ភ្ជាប់​ទៅ​គេហទំព័រ​ទាក់ទង

ព័ត៌មាន​​ថ្មី

រូបចម្លាក់​បុរាណខ្មែរ​ដែល​ត្រូវចោរលួច​បាន​ទៅដល់​មាតុភូមិ​អង្គរ​វិញ​ហើយ


រូបចម្លាក់​បុរាណខ្មែរ​ដែល​បាន​ដាក់តាំងនៅសារមន្ទីរ​សីល្បៈ​ Metropolitan Museum​ of Art នៅ​ទីក្រុង​ញូយ៉ក​មុន​បញ្ជូន​ទៅដល់​មាតុភូមិ​អង្គរ​វិញ។
រូបចម្លាក់​បុរាណខ្មែរ​ដែល​បាន​ដាក់តាំងនៅសារមន្ទីរ​សីល្បៈ​ Metropolitan Museum​ of Art នៅ​ទីក្រុង​ញូយ៉ក​មុន​បញ្ជូន​ទៅដល់​មាតុភូមិ​អង្គរ​វិញ។
រូបចម្លាក់ខ្មែរ​នា​សតវត្សរ៍​ទី១០​ចំនួន​ពីរ​បាន​ទៅ​ដល់មាតុភូមិ​អង្គរ​វិញ​ហើយ​ កាល​ពី​ថ្ងៃអង្គារ​ តាម​ការ​សន្យាសង​រូប​ចម្លាក់​ចោរលួច​ដែល​ជា​ករណី​ដ៏​ល្បីល្បាញ។​

រូប​ចម្លាក់​ទាំងពីរ​នេះ​ត្រូវគេ​ដាក់តាំង​នៅ​សារមន្ទីរ​សីល្បៈ​ Metropolitan Museum​ of Art នៅ​ទីក្រុង​ញូយ៉ក​ជិត២​ទសវត្សរ៍។​ ស្ថាប័ន​វប្បធម៌​ដ៏ល្បី​នៅ​ស.រ.អា.​នេះ​បាន​ស្ម័គ្រចិត្ត​សង​រូប​ចម្លាក់​មួយ​គូ​នេះ​ ដែល​គេ​មើល​ឃើញ​ថា ​ធ្វើ​ជា​គំរូ​នៃ​ការ​អភិរក្ស​វត្ថុ​សិល្បៈនៅ​កន្លែង​ដើម​ ដែល​ត្រូវ​គេ​យក​ចេញ​ដោយ​មិន​មាន​មូលហេតុ​ច្បាស់លាស់។​
ការ​សង​នេះ​ធ្វើឡើង​ នៅ​ពេល​រដ្ឋាភិបាល​ខ្មែរ​សុំឲ្យ​សារមន្ទីរ​ផ្សេងទៀត​ប្រគល់​រូប​ចម្លាក់​ខ្មែរ​ទៅ​វិញ។​

លោក​នាយក​រដ្ឋមន្ត្រី​ហ៊ុន សែន​ធ្លាប់​បាន​ថ្លែង​អំណរ​គុណ​រដ្ឋាភិបាល​ស.រ.អា.​ចំពោះ​ការ​ប្រគល់​រូប​ចម្លាក់​ទាំង​ពីរ​នេះ។​

មន្ត្រី​រដ្ឋាភិបាល​ខ្មែរ ​និង​ព្រះសង្ឃ​បាន​ធ្វើពិធី​ទទួល​រូប​ចម្លាក់​ដ៏​ចំណាស់​នេះ​នៅ​អាកាស​យានដ្ឋាន​អន្តរជាតិ​ភ្នំពេញ។​

លោក​ចាន់ តានី ​រដ្ឋលេខាធិការ​ទីស្តី​ការ​គណៈរដ្ឋមន្រ្តី​ថ្លែង​ក្នុង​ពិធី​នេះ​ថា៖ «ការ​ប្រគល់​រូប​ចម្លាក់​នេះ​សំខាន់​ណាស់​សម្រាប់​កម្ពុជា ​សម្រាប់​ខ្មែរ​ទាំងអស់។ ​យើង​ទទួល​បាន​កេរ​តំណែល​បុព្វ​បុរស​របស់​យើង​ ដូច្នេះ​ យើង​គួរ​មាន​មោទនភាព»។​
ទាញ​យក​ពី​តំណភ្ជាប់​ដើម

