កាលពីថ្ងៃច័ន្ទ លោកអនុប្រធានាធិបតីស.រ.អា. Joe Biden បានចាប់ផ្តើមដំណើរទស្សនកិច្ចប្រាំថ្ងៃរបស់លោកក្នុងភូមិភាគមជ្ឈិមបូព៌ា ដោយលោកបានសន្យាថាស.រ.អា.នឹង«ខ្វេះបេះដូង»ចេញពីក្រុមរដ្ឋឥស្លាមនិងបំផ្លាញពួកនេះ។
លោក Biden បានទៅសួរសុខទុក្ខក្រុមទាហានកងទ័ពអាកាសស.រ.អា.នៅឯមូលដ្ឋានកងទ័ពអាកាស Al-Dhafra នៅជិតរាជធានី Abu Dhabi នៃប្រទេសអេមីរ៉ាតអារ៉ាប់រួម (United Arab Emirates) នៅពេលយន្តហោះគ្មានមនុស្សបើកបានចុះលើផ្លូវយន្តហោះ។
លោកអនុប្រធានាធិបតីអាមេរិកាំងបានហៅក្រុមបះបោររដ្ឋឥស្លាមថាជា «ពួកឧក្រិដ្ឋជននិងជាមនុស្សកំសាក»។ ដោយប្រើឈ្មោះជាភាសាអារ៉ាប់នៃក្រុមរដ្ឋឥស្លាម លោក Biden បានមានប្រសាសន៍ប្រាប់ពួកទាហានជើងអាកាសអាមេរិកាំងទាំងនេះថា «យើងត្រូវតែច្របាច់ខ្វេះយកបេះដូងពួក Daesh នៅក្នុងប្រទេសអ៊ីរ៉ាក់និងប្រទេសស៊ីរីដើម្បីកុំឱ្យពួកវាអាចបន្តបញ្ចេញពិសពុលរបស់ពួកវានៅក្នុងតំបន់និងនៅក្នុងពិភពលោក»។
នៅក្នុងសេចក្តីសម្ភាសន៍មួយជាមួយកាសែត The National នៃក្រុង Abu Dhabi លោក Biden បានបង្ហាញគោលជំហរស.រ.អា.សម្រាប់ដំណោះស្រាយសន្តិភាពតាមរយៈកិច្ចចរចាគ្នា ដើម្បីបញ្ចប់សង្គ្រាមស៊ីវិលប្រាំឆ្នាំមកហើយក្នុងប្រទេសស៊ីរីដោយលោកបានបដិសេធដំណោះស្រាយខាងយោធា។ កិច្ចចរចាសន្តិភាពមានកំណត់នឹងធ្វើជាថ្មីនៅពេលបន្ទាប់មកទៀត ក្នុងសប្តាហ៍នេះនៅក្នុងក្រុងហ្ស៊ឺណែវ នៅពេលដែលកិច្ចឈប់បាញ់គ្នាបានកាត់បន្ថយការប្រយុទ្ធគ្នាកាលពីប៉ុន្មានថ្ងៃមុននេះ៕
