ក្រុមមន្ត្រីកម្ពុជាបានបញ្ជាក់ជំហរប្រុងប្រយ័ត្ននៅឡើយចំពោះការប្រយុទ្ធប្រឆាំងនឹងក្រុមឧទ្ទាមជ្រុលនិយមឈ្មោះ រដ្ឋឥស្លាម (ISIS) ជាមួយនឹងពួកបស្ចឹមប្រទេស ដោយចាត់ទុកថា កម្ពុជាកំពុងតែតាមដានរឿងនេះ ទោះជាមិនទាន់ប៉ះពាល់ដល់តំបន់ និងកម្ពុជាមែនក្តី។
ក្រុមឧទ្ទាមឥស្លាមជ្រុលនិយមនៅមជ្ឈឹមបូព៌ាប្រទេសហៅថា រដ្ឋឥស្លាម Islamic State ឬ ISIS បានវាយលុកយកទឹកដីនៅតំបន់ជាច្រើនក្នុងប្រទេសអ៊ីរ៉ាក់ ស៊ីរីនិងតំបន់មួយចំនួនទៀត។ ក្រុមនេះបានគំរាមវាយប្រហារស.រ.អា. និងប្រទេសមួយចំនួនទៀត ក្រៅពីបានសម្លាប់ដោយកាត់ក្បាលអ្នកកាសែតអាមេរិកាំងពីរនាក់ និងចំណាប់ខ្មាំងជនជាតិអង់គ្លេសម្នាក់ ដែលធ្វើការជាបុគ្គលិកអង្គការមនុស្សធម៌មួយ ហើយគំរាមកាត់ក្បាលចំណាប់ខ្មាំងជនជាតិអង់គ្លេសទីពីរនៅពេលឆាប់ៗខាងមុខ។ ពួកគេបានកាប់សម្លាប់ពលរដ្ឋ ជនជាតិភាគតិចនៅតំបន់ភ្នំជាច្រើនទៀត ដែលពួកគេបានវាយយកបានពីប្រទេសមួយចំនួនរួមទាំងអ៊ីរ៉ាក់ផងនោះ។ ពួកបស្ចឹមប្រទេសចាត់ទុកថា ក្រុមឧទ្ទាមរដ្ឋឥស្លាមជាគ្រោះថ្នាក់សម្រាប់ពិភពលោក។ ស.រ.អា. និងប្រទេសជិត៤០ក្នុងពិភពលោកសន្យាថានឹងចូលរួមវាយប្រហារទីតាំងក្រុមនេះ។
លោកឧបនាយករដ្ឋមន្ត្រីទៀ បាញ់ រដ្ឋមន្ត្រីក្រសួងការពារជាតិកម្ពុជា បានថ្លែង ថា ក្រុមឧទ្ទាមមិនមានបញ្ហាអ្វីដល់កម្ពុជាទេ ហើយកម្ពុជានិងតំបន់ក៏គ្មានការ គំរាមកំហែងដែរ។
«រឿងនេះហាក់ដូចជាវាមិនមានអ្វីរាលដាលមកដល់អាស៊ានទេ។ រឿងនេះជា រឿងកើតឡើងនៅឯនាយ។ វាហាក់ដូចជាវាមិនមានស្អីដែលប៉ះពាល់មកដល់ យើងទេបញ្ហានេះ»។
លោកបញ្ជាក់ថា រឿងនេះជាបញ្ហាដែលកម្ពុជាកំពុងឃ្លាំមើលដោយប្រុងប្រយ័ត្ន ដែរ។
«ចំណែករឿងពិតជាក់ស្តែងយ៉ាងណានោះគឺយើងហាក់ដូចជាពិបាកនឹងបញ្ចេញ មតិដែរ ព្រោះកិច្ចការហ្នឹង កិច្ចការខ្លះ វាកំពុងតែស្ថិតនៅក្នុងរង្វង់មួយនៃការ តាមដានយ៉ាងដិតដល់»។
ទោះជាយ៉ាងណាក៏ដោយ លោកទៀ បាញ់បានថ្កោលទោសចំពោះការកាប់សម្លាប់អ្នកកាសែតនិងចំណាប់ខ្មាំងដ៏សាហាវឃៅឃៅ ដែលលោកចាត់ទុកថា ជារឿងមិនអាចទទួលយកបាន។
«មែនទែនទៅ យើងឃើញតាមរូបភាពវីដេអូ ដែលគេបញ្ចាំងពីការធ្វើឃាត ការ សម្លាប់ដល់ឈ្លើយសឹក អីមួយចំនួនហ្នឹង គឺវាហាក់ដូចជាវាមើលទៅហាក់ដូច ជាវាមិនសូវល្អមើលសោះ ព្រោះអី ឃើញវាធ្វើនឹង វាជ្រុលពេក»។
លោកថ្លែងយ៉ាងដូច្នេះដោយសំដៅទៅលើការសម្លាប់ជនបរទេស ដែលមានការ បញ្ចាំងតាមប្រព័ន្ធបណ្តាញសង្គម និងការផ្សព្វផ្សាយតាមខ្សែរអាត់វីដេអូ ដែល បានធ្លាយមកក្រៅនោះ។
លោកឧត្តមសេនីយ៍ឯកគាត ច័ន្ថារិទ្ធ អ្នកនាំពាក្យស្នងការនគរបាលជាតិ បានអះ អាងថា អាជ្ញាធរកំពុងស្រាវជ្រាវមើល ថាតើមានបញ្ហាអ្វីទាក់ទងនឹងរឿងកម្ពុជា យើងទេ។
