ប្រទេសកម្ពុជារៀបចំព្រះរាជពិធីបុណ្យខួបឡើងគ្រងរាជ្យសម្បត្តិ១០ឆ្នាំ របស់ព្រះមហាក្សត្រខ្មែរសម្តេចព្រះបរមនាថ នរោត្តម សីហមុនី នៅព្រឹកថ្ងៃពុធនេះ។ ក្រុមអ្នកវិភាគខ្លះអះអាងថា ថ្វីដ្បិតតែព្រះអង្គបានបំពេញព្រះរាជតួនាទីជាសំខាន់យ៉ាងច្រើន ដើម្បីឲ្យមានការទាក់ទាញក្រុមអ្នកនយោបាយនិងប្រជាពលរដ្ឋខ្លះមែន តែនៅមិនទាន់មានប្រជាប្រិយភាពដូចជាព្រះរាជបិតារបស់ព្រះអង្គនៅឡើយទេក្នុងចំណោមប្រជារាស្ត្រទូទៅរបស់ព្រះអង្គនោះ។
ក្នុងពេលដែលប្រទេសកម្ពុជាប្រារព្ធខួប១០ឆ្នាំនៃការឡើងគ្រងរាជ្យនៅព្រឹកថ្ងៃពុធ ក្រុមអ្នកវិភាគខ្លះនិងអ្នកនយោបាយមួយចំនួនបានកត់សម្គាល់ពីស្នាព្រះហស្ថរបស់ព្រះមហាក្សត្រខ្មែរសម្តេចព្រះបរមនាថនរោត្ត សីហមុនី បន្ទាប់ពីព្រះអង្គបានឡើងគ្រងរាជ្យបន្តពីព្រះរាជបិតាជាទីគោរពរបស់ព្រះអង្គ កាលពីថ្ងៃទី២៩ ខែតុលាឆ្នាំ២០០៤។
ព្រះរាជតួនាទីដែលគេបានរៀបរាប់ទាំងនោះត្រូវគេចាត់ទុកថា ជាព្រះរាជតួនាទី សំខាន់សម្រាប់ជាតិ ទាំងវិស័យការទូត ព្រះរាជកិច្ចជាមួយប្រជារាស្ត្រនៅតាម ទីជនបទ បន្តរក្សាសន្តិភាព និងស្ថិរភាពសម្រាប់ប្រទេសកម្ពុជា ហើយនឹងការ រក្សាអព្យាក្រិត្យភាពរវាងគណបក្សនយោបាយជាដើម ទោះជាព្រះអង្គមិនទាន់បានបំពេញព្រះរាជកិច្ចធំធេងជាប្រវត្តិសាស្ត្រដូចព្រះបិតារបស់ព្រះអង្គនៅឡើយក្តី។
លោកបណ្ឌិតសុខ ទូច សាកលវិទ្យាធិការនៃសាកលវិទ្យាល័យខេមរៈ បានអះ អាងថា៖
«យើងឃើញថា ព្រះអង្គលោកគង់នៅឆ្ងាយពីឆាកនយោបាយតាមរដ្ឋធម្មនុញ្ញ ដែលចែងថា ព្រះអង្គអត់ធ្វើនយោបាយ តែព្រះអង្គដើរតួនាទីសម្របសម្រួល នយោបាយគឺព្រះអង្គជាម្លប់ដល់អ្នកនយោបាយ ហើយព្រះអង្គនៅអព្យាក្រិត្យ ភាព»។
លោកបានបន្តថា ប្រទេសកម្ពុជាជាប្រទេសកាន់របបរាជានិយមអាស្រ័យធម្មនុញដែលព្រះមហាក្សត្រធ្វើអ្វីៗទៅតាមរដ្ឋធម្មនុញ្ញ ដែលមានចែងពីព្រះរាជកិច្ច និងតួនាទីរបស់ព្រះអង្គ។
លោកកឹម សុខា អនុប្រធានសភា និងជាអនុប្រធានគណបក្សសង្គ្រោះជាតិ បាន អះអាងថា សមាជិកសភា១២៣រូបចូលរួមក្នុងព្រះរាជពិធីបុណ្យរឭកខួបឡើងគ្រងរាជ្យ១០ឆ្នាំ ដូចស្ថាប័នរដ្ឋាភិបាលផ្សេងៗទៀតដែរ នៅព្រឹកនេះ ក្រោយ ពីបានចូលរួមថ្វាយព្រះពរ និងអបអរសាទរក្នុងព្រះបរមរាជ្យវាំងកាលពីថ្ងៃអង្គារ ទី២៨ ខែតុលា។
«ស្ថាប័ននានាគេតែងតែធ្វើលិខិតថ្វាយព្រះពរ ហើយសុំឲ្យព្រះអង្គលោកបន្ត ដឹកនាំ ឬក៏គ្រប់គ្រងរាជបល្ល័ងឲ្យបានល្អជាម្លប់ត្រជាក់ដល់ប្រទេសជាតិ និងកូនចៅប្រជារាស្ត្រខ្មែរតទៅមុខទៀត»។
