ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

អតីត​នាយក​គ្រប់គ្រង​ក្រុមហ៊ុន​ខ្សែ​ភាពយន្ត​ហូលីវូដ​ចង់​បន្សល់​កេរតំណែល​ជាមួយ​កុមារ​ក្រីក្រ​កម្ពុជា


ទាញ​យក​ពី​តំណភ្ជាប់​ដើម

អតីត​នាយក​គ្រប់គ្រង​ក្រុមហ៊ុន​ខ្សែ​ភាពយន្ត​ហូលីវូដ​ចង់​បន្សល់​កេរតំណែល​ជាមួយ​កុមារ​ក្រីក្រ​កម្ពុជា

ក្នុង​រយៈ​ពេល​១​ទសវត្សរ៍​ចុងក្រោយ​នេះ អតីត​នាយក​ប្រតិបត្តិ​ម្នាក់​នៃ​ក្រុមហ៊ុន​ផលិត​កុន​ហូលីវូដ​ដ៏​ល្បី​ល្បាញ​របស់​អាមេរិក ​បាន​បង្កើត​អង្គការ​មូលនិធិ​កុមារ​កម្ពុជា ​ដើម្បី​ធ្វើ​ឲ្យ​មាន​ការ​ផ្លាស់ប្តូរ​ជីវិត​កុមារ​ក្រីក្រ​ខ្មែរ​និង​គ្រួសារ​របស់​គេរាប់​ពាន់​នាក់​តាម​រយៈ​ការ​ផ្តល់​ការ​អប់រំ ​និង​ឧបត្ថម្ភស្បៀង​អាហារ​ និង​សេវា​ថែទាំ​សុខភាព​ជា​ដើម។​

កុមារី​ម៉ៅ លីហ្សា សព្វថ្ងៃ ​លែង​ដើរ​រើស​អេតចាយ​ជាមួយ​ជីដូន​របស់​នាង​ត​ទៅ​ទៀត​ហើយ។ ​ការងារប្រចាំ​ថ្ងៃ​របស់​នាង​នៅ​ពេល​នេះ​គឺសរសេរ ​អាន​សៀវភៅ​និង​ទៅ​សាលារៀន។​

កុមារី​វ័យ​១០​ឆ្នាំ​ប្លាយ​នេះ​មិន​ចាំបាច់ដើរ​រើស​អេតចាយ​តទៅ​ទៀត​នេះ មិន​មែន​ដោយសារ​តែ​ទីលាន​ចាក់​សម្រាមស្ទឹង​មាន​ជ័យ​នៅ​ក្បែរ​ផ្ទះ​ជួល​របស់​នាង​ត្រូវបានបិទ​មិនឲ្យ​អ្នក​រើស​អេតចាយចូល​នោះ​ទេ ប៉ុន្តែ​គឺ​ដោយសារ​នាង ​និង​បងស្រី​ជីដូន​មួយ​ម្នាក់​ទៀតត្រូវ​បាន​អង្គការ​សប្បុរសមួយ​ឈ្មោះ​មូល​និធិ​កុមារ​កម្ពុជា​ឬ​ហៅ​កាត់​ជា​ភាសា​អង់គ្លេស​ថា ផ្តល់​ឱកាស​ឲ្យ​ចូល​សាលា​រៀន។​

លីហ្សា​និយាយ​ថា នាង​សប្បាយ​រីករាយ​ជាមួយ​នឹង​ការ​សិក្សា​របស់​នាង ដោយ​សារ​នាង​គឺ​ជា​សិស្ស​ពូកែ​ម្នាក់​នៅ​ក្នុង​ថ្នាក់។​

«នៅ​អង្គការ​ រៀន​បាន​លេខ​១ លេខ​២ ឬ​លេខ​៣។ នៅ​សាលារដ្ឋ​ជាប់​លេខ​៨»។​

បងស្រី​របស់​នាង​គឺ​សួង លីដា វ័យ​១៥​ឆ្នាំ ក៏​ឈប់​ដើរ​តាម​ជីដូន​ទៅ​រើស​អេតចាយ​ទាំង​យប់​ ទាំង​ថ្ងៃ​ហើយ​ដែរ។ ឥឡូវ​លីដា ​នៅ​ជួយ​ធ្វើ​កិច្ចការ​ផ្ទះ ហើយ​ក៏​ចូល​រៀន​ថ្នាក់​ភាសា​អង់គ្លេស ​និង​កុំ​ព្យូទ័រ​នៅ​អង្គការ​មូលនិធិ​កុមារ​កម្ពុជា​ដែរ។​

