បញ្ញវន្តមួយក្រុម ដែលធ្វើការនៅក្នុងអង្គការសង្គមស៊ីវិល កំពុងជំរុញក្រុមប្រជាពលរដ្ឋឲ្យចូលរួមក្នុងចលនានយោបាយដោយសកម្ម និងដោយផ្ទាល់។ ប៉ុន្តែអ្នកឃ្លាំមើលស្ថានការណ៍នៅកម្ពុជាសង្ស័យថា នេះជាគម្រោងការបង្កើតគណបក្សនយោបាយថ្មីមួយនាពេលខាងមុខ។
លោកបណ្ឌិតកែម ឡី អ្នកស្រាវជ្រាវកិច្ចអភិវឌ្ឍសង្គម លោកបណ្ឌិតយ៉ង សាំងកុមារ នាយកមជ្ឈមណ្ឌលសិក្សា និងអភិវឌ្ឍកសិកម្មកម្ពុជាហៅថា សេដាក (CEDAC) រួមជាមួយឥស្សរជនមួយចំនួនទៀត ដូចជាលោក ម៉ម សុណង់ដូ នាយកវិទ្យុសម្បុកឃ្មុំ និងជាប្រធានសមាគមអ្នកប្រជាធិបតេយ្យ លោកយ៉េង វីរៈ នាយកមជ្ឈមណ្ឌលអប់រំច្បាប់សម្រាប់សហគមន៍ ជាដើម បានរួមគ្នាបង្កើតចលនាសង្គមមួយហៅថា«បណ្តាញពលរដ្ឋដើម្បីអភិវឌ្ឍសង្គម»ឬហៅថា «ខ្មែរជួយខ្មែរ»។ អង្គការនេះត្រូវបានចុះបញ្ជីនៅឆ្នាំ២០០៤។
លោកកែម ឡី សមាជិកស្ថាបនិកម្នាក់ក្នុងចំណោមនោះ ពន្យល់ថា ចលនាខ្មែរជួយខ្មែរនេះមិនមែនជាចលនាបង្កើតគណបក្សនយោបាយខ្លួនឯងទេ។ប៉ុន្តែគឺជាចលនាជំរុញឲ្យប្រជាពលរដ្ឋតាមមូលដ្ឋានចាប់ផ្តើមស្រឡាញ់នយោបាយ និងសម្រេចចិត្តបង្កើតបក្សនយោបាយនៅមូលដ្ឋានរបស់ខ្លួន។
«បណ្តាញនេះគ្រាន់តែជាបណ្តាញសង្គមស៊ីវិលដើម្បីជំរុញអំណាចនយោបាយដល់ប្រជាពលរដ្ឋតាមរយៈលើកទឹកចិត្តឲ្យពួកគាត់ធ្វើលំហាត់នៃការរៀបចំគណបក្សអភិវឌ្ឍតាមឃុំសង្កាត់ តាមរយៈការផ្សព្វផ្សាយវេទិកាសាធារណៈ»។
នៅក្នុងពេលនេះ ក្រុមបញ្ញជនទាំងនេះបានចាប់ផ្តើមបើកវេទិកាជាមួយក្រុមប្រជាពលរដ្ឋនៅតាមបណ្តាខេត្តនានាដើម្បីបញ្ជ្រាបពីទស្សនវិស័យនយោបាយ និងសារៈសំខាន់នៃការបង្កើតគណបក្សនយោបាយ។
លោកកែម ឡីបញ្ជាក់ថា មានប្រជាពលរដ្ឋនៅក្នុងឃុំចំនួន២៧មកពីខេត្តកំពង់ស្ពឺ ខេត្តត្បូងឃ្មុំ ខេត្តតាកែវ ខេត្តមណ្ឌលគីរី ខេត្តកំពត ខេត្តកណ្តាល និងខេត្តព្រៃវែង និងក្រៅពីនោះមានពលរដ្ឋមកពីខេត្តរតនគីរី និងខេត្តព្រះវិហារក៏បានដាក់សំណើសុំបង្កើតជាក្រុមនយោបាយដែរ។
«គាត់ស្នើមកមានចំនួន២៧ឃុំ ប៉ុន្តែយើងសង្ឃឹមថា មានលទ្ធភាពរៀបចំឲ្យពួកគាត់បានត្រឹមប្រហែលជាដប់ឃុំ។ គណបក្សមូលដ្ឋានគឺពួកគាត់រៀបចំ(គណបក្ស) ដោយខ្លួនឯង។ យើងគ្រាន់តែបង្រៀនអំពីរបៀបរៀបចំលក្ខន្តិកៈ បទបញ្ជាផ្ទៃក្នុង សកម្មភាពសំខាន់ៗនៅមូលដ្ឋាន ដែលពួកគាត់ត្រូវធ្វើ ក្រោយពីបង្កើតគណបក្សហើយ។ បើគាត់យល់ច្បាស់អំពីការចូលរួមនយោបាយ ពួកគាត់អាចរកគណបក្សធំៗដើម្បីចងសម្ព័ន្ធមិត្ត ឬមួយពួកគាត់ផ្គុំគ្នានៅតាមឃុំ សង្កាត់ដើម្បីបង្កើតគណបក្សថ្មីមួយ។ ប៉ុន្តែយើងនឹងមិនបង្កើតគណបក្សទេ»។
