បរិស្ថាន

ឡាវ​ចាប់​ផ្តើម​សង់​ទំនប់​វារីអគ្គិសនី​ទោះ​បី​មានការ​រិះគន់​ពីអ្នក​បរិស្ថាន

រូបគំរូទំនប់​សាយ៉ាប៊ុរី នៅ⁣ប្រទេសឡាវ
រូបគំរូទំនប់​សាយ៉ាប៊ុរី នៅ⁣ប្រទេសឡាវ
Ron Corben
បាងកក៖ ពិធី​សម្ពោធ​បើក​ការ​សាង​សង់​ទំនប់វារីអគ្គិសនី​ដ៏​ចម្រូង​ចម្រាស់​ដែល​មាន​តម្លៃ​៣ពាន់​៥​រយ​លាន​ដុល្លា​ត្រូវ​បាន​ប្រារព្ធ​នៅទន្លេ​មេគង្គ។ ក្រុម​ការពារ​បរិស្ថាន​នៅ​ប្រទេស​ជិត​ខាង និង​សហរដ្ឋ​អាមេរិក​បាន​លើក​ឡើងការ​ព្រួយ​បារម្ភ​ចំពោះផលប៉ះពាល់​នៃ​គម្រោងនេះ​លើ​មនុស្ស​រាប់លាន​នាក់​នៅ​តំបន់​អាស៊ី​អាគ្នេយ៍។
 
ការ​សាងសង់​ទំនប់​សាយ៉ាប៊ុរីនឹង​ចាប់​ដំណើរ​ការ​ទោះ​បី​ជា​មាន​ការ​រិះគន់​ចំពោះ​ផលប៉ះពាល់​របស់​វា​លើ​ប្រព័ន្ធ​ទន្លេ​មេគង្គ​ក្រោមជា​ពិសេសពី​ប្រទេស​កម្ពុជា​ និង​វៀតណាម​ក៏​ដោយ។ 

នៅ​ឯ​ពិធី​សម្ពោធ​បើ​កការ​សាងសង់កាល​ពី​ថ្ងៃពុធ ឧបនាយក​រដ្ឋ​មន្ត្រី​ឡាវ លោក សានសាវ៉ាដ ឡេងសាវ៉ាត (Sarnsawad Lengsawat) និយាយថា ឡាវ​បាន​ពិចារណា​ទស្សនៈ​របស់​ប្រទេស​ដទៃ​ ហើយ​សម្រេច​ដំណើរ​ការ​សាងសង់។ ទំនប់​វារីអគ្គិសនី​ត្រូវ​បាន​កំណត់​បញ្ចប់​នៅ​ឆ្នាំ២០១៩។ 

ទំនប់នេះ​គឺ​ជា​ទំនប់​វារីអគ្គិសនី​មួយ​ក្នុង​ចំណោម​ទំនប់ចំនួនរហូត​ដល់១០​ដែល​នឹង​ត្រូវ​បាន​សាងនៅ​ផ្នែក​ខាង​ក្រោម​នៃ​ទន្លេ​មេគង្គដែ​លមាន​ប្រវែង​៤.៣០០​គីឡូម៉ែត្រ​ដែល​ហូរ​កាត់​ប្រទេស​ថៃ ឡាវ កម្ពុជា និងដី​សណ្តវៀតណាម ចុះ​ទៅ​សមុទ្រ​ចិន​ខាង​ត្បូង។ 

អ្នក​បរិស្ថាន​មាន​ការ​ព្រួយ​បារម្ភ​ថា​ ផលប៉ះពាល់​រយៈពេល​វែង​នៃ​ទំនប់​នឹង​រាំង​ស្ទះ​ដល់​ដំណើរ​ផ្លាស់​ទី​របស់​ត្រី​ ដែល​នឹង​មាន​ផល​ប៉ះពាល់​ដល់​ជីវភាពរបស់មនុស្ស​រហូត​ដល់​៦០​លាន​នាក់។ 

