ជនសង្ស័យដែលជាអង្គរក្សលោកឧកញ៉ា ថោង សារ៉ាត់ ត្រូវបានស្នងការនគរបាលក្រុងភ្នំពេញកោះហៅយកមកសាកសួរជាមួយនឹងលោកឧកញ៉ាថោង សារ៉ាត់កាលពីថ្ងៃច័ន្ទក៏ប៉ុន្តែលោក ថោង សារ៉ាត់ ត្រូវបានសមត្ថកិច្ចដោះលែងមកវិញបន្ទាប់ពីបានសាកសួររួចមកទាក់ទងនឹងការសង្ស័យថាជាប់ពាក់ព័ន្ធនឹងករណីបាញ់សម្លាប់ លោកឧកញ៉ា អ៊ឹង ម៉េងជឺ។
ក្រុមមន្ត្រីមានសមត្ថកិច្ច ទាំងមន្ត្រីជាន់ខ្ពស់ក្រសួងមហាផ្ទៃ និង លោក ជួន សុវណ្ណ ស្នងការប៉ូលិសក្រុងភ្នំពេញមិនបានធ្វើអត្ថាធិប្បាយទេជុំវិញការចាប់ឃាត់ខ្លួនជនសង្ស័យទាំងនោះ។
ចំណែកលោក អ៊ិន បូរ៉ា ប្រធាននាយកដ្ឋានព្រហ្មទណ្ឌក្រសួងមហាផ្ទៃមិនបានធ្វើអត្ថាធិប្បាយឱ្យបានពិស្តារទេ។ លោកគ្រាន់តែបាននិយាយថាការចាប់ខ្លួនជនសង្ស័យគឺស្ថិតក្នុងដំណាក់កាលនៃការស៊ើបអង្កេតរបស់សមត្ថកិច្ចនៅឡើយដោយមិនទាន់អះអាងថាពួកគេជាប់ពាក់ព័ន្ធនឹងករណីបាញ់សម្លាប់លោកឧកញ៉ា អ៊ឹង ម៉េងជឺឬក៏យ៉ាងណា?
លោកនិយាយថា៖«ឥឡូវខាងភ្នំពេញកំពុងតែសួរមិនដឹងលទ្ធផលយ៉ាងម៉េចនៅឡើយទេ។ ចាំមើលឱ្យគេសួរបានបន្តិចសិនទៅ»។
លោកឧកញ៉ា អ៊ឹង ម៉េងជឺ អាយុ៥៣ឆ្នាំត្រូវបានជនមិនស្គាល់មុខម្នាក់បាញ់ដោយកាំភ្លើងខ្លីចំនួន៨គ្រាប់កាលពីថ្ងៃទី២២ខែវិច្ឆិកាកន្លងទៅនេះបណ្តាលឱ្យស្លាប់ភ្លាមៗនៅកន្លែងកើតហេតុក្នុងខណៈពេលដែលលោកបានធ្វើដំណើរចាកចេញពីរថយន្តទៅទិញផ្លែឈើនៅតូបលក់ផ្លែឈើមួយនៅជិតម្តុំអាងទឹកអូឡាំពិក។
ឃាតកម្មទៅលើលោកឧកញ៉ា អ៊ឹង ម៉េងជឺ ត្រូវបានបណ្តាញសង្គមហ្វេសប៊ុកបង្ហោះរូបជនសង្ស័យឃើញចុះពីលើម៉ូតូមកបាញ់ជនរងគ្រោះរួចហើយបានគេចខ្លួនបាត់ដោយសុវត្ថិភាព។
លោកឧកញ៉ា ថោង សារ៉ាត់ ដែលសមត្ថកិច្ចបានកោះហៅមកសាកសួរកាលពីថ្ងៃច័ន្ទបានបដិសេធថាលោកនិងអង្គរក្សរបស់លោកទាំង៣នាក់មិនជាប់ពាក់ព័ន្ធនឹងករណីឃាតកម្មនេះទេ។
លោក ថោង សារ៉ាត់ ម្ចាស់សិប្បកម្មសាច់ប៉ាតតេ៩៩៩ និង បូរី៩៩៩បានបញ្ជាក់ថាលោកមិនដែលស្គាល់និងមានទំនាស់ជាមួយលោកឧកញ៉ា អ៊ឹង ម៉េងជឺទេ។ លោកមានប្រសាសន៍ថានៅថ្ងៃកើតហេតុទាំងអង្គរក្សរបស់លោកទាំង៣នាក់ដែលមានឈ្មោះសង្ស័យនិងលោកផ្ទាល់មិនបានចេញក្រៅផ្ទះទេគឺនៅក្នុងគេហដ្ឋានជាមួយគ្នាហើយរូបភិនភាគដែលបានបង្ហោះនៅក្នុងវីដេអូឃ្លីបនៅតាមបណ្តាញសង្គមហ្វេសប៊ុកមិនមានរូបរាងដូចអង្គរក្សទាំងបីនាក់នោះដែរ។
លោកនិយាយថា៖«ខ្ញុំមានការជាប់ពាក់ព័ន្ធនឹងករណីឃាតកម្មហ្នឹងដែរ? អញ្ចឹងបានខ្ញុំឆ្ងល់។ទីមួយខ្ញុំជាមួយលោកឧកញ៉ា អ៊ឹង ម៉េងជឺគឺមិនដែលស្គាល់គ្នាសោះ។ ខ្ញុំមិនដែលស្គាល់គាត់ គាត់ក៏មិនដែលស្គាល់ខ្ញុំ ហើយមិនដែលរកស៊ីស្អីចូលគ្នាសោះ។ ដល់ពេលថ្ងៃស្លាប់ហ្នឹងឃើញហ្វេសប៊ុកបានឮឈ្មោះអ៊ឹង ម៉េងជឺនៅលើហ្វេសប៊ុកហ្នឹងតែម្តង»។
សារព័ត៌មានក្នុងស្រុកជាច្រើនបានផ្សព្វផ្សាយថាឃាតកម្មបាញ់សម្លាប់លោកឧកញ៉ា អ៊ឹង ម៉េងជឺ បានកើតមានឡើងនៅមុនពេលដែលលោកគ្រោងនឹងត្រូវចូលខ្លួនទៅបំភ្លឺក្នុងតុលាការនៅថ្ងៃទី១០ខែធ្នូខាងមុខនេះពាក់ព័ន្ធនឹងទំនាស់ដីធ្លីមួយកន្លែងជាមួយនឹងឧកញ៉ាម្នាក់ផ្សេងទៀតដែលមានតម្លៃរាប់លានដុល្លារសហរដ្ឋអាមេរិក។
លោក ឧកញ៉ា ថោង សារ៉ាត់មានប្រសាសន៍ថាលោកក៏មិនមានរឿងក្តីក្តាំក្នុងតុលាការជាមួយលោកឧកញ៉ា អ៊ឹង ម៉េងជីមុនពេលដែលជនរងគ្រោះត្រូវបានឃាតករបាញ់សម្លាប់៕
