបានចាប់ពង្រត់ដោយក្រុមជនប្រដាប់អាវុធ។
របាយការណ៍នេះរបស់អ.ស.ប.បានចោទប្រកាន់រដ្ឋាភិបាលក្រុងដាម៉ាស់ថាបានបង្អត់អាហារអ្នកជាប់ឃុំឃាំងឬមួយទុកពួកគេឱ្យស្លាប់ដោយគ្មានការព្យាបាលមុខរបួសនិងជំងឺទេ។
សេចក្តីរាយការណ៍នេះនិយាយថា រដ្ឋាភិបាលរបស់ Assad បាន«ប្រព្រឹត្តឧក្រិដ្ឋកម្មយ៉ាងច្រើនដែលសន្មតថាជាការវាយប្រហារដោយប្រព័ន្ធនិងយ៉ាងរាលដាលប្រឆាំងនឹងប្រជារាស្ត្រស៊ីវិល»។
របាយការណ៍នេះមានទាក់ទិននឹងរយៈពេល ពីខែមីនាឆ្នាំ២០១១ ដល់ខែវិច្ឆិកាឆ្នាំ២០១៥ ដែលជារយៈពេលបួនឆ្នាំ៦ខែដំបូងនៃសង្គ្រាមស៊ីវិលក្នុងប្រទេសស៊ីរីដែលនៅមានតទៅទៀត។
ក្រុមអ្នកស៊ើបអង្កេតអ.ស.ប.បាននិយាយថា ពួកគេមានជំនឿថា «ពួកនាយទាហានជាន់ខ្ពស់»និងក្រុមមន្ត្រីឯទៀតៗរបស់រដ្ឋាភិបាលបានដឹងអំពីការស្លាប់នៃក្រុមជនទាំងនេះនិងបានដឹងអំពីសាកសពត្រូវបានកប់នៅក្នុងផ្នូរកប់សពរួម។
ការស៊ើបអង្កេតពិសេសអំពីការប្រព្រឹត្តរបស់អាជ្ញាធរស៊ីរីទៅលើប្រជារាស្ត្រស៊ីវិលរបស់ខ្លួន បានអំពាវនាវដល់ក្រុមប្រឹក្សាសន្តិសុខអ.ស.ប.ឱ្យដាក់ «ទណ្ឌកម្មមានទីដៅ» ប្រឆាំងនឹងក្រុមមន្ត្រីស៊ីវិលនិងក្រុមមន្ត្រីយោធាស៊ីរីដែលឃុបឃិតក្នុងការធ្វើឱ្យជនទាំងនេះស្លាប់ឬក្នុងការធ្វើទារុណកម្មក្រុមជនទាំងនេះ ក៏ប៉ុន្តែមិនបានបង្ហាញឈ្មោះអ្នកប្រព្រឹត្តល្មើសទេ។
ក្រុមអ្នកស៊ើបអង្កេតបានអំពាវនាវឱ្យមានការបញ្ជូនករណីទាំងនេះប្រឆាំងនឹងជនជាប់សង្ស័យថាជា ក្រុមឧក្រិដ្ឋជនសង្គ្រាមទៅឱ្យក្រុមរដ្ឋអាជ្ញានៅឯតុលាការឧក្រិដ្ឋកម្មអន្តរជាតិនៅក្រុងឡាអេ ក្នុងប្រទេសហូឡង់។
ឈ្មោះរបស់ក្រុមជនទាំងនេះត្រូវបានរក្សាទុកក្នុងទូដែកមួយរបស់អ.ស.ប.ក្នុងក្រុងហ្ស៊ឺណែវ៕
