ប្រធានាធិបតីអាមេរិក លោក ដូណាល់ ត្រាំ និយាយថា៖ «លោកនឹងមិនសប្បាយចិត្តនោះទេ» ប្រសិនបើកូរ៉េខាងជើងធ្វើការសាកល្បងនុយក្លេអ៊ែរមួយទៀត ដែលនោះនឹងក្លាយជាការធ្វើតេស្តសាកល្បងលើកទី៦។
លោក ត្រាំ បាននិយាយទៅកាន់លោកប្រធានាធិបតីចិន ស៊ី ជីនពីង នៅក្នុងបទសម្ភាសន៍មួយដែលបានផ្សាយកាលពីថ្ងៃអាទិត្យលើកញ្ចក់ទូរទស្សន៍ CBS ក្នុងកម្មវិធី Face the Nation ថា «ខ្ញុំអាចប្រាប់ដល់អ្នកដែរថា ខ្ញុំមិនជឿថាប្រធានាធិបតីចិន ដែលជាបុរសម្នាក់ដ៏គួរឲ្យគោរពនឹងសប្បាយចិត្តនោះទេ»។
នៅពេលសួរថា ប្រសិនបើលោកមិនសប្បាយចិត្តជាមួយនឹងការធ្វើតេស្តនុយក្លេអ៊ែរម្តងទៀតរបស់រដ្ឋាភិបាលក្រុងព្យុងយ៉ាង មានន័យថាលោកនឹងចាត់វិធានការយោធាទៅលើរបបមេដឹកនាំកូរ៉េខាងជើង លោក គីម ជុងអ៊ុន ឬយ៉ាងណា លោក ត្រាំ បានឆ្លើយថា «ខ្ញុំមិនដឹងនោះទេ។ ចាំមើលសិន។ វាគឺជាការលេងអុក។ ខ្ញុំមិនចង់ឲ្យគេដឹងថាខ្ញុំកំពុងគិតអ្វីនោះទេ»។
កូរ៉េខាងជើងដែលកំពុងតែព្យាយាមផលិតគ្រាប់មីស៊ីលរយៈចម្ងាយឆ្ងាយដែលមានសមត្ថភាពអាចបាញ់ដល់សហរដ្ឋអាមេរិកដែលមានចម្ងាយប្រមាណ៩០០០គីឡូម៉ែត្រ បានធ្វើតេស្តនុយក្លេអ៊ែរថ្មីមួយទៀតកាលពីថ្ងៃសៅរ៍ ប៉ុន្តែកូរ៉េខាងត្បូងនិយាយថា ការធ្វើតេស្តនោះបានបរាជ័យម្តងទៀត។
នៅក្នុងប្រអប់បញ្ចេញមតិមួយលើបណ្តាញសង្គម Twitter លោក ត្រាំ លោកបាននិយាយថា ការធ្វើតេស្តនេះ«មិនគោរពទៅតាមឆន្ទៈរបស់ចិននិងប្រធានាធិបតីរបស់ចិននោះទេ។ មិនល្អទេ!»។
ប៉ុន្តែនៅក្នុងបទសម្ភាសន៍លើកញ្ចក់ទូរទស្សន៍ CBS លោក ត្រាំ បាននិយាយថា កូរ៉េខាងជើងនៅទីបំផុត«នឹងមានប្រព័ន្ធបាញ់គ្រាប់មីស៊ីលមួយដែលល្អជាងនេះ»៕
