លោក Donald Trump បេក្ខជនប្រធានាធិបតីនាំមុខខាងគណបក្សសាធារណរដ្ឋរបស់សហរដ្ឋអាមេរិក កំពុងនិយាយបង្អាប់លោកស្រី Hillary Clinton ដែលកំពុងស្វះស្វែងរកតំណែងប្រធានាធិបតី ដោយនិយាយថា លោកស្រីគ្លីនតុន នឹងមិនមានឱកាសទេលើកលែងតែ លោកស្រី លេងសន្លឹកបៀររបស់ស្រ្តីក្នុងក្តីសង្ឃឹមថាលោកស្រី នឹងក្លាយជាស្រ្តីប្រធានាធិបតីលើកទីមួយរបស់សហរដ្ឋអាមេរិក។
មហាសេដ្ឋីអចលនទ្រព្យរូបនេះ បានប្រាប់បណ្តាញទូរទស្សន៍ NBC ថា «លោកស្រី Clinton កំពុងលេងសន្លឹកបៀរដែលខ្ញុំ មិនដែលបានឃើញបេក្ខជនណាម្នាក់បានលេងកាលពីពេលមុន។ អ្វីដែលខ្ញុំ កំពុងធ្វើគឺបញ្ចេញការពិត បើគ្មានសន្លឹកបៀររបស់ស្រ្តីទេនោះ លោកស្រី Hillary នឹងមិនអាចសម្រេចជោគជ័យបានសូម្បីតែឈរឈ្មោះសម្រាប់តំណែងក្រុមប្រឹក្សាក្រុងក៏ដោយ។
ការណ៍នេះ ជាការវាយប្រហារដែលពាក់ព័ន្ធនឹង Gender នៅពេលថ្មីៗបំផុតនេះរបស់លោក Trump ទៅលើអ្នកដែលទំនងបានទទួលការតែងតាំងជាបេក្ខជនប្រធានាធិបតីខាងគណបក្សប្រជាធិបតេយ្យ ដែលជាភរិយារបស់អតីតប្រធានាធិបតី Bill Clinton ហើយនឹងជាអតីតសមាជិកព្រឹទ្ធសភា និងអតីតរដ្ឋមន្រ្តីការបរទេសសហរដ្ឋអាមេរិក។បន្ទាប់ពីបានទទួលជ័យជម្នះនៅក្នុងការប្រកួតប្រជែងខាងគណបក្សសាធារណរដ្ឋនៅក្នុងរដ្ឋចំនួន៥នៅដើមសប្តាហ៍នេះ លោក Trump បាននិយាយថា ប្រសិនបើលោកស្រី Clinton ជាបុរសវិញ លោកស្រី នឹងទទួលបានសន្លឹកឆ្នោតតែ៥ភាគរយនៅក្នុងការបោះឆ្នោតតែប៉ុណ្ណោះ។
លោកស្រី Clinton បានឆ្លើយតបវិញដែលបានធ្វើឲ្យមានការស្រែកអបអរពីពួកអ្នកគាំទ្ររបស់លោកស្រីនៅឯការប្រជុំខាងនយោបាយក្នុងទីក្រុង Philadelphia នៅពេលដែលលោកស្រីប្រារព្ធជ័យជម្នះនៃការបោះឆ្នោតបឋមខាងគណបក្សប្រជាធិបតេយ្យ៤ដែលបានធ្វើឲ្យលោកស្រីខិតជិតទៅនឹងការទទួលបានការតែងតាំងជាបេក្ខជនប្រធានាធិបតីថា «បើការប្រយុទ្ធសម្រាប់ការថែទាំសុខភាពរបស់ស្រ្តី ហើយនឹងបើកប្រាក់សម្រាប់ការឈប់សម្រាក់គ្រួសារ និងការទទួលបានប្រាក់ឈ្នួលស្មើគ្នានឹងបុរស ជាសន្លឹកបៀររបស់ស្រ្តីដែលមានការពាក់ព័ន្ធនឹងលោកស្រី»៕
