បើទោះជាតម្លៃប្រេងសាំងនៅក្នុងទីផ្សារអន្តរជាតិបានធ្លាក់ចុះយ៉ាងណាក៏ដោយ ក៏ប៉ុន្តែតម្លៃប្រេងសាំងនៅកម្ពុជានៅមានតម្លៃខ្ពស់នៅឡើយ និងមានការបញ្ចុះថ្លៃយឺតយ៉ាវ បើប្រៀបធៀបនឹងប្រទេសជិតខាង។ មន្រ្តីសង្គមស៊ីវិល នៃសេដ្ឋកិច្ចក្រៅប្រព័ន្ធយល់ថា ការបញ្ចុះថ្លៃនេះនៅមានការសម្រួលតិចតួចនៅឡើយដល់ប្រជាជនសាមញ្ញនៅកម្ពុជា។ ថ្មីៗនេះ រដ្ឋាភិបាលកម្ពុជាបានចាត់យន្តការថ្មី ដោយកំណត់រូបមន្តតម្លៃប្រេងក្នុងបរិបទសេដ្ឋកិច្ចទីផ្សារសេរី។
តម្លៃប្រេងឆៅនៅក្នុងទីផ្សារអន្តរជាតិ និងក្នុងតំបន់អាស៊ីបានធ្លាក់ចុះយ៉ាងខ្លាំងចាប់ពីឆមាសទីពីរនៃឆ្នាំ២០១៤មក។ អ្នកជំនាញរំពឹងថា តម្លៃប្រេងនេះ នឹងនៅតែមានកម្រិតទាបដល់ចុងឆ្នាំ២០១៥ និងមានការកើនឡើងវិញនៅឆ្នាំ២០១៦។
ទោះជាយ៉ាងនេះក៏ដោយ គេសង្កេតឃើញថា តម្លៃប្រេងសាំងនៅកម្ពុជានៅមានតម្លៃថ្លៃនៅឡើយ និងមានការបញ្ចុះថ្លៃយឺតយ៉ាវ។ តម្លៃប្រេងនៅក្នុងប្រទេសកម្ពុជាមានតម្លៃប្រមាណជិត៤,០០០រៀលក្នុងមួយលីត្រ ស្របពេលដែលប្រទេសថៃ ប្រទេសឥណ្ឌូនេស៊ី និងប្រទេសម៉ាឡេស៊ីមានតម្លៃសាំងត្រឹមតែជាង២០០០រៀលក្នុងមួយលីត្រតែប៉ុណ្ណោះ។
អ្នកប្រកបរបរអាជីវកម្មធុនតូច និងមធ្យមបានត្អួចត្អែរថា ពួកគាត់ជួបបញ្ជាខាតបង់ច្រើន លើតម្លៃប្រេងសាំងដែលមានកម្រិតខ្ពស់ ដោយសារតែការចំណាយច្រើនលើថ្លៃដើម។
កញ្ញាខំ ស្រីកា វ័យ២២ឆ្នាំ ជាអាជីវករលក់សាំងដបមួយរូបក្នុងរាជធានីភ្នំពេញ យល់ថា តម្លៃសាំងដែលមិនឋិតឋេរដូចពេលបច្ចុប្បន្ននេះ ធ្វើឲ្យអាជីវករដូចជាកញ្ញាមិនទទួលបានប្រាក់ចំណេញច្រើនទេ។
«ខ្ញុំយកសាំងមកថ្លៃ ហើយតម្លៃវាធ្លាក់ចុះទៀត។ មានគេឆ្ងល់ថា សាំងអីចុះម៉េស? សារមុនយើងចំណេញច្រើន សារនេះ យើងបង្វិលបានរួចខ្លួន»។
ជាមួយគ្នានោះដែរ សមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ ហៅកាត់ថា IDEA ដែលជាអង្គការក្រៅរដ្ឋាភិបាលមួយ ដែលធ្វើការជាមួយអ្នករត់ម៉ូតូឌុប ម៉ូតូកង់បី តាក់ស៊ី អាជីវករតូចតាច កម្មករ និងម្ចាស់ភោជនីយដ្ឋានខ្នាតតូច បានត្អួចត្អែរថា អ្នករត់ម៉ូតូឌុប ម៉ូតូកង់បី តាក់ស៊ី បានចំណាយថវិកាជាច្រើនទៅលើថ្លៃប្រេងសាំងនេះ។
លោកឡុង វុទ្ធី ជាអគ្គលេខាធិការរងនៃសមាគម IDEA នេះ លើកឡើងថា បើទោះជាតម្លៃប្រេងនៅកម្ពុជាកំពុងធ្លាក់ថ្លៃយ៉ាងណាក៏ដោយ ក៏ប៉ុន្តែវានៅមានតម្លៃថ្លៃនៅឡើយ បើប្រៀបធៀបទៅនឹងប្រទេសជិតខាង។ លោកវុទ្ធីយល់ថា តម្លៃប្រេងដែលចុះថ្លៃតិចតួចនេះ នៅមិនទាន់បានជួយសម្រួលដល់ជីវភាពប្រជាជននោះទេ ប្រសិនបើទំនិញនានានៅក្នុងទីផ្សារកម្ពុជានៅតែមានតម្លៃខ្ពស់។
«ប្រសិនបើរដ្ឋាភិបាលមានការគ្រប់គ្រង និងអាណិតអាសូរ គួរតែកំណត់ឲ្យក្រុមហ៊ុននាំចូលប្រេងបញ្ចុះតម្លៃ បើបានត្រឹម៣០០០រៀលមួយលីត្រ ក៏ប្រជាជនសប្បាយ ដែលប្រើប្រាស់យានយន្តពាក់ព័ន្ធនឹងប្រេងសាំង ដើម្បីប្រកបជីវភាពប្រចាំថ្ងៃ»។
