ប្រធានាធិបតីអាមេរិក លោក ដូណាល់ ត្រាំ បានចុះហត្ថលេខាលើបទបញ្ជាប្រធានាធិបតីថ្មីមួយកាលពីថ្ងៃចន្ទ ដែលហាមឃាត់មិនឲ្យអ្នកដំណើរមកពីប្រទេសចំនួន៦ចូលមកកាន់សហរដ្ឋអាមេរិកក្នុងរយៈពេល ៣ ខែ ហើយហាមឃាត់ជនភៀសខ្លួនទាំងអស់រយៈពេល៤ខែ។
បទបញ្ជាប្រធានាធិបតីថ្មីនេះត្រូវបានចុះហត្ថលេខា ក្រោយពីចៅក្រមសាលាឧទ្ធរណ៍សហព័ន្ធបានហាមឃាត់មិនឲ្យអនុវត្តបទបញ្ជាប្រធានាធិបតីស្រដៀងគ្នានេះកាលពីខែមុន។
លោក Rex Tillerson រដ្ឋមន្ត្រីក្រសួងការបរទេសអាមេរិកបានមានប្រសាសន៍នៅក្នុងសន្និសីទសារព័ត៌មានមួយដែលប្រកាសអំពីការហាមឃាត់ថ្មីនេះថា៖ «បទបញ្ជាប្រធានាធិបតីថ្មីនេះគឺជាវិធានការដ៏សំខាន់មួយសម្រាប់ពង្រឹងសន្តិសុខប្រទេសជាតិរបស់យើង។ វាគឺជាភារកិច្ចដ៏មធ្យ័តរបស់លោកប្រធានាធិបតីក្នុងការការពារប្រជាពលរដ្ឋអាមេរិកាំង»។
ការបង្ហាញនូវវិធានការសន្តិសុខថ្មីនេះគឺដោយសារតែការទទួលស្គាល់របស់រដ្ឋបាលលោក ត្រាំ ដែលថា បទបញ្ជាប្រធានាធិបតីដែលហាមឃាត់ការធ្វើដំណើរកាលពីមុន ដែលត្រូវបានអនុម័តកាលពីថ្ងៃ២៧ ខែមករា គឺនៅមានចន្លោះខ្វះខាត។ ប៉ុន្តែគេនៅមិនទាន់ដឹងនៅឡើយទេថា បទបញ្ជាប្រធានាធិបតីថ្មីនេះនឹងធ្វើឲ្យអ្នករិះគន់ពេញចិត្តឬយ៉ាងណា ដោយសារតែពួកគេនៅតែយល់ឃើញថា វិធានការនេះគឺនៅតែជាការហាមឃាត់ចំពោះអ្នកកាន់សាសនាឥស្លាម។
នៅក្នុងកិច្ចខិតខំប្រឹងប្រែងដើម្បីធានាថា ការបង្ហាញបទបញ្ជាថ្មីនេះអាចប្រព្រឹត្តទៅបានដោយរលូននិងមានការការពារពីការពិនិត្យផ្លូវច្បាប់ បទបញ្ជាប្រធានាធិបតីថ្មីនេះខុសពីបទបញ្ជាចាស់ទៅលើទិដ្ឋភាពសំខាន់ៗមួយចំនួន។
ក្នុងចំណោមការផ្លាស់ប្ដូរដ៏គួរឲ្យកត់សម្គាល់បំផុតមួយចំនួនគឺមានការដកចេញប្រជាពលរដ្ឋអ៊ីរ៉ាក់ពីបញ្ជីឈ្មោះប្រទេសដែលហាមឃាត់មិនឲ្យធ្វើដំណើរចូលមកកាន់អាមេរិក។ បទបញ្ជាប្រធានាធិបតីថ្មីហាមឃាត់ប្រជាពលរដ្ឋមកពីប្រទេសអ៊ីរ៉ង់ លីប៊ី សូម៉ាលី ស៊ូដង់ ស៊ីរី និងយេមែន។
បទបញ្ជាថ្មីនេះនឹងមានប្រសិទ្ធភាពនៅថ្ងៃទី១៦ ខែមិនា។ បទបញ្ជានេះនឹងមិនប៉ះពាល់ដល់អ្នកមានសិទ្ធិរស់នៅអចិន្ត្រៃយ៍ ឬអ្នកដំណើរដែលមានទិដ្ឋាការនៅមានសុពលភាពចាប់ពីថ្ងៃទី២៧ ខែមករាឆ្នាំ២០១៧មកនោះទេ៕