ប៉ុន្តែ​លោក​សមគន់ វ៉ាតាគីគុល (Somkuan Watakeekul) ដែល​ជា​វិស្វករ​នៅ​ក្រុមហ៊ុន​ថាមពល​អាស៊ី​អាគេ្នយ៍ (South East Asia Energy Limited) មាន​ប្រសាសន៍​ថា ទំនប់​នេះ​នឹង​ផ្តល់​ប្រយោជន៍​ដល់​តំបន់។ 

«ទាំង​ទឹកសម្រាប់​បរិភោគ កសិកម្ម នេសាទ និង​ទាំង​ការ​ដឹកជញ្ជូន គ្រប់​ៗគ្នា​នឹង​ទទួល​ប្រយោជន៍​ពី​គម្រោង​នេះ។ លោក​មាន​ប្រសាសន៍​ថា ប្រយោជន៍​ចម្បង​នោះ​គឺ​ការ​ផលិត​ថាមពល ជំនួយ​ដល់​សហគមន៍​ក្រីក្ររបស់​ឡាវ និង​ការ​រីកចម្រើន​និង​អភិវឌ្ឍ​ក្នុង​តំបន់»។ 

ពិធីសម្ពោធ​បើក​ការ​សាងសង់​ត្រូវ​បាន​ធ្វើ​ឡើង​ទោះ​បី​ជា​នាយក​រដ្ឋ​មន្ត្រី​ឡាវ លោក​ថុងស៊ីង ថាម្មាវង់ (Thongsing Thammavong) មុននេះ​ បាន​មាន​ប្រសាសន៍​ថា គម្រោង​នេះ​នឹង​រង់​ចាំ​ការសិក្សា​បន្ថែម។ 
មន្ត្រី​ម្នាក់​នៃ​គណៈកម្មការ​ទន្លេ​មេគង្គ​ ដែល​ជា​គណៈកម្មការ​មួយ​ត្រូត​ពិនិត្យ​កិច្ច​សហប្រតិបត្តិការ​រវាង​ឡាវ ថៃ កម្ពុជា​ និង​វៀតណាមស្តី​ពី​គម្រោង​ទន្លេ​ បាន​ប្រាប់​វីអូអេ​ថា គណៈកម្មការ​ស្វះស្វែង​រក​ការ​បញ្ជាក់​ពី​សំណាក់​គណៈប្រតិភូ​ឡាវ ថា​តើ​ពិធី​នេះ​គឺ​ជា​ការ​សម្រេច​ចិត្ត​ចុង​ក្រោយ​របស់​ឡាវ​ក្នុង​ការ​ចាប់​ផ្តើម​ដំណើរ​ការ​គម្រោង​នេះ​ឬ​យ៉ាង​ណា។ នៅ​ឆ្នាំ​២០១១ រដ្ឋាភិបាល​ឡាវ​យល់​ព្រម​ផ្អាក​គម្រោង​រហូត​ដល់មាន​ការ​វាយ​តម្លៃ​ផ្នែក​បរិស្ថាន​បន្ថែម​ទៀត។ 
 
សហរដ្ឋ​អាមេរិក​ នៅ​សប្តាហ៍​នេះ បាន​និយាយ​ដោយ​ប្រយ័ត្ន​ប្រយែង​អំពី​ដំណើរការគម្រោងសាងសង់​នេះ ដោយ​បាន​ថ្លែង​ថា ​វិសាលភាព​ និង​ភាព​ធ្ងន់​ធ្ងរ​នៃ​ផលប៉ះពាល់​លើ​ប្រព័ន្ធ​បរិស្ថាន​ដែល​ផ្តល់​សន្តិសុខស្បៀង​អាហារ និងជីវភាព​នៅ​ក្នុង​តំបន់​មិន​ទាន់​មាន​អ្នក​ណា​ដឹង​បាន​នៅ​ឡើយ។ 

សកម្ម​ជន លោក​ស្រី​ ភានផន ឌីតេស (Pianporn Deetes) ​នៃ​អង្គការ​ទន្លេ​អន្តរជាតិ​ (International Rivers), ថ្លែងថា ពិធីសម្ពោធ​នេះ​គូស​បញ្ជាក់​ក្តី​ព្រួយ​កង្វល់​អំពី​តម្លាភាព​ជុំវិញ​គម្រោង។ 