«ចង់​រៀន​នៅ​អង្គការ ​CCF ​ព្រោះ​រៀន​នៅ​អង្គការ​នេះ ពេល​យើង​រៀន​ចេះ​ទៅ​ បាន​ការងារ​ធ្វើ​ ហើយ​ម៉្យាង​ទៀត​ស្រួល អត់​អស់លុយ​កាក់»។​

លីហ្សា ​និង​លីដា ប្រហែល​ជា​នៅ​តែ​មិន​អាច​ចូល​សាលារៀន​បាន​នៅ​ឡើយ​ទេ​នៅ​ពេល​នេះ ​ ប្រសិន​បើ​ស្ថាបនិក​អង្គការ​មូលនិធិ​កុមារ​កម្ពុជា​គឺ​លោក ​Scott Neeson ​មិន​បាន​មក​ដល់​អតីត​ទីលាន​ចាក់​សម្រាមស្ទឹង​មាន​ជ័យ​ដ៏ល្បី​ឈ្មោះ​ក្នុង​រាជធានី​ភ្នំពេញ កាល​ពី​ជាង​មួយ​ទសវត្សរ៍​មុននោះ។​

ក្នុង​នាម​ជា​អ្នក​ទេសចរណ៍​ម្នាក់​នៅ​ឆ្នាំ​២០០៣ លោក​ Scott Neeson ដែល​ជា​អតីត​ប្រធាន​ក្រុម​ហ៊ុន​ផលិត​ខ្សែ​ភាពយន្ត​ដ៏​ល្បី​ល្បាញ​របស់​អាមេរិក​មួយ​ឈ្មោះ 20th ​Century Fox ​International បាន​ទៅ​ដល់ទីលាន​ចាក់​សម្រាមស្ទឹង​មានជ័យ​នៅ​ពេល​នោះ។​

គឺ​ពេល​នោះ​ហើយ​ដែល​ជីវិត​របស់​លោក​បាន​ផ្លាស់​ប្តូរ នៅពេល​ដែល​លោក​បាន​ឃើញ​កុមារ​តូចៗ​ជា​ច្រើន​ និង​ខ្លះ​ឈឺ​ផង កំពុង​ធ្វើ​ការ​និង​ត្រូវ​គេ​ទុកចោល​នៅ​លើ​គំនរ​សម្រាមនៅ​ទីនេះ។​

«ទិដ្ឋភាព​នោះ​គឺ​ពិត​ជា​ការ​ពញ្ញាក់​ស្មារតី​មួយ​សម្រាប់​ខ្ញុំ ដោយ​សារ​មុន​ពេល​នោះ ខ្ញុំ​រស់នៅ​ក្នុង​ជីវិត​ដ៏ឆើតឆាយ​នៅ​បស្ចឹម​ប្រទេស។ រស់នៅ​ក្នុង​ពិភព​ហូលីវូដ ក្នុង​នាម​ជា​កម្លោះ​ ដែល​មាន​ស្រីស្អាតៗ​ចោមរោម មាន​ទូក មាន​ឡាន មាន​តារា​ភាពយន្ត​ជាច្រើន​ជុំ​វិញ​ខ្លួន ប៉ុន្តែ​មួយ​រំពេច​នោះ ស្រាប់​តែ​អ្នក​មក​ពើប​ប្រសព្វ​នឹង​ទិដ្ឋភាព​មួយ​ដែល​ផ្ទុយ​គ្នា​ស្រឡះ ហើយ​នៅ​ពេល​ដែល​អ្នក​បានឃើញ​វាហើយ ​នោះអ្នកពិបាកនឹង​បែរ​ខ្នង​ដាក់​វា​ណាស់។ ខ្ញុំ​ពិត​ជា​មិន​អាច​បែរ​ខ្នង​ដាក់​វា​បានទេ»។​

