លោក Donald Trump បេក្ខជនប្រធានាធិបតីស.រ.អា.ខាងគណបក្សសាធារណរដ្ឋមានការយឺតយ៉ាវក្នុងការគាំទ្រពួកសាធារណរដ្ឋជាន់ខ្ពស់សម្រាប់តំណែងខាងនយោបាយ នៅក្រោយការស្ទង់មតិក្រុមអ្នកបោះឆ្នោតអាមេរិកាំងក្នុងសប្តាហ៍នេះបានបង្ហាញថា លោកស្ថិតនៅពីក្រោយលោកស្រី Hillary Clinton បេក្ខជនប្រធានាធិបតីស.រ.អា.ខាងគណបក្សប្រជាធិបតេយ្យ។
ការស្ទង់មតីថ្មីៗបំផុតដែលបានចេញផ្សាយកាលពីយប់ថ្ងៃសុក្របានបង្ហាញថាការនាំមុខរបស់លោកស្រី Clinton ធ្លាក់មកនៅត្រឹមតិចជាង៣ភាគរយដោយចុះពីចំនួន៨ភាគរយដែលការស្ទង់មតិដដែលនេះបានបង្ហាញកាលពីថ្ងៃចន្ទសប្តាហ៍មុន។ ក៏ប៉ុន្តែទោះជាយ៉ាងណាក៏ដោយក៏ការស្ទង់មតិឯទៀតៗកាលពីប៉ុន្មានថ្ងៃមុននេះបានបង្ហាញថា លោកស្រី Clinton នាំមុខបេក្ខជនប្រធានាធិបតីខាងគណបក្សសាធារណរដ្ឋ៤៨ភាគរយទល់នឹង៣៣ភាគរយដែលនាំឱ្យពួកអ្នកស្ទង់មតិខ្លះនិយាយថា យុទ្ធនាការឃោសនាបោះឆ្នោតរបស់លោក Trump ហាក់ដូចជាមានហានិភ័យ។
កាលពីថ្ងៃសុក្រ លោក Trump បានគាំទ្រការជាប់ឆ្នោតជាថ្មីរបស់លោក Paul Ryan ប្រធានសភាតំណាងរាស្ត្រអាមេរិកាំង និងលោក John McCain ព្រមទាំងលោកស្រី Kelly Ayotte សមាជិកព្រឹទ្ធសភាស.រ.អា.។ ការគាំទ្រទាំងនេះមានឡើងតែប៉ុន្មានថ្ងៃក្រោយពីលោក Trump បាននិយាយថា លោក «មិនទាន់ប្រុងប្រៀប»គាំទ្រលោក Ryan ដែលជាអ្នកសាធារណរដ្ឋជាប់ឆ្នោតជាន់ខ្ពស់ម្នាក់នៅឡើយទេ។
ចាប់តាំងពីការប្រជុំមហាសន្និបាតជាតិនៃគណបក្សសាធារណរដ្ឋមក គេយល់ឃើញថា ភាពតានតឹងរបស់លោក Trump ជាមួយពួកមេដឹកនាំជាន់ខ្ពស់នៃគណបក្សសាធារណរដ្ឋរបស់លោក និងជម្លោះរបស់លោកដែលមានតទៅទៀតជាមួយឪពុកម្តាយនៃទាហានអាមេរិកាំងកាន់សាសនាឥស្លាមម្នាក់ដែលបានស្លាប់ក្នុងសមរភូមិ បានធ្វើឱ្យខូចខាតដល់ការគាំទ្រលោកពីសំណាក់សាធារណជនអាមេរិកាំង។
កាលពីថ្ងៃសៅរ៍លោក Trump បានផ្តោតការយកចិត្តទុកដាក់របស់លោកទៅកាន់លោកស្រី Hillary Clinton ដោយលោកបានបរិហាររិះគន់លោកស្រីអំពីការប្រើប្រាស់អ៊ីម៉ែលឯកជនរបស់លោកស្រីដែលលោកស្រីបានប្រើប្រាស់នៅពេលលោកស្រីកាន់តំណែងជារដ្ឋមន្ត្រីការបរទេសស.រ.អា.ដែលត្រូវបានយកមកស៊ើបអង្កេតមួយដោយការិយាល័យ FBI៕