«អ្វីដែល​កើត​ឡើង​ចំពោះ​ភាព​មិន​ច្បាស់​លាស់​នេះ​គឺ​ឆ្លុះ​បញ្ចាំង​រឿង​ទំនប់​សាយ៉ាប៊ុរី​ទាំងមូល​ ដែល​ខ្វះ​តម្លាភាព។ យើង​មិន​ដឹង​អំពី​អ្វី​ដែល​កើត​ឡើង។ យើង​មិនដឹង​ព័ត៌មាន​អ្វីទាំង​អស់ ហើយ​មាន​តែ​អ្នក​សាងសង់​ទេ​ដែល​ដឹង​ ដែល​អ្នក​សង់​នោះ​គឺ​ជា​ក្រុម​ហ៊ុន​ឯងជន​ថៃ ហើយ​មន្រ្តី​ជាន់​ខ្ពស់​ឡាវ​មួយ​ក្តាប់​តូចជា​អ្នក​ធ្វើ​សេចក្តី​សម្រេច​ចិត្ត និង​មានពត៌មាន»។

ក្រោម​កិច្ច​ព្រមព្រៀង​រួម​រវាង​ឡាវ និង​ថៃ ៩៥ភាគរយ​នៃ​អគ្គិសនី​ដែល​ទំនប់​នេះ​ផលិត​នឹង​ត្រូវ​លក់​ទៅ​ឲ្យ​ប្រទេស​ថៃ។ កាល​ពីដើម​សប្តាហ៍​នេះ លោក ស៊ុរ៉ាភុង ថូវីឆាកឆៃគុល (Surapong Tovichakchaikul) បាន​មាន​ប្រសាសន៍​ថា រដ្ឋាភិបាល​គាំទ្រការ​អនុវត្ត​គម្រោង​សាងសង់​នេះ។ ប៉ុន្តែ​ទាំង​កម្ពុជា ទាំងវៀតណាម​បង្ហាញ​ពី​ការ​ជំទាស់។ វៀតណាម​កំពុង​អំពាវនាវ​ឲ្យ​មាន​ការ​ផ្អាក​ចំនួន​១០​ឆ្នាំសម្រាប់​គ្រប់​គម្រោង​ទាំង​អស់​នៅ​ទន្លេ​មេគង្គ។ 
 
សរសេរ​សម្រួល​ដោយ ​អ៊ឹម សុធារិទ្ធ
Your JavaScript is turned off or you have an old version of Adobe's Flash Player. Get the latest Flash player.
ឯកអគ្គ​រាជទូត​កម្ពុជាចង់​លើក​កម្ពស់​ពាណិជ្ជកម្ម​រវាង​ប្រទេស​ទាំងពីរi
X
29 សីហា 2015
ឯកអគ្គ​រាជទូត​ថ្មី​របស់​ប្រទេស​កម្ពុជា​ប្រចាំ​នៅ​សហ​រដ្ឋ​អាមេរិក​សំឡឹង​មើល​ការ​លើក​កម្ពស់​ពាណិជ្ជកម្ម​រវាង​ប្រទេស​ទាំងពីរ​ ក្នុង​ខណៈ​ពេល​ដែល​សហរដ្ឋ​អាមេរិក​ងាក​មក​ផ្តោត​ការ​ចាប់​អារម្មណ៍​លើ​តំបន់​អាស៊ី។ ​លោក​ម៉ែន គឹមសេង​នៃ​វីអូអេ​សូម​ជូន​សេចក្តី​រាយការណ៍​ពី​រដ្ឋ​ធានី​វ៉ាស៊ីនតោន​។​
Your JavaScript is turned off or you have an old version of Adobe's Flash Player. Get the latest Flash player.
មរណភាព​អ្នកស្រី​​អៀង ធីរិទ្ធ​នាំឲ្យ​មាន​មន្ទិល​អំពី​យុត្តិធម៌​ក្នុងការ​កាត់​ទោស​ខ្មែរក្រហមi
X
26 សីហា 2015
បើ​ទោះ​ជា​​​អ្នក​ស្រី​​អៀង ធីរិទ្ធ​ ​អតីត​មន្ត្រី​ជាន់​ខ្ពស់​ខ្មែរ​ក្រហម​បាន​លាចាក​លោក​ក៏​ដោយ តែ​នៅ​តែ​មាន​សំណួរ​ចោទ​សួរពី​ការ​ទទួល​ខុស​ត្រូវ​របស់​មេ​ដឹកនាំរូប​នេះ​ចំពោះ​ទង្វើ​របស់​គាត់​នៅ​ក្នុង​របប​កម្ពុជា​ប្រជា​ធិបតេយ្យ។​​​​ លោក​នៅ វណ្ណារិន​​នៃ​វីអូអេ​សូមជូន​​សេចក្តីរាយ​ការណ៍​ពី​​រាជ​ធានី​ភ្នំពេញ។