រូប​ចម្លាក់​នេះ​ជា​រចនាបទ​ប្រាសាទ​កោះកេរ ​នៅ​ខេត្ត​សៀមរាប​ ដែល​សម្បូរ​ប្រាសាទ។​មន្ត្រី​នានា​និយាយ​ថា ​រូប​ចម្លាក់​នេះ​ត្រូវ​គេ​លួច​នៅ​ទសវត្សរ៍​១៩៧០។​ មន្ត្រី​សារមន្ទីរស.រ.អា.បាន​ឲ្យដឹង​ថា ​ខ្លួន​ទទួល​បាន​រូប​ចម្លាក់​នេះ​រវាង​ឆ្នាំ​១៩៨៧ ​និង​១៩៩២។​

លោក​ Maxwell Hearn​ ជា​ប្រធាន​ផ្នែក​សិល្បៈ​អាស៊ី​នៅ​សារមន្ទីរ ​ Metropolitan Museum​ of Art។ លោកនិយាយថា៖​ «យើង​មាន​កិត្តិយស​បាន​ចូលរួម​ក្នុង​ពិធីសង​រូប​ចម្លាក់​ដ៏​អស្ចារ្យ​នេះ​ឲ្យ​កម្ពុជា​វិញ»។​

សារមន្ទីរ​នេះ​បាន​ប្រកាស​កាលពី​ខែ​ឧសភា​ថា​ ខ្លួន​នឹង​ប្រគល់​រូប​ចម្លាក់​នេះ​ឲ្យ​កម្ពុជា​វិញ​ ក្រោយ​ពី​អ្នក​ស្រាវជ្រាវ​រក​ឃើញ​ភស្តុតាង​ថា​ រូប​ចម្លាក់​បុរាណ​ទាំង​នេះ​ត្រូវ​គេ​នាំ​ចេញ​ខុស​ច្បាប់។​

ច្បាប់​កម្ពុជា​នៅ​ឆ្នាំ​១៩៩៣​ហាមប្រាម​ការ​យក​សម្បត្តិ​វប្បធម៌​ចេញ​ពីកម្ពុជា​ដោយ​គ្មាន​ការ​យល់ព្រម​ពី​រដ្ឋាភិបាល។​ ដូច្នេះ​រូបចម្លាក់​នាំចេញ​ពីកម្ពុជា​ក្រោយ​កាល​បរិច្ឆេទ​នេះ​គឺ​ត្រូវ​ប្រគល់​ឲ្យ​កម្ពុជា​វិញ។​ មុន​មាន​ច្បាប់​ឆ្នាំ​១៩៩​៣​នេះ ​ក៏មាន​កិច្ច​ព្រមព្រៀង​តម្រូវ​ឲ្យ​សង​វត្ថុ​សិល្បៈ ​ដែល​ទទួល​បាន​ខុស​ច្បាប់​ ហើយ​ដែល​នាំ​ចេញ​ដោយ​គ្មាន​មូលហេតុ ​និង​ឯកសារច្បាស់លាស់​ ក្រោយ​ឆ្នាំ​១៩៧០​ ជា​ឆ្នាំ​ដែល​អ.ស.ប.​ធ្វើកិច្ច​ព្រមព្រៀង​អំពី​វប្បធម៌​ដើម្បីទប់ស្កាត់​ការ​ជួញ​ដូរ​វត្ថុ​បុរាណ។​

លោក​ចាន់ តានី​ថ្លែង​ថា​ ជា​ដំបូង​រូប​ចម្លាក់​នេះ​នឹង​ត្រូវ​ដាក់តាំង​នៅ​ទីស្តីការ​គណៈ​រដ្ឋមន្ត្រី​ ​ពេល​មាន​កិច្ច​ប្រជុំ​ជា​អន្តរជាតិ​របស់​គណៈកម្មាធិការ​បេតិ​កភណ្ឌ​ពិភព​លោក​របស់​ទីភ្នាក់ងារ​វប្បធម៌​អ.ស.ប.​នៅ​ខែ​នេះ។​

ក្រោយ​មក​ រូប​ចម្លាក់​ទាំង​នេះ​នឹង​ត្រូវយក​ទៅ​រក្សា​ទុក​នៅ​សារមន្ទីរ​ជាតិ​នៅ​ភ្នំពេញ។​
កន្លង​មក​ដោយសារ​សង្គ្រាម​ ដែល​បង្ក​អសន្តិសុខ​សង្គម ​និង​នយោបាយ​ អំពើ​ចោរកម្ម​លួច​វត្ថុ​បុរាណ​ខ្មែរ​បាន​រាល​ដាល​ខ្លាំង​ពី​ទសវត្សរ៍​១៩៧០​ដល់​១៩៩០។​ វត្ថុបុរាណខ្មែរ​ជា​ច្រើន​ត្រូវ​លួច​ឆ្លង​កាត់​ប្រទេស​ថៃ៕
XS
SM
MD
LG