អ្នកសេដ្ឋកិច្ចល្បីល្បាញរាប់រយនាក់ រួមបញ្ចូលទាំងម្ចាស់ពានរង្វាន់ណូបែលចំនួន៨នាក់ បានថ្លែងថា បេក្ខជនប្រធានាធិបតីខាងគណបក្សសាធារណរដ្ឋលោក Donald Trump គឺជាជម្រើសប្រធានាធិបតីដ៏គ្រោះថ្នាក់ និងអន្តរាយមួយរូប។ នៅក្នុងលិខិតស្រដៀងគ្នានេះ ដែលចេញផ្សាយនៅក្នុងទស្សនាវដ្តី Wall Street Journal អ្នកសេដ្ឋកិច្ចរាប់រយនាក់ផ្សេងទៀតបានថ្លែងថា លោកស្រី Clinton នឹងបន្តគោលនយោបាយដែលអាចជួយតិចតួចប៉ុណ្ណោះដល់សេដ្ឋកិច្ចដែលកើនតិចតួចស្រាប់របស់អាមេរិក។
លោក Donald Trump អំពាវនាវឲ្យកាត់ពន្ធ និងបទបញ្ជាជាច្រើន ហើយបង្កើនផលិតផលប្រេងនិងរ៉ែដើម្បីជួយដល់ការកើនឡើងនៃសេដ្ឋកិច្ច ដែលលោកបានថ្លែងថាកើនឡើងយឺតយ៉ាវពេកនោះ។
លោកបានថ្លែងថា សេដ្ឋកិច្ចអាមេរិករងគ្រោះដោយសារតែកិច្ចព្រមព្រៀងពាណិជ្ជកម្មអន្តរជាតិដែលធ្វើឲ្យប៉ះពាល់ដល់ការងារឧស្សាហកម្មរាប់លានរបស់ពលរដ្ឋអាមេរិកាំង។ លោក Trump នឹងតម្លើងតម្លៃពន្ធទៅលើទំនិញចិននិងទំនិញរបស់ប្រទេសម៉ិកស៊ិក ហើយស្វែងរកកិច្ចព្រមព្រៀងដែលតឹងរ៉ឹងជាងនេះជាមួយនឹងប្រទេសជាដៃគូ។ លោកបានថ្លែងថា៖ «យើងត្រូវតែធ្វើការចរចាទៅលើកិច្ចព្រមព្រៀងពាណិជ្ជកម្មរបស់យើងឡើងវិញ»។
ប៉ុន្តែក្រុមអ្នកសេដ្ឋកិច្ចបានថ្លែងថា ការធ្វើបែបនេះនឹងធ្វើឲ្យប៉ះពាល់ដល់កំណើនសេដ្ឋកិច្ចរបស់អាមេរិក ពីព្រោះថា ចិន និងម៉ិកស៊ិកនឹងវាយបកដោយការតម្លើងតម្លៃពន្ធខ្ពស់ជាងមុន ដែលធ្វើឲ្យតម្រូវការទៅលើផលិតផលរបស់អាមេរិកនិងការងារដែលពួកគេគាំទ្រមានភាពយឺតយ៉ាវ៕
