ក្រុមកម្មកររោងចក្រកាត់ដេរសម្លៀកបំពាក់ នៅថ្ងៃពុធនេះ បានពាក់អាវនិងកាន់បដាដែលជាផ្នែកមួយនៃការចាប់ផ្តើមដំបូងសម្រាប់យុទ្ធនាការដំឡើងប្រាក់ឈ្នួលដល់ក្រុមកម្មករឲ្យបានដល់១៧៧ដុល្លារក្នុងមួយខែ។
ក្រុមកម្មករនិងមេដឹកនាំសហជីពបានចាប់យកទីតាំងផ្លូវវ៉េងស្រេងសម្រាប់បើកឆាកដំបូង ដើម្បីទាមទារដំឡើងប្រាក់បៀវត្សរ៍។ កាលពីដើមខែមករា នៅកន្លែងនេះមានការប៉ះទង្គិចគ្នាដោយបង្ហូរឈាមរវាងក្រុមបាតុករ និងកងកម្លាំងមានសមត្ថកិច្ចរបស់រដ្ឋាភិបាលដែលបានបណ្តាលឲ្យមានមនុស្សស្លាប់ចំនួន៥នាក់និងរងរបួសជាង៤០នាក់។
ក៏ប៉ុន្តែយុទ្ធនាការដំឡើងប្រាក់បៀរវត្សរ៍នៅថ្ងៃនេះមិនមានការប៉ះទង្គិចគ្នាទេ ខណៈពេលដែលក្រុមសមត្ថកិច្ច និងក្រុមមន្ត្រីយោធាក្នុងសម្លៀកបំពាក់ប៉ារ៉ាប្រដាប់ដោយកាំភ្លៀង AK ស្វ័យប្រវត្តិត្រូវបានដាក់ពង្រាយនៅតំបន់សួនឧស្សាហកម្មកាណាឌីយ៉ានោះ នេះបើតាមការបញ្ជាក់ពីមេដឹកនាំសហជីព។
ក្រុមកម្មករបានពាក់អាវយឺតពណ៌ទឹកក្រូច ដែលមានសរសេរអក្សរថា យើងត្រូវការប្រាក់ឈ្នួល១៧៧ដុល្លារ ព្រមទាំងបានឈរកាន់បដាស្រែកទាមទារនៅតាមបណ្តារោងចក្រមួយចំនួន នៅក្នុង និងនៅជាយទីក្រុងភ្នំពេញ។
លោកអាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា ដែលហៅកាត់ថា C-CAWDU មានប្រសាសន៍ថា យុទ្ធនាការទាមទារប្រាក់ឈ្នួលនេះធ្វើឡើងមួយថ្ងៃតែប៉ុណ្ណោះ ហើយចាប់ពីថ្ងៃស្អែកតទៅ ក្រុមមេដឹកនាំសហជីពទាំង៨នឹងបន្តដាក់ញត្តិនៅតាមបណ្តាស្ថានទូតបរទេសដែលមានប្រទេសបញ្ជាទិញសម្លៀកបំពាក់ចេញពីរោងចក្រកម្ពុជា។
លោកនិយាយថា៖ «យើងចង់ឲ្យមានការជជែកគ្នាមែន ប៉ុន្តែបើក្នុងករណីការដំឡើងប្រាក់ឈ្នួលខាងមុខនេះវាមិនបានដល់កម្រិតថា បានរស់នៅសមរម្យបាន ឬក៏វានៅទាបពេក បញ្ហាវានៅតែមានទេ។ អញ្ចឹងយើងចង់ឲ្យមានការដំឡើងប្រាក់ឈ្នួលនៅចុងឆ្នាំ២០១៤ ឬ២០១៥នេះឲ្យវាឡើងខ្ពស់សមរម្យ»។
