លោកប្រធានាធិបតី អូបាម៉ា បានប្រឈមសំណួរពិបាកៗជាច្រើនអំពីអសមត្ថភាពរបស់សហរដ្ឋអាមេរិកដើម្បីបញ្ឈប់ការសម្លាប់រង្គាលនៅក្នុងប្រទេសស៊ីរី នៅពេលដែលលោកបាននិយាយនៅសន្និសីទកាសែតកាលពីខែធ្នូ។លោកប្រធានាធិបតីបារ៉ាក់ អូបាម៉ា មានប្រសាសន៍ថា៖ «អស់រយៈពេលជាច្រើនឆ្នាំមកហើយ យើងបានធ្វើការងារដើម្បីបញ្ឈប់សង្គ្រាមស៊ីវិលនៅក្នុងប្រទេសស៊ីរី និងដើម្បីសម្រាលការឈឺចាប់របស់មនុស្សជាតិ។ វាជាបញ្ហាដ៏លំបាកបំផុតមួយនៃបញ្ហាដ៏លំបាកបំផុតនានាដែលខ្ញុំបានប្រឈមមុខក្នុងឋានៈជាប្រធានាធិបតី។ ការទទួលខុសត្រូវចំពោះភាពឃោរឃៅនោះគឺស្ថិតនៅលើកន្លែងតែមួយទេគឺរបប Assad ហើយនិងសម្ព័ន្ធមិត្តរបស់គេគឺរុស្ស៊ី និងប្រទេសអ៊ីរ៉ង់។ ការបង្ហូរឈាម និងអំពីព្រៃផ្សៃទាំងនេះស្ថិតនៅដៃរបស់ពួកគេ»។
លោកប្រធានាធិបតី អូបាម៉ា ទទួលបានការសរសើរចំពោះការបញ្ចប់តួនាទីកងទ័ពប្រយុទ្ធសហរដ្ឋអាមេរិកនៅក្នុងប្រទេសអ៊ីរ៉ាក់ និងអាហ្វហ្គានីស្ថាន តាមការសន្យាក្នុងអំឡុងនៃយុទ្ធនាការឃោសនាបោះឆ្នោតប្រធានាធិបតីរបស់លោក។ យ៉ាងហោចណាស់ក៏អ្នកវិភាគម្នាក់ដែរបានសរសើរលោកប្រធានាធិបតីចំពោះការដោះស្រាយស្ថានភាពដ៏ធ្ងន់ធ្ងរដែលលោកបានទទួលពីរដ្ឋបាលរបស់លោកប៊ូស។ លោក Brian Katulis នៃមជ្ឈមណ្ឌល American Progress បាននិយាយថា៖ «ពិភពលោកបានស្ថិតក្នុងភាពចលាចលយ៉ាងខ្លាំង ហើយលោកប្រធានាធិបតីអូបាម៉ាបានទទួលស្ថានភាពនេះដែលយើងបានជាប់ពាក់ព័ន្ធនៅក្នុងប្រទេសអ៊ីរ៉ាក់ និងអាហ្វហ្គានីស្ថានដោយមិនឃើញទីបញ្ចប់នៃសង្គ្រាមទាំងនោះ ហើយលោកបានបញ្ចប់ការទាក់ទិនខាងយោធារបស់សហរដ្ឋអាមេរិក និងវត្តមានដ៏ច្រើនរបស់កងទ័ពសហរដ្ឋអាមេរិក»។
ពួកអ្នកវិភាគផ្សេងទៀតមិនយល់ស្របដោយនិយាយថា លោកអូបាម៉ាកំពុងបន្សល់ទុកឲ្យពិភពលោកមានសន្តិសុខតិចជាងមុន។ លោក James Carafanoនៃមូលនិធិ Heritage និយាយថា៖ «ខ្ញុំគិតថា ពិតប្រាកដណាស់ថា មានការព្រួយកង្វល់អំពីការដកកងទ័ពអាមេរិកចេញពីពិភពលោក អាមេរិកាំងហាក់ដូចជាគ្មានការចាប់អារម្មណ៍ គ្មានការផ្តោតការយកចិត្តទុកដាក់ ការតាំងចិត្ត និងការពាក់ព័ន្ធ។ ខ្ញុំគិតថា នេះជាការពិត។ ក៏ប៉ុន្តែ ខ្ញុំមើលឃើញបញ្ហាជាច្រើននៅតំបន់មជ្ឈឹមបូព៌ា ខ្ញុំឮបញ្ហានេះមកពួកអឺរ៉ុប។ ខ្ញុំឃើញបញ្ហានេះនៅក្នុងតំបន់អាស៊ីដែរ»។
ប្រធានាធិបតីអូបាម៉ា និងប្រធានាធិបតីជាប់ឆ្នោត ត្រាំ បានប៉ះទង្គិចគ្នារួចទៅហើយលើបញ្ហាគោលនយោបាយការបរទេសមួយចំនួន រួមមានការជ្រៀតជ្រែករបស់រុស្ស៊ីនៅក្នុងការបោះឆ្នោតប្រធានាធិបតីសហរដ្ឋអាមេរិក កិច្ចព្រមព្រៀងនុយក្លេអ៊ែររបស់ប្រទេសអ៊ីរ៉ង់ តើដោះស្រាយជាមួយចិនយ៉ាងដូចម្តេចហើយនិងថាតើបិទមជ្ឈមណ្ឌលឃុំឃាំងរបស់សហរដ្ឋអាមេរិកនៅច្រកសមុទ្រ Guantanamo ដែរឬទេ។
លោកប្រធានាធិបតីអូបាម៉ា បានប្រាប់អ្នកយកព័ត៌មានថា លោកមានពាក្យណែនាំនេះសម្រាប់អ្នកស្នងតំណែងរបស់លោក។ លោកប្រធានាធិបតី អូបាម៉ា មានប្រសាសន៍ថា៖ «អ្វីដែលខ្ញុំបានផ្តល់ឱវាទដល់ប្រធានាធិបតីជាប់ឆ្នោតគឺថា ចំពោះការអនុវត្តគោលនយោបាយការបរទេស លោក ត្រូវធ្វើឲ្យប្រាកដថា លោក ធ្វើវាជាប្រព័ន្ធ និងការគិតទុកជាមុន។ លោកគួរឲ្យក្រុមរបស់លោកបានទទួលការពន្យល់ពីអ្វីដែលបានកើតឡើងកាលពីអតីតកាលហើយ និងភាពគ្រោះថ្នាក់ដ៏ខ្លាំង អាចកើតមានឡើង ជាច្រើនឆ្នាំ»។
ក៏ប៉ុន្តែ លោកត្រាំ ហាក់ដូចជាធ្វើទៅតាមមាគ៌ារបស់លោកនៅក្នុងជំនួបមុនដំបូងជា មួយពួកមេដឹកនាំពិភពលោក មុនពេលក្លាយជាអគ្គមេបញ្ជាការនៅថ្ងៃទី២០ ខែមករា៕
ប្រែសម្រួលដោយ ជឹង ប៉ូជីន