មួយ​ឆ្នាំ​ក្រោយ​មក​គឺ​នៅ​ឆ្នាំ​២០០៤ លោក​ Scott Neeson ក៏​សម្រេច​ចិត្ត​លក់​ផ្ទះ ទូក​ ឡាន​នៅ​សហ​រដ្ឋ​អាមេរិក​នោះ ហើយ​ផ្លាស់​មក​រស់​នៅ​ក្នុង​ប្រទេសកម្ពុជា​ ហើយ​បាន​បង្កើតអង្គការ​មូលនិធិកុមារ​កម្ពុជា​នេះ​ឡើង។​

រហូត​មក​ដល់​ពេល​នេះ អង្គការ​របស់​លោក​បាន​បម្រើ​សេវា​ជួយ​កុមារ​ក្រីក្រ​រាប់​ពាន់​នាក់​ និង​ក្រុម​គ្រួសារ​របស់​ពួក​គេ តាម​រយៈ​ការ​ផ្តល់​ការ​អប់រំ ការ​ឧបត្ថម្ភ​ស្បៀង​អាហារ ​និង​ការ​ថែទាំ​សុខភាព​ជាដើម។​

កុមារ​នៅ​ទីនេះ រៀន​ភាសា​អង់គ្លេស កុំព្យូទ័រ គូរ​គំនូរ​ និង​ផាត់​ពណ៌​ជាដើម។ ចំណែក​កុមារ​ជំទង់ៗ​ ឬ​ស្ថិត​ក្នុង​យុវវ័យ​ខ្លះ​ ទទួល​កា​របណ្តុះ​បណ្តាល​ជំនាញ​វិជ្ជាជីវៈ ​ឬ​ការ​អប់រំ​ថ្នាក់​ឧត្តម​សិក្សា។​

ជា​ស្ថាបនិក​ និង​ជានាយក​ប្រតិបត្តិ​អង្គការ​នេះ​ផ្ទាល់​ លោក​ Scott Neeson ដែល​បាន​ចាកចេញ​ពី​អាជីព​ផលិត​ខ្សែភាព​យន្ត​រយៈ​ពេល​២៦​ឆ្នាំ​របស់​លោក​នោះ​និយាយថា​ នៅ​ពេល​ដែល​ឃើញ​កុមារ​ទាំង​នេះ លោក​បាន​សំឡឹង​ឃើញ​ក្តី​សង្ឃឹមនៅក្នុង​ភ្នែក​របស់​ពួក​គេ។​

«អ្នក​ស្រាប់តែស្រឡាញ់​ក្មេងៗ​នៅ​ទីនេះ​តែ​ម្តង។ ពួក​គេ​គឺ​ជា​ក្មេង​ដ៏​អស្ចារ្យ ដែល​ពោរ​ពេញ​ទៅ​ដោយ​សក្តានុពល​ និង​ក្តី​សង្ឃឹម។ ខ្ញុំ​បាន​គិត​ថា ខ្ញុំ​អាច​ធ្វើ​ការងារ​បាន​ច្រើន​សម្រាប់​ពិភព​លោក​ ជាងការ​ផលិត​កុន»។​

លោក ​Scott ​Neeson ធ្លាប់​ជា​អ្នក​មើល​ការ​ខុសត្រូវ​ទៅលើ​ការ​ចេញ​ផ្សាយខ្សែ​ភាពយន្ត​ហូលីវូដល្បីៗជាច្រើន​ដូចជា រឿង​ Titanic ​និង​រឿង​ Brave​ Heart​ ជាដើម មុន​ពេល​លោកសម្រេច​ចិត្ត​មក​បង្កើត​អង្គការ​មូល​និធិ​កុមារ​កម្ពុជា​នេះ។​

«ខ្ញុំ​ចង់​មាន​កេរ​តំណែល​មួយ ព្រោះ​យើង​ចង់​ធ្វើ​ឲ្យ​ពិភព​លោក​នេះ​ក្លាយ​ជា​កន្លែង​ដែល​ល្អ​ប្រសើរ​ជាង​មុន ដែល​ផ្ទុយ​ពី​ការ​គ្រាន់តែ​បណ្តោយ​ខ្លួន​ឲ្យ​ធ្វើ​អ្វី​តាម​ចិត្ត​ទៅតាម​ជីវិត​បែប​សម្ភារៈ​និយម​នោះ»។

