ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

កូរ៉េ​ខាង​ជើង​ប្រហារ​ជីវិត​រដ្ឋ​មន្រ្តី​ការពារ​ប្រទេស​


រូប​ភាព​ឯកសារ៖ រដ្ឋ​មន្រ្តី​ការពារ​ប្រទេស​របស់​ប្រទេស​កូរ៉េ​ខាង​ជើង​ Hyon Yong Chol ទះ​ដៃ​ក្នុង​អំឡុង​ការប្រជុំ​មួយ​កាល​ពី​ឆ្នាំ​២០១២​ នៅ​ក្នុង​ទីក្រុង​ព្យុងយ៉ាង​។
រូប​ភាព​ឯកសារ៖ រដ្ឋ​មន្រ្តី​ការពារ​ប្រទេស​របស់​ប្រទេស​កូរ៉េ​ខាង​ជើង​ Hyon Yong Chol ទះ​ដៃ​ក្នុង​អំឡុង​ការប្រជុំ​មួយ​កាល​ពី​ឆ្នាំ​២០១២​ នៅ​ក្នុង​ទីក្រុង​ព្យុងយ៉ាង​។

សេវា​ស៊ើបការណ៍​សម្ងាត់​របស់​ប្រទេស​កូរ៉េខាង​ត្បូង​ប្រាប់​ឲ្យ​ដឹង​ថា​ មេដឹកនាំ​កូរ៉េ​ខាង​ជើង Kim Jong Un បាន​ប្រហារ​ជីវិត​រដ្ឋ​មន្រ្តី​ការពារ​ប្រទេស​របស់​ខ្លួន ដោយ​សារ​ទំនង​មក​ពី​ដេក​លក់​នៅ​ឯ​ការប្រជុំ​យោធា​មួយ។

មន្រ្តី​ស៊ើបការណ៍​ម្នាក់​បាន​និយាយ​ថា លោក Hyon Yong Chol ដែល​មាន​មុខ​ងារ​ជា​រដ្ឋ​មន្រ្តី​របស់​កង​កម្លាំង​ប្រដាប់​អាវុធ​ប្រជា​ជន ត្រូវ​បាន​បាញ់​សម្លាប់​ដោយ​កាំភ្លើង​បាញ់​យន្តហោះ។​ ក្រុម​មន្រ្តី​រាប់​រយ​នាក់​បាន​មើល​ការ​ប្រហារ​ជីវិត​លោក Hyon​ កាល​ពី​ថ្ងៃ​ទី​៣០ ​ខែ​មេសា នេះ​បើ​តាម​លោក Han Ki-beom ​អនុ​ប្រធាន​ទីភ្នាក់ងារ​ស៊ើបការណ៍​សម្ងាត់​ជាតិ​របស់​កូរ៉េខាង​ត្បូង​បាន​ប្រាប់​គណៈ​កម្មាធិការ​សភា​នៅ​ក្នុង​រដ្ឋធានី​សេអ៊ូល​នៅ​ថ្ងៃ​ពុធ​នេះ។

ទីភ្នាក់ងារ​សារព័ត៌មាន Yonhapនៃ​ប្រទេស​កូរ៉េ​ខាង​ត្បូង​ប្រាប់​ឲ្យ​ដឹង​ថា​Kim Jung Un ​ជឿជាក់​ថា ​លោក Hyon ​ដែល​ត្រូវ​បាន​តែងតាំង​ឲ្យ​កាន់​ដំណែង​របស់​លោក​មិន​ដល់​មួយ​ឆ្នាំ​ផង ​បាន​បង្ហាញ​ពី​ភាពមិនស្មោះ​ត្រង់​និង​ការ​មិន​គោរព​ដោយ​ការដេក​លក់។​ មាន​សេចក្តី​រាយការណ៍​ដែរ​ថា ​លោក Hyon ​បាន​ជំទាស់​ប្រឆាំង​ Kim Jong Un ​កាល​ពី​ពេល​មុន។

នៅ​ក្នុង​ប្រទេស​កូរ៉េ​ខាង​ជើង ​រដ្ឋ​មន្រ្តី​ការពារ​ប្រទេស​ត្រូវ​ទទួល​បន្ទុក​សំខាន់​ខាង​ភស្តុភា​និង​ការផ្លាស់​ប្តូរ​កិច្ច​ការ​ជាមួយ​បរទេស។ ការតាក់​តែង​គោល​មាគ៌ា​នយោបាយ ​ត្រូវ​បាន​កាន់​កាប់​ដោយ​គណៈកម្មការ​ការពារ​ជាតិ​ដ៏​មាន​អំណាច​ហើយ​និង​គណៈ​កម្មការយោ​ធា​មជ្ឈិម​របស់​បក្ស។

​គ្មាន​សេចក្តី​អត្ថាធិប្បាយ​ជា​សាធារណៈ​ស្តី​ពី​សេចក្តី​រាយការណ៍​ពី​ប្រទេស​កូរ៉េ​ខាង​ជើង​នេះ​ទេ។

Kim Jong Un​ត្រូវ​បាន​គេ​ស្គាល់​ថា ​គ្មាន​ការ​អត់ឱន​ដល់​ការ​ប្រឆាំង​ឬ​ជំទាស់​ដល់​ការ​ដឹកនាំ​ផ្តាច់​ការ​របស់​ខ្លួន​ទេ។

​លោក​បាន​ប្រហារ​ជីវិត​ឪពុកមា​របស់​ខ្លួនឯង​នៅ​ឆ្នាំ​២០១៣ ​លើ​បទ​ចោទ​ប្រកាន់​ពី​ការ​មិន​ស្មោះ​ត្រង់។​ ទី​ភ្នាក់​ងារ​ចារកម្ម​របស់​កូរ៉េខាង​ត្បូង​បាន​និយាយ​កាល​ពី​ចុង​ខែ​មុន​ថា​Kim Jong Un ​បាន​បញ្ជារ​ឲ្យ​ប្រហារ​ជីវិត​មន្រ្តី​ជាន់​ខ្ពស់​១៥​នាក់​នៅ​ឆ្នាំ​នេះ​ដែល​ជា​ការ​ដាក់​ទណ្ឌកម្ម​ចំពោះ​ការប្រឆាំង​បទបញ្ជារ​របស់​ខ្លួន៕

XS
SM
MD
LG