ដំណើរទស្សនកិច្ចរបស់លោកស្រី Michelle Obama ភរិយាប្រធានាធិបតីសហរដ្ឋអាមេរិកទៅកម្ពុជាគឺផ្តល់ជាឱកាសសម្រាប់ពលរដ្ឋខ្មែរគិតឱ្យច្បាស់ថា តើកម្ពុជាត្រូវគិតគូរដោះស្រាយបញ្ហាការសិក្សារបស់សិស្សស្រីដោយរបៀបណាបន្ថែមទៀត។ នេះបើតាមការលើកឡើងរបស់លោកស្រី មូរ សុខហួរ អ្នកតំណាងរាស្រ្តគណបក្សសង្គ្រោះជាតិ។
លោកស្រី មូរ សុខហួរដែលជាអតីតរដ្ឋមន្ត្រីក្រសួងកិច្ចការនារីផងដែរបានបញ្ជាក់ក្នុងកម្មវិធីHello VOA កាលពីថ្ងៃពុធថាការអប់រំសិស្សស្រីនៅមិនទាន់ទទួលបានការផ្តល់អាទិភាពដូចកូនប្រុសហើយលោកស្រីប្តេជ្ញាថានឹងតស៊ូដើម្បីសុំឱ្យរដ្ឋាភិបាលបន្ថែមថវិកាលើវិស័យអប់រំ។
លោកស្រីយល់ថាថវិកាដែលរដ្ឋាភិបាលបានផ្តល់សម្រាប់ជូនដល់ក្រសួងអប់រំដែលមាន១២ភាគរយគឺជាថវិកាដែលតិចតួចដែលគួរតែបង្កើនឱ្យដល់យ៉ាងហោចណាស់២០ភាគរយ។
«ទោះបីជាមានអាហារូបករណ៍ជូនទៅដល់កុមារីយើង ជូនទៅដល់គ្រួសារក្រីក្រក៏ប៉ុន្តែមិនអាចឱ្យអាហារូបករណ៍នេះដល់១២ឆ្នាំរហូតដល់បញ្ចប់ការសិក្សាសម្រាប់ឱ្យយុវតីយើងអាចទៅដល់កម្រិតមួយដែលជាសេចក្តីប្រាថ្នាស្ត្រីខ្មែរយើងគឺចង់បានការរៀនសូត្របានខ្ពស់មានចំណេះចេះដឹងមានការងារសមរម្យប្រាក់ខែសមរម្យ ដើម្បីចិញ្ចឹមជីវិតឱ្យសមរម្យ»។
លោកស្រីមីស្ហែល អូបាម៉ានឹងធ្វើទស្សនកិច្ចជាផ្លូវការនៅប្រទេសកម្ពុជាពីថ្ងៃទី២១ដល់២២ខែមិនា។
កម្ពុជាជាប្រទេសមួយក្នុងចំណោមប្រទេសចំនួន១១ដែលមាននៅ ក្នុងគម្រោង “Let Girls Learn” (ផ្តល់ឱកាសឱ្យស្ត្រីបានសិក្សា)។ លោកស្រីនឹងទៅមើលដោយផ្ទាល់ពីវិធីដែលដំណោះស្រាយក្នុងសហគមន៍អាចផ្លាស់ប្តូរជីវិតរបស់សិស្សស្រីនៅខេត្តសៀមរាប។
លោកស្រីមីស្ហែល អូបាម៉ាបានឱ្យដឹងថាពេលបច្ចុប្បន្ននេះ មានស្ត្រី៦២លាននាក់នៅទូទាំងពិភពលោកមិនបានចូលរៀនដែលអាចឱ្យពួកគេងាយរងគ្រោះពីអំពើហិង្សានិងជំងឺក៏ដូចជាកំហិតលទ្ធភាពរីកចម្រើននៃក្រុមគ្រួសាររបស់ពួកគេនិងសង្គមផងដែរ។
លោកស្រី Michelle Obama បានបន្ថែមថា៖
«នៅពេលដែលស្ត្រីមានឱកាសសិក្សាពួកគេអាចចិញ្ចឹមគ្រួសារដែលមានសុខភាពល្អ ទទួលបានប្រាក់ខែច្រើនហើយរួមចំណែកដល់សេដ្ឋកិច្ចក្នុងប្រទេសផងដែរ។ ដូច្នេះហើយបានជាយើងចាប់ផ្តើមគម្រោង«ផ្តល់ឱកាសឱ្យស្ត្រីបានសិក្សា» ហើយយើងដឹងច្បាស់ថាដំណោះស្រាយដ៏ល្អបំផុតសម្រាប់ការអប់រំសម្រាប់ស្ត្រីនិងកុមារីគឺចេញមកពីសហគមន៍មូលដ្ឋាន»។
ឧបសគ្គក្នុងពេលបច្ចុប្បន្នដែលគ្រួសារខ្មែរជួបប្រទះក្នុងការមិនសូវជំរុញកូនស្រីឱ្យបានសិក្សាខ្ពស់នោះគឺកត្តាភាពក្រីក្រ អំពើពុករលួយ កត្តាវប្បធម៌ដែលមិនទាន់ផ្តល់អាទិភាពដល់កូនស្រី។
ទន្ទឹមគ្នានេះដែរ លោកស្រី មូរ សុខហួរ យល់ថាគុណភាពអប់រំត្រូវតែបង្កើន និងដល់ពេលដែលត្រូវបំបាត់អំពើពុករលួយក្នុងប្រព័ន្ធអប់រំហើយដើម្បីឱ្យសិស្សស្រីមានឱកាសសិក្សាកាន់តែច្រើនជាងពេលបច្ចុប្បន្ន។
លោកស្រី យល់ថា ផលប៉ះពាល់ដែលបណ្តាលមកពីការខ្វះការអប់រំសម្រាប់ស្ត្រីនឹងមានរហូតដល់ពេលដែលពួកគេត្រូវចិញ្ចឹមគ្រួសារនៅពេលក្រោយផងដែរ។
«ដល់ពេលដែលកុមារី យុវតីរបស់យើងទៅជាមាតា។ មាតាដែលខ្វះការចេះដឹង ខ្វះអក្សររៀនមិនគ្រប់គ្រាន់នឹងក្លាយជាមាតាដែលខ្វះព័ត៌មាន។ ពេលណាយើងចិញ្ចឹមគ្រួសារយើងដោយយើងខ្វះព័ត៌មានសេចក្តីសម្រេចរបស់យើងការរកទទួលទានរបស់យើងចំណូលរបស់យើងដើម្បី ជួយរកថវិកាគ្រួសារវាតិច»។
ដើម្បីឱ្យសិស្សស្រីនៅសិក្សាបានច្រើនក៏ត្រូវបង្កើតហេដ្ឋារចនាសម្ព័ន្ធងាយស្រួលសម្រាប់សិស្សស្រីនិងបង្កើនសាលារៀនឱ្យដល់មូលដ្ឋានផងដែរ។
សម្រាប់យុទ្ធសាស្រ្តក្នុងរយៈពេលខ្លីគឺត្រូវបង្កើនថវិកាដល់ក្រសួងអប់រំ កំណត់តំបន់អាទិភាពហើយផ្តោតការយកចិត្តទុកដាក់ពិសេសលើក្រុមជនដែលងាយរងគ្រោះ បន្ថែមថវិកាសម្រាប់បណ្តុះបណ្តាលវិជ្ជាជីវៈសម្រាប់បម្រើតាមតម្រូវការទីផ្សារការងារ។ នេះបើតាមការលើកឡើងរបស់លោកស្រី មូរ សុខហួរ៕