លោកបណ្ឌិតកែម ឡីឲ្យដឹងថា ការជំរុញប្រជាពលរដ្ឋមូលដ្ឋានឲ្យចូលក្នុងជីវភាពនយោបាយនេះគឺបានស្រង់យកគម្រូពីប្រទេសអាល្លឺម៉ង់ ប្រទេសអូស្ត្រាលី ប្រទេសអាមេរិកនិងបទពិសោធន៍នៃចលនាសង្គម និងគណបក្សនយោបាយក្នុងស្រុក។ លោកអះអាងថា សមាជិកដែលចូលរួមក្នុងចលនានេះ រួមមានអ្នកមកពីបណ្តាញកសិករ បណ្តាញព្រះសង្ឃ អ្នកនិយមជជែកតាមកម្មវិធីវិទ្យុ មន្ត្រីរាជការ តំណាងសហជីព តំណាងអង្គការសេដ្ឋកិច្ចក្រៅប្រព័ន្ធ និងតំណាងជនជាតិដើមភាគតិច។
នៅក្នុងន័យខាងលើនេះលោកអ៊ូ វីរៈ ប្រធានក្រុមប្រឹក្សាភិបាលមជ្ឈមណ្ឌលសិទ្ធិមនុស្សកម្ពុជា យល់ថា ចលនាខាងលើនឹងឈានទៅរកការបង្កើតគណបក្សនយោបាយដោយខ្លួនឯង។
«ចំពោះខ្ញុំការចូលរួមបង្កើតគណបក្សនយោបាយ ទោះបីជាគាត់បង្កើតខ្លួនឯង ឬរៀបចំឲ្យអ្នកដទៃបង្កើតក៏ជារឿងមួយដើម្បីបង្កើតគណបក្សនយោបាយដែរ ហើយពួកគាត់ជាអ្នកចូលរួមបង្កើតហើយ»។
ថ្វីបើនេះជាជំហានឆ្ពោះទៅរកការបង្កើតគណបក្សនយោបាយ ប៉ុន្តែអ្នកនយោបាយនៃគណបក្សសង្គ្រោះជាតិ និងគណបក្សប្រជាជនកម្ពុជាហាក់មិនបានព្រួយបារម្ភនោះឡើយ។
លោកផៃ ស៊ីផាន រដ្ឋលេខាធិការទីស្តីការគណៈរដ្ឋមន្ត្រី និងជាមន្ត្រីជាន់ខ្ពស់គណបក្សកាន់អំណាច លើកឡើងថា វត្តមាននៃគណបក្សថ្មី នាពេលអនាគត មិនមែនជាការគំរាមកំហែងនោះទេ។
«គណបក្សប្រជាជនកម្ពុជាមិនដែលព្រួយបារម្ភអ្វីទេ។ ឥឡូវគណបក្សប្រជាជនយល់ឃើញថា អ្នកណាក៏អាចជាដៃគូពិភាក្សាជាមួយគណបក្សប្រជាជនកម្ពុជា ជាដៃគូពិភាក្សាជាមួយរដ្ឋាភិបាលដែរ»។
សម្រាប់លោកស្រីមូរ សុខហួរ តំណាងរាស្ដ្រគណបក្សជំទាស់ នេះជាលក្ខណៈប្រជាធិបតេយ្យក្នុងការបង្កើតគណបក្សថ្មី។
«ការប្រកួតប្រជែងនេះ យើងខ្ញុំនិងគណបក្សសង្គ្រោះជាតិអត់មានការព្រួយបារម្ភទេ។ សូមឲ្យពង្រឹងលទ្ធិប្រជាធិបតេយ្យ»។
ទោះជាយ៉ាងណា គេនៅមិនទាន់ដឹងជាក់លាក់អំពីកាលបរិច្ឆេទនៃការបង្កើតគណបក្ស ឬចលនានេះរបស់ក្រុមលោកកែម ឡី លោកម៉ម សុណង់ដូ លោកយ៉េង វីរៈ និងលោកយ៉ង សាំងកុមារនោះទេ៕