នាប៉ុន្មានសប្តាហ៍ចុងក្រោយនេះ តម្លៃប្រេងសាំងនៅកម្ពុជាមានការថយចុះតម្លៃពីជាង៥,០០០រៀលមកនៅត្រឹមក្រោម៤000រៀលក្នុងមួយលិត្រ បន្ទាប់ពីលោកនាយករដ្ឋមន្ត្រីហ៊ុន សែនធ្វើការរិះគន់ដល់ក្រុមហ៊ុនដែលនាំប្រេងសាំងចូលមកប្រទេសកម្ពុជា។ ស្របពេលនោះ រាជរដ្ឋាភិបាលកម្ពុជា និងក្រសួងពាក់ព័ន្ធក៏កំពុងចាត់វិធានការ ដើម្បីជាការឆ្លើយតបទៅនឹងបញ្ហានេះដែរ។
ជាក់ស្តែង កាលពីថ្ងៃព្រហស្បតិ៍នេះ ក្រសួងពាណិជ្ជកម្ម ក្រសួងសេដ្ឋកិច្ច ក្រសួងរ៉ែ និងថាមពល ព្រមទាំងតំណាងក្រុមហ៊ុនចែកចាយប្រេងសាំងធំៗនៅកម្ពុជា បានជួបពិភាក្សាគ្នាអំពីស្ថានភាពតម្លៃប្រេងសាំងនៅកម្ពុជានាពេលបច្ចុប្បន្ន។ កិច្ចពិភាក្សានេះធ្វើឡើងដើម្បីឈានទៅដល់ការកំណត់រូបមន្តតម្លៃប្រេងសាំងក្នុងបរិបទសេដ្ឋកិច្ចទីផ្សារសេរី ឲ្យកាន់តែមានប្រសិទ្ធភាព និងសមស្របទៅហ្នឹងតម្លៃទីផ្សារអន្តរជាតិ។
លោកស៊ុន ចាន់ថុល រដ្ឋមន្ត្រីក្រសួងពាណិជ្ជកម្ម ថ្លែងថា រូបមន្តដែលនឹងកំណត់ឡើងក្នុងពេលឆាប់ៗខាងមុខនេះ នឹងអាចឲ្យរដ្ឋាភិបាលក្តាប់ព័ត៌មានទាក់ទងនឹងប្រេងឥន្ទនៈកាន់តែប្រសើរជាងមុន។
«ដោយសារតែពីដើមយើងមិនទាន់មានរូបមន្តច្បាស់លាស់ ដែលរាជរដ្ឋាភិបាល និងខាងឯកជនសហការគ្នា យើងត្រូវតាមដានពិនិត្យតម្លៃនោះតាមទីផ្សារអន្តរជាតិ»។
រូបមន្តដែលលោកស៊ុន ចាន់ថលបានលើកឡើងនេះគឺសំដៅដល់ការគណនារវាងថ្លៃដើម តម្លៃដឹកជញ្ជូន និងប្រតិបត្តិការគ្រប់គ្រងរបស់ក្រុមហ៊ុនឯកជន ដែលរូបមន្តដូចគ្នានេះត្រូវបានអនុវត្តហើយនៅក្នុងបណ្តាប្រទេសជិតខាងមួយចំនួន។
លោកឌិត ទីណា ជាអ្នកនាំពាក្យក្រសួងរ៉ែ និងថាមពល បានប្រាប់ VOA ថា តម្លៃប្រេង ដែលកំពុងតែធ្លាក់ចុះនៅកម្ពុជាដូចពេលបច្ចុប្បន្ននេះ បានផ្តល់ជាផលចំណេញដល់សេដ្ឋកិច្ចកម្ពុជា ដែលអាចនាំឲ្យវិស័យពាក់ព័ន្ធផ្សេងៗមានការលូតលាស់ល្អដែរ ដោយហេតុថា សេដ្ឋកិច្ចជាវិស័យស្នូល។
«អញ្ចឹង! ការដែលតម្លៃប្រេងធ្លាក់ចុះ វាជាចំណុចល្អក្នុងបរិបទឥឡូវនេះ ប៉ុន្តែវានៅបន្តធ្លាក់ចុះទៀត ឬយ៉ាងណា? ធ្លាក់ចុះរយៈពេលយូរ ឬបន្តិចទៀតនឹងឡើងទៅវិញ? តម្រូវការប្រេងត្រូវតែមាន ដោយសារយើងមិនមែនជាប្រទេសផលិត។ អញ្ចឹងយើងក៏អាចគិតគូរពីការទិញស្តុកទុក នៅពេលដែលប្រេងចុះថោក សម្រាប់ធ្វើយ៉ាងណាបញ្ចេញមកវិញស្តុករបស់យើងសម្រាប់គោលនយោបាយថាមពលរបស់យើង»។
គេសង្កេតឃើញថា តម្លៃប្រេងសាំងនៅកម្ពុជាតែងតែមានការធ្លាក់ចុះយឺតយ៉ាវ បន្ទាប់ពីតម្លៃប្រេងនៅក្នុងទីផ្សារអន្តរជាតិមានការធ្លាក់ចុះនោះ។ ហើយជារឿយៗតម្លៃប្រេងក្នុងប្រទេសកម្ពុជានឹងឡើងមួយកម្រិតវិញ ប្រសិនបើរដ្ឋាភិបាលមិនមានយន្តការអ្វីនោះ៕