សហជីពទាំងប្រាំបីដែលបានចូលរួមយុទ្ធនាការទាមទារប្រាក់ខែគោលនោះ រួមមានសហជីព C-CAWDU សហព័ន្ធសហជីពជាតិនៃឧស្សាហកម្មវាយនភណ្ឌកាត់ដេរកម្ពុជារបស់លោកស្រីម៉ម ញឹម សហភាពសហជីពកម្ពុជារបស់លោក រ៉ុង ឈុន សហជីពសេរីកម្មកររបស់លោកជា មុន្នី ដែលធ្លាប់បានទាមទារដំឡើងប្រាក់ខែអប្បបរិមាសម្រាប់កម្មករចំនួន១៦០ដុល្លារចាប់តាំងពីចុងខែធ្នូឆ្នាំ២០១៣មកម្ល៉េះ។ ប៉ុន្តែក្រុមសហជីពបានដំឡើងការទាមទារប្រាក់ខែគោលឲ្យដល់១៧៧ដុល្លារវិញក្នុងរយៈពេលចុងក្រោយនេះ ដោយសារតម្រូវការកើនឡើងរបស់ក្រុមកម្មករ។
លោកជា មុន្នី ប្រធានសហជីពសេរីកម្មករនៃព្រះរាជាណាចក្រកម្ពុជា មានប្រសាសន៍ថា ប្រសិនបើយុទ្ធនាការទាមទារនៅថ្ងៃនេះមិនបានជោគជ័យទេ នោះមេដឹកនាំសហជីពទាំងអស់នឹងកំណត់គោលការណ៍ទាមទាររបស់ខ្លួនតទៅទៀត។
លោកនិយាយថា៖ «ប្រហែលជាជំហានទី២ និងទី៣នឹងមានតទៅទៀត។ ប៉ុន្តែដោយសារតែយើងដឹងហើយថា តំបន់វ៉េងស្រេងគឺជាតំបន់ក្តៅ ហើយមេដឹកនាំសហជីពមួយចំនួនត្រូវបានឃាត់កុំឲ្យមានការជួបប្រជុំជាមួយកម្មករកម្មការិនី»។
លោកអ៊ិត សំហេង រដ្ឋមន្ត្រីក្រសួងការងារ មានប្រសាសន៍ប្រាប់ក្រុមអុ្នកកាសែតនៅថ្ងៃពុធនេះថា វាជារឿងធម្មតាទេដែលមេដឹកនាំសហជីពបានបើកយុទ្ធនាការទាមទារដំឡើងប្រាក់ឈ្នួលដល់ក្រុមកម្មករ។ ក៏ប៉ុន្តែលោកសុំកុំឲ្យយុទ្ធនាការទាំងអស់នោះធ្វើហួសហេតុពេក ដើម្បីទុកឱកាសឲ្យមានការជជែកគ្នាជាលក្ខណៈស្ថាបនាជាការប្រសើរជាង។
លោកបានបញ្ជាក់ថា៖ «ការដំឡើងប្រាក់ឈ្នួលវាមានហោនិភ័យ។ កាលណាខ្ពស់ពេក ក៏វាមានហោនិភ័យ បានន័យថា ខ្ពស់ពេកអ្នកវិនិយោគទៅមិនរួច រោងចក្រវាត្រូវដួល។ អញ្ចឹងវាមានហោនិភ័យមួយគឺបាត់បង់ការងារសម្រាប់ប្រជាពលរដ្ឋកម្មករ កម្មការិនីរបស់យើង។ កាលណាទាបពេកក៏មានហោនិភ័យដែរ។ ទាបពេកក៏កម្មករមិនអាចទទួលបាន មិនអាចរស់នៅបាន ផលិតកម្មក៏មិនអាចបង្កើនបានដែរ»។
ក្រសួងការងារនិងបណ្តុះបណ្តាលវិជ្ជាជីវៈ អង្គការពលកម្មអន្តរជាតិ និងតំណាងសហជីពបានរៀបចំសិក្ខាសាលាត្រីភាគីមួយនៅថ្ងៃនេះ ដើម្បីកំណត់ប្រាក់ឈ្នួលកម្មករ ហើយនៅថ្ងៃទី២៦ខែកញ្ញាខាងមុខនឹងមានកិច្ចពិភាក្សានេះមន្តទៀត៕