អង់គ្លេស​ជាមួយ​ម៉ានី​និង​ម៉ូរី

Your JavaScript is turned off or you have an old version of Adobe's Flash Player. Get the latest Flash player.
A Wake Up Call ពញ្ញាក់​ស្មារតីi
X
01 សីហា 2015
ឃ្លា a wake up call មាន​ន័យ​ថា ព្រឹត្តិការណ៍​អ្វី​មួយ​ដែល​ពញ្ញាក់​ស្មារតី​របស់​យើង ឲ្យ​ត្រូវ​ធ្វើ​អ្វី​មួយ​ដើម្បី​កែតម្រូវ​ស្ថានការ​បច្ចុប្បន្ន​របស់​យើង។ ដើម្បី​ឲ្យ​យល់​កាន់តែ​ច្បាស់​សូម​មើល​វីដេអូ​កម្មវិធី​រៀន​គ្រាម​ភាសា​អង់គ្លេស​ជាមួយ​ម៉ានី​និង​ម៉ូរី។ កម្មវិធី​នេះ ក៏​មាន​ដាក់​ផ្សាយ​ជូន​រាល់​ថ្ងៃសុក្រ​លើ​គេហទំព័រ Facebook https://www.facebook.com/voakhmer និង YouTube www.youtube.com/KhmerSpecialEnglish របស់​វីអូអេ​ខ្មែរ​ផងដែរ៕
Your JavaScript is turned off or you have an old version of Adobe's Flash Player. Get the latest Flash player.
ទីក្រុង​បាងកក​ត្រូវ​បាន​ព្រមាន​ថា អាច​នឹង​លិច​ទឹក​យ៉ាង​សន្សឹមៗi
X
25 សីហា 2015
មិនមែន​មាន​តែ​ទីក្រុង Venice នៅ​អ៊ីតាលី និង​ទីក្រុង New Orleans នៅ​សហរដ្ឋ​អាមេរិក​នោះ​ទេ ដែល​កំពុង​តែ​ត្រូវ​បាន​លិច​យ៉ាង​សន្សឹមៗ​នោះ បច្ចុប្បន្ន​នេះ​ទីក្រុង​បាងកក ដែល​មាន​ប្រជាជន​រស់​នៅ​ប្រមាណ​ជិត ១០លាន​នាក់ កំពុង​ប្រឈម​នឹង​ការព្រមាន​ថា នៅ​ពីរបី​ទសវត្ស​ខាង​មុខ​នេះ ទីក្រុង​នេះ នឹង​មិន​អាច​ជា​ទីកន្លែង​សម្រាប់​រស់​នៅ​បាន​ទៀត​ទេ។ អ្នកឆ្លើយឆ្លង​ព័ត៌មាន​របស់​វីអូអេ លោក Steve Herman រាយការណ៍​ពី​រាជធានី​បាងកក​នៃ​ប្រទេស​ថៃ។ ហើយ​នាង​ ស្រេង​ លក្ខិណា ជូន​សេចក្តី​ប្រែ​សម្រួល៕