ក្រៅ​ពី​ការអប់រំ​ដល់​កុមារ​ក្រី​ក្រ​ហើយ​នោះ អង្គការ​មូលនិធិ​កុមារ​កម្ពុជា​ក៏​ផ្តល់​ឲ្យ​គ្រួសា​រ​បស់​ពួក​គេ​ផង​ដែរ​នូវ​ការ​ឧបត្ថម្ភ​ចាំបាច់​មួយ​ចំនួន​ រាប់​ចាប់តាំង​ពីការ​ពិនិត្យសុខភាព​រហូត​ដល់​ការ​ផ្តល់​ស្បៀង​អាហារ​ជា​ដើម ដើម្បី​ធានា​ថា ​ឪពុក​ម្តាយ​របស់​កុមារ​នឹង​បញ្ជូន​ពួកគេ​មក​សាលា​រៀន។​

លោក Scott Neeson ជឿ​ថា ឪពុកម្តាយ​នឹង​មិន​បញ្ជូន​កូន​របស់​ខ្លួន​មក​រៀន​ទេ ​ប្រសិន​បើ​ពួក​គេ​ត្រូវការ​ប្រាក់​ដើម្បី​ទិញ​អាហារ​ ឬ​ត្រូវការ​អ្នក​មើល​ថែទាំ​បងប្អូន​របស់​ពួក​គេ​នោះ។​

«ខ្ញុំ​អាច​យល់​បាន​ពី​បញ្ហា​ហ្នឹង។ វា​ជា​ជម្រើស​រវាង​ការ​ដែល​ ថា​តើ​កូន​គួរ​តែ​ទៅ​រៀន ឬ​ក៏​ថា​ តើ​យើង​មាន​អាហារបរិភោគ​នៅ​យប់នេះ​ដែរ​ឬទេ»។

លោក សុខ ផល គឺ​ជា​ពូ​របស់កុមារី ម៉ៅ លីហ្សា។ លោក មាន​ប្រសាសន៍​ថា អង្គការមូលនិធិ​កុមារ​កម្ពុជា​បាន​ផ្លាស់​ប្តូរ​ជីវិត​គ្រួសារ​ទាំង​មូល​របស់​លោក។​

«ផ្លាស់​ប្តូរ​ច្រើន​ណាស់។ វា​បាន​ជួយ​កូន​ក្មួយ​របស់​ខ្ញុំ​ឲ្យ​បាន​ចូល​សាលារៀន​ទាំង​សាលា​រដ្ឋ​ និង​សាលា​នៅអង្គការ ​ រៀន​ទាំង​ខ្មែរ​ ទាំង​អង់គ្លេស។ ពី​មុន ​កូន​ក្មួយ​ខ្ញុំមិន​ដែល​បាន​រៀន​អី​ទេ​ ​ដើរ​តែរើស​អេតចាយ។ ខ្ញុំ​ ប្រពន្ធ​ខ្ញុំ​និង​ម្តាយ​ខ្ញុំ សុទ្ធ​តែ​ជា​អ្នកដើរ​រើស​អេតចាយ»។

លោក​សុខ ផល​បន្ថែម​ថា ដោយ​មាន​ជំនួយ​ពី​អង្គការ​នេះ លោក​ទទួល​បាន​រ៉ឺម៉ក​ម៉ូតូ​កង់បី​(ទុកទុក)មួយ​សម្រាប់​រត់​ ហើយ​ប្រពន្ធ​របស់​លោក​ក៏​ទទួល​បាន​ម៉ាស៊ីន​ដេរ​មួយ​គ្រឿ​សម្រាប់​រក​ចំណូល​មក​ជួយ​ផ្គត់​ផ្គង់​គ្រួសារ។​

«ខ្ញុំ​មិន​ដែល​ស្រមៃ​នឹក​ឃើញ​ថា ​កូន​បាន​ចេះ​អង់គ្លេស​អី​ទេ។ កុំ​តែ​បាន​អង្គការ​ជួយ​ កុំ​អី​កូន​ក្មួយ​ខ្ញុំ​មិន​បាន​រៀន​ទេ។ ឥឡូវ​កូន​ក្មួយ​ខ្ញុំ​និយាយ​អង់គ្លេស​បាន»៕
XS
SM
MD
LG