លោកបណ្ឌិត ពុទ្ធា ហង្ស អ្នកឃ្លាំមើលស្ថានការណ៍នយោបាយម្នាក់មកពីអង្គការឯករាជ្យសម្រាប់ឃ្លាំមើលការបោះឆ្នោត ឈ្មោះនិចហ្វិក បានអះអាងថា ព្រះអង្គគឺជាម្លប់ និងជាតំណាងក្សត្រនៃព្រះរាជាណាចក្រកម្ពុជា។
«រយៈពេល១០ឆ្នាំនេះគឺព្រះមហាក្សត្រកម្ពុជាបានបំពេញព្រះរាជតួនាទីដែល ពលរដ្ឋទូទៅអាចមើលឃើញបាននោះគឺព្រះអង្គគឺជាតំណាង ជាព្រះមហាក្សត្រ ស្របទៅនឹងបាវចនា ជាតិ សាសនា ព្រះមហាក្សត្រ»។
លោកបានបន្តថា៖
«ខ្ញុំឃើញព្រះអង្គជាព្រះមហាក្សត្រខ្មែរចូលរួមក្នុងពិធីប្រពៃណី ឬក៏ពិធីសាសនា របស់ជាតិ។ ហើយទី២ ក្នុងនាមព្រះមហាក្សត្រ ព្រះអង្គបានយាងចុះទៅសួរសុខ ទុក្ខប្រជាពលរដ្ឋដោយអន្លើរៗ។ ហើយទី៣ លោកចេញព្រះភ័ក្រ្តទៅចូលរួម ដោយបើកសភា ឬក៏ចូលរួមក្នុងកិច្ចការនយោបាយដោយគណបក្សនយោបាយ ឬ រដ្ឋាភិបាល»។
ទោះជាយ៉ាងណាក៏ដោយ លោកសុខ ទូចបានអះអាងថា ព្រះរាជសកម្មភាព របស់ព្រះមហាក្សត្រហាក់ដូចជាមិនសូវមានសកម្មភាពដូចជាព្រះរាជបិតារបស់ព្រះអង្គ និងដូចជាក្សត្រប្រទេសថៃ ជាប្រទេសជិតខាងកម្ពុជាទេ។
«ប៉ុន្តែតាមដែលធ្វើ សកម្មភាពព្រះអង្គមិនសូវជាមានថវិកាផ្ទាល់ខ្លួនព្រះអង្គទេ ខុសពីស្តេចថៃ សេ្តចដែលគ្រងរាជ្យ ហើយមានអំណាចហើយមានលុយ មានទាំងជំនួញផ្ទាល់ខ្លួនទៀត។ តែព្រះមហាក្សត្រខ្មែរ ព្រះអង្គអត់ទេ ព្រះអង្គប្រហែលជារង់ចាំការឧបត្ថម្ភពីរាជរដ្ឋាភិបាល»។
លោកថ្លែងយ៉ាងដូច្នេះដោយយោងទៅលើប្រជាប្រិយភាព ឥទ្ធិពលស្តេចថៃ និង ជាពិសេសគឺឥទ្ធិពលស្នាព្រះហស្ថសម្តេចឳដែលអ្នកនយោបាយ ប្រជាពលរដ្ឋ ជាទូទៅបានចងចាំគឺការដែលព្រះអង្គបានទាមទារឯករាជ្យពីបារាំង ការពារ បូរណភាពទឹកដី ទាមទារប្រាសាទព្រះវិហាររបស់ខ្មែរពីប្រទេសថៃ និងព្រះរាជ តួនាទីបង្រួបប្រង្រួម ផ្សះផ្សារជាតិជាដើម។
ទោះជាយ៉ាងណាក៏ដោយ លោកញ៉ឹក ប៊ុនឆៃ អគ្គលេខាធិការគណបក្សហ៊្វុនស៊ីនប៉ិចដែលជាគណបក្សបង្កើតដោយស្នាព្រះហស្ថសម្តេចឳព្រះបាទ សម្តេចព្រះនរោត្តមសីហនុ បានអះអាងថា ព្រះមហាក្សត្រខ្មែរបច្ចុប្បន្នក៏បានបំពេញព្រះរាជកិច្ចច្រើនក្នុងរយៈពេល១០ឆ្នាំកន្លងមក ទាំងការទូត និងព្រះរាជកិច្ចជួយដល់ប្រជារាស្ត្រក្រីក្រនៅតាមជនបទនិងបន្តតាមព្រះរាជកិច្ចរបស់ព្រះរាជបិតាព្រះអង្គដែរ ទាក់ទងនឹងសន្តិភាព។
«ហើយសំខាន់មួយទៀតគឺការធ្វើឲ្យសន្តិភាព ស្ថិរភាពដែលមានពីមុនមកនោះ ចេះតែបន្តទៅមុខ គឺព្រះអង្គបានធ្វើកិច្ចការច្រើនក្នុងរយៈពេល១០ឆ្នាំនេះ»។
ក្រុមអ្នកវិភាគបានអះអាងថា ពួកគេចង់ឃើញព្រះមហាក្សត្របន្តគង់ជាអព្យាក្រិត្យ និងបង្កើនព្រះរាជកិច្ចជួយដល់ប្រជារាស្ត្ររបស់ព្រះអង្គថែមទៀតដែលកំពុងជួបប្រទះបញ្ហាជីវភាពជាប្រចាំនៅទូទាំងព្រះរាជាណាចក្រព្រះអង្គ៕
