ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អតីត​សមាជិក​ព្រឹទ្ធសភា​ស.រ.អា.​នឹង​ឈរ​ឈ្មោះ​ជា​បេក្ខជន​ប្រធានាធិបតី


DEM 2016 Webb
DEM 2016 Webb

លោក​ Jim Webb ​អតីត​សមាជិក​ព្រឹទ្ធសភា​ស.រ.អា.​បាន​និយាយ​ថា​ លោក​នឹង​ឈរ​ឈ្មោះ​ជា​បេក្ខជន​ប្រធានាធិបតី​ស.រ.អា.​ក្នុង​ឆ្នាំ​២០១៦​ ហើយ​លោក​ក្លាយ​ទៅ​ជា​សមាជិក​ទី​បួន​នៃ​គណបក្ស​ប្រជាធិបតេយ្យ​ដែល​ប្រកួត​ប្រជែង​នឹង​លោកស្រី Hillary Clinton​ អ្នក​នាំ​មុខ​គេ​នៅ​ក្នុង​ការ​ប្រកួត​ប្រជែង​ដើ​ម្បី​ទទួល​ការ​តែងតាំង​ជា​បេក្ខជន​ប្រធានាធិបតី​ខាង​គណបក្ស​ប្រជាធិបតេយ្យ។​

លោក​ Webb ​ដែល​តំណាង​រដ្ឋ​ Virginia ​នៅ​ក្នុង​ព្រឹទ្ធសភា​ស.រ.អា.​ពី​ឆ្នាំ២០០៧​ដល់​ឆ្នាំ​២០១៣​បាន​បង្កើត​គណៈកម្មាធិការ​ស្ទាបស្ទង់​តំណែង​ប្រធានាធិបតី​មួយ​កាល​ពី​ខែ​វិ​ច្ឆិកា ​ហើយ​បាន​អំពាវនាវ​ឱ្យ​មាន​ «ភាព​ជា​មេដឹកនាំ​ប្រកប​ដោយ​ភាព​វិជ្ជមាន​ និង​មាន​ទស្សនៈវិស័យ» នៅ​ក្នុង​ស.រ.អា.។

លោក​ Webb ​បាន​ប្រកាស​អំពី​បេក្ខភាព​របស់​លោក​ក្នុង​គេហទំព័រ​របស់​លោក​ ហើយ​លោក​បាន​និយាយ​ថា ​លោក​បាន​ធ្វើសេចក្តី​សម្រេច​ចិត្ត​ឈរឈ្មោះ​ «នៅ​ក្រោយ​មាន​ការ​ពិចារណា​ និង​ការ​ពិភាក្សា​ជា​ច្រើនខែ​មក​ហើយ»។

នៅ​ពេល​លោក​បម្រើការ​នៅ​ក្នុង​សភា​ស.រ.អា. ​លោក​ Webb ​បាន​ធ្វើដំណើរ​ទៅ​កាន់​ប្រទេស​ភូមា​ ហើយ​លោក​បាន​ជួយ​ឱ្យ​មាន​ការ​ដោះលែង​លោក John Yettaw ដែល​ជា​ជនជាតិ​អាមេរិកាំង​លប​ចូល​ទៅ​ក្នុង​ប្រទេស​ភូមា។ លោក​បាន​នាំ​លោក Yettaw តាម​យន្តហោះ​ទៅ​កាន់​កន្លែង​សុវត្ថិភាព​នៅ​ក្នុង​រាជធានី​បាងកក​នៃ​ប្រទេស​ថៃ។

លោក Webb ដែល​ជា​វីរបុរស​ក្នុង​សង្គ្រាម​បាន​ទទួល​មេដាយ​នៅ​ពេល​លោក​បម្រើការ​ក្នុង​សង្គ្រាម​វៀតណាម​ត្រូវ​បាន​គេ​ស្គាល់​ដោយសារ​ការ​រិះគន់​របស់​លោក​ដល់​គោលនយោបាយ​ការបរទេស​ស.រ.អា.​ និង​យុទ្ធសាស្ត្រ​យោធា​របស់​អាមេរិកាំង​ និង​ការ​គាំទ្រ​របស់​លោក​ដល់​ក្រុម​ទាហាន​ស.រ.អា.​ដែល​បម្រើការ​នៅ​ក្រៅ​ប្រទេស។

លោក​ Webb ​បាន​និយាយ​ថា​ កិច្ច​ការពារ​ប្រទេស កំណែ​ទម្រង់​យុត្តិធម៌ ​ឧក្រិដ្ឋកម្ម ​និង​បញ្ហា​សេដ្ឋកិច្ច​ដែល​ផ្តល់អត្ថប្រយោជន៍​ដល់​ពលរដ្ឋ​អាមេរិកាំង​ឋានៈ​កណ្តាល​នឹង​ក្លាយ​ទៅ​ជា​ការ​ផ្តោត​ការ​យក​ចិត្ត​ទុក​ដាក់​នៅ​ក្នុង​ការ​ឃោសនា​បោះឆ្នោត​របស់​លោក។​

បេក្ខជន​ឯ​ទៀតៗ​ខាង​គណបក្ស​ប្រជាធិបតេយ្យ​ដែល​ប្រកួត​ប្រជែង​នឹង​លោកស្រី​ Hillary Clinton មាន​លោក Bernie Sanders សមាជិក​ព្រឹទ្ធសភា​ស.រ.អា.​ប្រចាំ​រដ្ឋ​ Vermont ​លោក Lincoln Chafee ​អភិបាល​រដ្ឋ​ Rhodes Island និង​លោក​ Martin O'Malley ​អតីត​អភិបាល​រដ្ឋ​ Maryland៕

XS
SM
MD
LG