«យើងដូចជាអត់មានសញ្ញាអ្វីទេ តែទោះជាយ៉ាងណា ការប្រុងប្រយ័ត្នក៏យើងនៅតែមានជាប់ជាហូរហែ។ យើងបានយកចិត្តទុកដាក់តាមដានរឿងនឹងដែរ។ តែយើងមិនទាន់ឃើញមានសញ្ញាអ្វីធំដុំ គួរកត់សម្គាល់ទេ»។
នៅពេលសួរពីការចូលរួមជាមួយនឹងប្រទេសមួយចំនួនដើម្បីប្រយុទ្ធប្រឆាំងនឹងពួក ISIS លោកឧត្តមសេនីយ៍គាត ច័ន្ថារិទ្ធបានបញ្ជាក់ថា កម្ពុជាកំពុងតែស្ថិត នៅក្នុងដំណាក់កាលតាមដានអំពីរឿងនេះ។
ក្រុមអៃស៊ីស (ISIS) បានជួលក្រុមជនជាតិឥស្លាមជាច្រើនពីប្រទេសមួយចំនួន ក្នុងប្រទេសអាមេរិក អូស្ត្រាលី សហភាពអឺរ៉ុប និងប្រទេសអង់គ្លេស បារាំងផង ដែរ ដើម្បីចូលរួមសកម្មភាពវាយប្រយុទ្ធក្នុងសង្គ្រាមសាសនា Jihard នៅពេល ក្រុមរដ្ឋាភិបាលប្រទេសទាំងនេះព្យាយាមទប់ស្កាត់នោះ។
លោកយ៉ែម បុញ្ញរិទ្ធ មន្ត្រីនាំពាក្យគណបក្សជំទាស់គឺគណបក្សសង្គ្រោះជាតិ បានអះអាងស្រដៀងគ្នាទៅនឹងការកត់សម្គាល់របស់មន្ត្រីអាជ្ញាធរកម្ពុជាដែរ។
«ខ្ញុំដូចអត់មានឃើញអ្វីគួរឲ្យកត់សម្គាល់ផង នៅក្នុងប្រទេសយើង ពីព្រោះបង ប្អូនខ្មែរឥស្លាមដែលកាន់សាសនាឥស្លាមហ្នឹងក៏មិនមែនជាអ្នកជ្រុលនិយមដែរ។ ដល់អញ្ចឹងទៅ ខ្ញុំសង្កេតឃើញថា ដូចជាមិនមានអ្វី ដែលជាបញ្ហាគួរឲ្យកត់ សម្គាល់ទេ»។
ក្រោយពួកអៃស៊ីសសម្លាប់ជនជាតិអង់គ្លេសនៅចុងសប្តាហ៍កន្លងទៅ នាយករដ្ឋមន្ត្រីអង់គ្លេសដេវីដ កាម៉ារ៉ូន (David Cameron) ថ្លែងប្តេជ្ញាថា ការវាយប្រហារក្រុមអៃស៊ីសគឺធ្វើតាមវិធីប្រយុទ្ធប្រឆាំងនឹងភេរកម្ម។
«ពួកគេបានតាំងខ្លួនថា គេធ្វើការសម្លាប់នេះក្នុងនាមសាសនាឥស្លាម។ នោះជារឿងគ្មានន័យ។ ឥស្លាមគឺជាសាសនាមួយមានសន្តិភាព។ ពួកគេមិនមែនជាជន ឥស្លាមទេ។ ពួកគេជាបិសាច»។
រដ្ឋបាលលោកប្រធានាធិបតី បារ៉ាក់ អូបាម៉ាបាននាំមុខក្នុងការប្រយុទ្ធប្រឆាំងនឹង ពួកឧទ្ទាមឥស្លាមជ្រុលនិយមអៃស៊ីស។ លោករដ្ឋមន្ត្រីការបរទេសស.រ.អា.ចន ឃែរី បានជួបប្រជុំជាមួយក្រុមតំណាងប្រទេសជាង៣០ក្នុងប្រទេសបារាំងកាល ពីថ្ងៃច័ន្ទ ដែលចូលរួមជាមួយនឹងស.រ.អា. អង់គ្លេស បារាំងដើម្បីវាយប្រហារក្រុមអៃស៊ីល ជាក្រុមឥស្លាមជ្រុលនិយមឈ្មោះរដ្ឋឥស្លាមនោះ ដោយសន្យាជួយជាសម្ភារៈសិក យោធា និងបច្ចេកទេសជាដើម។
លោកនី ចរិយា អ្នកស៊ើបអង្កេតនៃសមាគមសិទ្ធិមនុស្សអាដហុក បានអះអាងថា ជាការគ្រោះថ្នាក់និងជាការលំបាកនិងងាយយល់ច្រឡំថា ជាសង្គ្រាមសាសនា នៅពេលអន្តរជាតិនិងក្រុមឥស្លាមជ្រុលនិយមនៅមជ្ឈឹមបូព៌ាប្រឈមមុខដាក់ គ្នា។
«ប្រសិនបើមានការលូកដៃជ្រៅរហូតដល់បង្កើតជាសង្គ្រាមវ៉ៃលុក នោះវាអាចធ្វើឲ្យមានបញ្ហាក្នុងការក្រឡៃស្ថានភាពនយោបាយពីការឈ្លោះគ្នាដោយការរើសអើង ឬក៏វិបត្តិខាងនយោបាយ ទៅជាបញ្ហាសាសនា»។
លោកថ្លែងថា ការយល់ច្រឡំថា ជាសង្គ្រាមសាសនា ដែលជាបញ្ហាធំជាងសង្គ្រាមនយោបាយនោះ អាចមានការគ្រោះថ្នាក់ខ្លាំង និងពិបាកបញ្ចប់៕
